Evvan 12

Isõõzz vuõidât Betaniast

1Kutt peeiʹv ouddâl eʹjjpeeiʹv Isõs pueʹđi Betania gåårda, koʹst jeälsti Lasarõs, koon Isõs leäi counnâm jaaʹmmjest. 2Tåʹben Määrf kuâssti veärain Isõõzz, da Lasarõs leäi õhtt, kååʹtt leäi poorrmen suiʹn.

3Mäʹrjj vaaʹldi pieʹllǩilo kaallšõs nardusvuõiddâz da pååusai Isõõzz juõʹljid da koškkii tõiʹd jiijjâs vuõptivuiʹm. Põʹrtte šõõddi tiiud vuõidâshaajj.

4Tâʹl õhtt mättʼtõspäärnain, Juudas Iskariot, kååʹtt leäi Isõõzz õlmmsauʹvddi, kõõjji: 5«Mõõn diõtt tän vuõiddâz jiâ kaaupšam? Tõʹst leäi vuäǯǯad kolmmčueʹđ denaarâd da tieʹǧǧid leäi vueiʹtted jueʹǩǩed vääivaš oummid.» 6Leša ij Juudas vääivaš oummin perstam. Son cieʹlǩi nääiʹt tõn diõtt, ko leäi suõl; son leäi õhttsaž kåʹššel hoiʹddjeei, da tõʹst son vaaʹldi tieʹǧǧid jiijjâs taarbi diõtt. 7Isõs cieʹlǩi: «Lueʹšt suu leeʹd. Uuʹd suu šeäʹštted tän muu jääʹmmempeeiʹv räjja. 8Vääivaš oummu teeʹst liâ jueʹǩǩ poodd ââlda, leša mon jiõm leäkku.»

Lasarõs

9Jõnn joukk juudlažneeʹǩǩ kuʹlle, što Isõs leäi Betaniast. De sij puõʹtte tåk, jiâ pâi Isõõzz diõtt, leša še Lasarõõzz diõtt, koon Isõs leäi counnâm jaaʹmmjest. 10Tâʹl jõnnpaapp tattu kåʹdded Lasarõõzz še, 11tõn diõtt ko määŋgas juudlažneeʹǩǩ suu diõtt mõʹnne Isõõzz peälla da oskku suu.

Isõs puätt Jerusaaʹlma

12Nuuʹbb peeiʹv prääʹznka noorõõttâm narod kuuli, što Isõs leäi pueʹttmen Jerusaaʹlma, 13Sij vaʹldde virbboouʹsid da mõʹnne suu vuâstta da čuõʹrvvje:

«Hoosianna,

bloouslõvvum leäǥǥas son, kååʹtt puätt Šuur nõʹmme,

Israeeʹl koonǥõs!»

14Isõs kaauni nuõrr siõm ååʹssel da iišti tõn seälgga, nuʹt mäʹhtt ǩeeʹrjtum lij:

15«Jeäʹl põõl, nijdd Siion,

ǩiõčč, tuu koonǥõs puätt

da vuâjj siõm ååʹssel sieʹljest.»

16Tän suu mättʼtõspäärna jiâ fiʹttjam, leša ko Isõs leäi čuõvtum, tâʹl sij muʹštte, što tät leäi suʹst ǩeeʹrjtum, da što tõt leäi nuʹt suʹnne še tuejjuum.

17Tõk, kook leʹjje leämmaž Isõõzz mieʹldd, mainste, mäʹhtt son leäi kåččam Lasarõõzz ääuʹdest da counnâm suu jaaʹmmjest, da tuõđšte suʹst. 18Narod pueʹđi suu vuâstta, tõnt ko tõt leäi kuullâm tõn õõmâstuâjast. 19De farisõõzz cieʹlǩǩe kõskkneez: «Vueiʹnnveʹted-a? Ij täʹst ni mii šõõdd. Puk maaiʹlm orčč suu mieʹldd.»

Måtam kreikkla åʹcce Isõõzz

20Tåʹben leʹjje še måtam kreikkla, kook leʹjje puättam prääʹznka moʹlidvâʹstted. 21Sij puõʹtte Iʹllep årra, kååʹtt leäi Galilea Beetsaidast, da rauʹǩǩe suu cieʹlǩeeʹl: «Šurr, täättčep vueiʹnned Isõõzz.» 22Iʹllep mõõni mainsted Andreaʹsse, da õhttna suäna mõʹnne Isõõzz årra. 23Leša Isõs vaʹsttii siʹjjid: «Äiʹǧǧ lij puättam, da Oummu Päʹrnn mâânn čuõvvâdvuõttses. 24Tuõđi, tuõđi mon ceälkam tiʹjjid: jõs viõʹlǧǧesjäävv siõm ij kõõčč jânnma da koddu, tõʹst ij šõõdd ni mii, leša jõs tõt kåddai, tõt šõddad jiânâs šââdd. 25Kååʹtt jieʹllem rääʹǩǩast, mõõnat tõn; leša kååʹtt vâjjad jiijjâs jieʹllem tän maaiʹlmest, son šeäštt tõn âʹǩǩpâjjsaž jieʹllma. 26Jõs ǩii-ne haaʹlad muu sluužâd, puäđas muu mieʹldd, što kääzzkam leʹčči tåʹben koʹst mon leäm. Muu Eččam ciʹsttai tõn, kååʹtt sloož muu.

Isõs maainast jiijjâs jääʹmmʼmest

27Ååʹn mon leäm suõrggnam. Mâiʹd mon õõlǥam ceäʹlǩǩed? Eʹčč, kaʹjje muu tän vaiʹǧǧes pooddâst. Ij, mon leäm puättam, što ǩeâllʼjeʹččem tän poodd. 28Eʹčč, čuäʹjet ciistad!»

Da ââʹlmest kollʼji jiõnn: «Mon leäm čuäʹjtam cisttan, da čuäʹjtam tõn täʹst ooudâs årra še.» 29Da oummu, kook čuõǯǯu da kuʹlle tõn, juʹrdde, što tieʹrmes čieʹrǧǧii. Jeärraz cieʹlǩǩe: «Suu säärntõõli aʹŋǧǧel.» 30Isõs vaʹsttii siʹjjid: «Tät jiõnn ij puättam muu diõtt, leša tij diõtt. 31Ååʹn tät maaiʹlm jåudd suuʹde; ååʹn tän maaiʹlm vueiʹvvåumma läʹǧǧstet åålǥas. 32Da ko muu jânnmest kaaggât pââjas, ǩeäzzam pukid årrsan.» 33Nääiʹt Isõs cieʹlǩi, mõõn nalla son jäämči.

34Narod vaʹsttii suʹnne: «Mij leäʹp lääʹjjest kuullâm, što Kristõs jeäll âʹǩǩpââjas; mäʹhtt šât ton ceälkak, što Oummu Päʹrnn âlgg pââʹjded? Ǩii lij tõt Oummu Päʹrnn?» 35De Isõs cieʹlǩi siʹjjid: «Čuõvv lij occnja ääiʹj tij kõõskâst. Jååʹtted, nuʹt kuuʹǩǩ ko teeʹst lij čuõvv, što seuʹnnjõs ij õõstče tiʹjjid. Kååʹtt seuʹnnjõõzzâst jeäll, ij tieʹđ, koozz jåått. 36Nuʹt kuuʹǩǩ, ko teeʹst lij čuõvv, åskkad čuõvvõʹsse, što tij čuõv päärnžen šõõddčid.»

Juudlažneeʹǩǩ jiâ ååsk

Tän Isõs mainsti da mõõni meädda da peittlõõđi. 37Håʹt son leäi nuʹt jiânnai õõmâstuâjaid tuejjääm juudlažniiʹǩǩi čõõʹlmi õõudâst, jiâ sij åskkam suu, 38što šõõddči tuõttân profeeʹtt Esai veiʹǩǩumuš, koon son lij ceälkkam: «Šurr, ǩii åskk, mâiʹd mij leäʹp mainstam? Ǩeäzz Šurr čuäʹjti viõǥǥâs?» 39Tõn diõtt sij jiâ vuäittam åskkad, ko Esai leäi veâl ceälkkam nääiʹt še: 40«Vuâsppåʹd lij seuʹnnjâttam sij čõõʹlmid da kõrrääm sij čâđđmeez, što sij jiâ vuäinče čõõʹlmeezvuiʹm jiâ-ǥa fiʹttjeʹčče ni mõõn jiâ-ǥa jåårǥleʹčče, da jiõm mon siʹjjid pueʹreʹče.» 41Nääiʹt mainsti Esai, ko son vuõiʹni suu čuõvvâdvuõđ da mainsti suʹst.

42Tõn diõtt še määŋgas juudlaž vueiʹvvoummu oskku Isõʹsse, leša farisõõzzi diõtt sij jiâ tuõsttâm tobdsted, ko siʹjjid leʹčče rätkkam ceerkvest. 43Sij räʹǩste oummui uʹvddem ciist jeäʹnab ko Vuâsppååʹd ciist.

Suud

44Isõs aaʹlji mainsted kõrr jiõʹnne: «Kååʹtt åskk muu, åskk še suu, kååʹtt lij muu vuõlttääm. 45Da kååʹtt vuäinn muu, vuäinn še suu, kååʹtt lij muu vuõlttääm. 46Mon puõʹttem maaiʹlme čuõvvân, što ij ni ǩii, kååʹtt muu åskk, pääʒʒče seuʹnnjõʹsse. 47Tõn, kååʹtt kooll muu saaʹnään, leša ij jäkktõõl tõiʹd, mon jiõm suud. Jiõm leäkku puättam maaiʹlme suudâm diõtt, leša kaʹjjeem diõtt. 48Tõʹst, kååʹtt ǩeäčč muu pâiʹl ij-ǥa vääʹld vuâstta muu saaʹnid, lij suu jiijjâs suuʹdi: tõt sääʹnn, koon mon leäm mainstam, sooud suu mââimõs peeiʹv. 49Jiõm mon leäkku mainstam jijstan, leša Eʹčč, kååʹtt lij muu vuõlttääm, lij jiõčč mieʹrrääm, mâiʹd mon mainstam. 50Da mon teâđam, što suu päkkmuš lij âʹǩǩpâjjsaž jieʹllem. Tõn diõtt mon mainstam tõn, mâiʹd muu Eʹčč lij muʹnne mainstam.»

Currently Selected:

Evvan 12: SKOLT

Highlight

Copy