Evvan 11

Lasarõõzz jäämmʼmuš

1Måtam ååum, Lasarõs, Betaniast, Määʹrj da Määrf siidâst, leäi puõccmen. 2Da tät Mäʹrjj leäi tõt, kååʹtt pååusai Šuur juõʹljid šiõǥǥhajjsaž vuõiddsin da koškkii suu juõʹljid vuõpteesvuiʹm. Lasarõs, kååʹtt puõʒʒi, leäi suu villjâs. 3Da nuʹt suu vueʹbb vuõlttee Isõʹsse tän saaǥǥ: «Šurr, ǩiõčč, tõt kååʹtt lij tuʹnne rääʹǩǩes, puâcc.» 4Leša ko Isõs kuuli tõn, son cieʹlǩi: «Ij tõt puõccmuš viiǥǥ jääʹmmʼma, leša Vuâsppååʹd ciʹstte, što Vuâsppååʹd Päʹrnn tõn pääiʹǩ čuõvvneʹčči.»

5Da Isõs räʹǩsti Määrf da suu vueʹbb da Lasarõõzz. 6Ko Isõs kuuli, što Lasarõs lij puõccmen, son paaʹʒʒi veâl kueiʹt peeivas tõn päikka, koʹst son leäi. 7Mâŋŋa tõʹst son cieʹlǩi mättʼtõspäärnees: «Vueʹlǧǧep väʹst Juudea.» 8Mättʼtõspäärna cieʹlǩǩe suʹnne: «Uʹčteeʹl, täättak-a eʹpet mõõnnâd tåk? Eman-i juudlažneeʹǩǩ tattu tuu ǩieʹđjted da eʹpet ton leäk mõõnnmen tåk.» 9Isõs vaʹsttii: «Jiâ-ǥo peeiʹvest leäkku kuâtmlo poddâd? Ǩii peivva jåått, tõt ij kuåkkâz, tâʹl son vuäinn tän maaiʹlm čuõv. 10Leša tõt, ǩii jåått ekka, tõt kuåkkas, ko suʹst iʹlla čuõvv.»

11Son eʹpet cieʹlǩi: «Naʹzvaanam Lasarõs vuäđđ, mon mõõnam suu counnâd.» 12«Šurr», mättʼtõspäärna cieʹlǩǩe, «jõs son vuäđđ, tâʹl son puârran.» 13Leša Isõs mainsti tõʹst, što Lasarõs leäi jäämmam, leša mättʼtõspäärna juʹrdde, što son mainsti Lasarõõzz nââʹervueʹđđmest. 14Tâʹl Isõs cieʹlǩi vuõiʹǧǧest: «Lasarõs lij jäämmam. 15Mon rämmšõõđam tij diõtt tõʹst, što jiõm leäkku leämmaž tåʹben, ko ååʹn tij kâʹl åskkveʹted. Vueʹlǧǧep ǩiččâd suu.»

16Fooma, koon cieʹlǩǩeš Didymõssân, cieʹlǩi jeärrsid: «Mõõnnâp tåk da jäämmap suin.»

Isõs lij pââjaskaggõõttmuš da jieʹllem

17De Isõs pueʹđi tõn päikka da kuuli, što Lasarõs lij leämmaš neelljad peeiʹv ääuʹdest. 18Betania leäi ââlda, koolm ǩilomettar ǩeeʹjjest Jerusaaʹlmest. 19Da määŋgas juudlažneeʹǩǩ leʹjje puättam lâʹdded Määrf da Määʹrj viillj jääʹmmem diõtt. 20Määrf ko kuuli, što Isõs leäi pueʹttmen, mõõni son suu vuâstta, leša Mäʹrjj kuâđđji domoi.

21Määrf cieʹlǩi Isõʹsse: «Šurr, jõs ton leʹjjiǩ leeʹd tääiʹben, tâʹl muu villjam iʹlleʹjje jääʹmmed. 22Leša ååʹn-i mon teâđam, što Vuâsppåʹd oudd tuʹnne puk, mâiʹd ton Vuâsppååʹdest raaukak.» 23Isõs cieʹlǩi suʹnne: «Tuu villjad leežž kaggõõttâd pââjas.» 24Määrf cieʹlǩi suʹnne: «Mon teâđam, što son kåccai mââimõs peeiʹv, ko puk jaaʹmjid coounât.» 25Isõs cieʹlǩi suʹnne: «Mon leäm pââjaskaggõõttmuš da jieʹllem; kååʹtt åskk muu, tõt jeäll, håʹt leežž jäämmam. 26Ij-ǥa ni õhtt, ǩii jeäll da åskk muu, jääʹm ni kuäʹss. Ååskak-a tõn?» 27«Ååskam, Šurr», Määrf vaʹsttii, «mon ååskam, što ton leäk Kristõs, Vuâsppååʹd Päʹrnn, koon pueʹttem lij maaiʹlme vuõrddum.»

Isõs reäkk

28Tän ko leäi ceälkkam, Määrf mõõni väʹst da kååččai sueʹleld vueʹbbes da cieʹlǩi: «Uʹčteeʹl lij tääiʹben da kåčč tuu.» 29Ko Mäʹrjj kuuli tõn, võʹllʼji son sõõrǥab da mõõni Isõõzz årra. 30Leša Isõs iʹlleäm veâl puättam siʹjdde, leša leäi leämmaž tõn pääiʹǩest, koʹst Määrf leäi suu vuäinnam.

31Ko juudlažneeʹǩǩ, kook leʹjje põõrtâst lâʹddmen Määʹrj, vuõiʹnne suu sõrgg kaggõõttâm da vueʹlǧǧem åålǥas, da sij mõʹnne suu mieʹldd da juʹrdde, što Mäʹrjj mõõni ääuʹd årra reäkkad. 32Ko Mäʹrjj pueʹđi Isõõzz årra, son luâšttõõđi suu juõʹlji ouʹdde da cieʹlǩi: «Šurr, jõs ton leʹččiǩ leämmaž tääiʹben, villjam iʹlleʹjje jääʹmmed.» 33Ko Isõs vuõiʹni Määʹrj da juudlažniiʹǩǩid reäkkmen, son pâiʹl rââʹdd vuõiŋsti; 34da son kõõjji: «Koozz leäʹped suu čiõkkâm?» Sij cieʹlǩǩe suʹnne: «Šurr, puäʹđ da kiõčč.» 35Isõs reäǥškueʹđi. 36Da juudlažneeʹǩǩ cieʹlǩǩe: «Kâʹl son lij leämmaž suʹnne rääʹǩǩes.» 37Leša måtam seeʹst cieʹlǩǩe: «Ko son ääʹvii čââʹlmteeʹm čõõʹlmid, ij-ǥo son še leʹjje vueiʹtted tuejjeed, što Lasarõs iʹlleʹjje jääʹmmed.»

Isõs cåunn Lasarõõzz

38Isõs eʹpet pâiʹl rââʹdd vuõiŋsti da mõõni ääuʹd årra. Tõt leäi skuõrr, da tõn ooudâst leäi ǩeäʹdǧǧ. 39Isõs cieʹlǩi: «Väʹldded meädda ǩieʹđj.» Määrf, pokaineeʹǩǩ vuäʹbb, cieʹlǩi: «Šurr, son lij leämmaž neelljad peeiʹv ääuʹdest da son juʹn âpss.» 40Isõs cieʹlǩi suʹnne: «Jiõm-a ceälkkam tuʹnne, što vuäǯǯčiǩ vueiʹnned Vuâsppååʹd čuõvvâdvuõđ, ko pâi ååskčiǩ.» 41Da sij joorte ǩieʹđj meädda.

Isõs ǩiʹcsti pââjas da cieʹlǩi: «Eʹčč, späʹsseb, što leäk kuullâm muu. 42Mon kâʹl teâđam, što ton kuulak muu, leša säärnam täi oummi diõtt, što sij ååskče, što ton leäk vuõlttääm muu.»

43Nääiʹt ko Isõs leäi ceälkkam, son čuõʹrvvji kõrr jiõʹnne: «Lasarõs, puäʹđ åålǥas!» 44Da jaaʹmmi pueʹđi ääuʹdest da jueʹlj da ǩiõđ leʹjje leeiʹnin karrum da muâđ kattum leeiʹnin. Isõs cieʹlǩi: «Peäʹstted leeiʹnid da lueʹštted suu mõõnnâd.»

Isõõzz mieʹrreet kåʹdded

45Määŋgas juudlažniiʹǩǩin, kook leʹjje puättam Määʹrj årra da vuõiʹnne, mâiʹd Isõs tuejjii, oskku suu. 46Leša måtam seeʹst mõʹnne farisõõzzi årra da mainste siʹjjid, mâiʹd Isõs leäi tuejjääm. 47Jõnnpaapp da farisõõzz kočču norrõõzz õõutsâjja da cieʹlǩǩe: «Mâiʹd mij tuejjeep, ko tõt ooumaž tuejjad jiânnai tuõđštõstuâjaid? 48Jõs uʹvddep suu nääiʹt leeʹd, sõrgg puk åskka suu. Tâʹl roomalažneeʹǩǩ puäʹtte da hiâvte meeʹst ceerkvid da puk narood.» 49Leša õhtt seeʹst, Kaifas, kååʹtt tõn eeʹjj leäi jõnnpapp, cieʹlǩi: «Tij jeäʹped fiʹtte ni mâiʹd. 50Ij-ǥo tij miõlâst leʹčči pueʹrab, što õhtt jäämm narood ooudâst, ko puk narod hiâvvan?»

51Tän son ij jiõčč jorddam, leša ko son leäi tõn eeʹjj jõnnpappân, de son nääiʹt veiʹǩǩii, što Isõs jäämm narood ooudâst. 52Ij-ǥa pâi tän narood õõudâst, leša puki peâđǥai Vuâsppååʹd päärnai diõtt, što son noorči tõiʹd õõutsâjja.

53Tõn peeiʹv rääʹjest sij raajdõʹtte kåʹdded Isõõzz. 54Mâŋŋa tõʹst Isõs ij teäʹnab jååttam Juudeast õlmmsest, leša vuõʹlji tåʹben Jefreem gåårda, kååʹtt leäi poostaijânnam ââlda, da leäi tåʹben mättʼtõspäärneesvuiʹm.

55Leša juudlažniiʹǩǩi eʹjjpeiʹvv leäi ââlda, da määŋgas mõʹnne jânnampaaiʹǩin Jerusaaʹlem gåårda ouddâl eʹjjpeeiʹv prääʹzneǩ puʹtstõõttâd. 56Sij oʹcce Isõõzz da cieʹlǩǩe kueiʹmm kuâimmseez ceerkvest: «Mâiʹd juʹrddveʹted? Ij son ni tääiʹd pueʹtted prääʹznka.» 57Jõnnpaapp da farisõõzz leʹjje mieʹrrääm, što ǩii tiõʹđi, koʹst Isõs leäi, õõlǥi ceäʹlǩǩed, koʹst son lij, ko sij tattu väʹldded suu ǩidd.

Currently Selected:

Evvan 11: SKOLT

Highlight

Copy