Zouao 7

Zeso poua imecote pouaza parrissa quena-rrararrari

1Naui zotodepa zama arobeni Carireazana Zeso madiccaza oza onihi, onihiza mari mari narizarraride. Zama arobeni Zodeauarripa zodeodeni Zeso poua zoqqueuiuarrine toui quenazapa nauiuarri madide nacassera tarrari. 2Naraha zodeodenicca idideni oza rrorroredeza madirizemanaporraridenicca errete touarrirarrarode. 3Nazapa Zeso poua imecotedenipa pouaza uati toquenade: —Arrizape timadi terrerarri. Zodeauarri ticcarri. Nauiuarri madimanarrari titoui quenarrarideniza naqui ticca nauatoue noue noue tarizarri −quenade. 4—Madirra ouaha nauatoue carrimanarraridenipa pouadeni tauimari torrarizaniuarrinepe poccadeni nauatoue ihinarrimemana nerrerarraro. Madirra bazima qqui toquenauiuarrine nauatoue auato ihinanemana narraro. Tia naqui nauatoue ticarrizape madirra bazima qqui toquenauiuarrine nema tarizarri −quenade poua imecote attideni. 5Zeso poua imecotedeniraha pouaza parrissa quena-rrarazapa attideni nama quenarrariparra. 6Naraha Zeso poua imecotedeniza uati tade: —Tiadenipe uada ponimaccaza touini tiqueneraha otauimari torrarizaniuarrinecca uada bacco terreraccani −nade. 7—Nazama tiadenizape arrirraro zamacca madirra nacasseraqquiri narraraui. Naraha ouazana nacasseraqquiri narrari, ouape poccadeni uimasiri cacomera oneza. 8Nezape tiadenira erreteuarri rraui tirrarri, ouape oqquerrerani. Ouaza nauatoqquiri nauiuarrinecca uada bacco terreraccani −nade.

9Zeso atti nama nazapa Carireaza iborraride.

Zesopa Oza rrorroredecca erreteza carrimarrari

10Nazapa Zeso imecotedeni erretetoui rraui torrazapa poua naco zotode naui madirra uapi tauiza tocarrima-zanapode. Naraha pina pouadeniza toqqueraui nauiuarrine poua cacomarraride. 11Naza errete torrezape zodeodeni taminedenipa Zeso bacco iquenauiuarrine qqui narizemanazapa: —Nerrecouarri maqquiderre nauatobotepa? −quenarraride. 12Nazapa madirra bazima Zeso poua tauimari uimahaha canade. Madirra motapa: —Narraripa maqquiderre bicabotea −quenade. Naraha madirra ouahadenipa: —Iazapa bica tarraraui. Pouapa toponi mamaizade −quenade. 13Naraha Zesoza nacassaqquiri narraripa zodeodeni noppine cappinemanaza orriza uimahaha canade.

14Errete rricaniparrinerrereraha Deoza dada toqquimauarri Zeso toqquezimaza madirra mari icanabaqquirraride. 15Nauiza Zeso mari icanabaqquizana zodeodeni uarro canireza uimahaha canarraride. —Nerrecoma naza touattarraritta? Mari mari ihicanemana narrararaha −quenade.

16Naraha Zesopa pouadeniza uati tade: —Occa marinarrape occa rrerani, oua Cazossederrine −nade. 17—Arri tibodidenipe: “Pocca marinarrape Deocca zossenirriqui? Poua motta poua attirane?” tiquenarraro nitide. Naraha Deo Poua nacassa tauiccara tinanemanezape otauimari tiadeniza auato tanitoui: Occa marinarrape Deocca. 18Arra madirra pocca uima uati uati tatarra narraripa madirra ouaha pouaza: “A, tiape nauato tinani” nauiuarrine uati uati tatarra narrari. Naraha madirra ouaha uati uati tatarra narraripa: “Arrirraro uimape orrine rrerani, oua Cazossedecca uima, pouazara tetizemanarri” narrari. Narrarina parrissehecca uima uati uati tatarra narrari. Maiza-rrararrari −nade Zeso.

19—Naraha Deocca zossenirri Moize dozo inarrarope tiadeniza nouerarrarottaqui? Ticarrimaneraha narraroza iboqquiri tiquenarraro. Nerrecotouira oua tinanazoqquemananiuarrine touini tiquenarraro? Narrarope Deocca zossenirri rrerani −nade Zeso.

20Nazapa madirra bazima Zesoza uati toquenade: —Tiape tocorime ticarrirrarorrine mona tirrarraro nitiderra. Naraha nerrecorrarideni “Tia inanazoqquena” quenarrari? −quenade.

21Naraha Zeso pouadeniza uati tade: —Icca rrassinarracca uada sabadoza occa nauatoue orrari neraha uarro ticanirerrarode. 22Arri Moizecca marinarrazape: “Maqquiderredenipa zopori cotani eteroni uissinarra cacarrimana nauiuarrine” napoui nade. (Naraha narraro uimape Moize uati taza rrerani. Abarahao madipozama nema narronarraro.) Narraroa arri erredeni uadari 8 nazapa sabadoraha zopori cotani eteroni uissinarra titinacarribaqquimana narrariparra. 23Tibodideni uatomanarri: Pina Moizecca marinarrassa titinanemana naniuarrine sabadoza maqquiderre bedi zopori cotani eterori uissinarra titinacarrimana naraha arri orrinepe bica terreraqui? Orrinepa sabadoza madirra assire namanaha tonomiraha nerrecotoui ouaza tiboquemanarraro? 24Nezape arrirraro uima tibodideni uatonissa tarri. Ponima “Uaidira tani” tiquenerrerarri. Uima nattomede tiquerreneza parrissehera nattome tiquenanissa tarri −nade Zeso.

Zesopa Deocca zossenirri ccaronarrari

25Nazapa Zerozareuarri madimanarrarideni motaha Zeso qqui toquenaza uimahaha canarraride: —“Arrarraria inanazoqquena” quequenanarrarico? 26A, naraha arra madirra mari mari narronaua! Taminedenipa: “Mari terrerarri” quena-rrararrarirana. Icca taminedenipa: “Parrissa, Cristo-Mesia” quenarrarico? −quenade. 27—Neraha iape arrarrari madirra poua ccarronauiuarripa nauatoqquiri inani. Rridacca Cristo-Mesiapa poua ccarronauiuarri ssamoqquiri inanerre −quenade.

28Zesopa naui Deoza dada toqquimauarri maride torraraha pouadeni atti mittaza rrazirema uati tarraride: —Rrehe, tiadeniza rrizera onarrarorane! Oua occarronaniuarri naqui nauatoqquiri tiquenarraroranerre! Naraha ouape occa uimaza occarrona-rrerani. Arra oua Cazossedena parrissehe rrinede. Naraha tiadenipe Pouaza tinoccodeni rrizaqquiri nani –nade. 29—Naraha ouapa qqui onarra narrari, nani Pouauarri occarronarraro. Pouana oua cazosserraride −nade Zeso.

30Nazapa nauiza Zeso pouadeni zepeza torrauiuarrine dama iquenauitouiraha dama iquena-rrarade. Zeso zoqqueuiuarrinecca uima Deorrine narro taccarraro.

Zodeodeni motapa: —Zeso dama inana −quenarrari

31Naraha madirra mota pouaza parrissa quenarraridenipa uimahaha canade: —Zesocca nauatoue deni torrarraro. Pina Cristo-Mesiacca uima imittaporrarossa nani. Narrarina Cristo-Mesia poua. Niza madirra ouaha pina Zeso canauatori canarrarissa narrarauitoui −quenade. 32Madirra —Zesopa Cristo-Mesia −quenarrari uimahaha canaza zodeodeni mota marinarra onini parizeoza rrehe quenarrarideni mittemanazapa dada toqquimade taminedeni tezerre nauiuarricca cacauadedeni Zeso dama iquenauiuarrine zosse inabaqquimanarrari: —Zeso dama tiquenaza teccanimanana −quenarrari. 33Rraui torrazapa Zesoza bacco toquenarrari. Naraha Zeso pouadeniza uati tade: —Ouape tiadeniza biqui tehe omadi naccaniuarrine. Niza zotodepe arra oua Cazossedeza occaninitoui. 34Nezape otoui qqui tarizemananitoui, neraha oua bacco tiquenerreranitoui. Oua omadiniuarri “Bacco inana” tiqueneraha naniuarri bacco tiquenarreranitoui −nade Zeso.

35Narraro uima madirra mittemanazapa pouadenira uimahaha canade: —Zama nerrecoma nauiuarri toccauiuarrine iaza: “Oua bacco tiquenerreranitoui” naua? −quenade. —Zodeodeni zama onihiuarri torraribaqquirrari-deniuarri toccauiuarrineco? Nauiuarricca zodeo querrena-rrararrarideni mari icanabaqquiuiuarrineco? −quenade. 36—Poua atti nerrecoma narrari? Arra “Otoui qqui tarizemaneraha oua bacco tiquenerreranitoui. Omadiniuarri naqui ‘Bacco inana’ tiqueneraha naniuarri bacco tiquenerreranitoui” narrari −quenade.

Passo camittehecca uati tarrari Zeso

37Oza rrorroredecca errete uada rricaniccana denima bica tarraro. Narraro uadazana Zeso uaza rrazirema uati uati tarraride: —Tibacco rrocozape ouaza ticcarroneza ze tarri −nade. 38—Madirra ouaza parrissa narraripa passo camittehecca carriuitoui. Narraro poua bodicca qquenezape torraribaqquinitoui. Narrarope Deo Atti dozo naniza dozo naporraro −nade Zeso.

39Arra Zeso uati tarraripa pouaza madirra parrissa quenarraridenina Deo Corime carrimanauitoui, narrari. Naraha Zesopa zoqque, nauatoni, toccamacossani narraraccazapa Deo Corime torrariza-rraraccarrariparrade.

Zeso tauimarirrine madirra torraribaqquimanarrari

40Zeso uati uati taui mittemanazapa madirra mota pouadenira uimahaha canade: —Parrissa arrarrari madirrapa Deo Atti cacomeraboteua −quenade. 41Naraha madirra mota attidenipa: —Arrarraripa Cristo-Mesia −quenade. Naraha madirra mota attidenipa: —Noueraui! Cristo-Mesiapa Carireauarricca rraraui. 42Arri Deo Atti dozo naporrarozape uima arrima narraro: “Mesiapa tamine Dabi Potemaui. Dabicca zamabote oza panani Bereneuarrina ccarronauitoui” nani Deo Atti dozo naporraroza −quenade.

43Narraroa arri Zeso tauimarirrine madirra torraribaqquimanarraride. 44Madirra motapa: —Toponi cocorouarri Zeso iaccana −quenaraha cappinemanaza dama iquena-rrarade.

Zodeodeni taminedeni boquemanarrari

45Nazapa marinarra parizeoza rrehe quenarrarideni, dada toqquimade taminedeni quenaza oza bodiuarri queriqquimanaza naui Deoza dada toqquimacca cacauadedeni Zeso damade rraui torraraha Zeso rriraha bacco nanimanaza taminedeni uati toquenarrari: —Nerrecotoui teccanimana-rrararrari? −quenaui nade. 46Naraha cacauadedeni uati toquenarrari: —Zeso attipa deni torraza pina madirra ouaha attissa narrarazapa −nanimanaui nade. 47Nazapa parizeodeni cacauadedeniza uati toquenapomarrari: —Tiadeni naqui Zeso tiadeni tocamaizabaqquirrari uitiderra? 48Naraha zodeodenicca taminedeni Zesoza rrehe narra canimarrarico? Noueraui. Parizeodeni naco Zesoza rrehe narra canimarrarico? Noueraui. 49Arra madirra pouaza rrauirizarraridenipa iassa quena-rraraui. Pouadenipa Deo Atti ssamoqquiri naui. Narrizoue rriquerreraniccaza toquerrenauitoui −quenaui nade.

50Naraha arra parizeodeni orraria oni Nicodemo zome Zesoza uatide toccauarrarrarina pouadeniza uati tarrari: 51—Titauaribobo canarri! Icca marinarrape arrima ihinanarraro: Madirra pocca uima ecomera-rreraqquezape izaua-rraraccaui. Taidepa madirra tauimaritoui uati inarizeza, pocca uima nauato ineza, uaidira taui auato tazana ihizaua narrari −naui nade Nicodemo. 52Naraha Nicodemoza uati toquenarrari: —Tia naqui Carireauarricca tirrarraro nitiderra? Carireacca uimatoui Deo Atti ua timaninissa tarri. Carireauarripa Deo Atti cacomeraqquiri narrarideni qquenarra canima-rraraui −quenaui nade Nicodemoza. 53Nazapa poccadeni ozauarri rraui torranirizaui quenade.

Currently Selected:

Zouao 7: KBNT

Highlight

Copy