Zouao 8

Amonerre maqqui carriraha maqquiderre ouaha inarrarraricca uima

1Nezape ssono (onini) Rritona quenauiuarri Zeso toqquemoraza pouaza rrauirremorade. 2Uada ssiuarra rrauirrezippanizape Deoza dada toqquimauarri Zeso toqquezimapomaza madirra ecaua-uarranimana narraride. Nauiza Zeso uittariza madirra mari icanabaqquirraride.

3Nauizana zodeodenicca marinarra maridedeni, marinarra parizeoza rrehe quenarrarideni tezerrepa amonerre eccarronemanarraro. Ponipe maqqui carriraha maqquiderre ouaha narrade torreza qqui toquenazapa rroua icanabaqquimanarrari. Nazapa amonerre dama iqueneza Zesoza eccarronemanarraro. Zeso boroniza mari mari nauiuarri inauemana narrarode. 4Nazapa parizeodeni Zesoza uati toquenade: —Mamaride, arrirraro amonerrepe maqqui carriraha maqquiderre ouaha inarraui qqui ineza tiaza eccarronarraro. 5Moizecca marinarrazape: “Amonerre maqquiderre ouaha narrezape zoqquena. Sibaza tiquenaqquimanarri” nade. Naraha tettipe nerrecoma tani? −quenade Zesoza.

6Nama quenarraripa pouadeni bodi: —Zeso uima zori inanezape pouaza uima inassonariniuarrine −quenarrari. Naraha Zesopa tocatteza naza ssiquiza poua zepeza dozo dozo nade. 7Zesopa ssiquiza dozode torraraha parizeodeni denima uati zanapomananarra Zeso totemaza pouadeniza uati tade: —Rrehe, tiquenaqquimanarri. Naraha uimasiri cappirarrarina taide siba idiza iquenacossapona −nade Zeso.

8Nazapa tocattezanipomaza ssiquiza denima dozode torrapomade. 9Naraha Zeso atti mittemanaza bodideni uatozapa maqquiderre rradauidenina taide toqquena, toqquena rriquemana nade. Bazima naco rraui torremaha rricazapa Zeso poua, amonerre poni tazarranira ba narraride. 10Nazapa Zeso totemaza arri amonerre uarraroza uati tade: —Asi couarri rridacca madirra tia ccaccarronadedenipa? Narrarideni orrariapa uimasiri tinanani manaconi tiaza: “Tia onanazoqquena” narra canima-rraraco? −nade Zeso. 11Neraha Zesoza uati tade: —Oua Zozossede, noueraparra −nade. Naraha Zeso poniza uati tapomade: —Rrehe, oua naqui tizoqquerri onerrerani. Nazama ticcanina. Rridapanape maqquiderre ouaha narra terrerana. Uimasiri tinanapoma terrerana −nade Zeso.

Zeso ssiuerrenepa madirra bazimaza auatorizarraro

12Zeso madirra bazima mari icanabaqquipomarrari: —Ouape zama bazimaza ossiuerrene auatorizarraro. Madirra ouaza toquerrenarraripa ossiuerrene carrimanaui. Ossiuerrene carrimanazapa camittehe rriquerreranicca naco carrimanaui. Nazama camittehe rriquerreranicca carrimanazapa uimasiricca ziziniza toquerrena-rrarauitoui −nade Zeso. 13Naraha marinarra parizeoza rrehe quenarrari attideni Zesoza: —Tia motta titauimari tetecomera narraro. Ia motta itauimari ecomerani bica terrerani, inarraro −quenade.

14Naraha Zeso pouadeniza uati tade: —Rrehe, oua motta otauimari ouacomereraha ouattipe parrissa. Ouape oua occarronaniuarri nauato onani. Oua occani onaniuarri naqui nauato onani. Naraha tiadenipe occarronaniuarri ssamoqquiri tiquenani. Oua occani uarri naqui ssamoqquiri tiquenani −nade Zeso. 15—Neraha tiadenipe arrirraro namiza madimanarraridenicca marinarrazara madirracca uima nattomede nauatoqquiri tiquenarraro. Madirrarrine uima bica terrerani tiadeniza auato tezape: “Pocca uima uaidira tani. Icca marinarrassa nerrerani” titiquena neraha ouape nema onerrerani. Madirracca uima nattome onerrerani. 16Neraha oua madirracca uima nattome onaniuarrinepe oua motta nattome onerrerani. Occa Abi oua Cazossede tezerrena madirradenicca uima nanattome ihinanarraro. Nema inarrarope madirracca uimaza: “Uaidira tani” onezape ouattipe parrissa. 17Naraha ticcadeni marinarra dozo nanizape: “Madirra pamaha qqui toquenarrari poccadeni uima narrarossa narraro ecomeremanezape pouadeni attiza parrissa tiquenarri” nade. 18Ouape oua motta otauimari ohouacomera neraha Abi oua Cazossede naco otauimari ehecomera narraro −nade Zeso.

19Naraha Zesoza uati toquenapomade: —Ticca abipa nerrecouarri madirrari? −quenade. Naraha Zesopa pouadeniza uati tapomade: —Ouaza tinoccodeni rriza tani, occa Abiza naqui tinoccodeni rriza tani. Ouaza tinoccodeni rrizera tezape occa Abiza naqui tinoccodeni rrizera tanitouiraha −nade Zeso.

20Narraro uimape Deoza dada toqquimauarricca ziniro uauaza bau cacauittizeri narizaniuarri mari icanabaqquirraride. Nauizapa Zeso dama iquena-rraraccade, pouaza uima torraniuarrinecca uada bacco terreraqqueza.

—Oua occaniniuarri rraui tirraniuarrine tiparriremane-rrerani −narrari

21Naraha Zeso pouadeniza uati tapomade: —Ouape occaninitoui. Occanizape otoui qqui tarizemananitoui. Naraha oua occaniniuarri rraui tirraniuarrinepe tiparriremane-rrerani. Tiadenipe ticcadeni uimasirima tirricanitoui −nade Zeso. 22Naraha zodeodenipa: —Poua nanazoqqueuiuarrineco? Nerrecotouira “Oua occaniniuarri rraui tirraniuarrinepe tiparriremane-rrerani” naua? −quenade.

23Nazapa Zeso pouadeniza uati tade: —Tiadenipe arrirraro namicca tiquerrenani. Naraha ouape arrirraro namicca orrarrerani. Ouape memeuarricca orrani. 24Arri ouatti tiadeniza: “Ticcadeni uimasirima tirricanitoui” onarrarope ouaza parrissa tiquenerrerarraro. Ouape arri uati uati onarraro orrani onarraroza parrissa tiquenerrereza naqui ticcadeni uimasirima tirricarizanitoui, onarraro −nade Zeso.

25Naraha manaco Zesoza uati toquenade: —Tiape nerreco madirra tirrani? −quenade. Naraha Zesopa: —Ouape taide otauimari tiadeniza uati uati onarronarraroa arri rridapana tiadeniza uati uati onarraroparri. 26Nema nezape ticcadeni uaidirehe bazima tiadeniza uati onezape tiadeniza uima ssonarinitouiraha nema onerrerani. Naraha oua cazosserrarina parrissa uati uati tarrari. Pouapa ouaza uati uati taui omittezana arrirraro zamacca madirraza uati uati ohoqquima narraro −nade Zeso.

27Naraha pouadenipa Zeso pocca Abi Deocca uima uati uati tarraripa mittemanauissa tarrararrari. 28Narrarorrine Zeso denima uati tapomarraride: —Ouape Madirra Bedi orrarraroa niza aua porimacossaniza oua acca ticanamacosse-maneza que onanitoui. Nazana nauatoqquiri tiquenanitoui: Arri uati uati onarraro orrani onarrarope parrissa. Oua mottape oua nacassa onanicca onane-rrerani. Occa Abi oua mari canazana uati uati ohonanarraro. 29Nazama oua Cazossedepa ouaza madiui. Occa Abipa oua motta orraniuarrine oua nebo-rraraui, uarrirriraza Pouaza bica tanicca ohonana nezape −nade.

30Narraria Zeso uati uati tazapa madirra mota uapi taha pouaza parrissa quenarraride.

Ouahadenipa Deocca erredeni toquerrenarrari, ouahadenipa uimasiricca zozosse toquerrenarrari

31Nazapa Zeso zodeodeni mota pouaza parrissa quenarrarideniza uati tade: —Ouattiza dameraqquiri tiquenezape parrissa occa tiquerrenanitoui −nade. 32—Occa tiquerrenezape parrissehera nauatoqquiri tiquenanitoui. Narraro parrissehe nauatoqquiri tiquenezape tiadeni zozossede uaidira tarrariza zozosse tiquerrene-rreranitoui −nade Zeso.

33Naraha manaco Zesoza uati toquenade: —Iape Abarahao potemaui iquerrenarraro. Zozosse iquerrene-rrerehe nema inarronarraro. Naraha nerrecotoui iazara: “Zozosse tiquerrene-rreraniuarrine” tarraro? −quenade. 34Naraha manaco Zeso pouadeniza uati tade: —Parrissehera tiadeniza uati onana: Madirra uimasiri inanezape narraro uimasiricca zozosse torrarrari. 35Madirra zozosse torrarraripa poua zozossedecca zozosse torraraha poua zozossedeza nama zanaporrara taui. Zozosse torrarraripa pina madirra poua pocca erredenissa narraraui. Madirracca erredenipa pocca abiza nama zanaporrari. 36Nazama Deo Bedina tiadeni tappa tabaqquizapa parrissa zozosse tiquerrene-rrerehe timadimananiuarrine onarraro. 37Rrehe, tiadenipe Abarahao potemaui tiquerrenani nauato onani. Naraha ouattiza parrissa tiquenerrerezape oua tinanazoqquemanabote nani. 38Nazama ouape occa Abi ouaza noue inarrarocca uati uati ohonanarraro. Naraha tiadenipe ticcadeni abi uati uati tatarra naui titimittemana narrarora narrarossa titinanemana narraro −nade Zeso.

39Naraha manaco uati toquenade: —Icca abipa Abarahao! −quenade. Naraha Zeso uati tapomade: —Parrissa Abarahao potemaui tiquerrenezape pina Abarahaorrinessa tinanemananitouiraha. 40Deo parrissa oua mari canarraricca tiadeniza uati uati onarraroraha oua tinanazoqquemanabote nani. Abarahaorrinepe uima nema nerrerani. Nouerani! 41Naraha tiadeni naqui pina ticcadeni abirrinessa tinanemanarraro −nade Zeso. Naraha manaco uati toquenarrari: —Abi ouaha icappirani! Icca Abipa Deona orrariui! −quenade.

42Naraha Zeso pouadeniza uati tade: —Rridacca parrissa Deo ticcadeni abi torrazapa ouaza naqui tetideni uanaqquiri nanitouiraha nema tiquenerrerani. Ouape Deouarri occarronarraro arri omadini. Ouape ouara occarrona-rrereraha Abi Deo oua cazosseza occarronarrarode. 43Neraha nerrecotoui ouatti timittemananissa terrerarraro? Occa uimaza nacasseraqquiri tiquenezape arri timittemananissa terrerarraroparri. 44Ticcadeni abipa Deoza uauadide Tocorime-Tamine. Pouaza tiquerrenani. Poua nacassa tauiccaza dameraqquiri tiquenarraroparri. Tocorime-Taminepa irrine auauiuarrineraha nazama touattaporra narrari. Parrissa uati tauiuarrinepa ssamo taui. Pouapa maizehe rrinederra narrari. Narraria maizeheza uati uati nanarra narrariparra. 45Narrarorrine tiadeniza parrissehera uati uati oneraha tiadeni naqui ouaza parrissa tiquenerrerarraroparri. 46Nerrecorrarina uimasiri ocarrini ecomeraniuarrine nauato taui? Noueraui. Ouape parrissehera uati uati onezape ouaza parrissa tiquenaniuarrine bica teraha nerrecotoui ouaza parrissa tiquenerrerarraro? 47Madirra Deocca querrenarraripa Deo Atti mittemanauiuarrine nacasseraqquiri narrariparra. Naraha Deocca tiquerrene-rrerezape arri Deo Atti mittade nacasseraqquiri tiquenarraroparri −nade Zeso.

Cristopa taide madiporrari, Abarahaopa zotode

48Naraha manaco zodeodeni Zesoza uati toquenade: —Tiape samaritano tirrani. Tiaza nacasseraqquiri inani! Rridacca uati inaporrarope parrissa. Tocorime siri ticarrirraro nauatoqquiri inani −quenade Zesoza. 49Naraha Zeso uati tapomade: —Ouape tocorime siri ocappirani. Ouape: “Occa Abipa deni torraui” ohonanarraro. Naraha tiadenipe ouaza: “Zesopa deni torraui” titiquena nerrerani. 50Naraha ouape madirra ouaza: “Deni tirrani” quenauiuarrine touini onerrerarraro. Naraha orrariana ouaza: “Deni tirrani” quenauiuarrine nacassa tarrari. Pouana occa uima bazima nauato tarrari. Pouana madirracca uima uapima tocatterrizade nauato tarrari. 51Nazama ouape parrissehera tiadeniza uati onarraro: Ouattiza iboraqquiri tiquenezape parri tirricarini nerreranitoui −nade Zeso.

52Nazapa manaco zodeodeni uati toquenade: —Rridapanape nauatoqquiri inani tocorime siri ticarrirraro. Abarahaopa maittaccazama zoqquepoui. Deo Atti cacomeraqquiri narrarideni naco rricarizaui. Naraha tia tettipe: “Ouattiza iboraqquiri tiquenezape parri tirricarini nerreranitoui” taua. 53Arrina tiape icca idi Abarahaoza deni tirrarrarorane? Abarahaopa zoqquepoui. Deo Atti cacomeraqquiri narrarideni naco rricarizapoui. Naraha tiape tibodi: “Ouape deni orrani” tarraroqui? −quenade Zesoza.

54Naraha Zeso pouadeniza uati tapomade: —Oua mottape oua deni onanani parrire-rrerani. Naraha occa Abi oua deni tonanazana parrireni. Occa Abipa Deo. Pouaza: “Icca Deo” tiqueneraha. 55Pouaza ssamoqquiri tiquenani. Ouana Pouaza nauato onani. “Nauato onerrerani” onezape mamaizade orrani, pina tiadenissa onanitouiraha. Naraha ouape parrissa Pouaza nauato onarraro. Poua Attiza naqui ibora onarraroparri. 56Nazama ticcadeni idi Abarahaopa maittaccazama occarronanicca uima nauato tapozapa uatizeza otoui madirrari. Parrissa Deorrine occaronani qqui tazapa uatizeri narraride –nade Zeso.

57Naraha zodeodenipa Zesoza uati toquenapomade: —Tiape ticca uarrano 50 bacco tarrararaha Abarahao qqui tinarrarittaco? −quenade. 58Naraha Zeso pouadeniza uati tapomade: —Parrissehera tiadeniza uati onarraro: Ouape Abarahao tossona-rraraccaza taide omadiporrarode −nade Zeso.

59Nazapa zodeodeni uadimanaza siba nacca-cca quenade, Zeso iquenaqqui-manauiuarrine. Naraha Deoza dada toqquimauarri madirra uapi tarra narrari. Zesopa narrari madirradeniza carrimaza amossi narraride. Deoza dada toqquimauarri toqquenarrari.

Currently Selected:

Zouao 8: KBNT

Highlight

Copy