Luke 8

Bagyetu babakingenge ne Sesu

1Ve yulu vane, Sesu ayendenge mu mavule ne mu miimbu. Aloonzenge musamu wumunyi wu Bufumu bu Nzambi. Digumi ne babeyi di bayikitsi baandi, babile naandi. 2Gubile ne dikabu dibagyetu babapunzulu manyunyi mamabi ne wubeelusu bambeedu bawu. Yawu bayendenge yiloonge ne Sesu. Bile re Mari mwisi Magedala wupunzulu manyunyi tsaambu mamabi. 3Gubile ne Sane, mugatsi Susa mukyelitsi bivaave bi Irode, ne Susane ne mbili bagyetu basusu babaveegenge manyi mawu muyamune Sesu ne bayikitsi baandi.

Sesu aloonze mu dyaambu di noongu yi muvaritsi

4Batu baburugengu mu mavule mavule, mu yitselabe Sesu. Ve duge piti, Sesu atu noongu re: 5«Gubile mulagitsi wumoosi, ayende mulage bambi gu nuungyandi. Ve mwakenge yandi bambi, tsine tsilage mu tuungu nzile ne tsyo tsitsaru ne tsidoku ne banyonyi. 6Tsimosi tsilage mu mamanyi, tsibeende te tsiyumugu mu dikaambi di maambe. 7Tsisusu tsilage veganegare batseende. Batseende tsipite bivaru mumbare tsibeende dikyesi dimoosi ne bambi. 8Te dine dikabu di bambi dilage ve dinyeengi. Ve beende bivaru, bibangugu ne bibure miluunde. Yivaru gimoosi gibure kame miluunde.» Sesu abekoonde re: «Wotsu wune maru muyulu, akuunzi wuyulu.»

9Bayikitsi ba Sesu batombe yandi divindugulu di noongwene. 10Ayagule yawu re: «Yenu diveegu buyedi buyabe maambu maswegu magu Bufumu bu Nzambi; te gu bamosi, maambu mene maloonzu ne banoongu, mure bakebeminenge gugalabe ne bakeyulungu guganyigugulu.#8.10 Isayi 6.9.

Sesu asupule noongu yi muvaritsi

11Yulwanu divindugulu di noongwene: bambi re maambu ma Nzambi. 12Tuungu nzile yilage bambi tsidoku ne banyonyi, re yibagunu gi batu babakayulu maambu ma Nzambi, te mukolitsi ga amitse, akaburuli mo mu mirime myawu, mure bakerebile ne gitu muyobulu. 13Bambi balage mu mamanyi re yibagunu gi batu babakayulu maambu ma Nzambi ne wusiinge mo ne yinyunge; te bake ga bivaru bine myanzi migakuunze wusunde gu mutambe. Bayi ne gitu mu ma dikyesi, te vekarugi dimaangu, bakalagi. 14Bambi balage gugare batseende re yibagunu gi batu babakayulu maambu ma Nzambi te mirime myawu mike mipitu ne mataase ne busine ne mugaangu maambu ma tsi yi. Re disine miluunde mikaburi yawu misakayeli. 15Bambi balage gu dinyeengi re yibagunu gi batu babagoneyulu maambu ma Nzambi ne murime wumunyi, wusuunde. Bakakyeli mo nubure miluunde mu muginyinyi wawu.

Noongu yi page

16Gusaandi mutu wukabangisi page, nuswege yo gutsi muluumbu, vo gutsi taangi. Te akasunzi yo mu yikobugulu mure batu bootsu babakenyingenenge, bakelabange yiveele. 17Mumbare gusaandi dyaambu di diswele disakeyabunu, gusaandi dyaambu diswegu disakeyulunu. 18Kagu yenu dikuunze yulu maambu mami. Mumbare wotsu wune yivaave agukoondu wuveegu, te wugane gyo aguduumbu nisi gigonetaase yandi re ane gyo.»

Nguyi ne baane ba nguyi ba Sesu

19Wisi wumoosi, nguyi ne baane ba nguyi ba Sesu baruge mudagise yandi, te baserungule wugogule ve mbarandi, mumbare piti yibile yirage. 20Mutu wumoosi amuyambile re: «Ngwagu ne baane ba ngwagu bayi gu kane, bagoneroonde wulabe yu.» 21Te Sesu ayambile gu bootsu bababile vane re: «Maame ne baane ba maame nde babagoneyulu mabigu ma Nzambi ne wugobise mo.»

Sesu asikige mukunge

22Wisi wumoosi, Sesu yane bayikitsi baandi bapeke mu mbuungu. Ayambile yawu re: «Wokanu gu simu yine yi mudibe.» Ne yawu bayende. 23Ve dugenge yawu mbuungu, Sesu alame gyolu. Vane ne vane mukuunge wumunene wuruge ne maambe mabaande wubase mbuungu, bayikitsi balabe re dyaambu di page dikerugile yawu, bayulu wome, mumbare mbuungu yikusugu wunyoonge. 24Bayende ve mbare Sesu, barambuse yandi nubwamugu re: «Muloonzi! Muloonzi! Dikefu!» Sesu arambugu. Ve rambuge yandi, abetile mukuunge. Divuge ne mingibe, byootsu biruumbe. 25Kere vane atombe yawu re: «Gitu gyenu gi nde gunyi?» Balabe wome ne bagibeme bayambilenenge yawu ne yawu re: «A wu munoongu mutu nde nyi wugonebetile divuge ne maambe, ne byo bigonegobise yandi?»

Sesu abeeluse mutu wune manyunyi mamabi

26Sesu ne bayikitsi baandi bapule gu tseengi yi Serase; simu ne simu ne mudibe wu Galilé. 27Ve sunde Sesu ne bayikitsi baandi mu mbuungu, mutu wumoosi gu divule dyene aruge ve wusu Sesu. Mutu wene abile ne mbili manyunyi mamabi. Makyesi mambili mutu wene asebedwaara bidwaari nisi wutsagele gu ndagu, veengu keke gu manyime. 28Ve ruge yandi ve wusu Sesu, asume magonungu ne wubwamugu re: «Yigoneroonde vage me nde tsenyi, Mwaane Nzambi Puungu? Kokolwagu, yiyakilise me.» 29Ve labe Sesu nane arume dinyunyi dibibi muvate mu mutu wene mumbare dyo diyungisenge yandi makyesi mootsu. Re dibaandu atuungungu ne bapaange ne miluunge mi myange. Te apabenge bapaange ne miluunge ne ayenzungu ne dinyunyi didibi mu bakumu. 30Sesu atombe yandi re: «Ndugagu nde nyi?» Ayagule Sesu re: «Dibaadi.» Ayagule nane mumbare mbili manyunyi mamabi manyingene mu yandi. 31Manyunyi mene mabaande wuleende Sesu mure akeresindige yawu gu mbengi yikakilusu manyunyi mamabi.

32Vane vekyegulu digaande di bangulu bayangenge gu yulu mukoongu ne manyunyi maleende Sesu mu siingise yawu mu nyingene gugare bangulu bene. Sesu asiinge. 33Manyunyi mamabi mapule mu mutu wene ne manyingene mu bangulu ne tsyo tsigulumuge mukoongu bambaangu ne tsitondeme gu mudibe ne tsifu. 34Ve labe babakyelenge tsyo dyaambu dyene, barine, tsaangu yi yulunu gu divule ne mu miimbu. 35Batu bayende muyelabe dyaambu divyoge guune. Ve pule yawu ve mbare Sesu, badagise mutu wupusulu manyunyi mamabi matsagele ve wuswandi, adwaare bidwaari ne bagaangu ne wome wu mbili. 36Babalabe maambu mavyoge guune, banyigule batu nave yobulu mutu wubile ne manyunyi mamabi. 37Mbili batu ba museengi wu Serase baleende Sesu mu burugu ve yawu mumbare bagaangu ne wome wu mbili. Sesu ne bayikitsi baandi banakeme mu mbuungu ne bagabugu. 38Mutu wupusulu manyunyi mamabi aroonde keke re Sesu abilingi naandi, te Sesu asesiinge. Ayambile yandi re: 39«Gabugu gu ndagwagu yeyambili mootsu matsevagulu yu ne Nzambi.» Agabugu, ne ayambile mu divule dyotsu, mootsu mavagulu yandi ne Sesu.

Sesu abeeluse mugyetu ne afwangule mwaane Sayiruse

40Ve gabuge Sesu gu yine simu mudibe wu Galilé, piti batu yisaangile yandi mumbare batu bootsu baviingilenge yandi. 41Vane ne vane dibagele dilugu re: Sayiruse atsoombugu. Abile yivuunde gi ndagu disaambulu. Asume makotulu ve wusu Sesu muleende yandi mu nyingene gu ndagwandi, 42mumbare abile ne mwaane wu dikike wu mugyetu wubile ne digumi di bilime ne bilime bibeyi ne wubeele wurage, bebele ne difu. Ve yendenge Sesu gune, abamugungu ne piti. 43Gugare pityene gubile mugyetu wubeelenge muvuve digumi ne bilime bibeyi, agudise busine bwandi bwotsu gu babugitsi, te asebeelusu ne mutu nisi wumoosi. 44Agogule ne ve nzime Sesu ne agaangile dibogu di kapandi, vane ne vane muvuve wandi wukanyi. 45Kere vane Sesu atombe re: «Wumebembulunu nami nde nyi?» Te bootsu barune. Pyere ayambile yandi re: «Muloonzi! Yinde wutseengu ne piti yigonebamige yu.» 46Te Sesu ayagule yandi re: «Guyi mutu wutsebembulunu nami mumbare mayatsi re ngudi yimevate mu me.» 47Ve labe mugyetu re ameyabunu, aruge nuregeme, asume makotulu ve wusu Sesu. Ayambile ve miisu ma batu bootsu disine ditsegaangile yandi Sesu, ne natsebeelugu yandi mu dikyesi dyene. 48Sesu ayambile yandi re: «Gitu gyagu gimebeeluse yu. Yendenge ne polu.»

49Ve yambilenge Sesu, mutu aruge guyambile Sayiruse yivuunde gi ndagu disaambulu re: «Mwaanagu wu mugyetu amafu, yiyabegolu wukingise muloonzi.» 50Te ve yulu Sesu dyo, ayambile Sayiruse re: «Yiyalabe page. Te bile ke ne gitu, mwaanagu agubeelugu.» 51Ve pule Sesu gu ndagu yi Sayiruse, akale batu bootsu munyingene gu yiriini naandi, veengu ke Pyere ne Sa ne Sake, ne tayi ne nguyi mwaane. 52Batu bootsu bagu ndagu balilenge, nukayigene mu mwaane. Sesu ayambile yawu re: «Diyalile, asafu akegyolu.» 53Yawu basevenge Sesu, mumbare bayabenge re mwaane wutsefu. 54Te Sesu agaangile dikake di mwaane nuyambile pepe re: «Mwaane, rambugu!» 55Dinyunyi dyandi digabugu mu yandi, vane ne vane ateleme. Sesu arume bakiinde mu veege yandi kure. 56Nguyi ne tayi mwaane bagibeme mbili ne akale yawu muyambile mutu nisi wumoosi dyaambu ditsevyoge.

Currently Selected:

Luke 8: SNQ

Highlight

Copy