Luke 4

De hagatale o Iesu

(Mat 4.1-11; Mark 1.12-13)

1Gai Iesu gu honu i de Hagasaalunga Dabu i de masavaa oona ne ahe mai ai i Jordan, gai de Hagasaalunga ne dagi ia ga kave gi de vao. 2E madahaa laangi oona ne hagatale ai i daho de ia hagabaubau laa. Gai ia tee gaimee i laangi laa, gai dua huu laangi laa gai ia gu saalohia.

3Gai de ia hagabaubau laa ga hai ange gi de ia, “Noo go koe donu Tama Daane a de Maadua, gai koe basa ange gi de hadu nei, mage suuia gi se pelaoaa.”

4Aagai Iesu ne basa ange ga hai ange gi de ia, “Gu sisi e hai ange, ‘Tangada e dee mouli donu huu i pelaoaa.’ ” #Deut 8.3

5Gai de ia hagabaubau ne gaavage hogi ia gi dahi mommee maolunga ga hagaago ange denga nohoanga hodooligi o henua i lalo alodahi i dahi masavaa bodobodo. 6Gai ia ga hai ange gi Iesu, “Au e gaavadu gi de goe ssauaa alodahi e huahua ai mee nei ma olaadeu mahamaha. Mee nei alodahi gu dugu mai gi de au, gai au e gaavange be goai aagu e lodo e vange aagena. 7Deenei ai, noo koe e daumaha mai gi de au, gai mee nei alodahi gu niiau.”

8Aagai Iesu ga hai ange gi de ia, “Gu sisi e hai ange, ‘Koe gi daumaha ange gi Tagi Maolunga doo Maadua, gai go ia donu huu oou e hai hegau ange aagena.’ ” #Deut 6.13

9De ia hagabaubau ne kave hogi ia gi Jerusalem, ga hai ia gi duu i honga dahi dahuuhuu maolunga o de temple, gai ia ga hai ange gi de ia, “Noo go koe donu Tama Daane a de Maadua, gai koe lele iho. 10Go hiidinga gu sisi e hai ange,

‘Ia e hai naa ono dangada de langi gi hagaloosi ina goe,

11gai gilaadeu ga sigo ai goe i olaadeu lima,

gi dee duugia ai doo vae i dahi hadu.’ ” #Psa 91.11-12

12Aagai Iesu ne hai ange gi de ia, “Gu sisi hogi e hai ange, ‘Aude hagataalea Tagi Maolunga doo Maadua.’ ” #Deut 6.16

13Gai ga lava huu i de hagatale a de ia hagabaubau laa Iesu, gai ia ga hano gee mai i ono daha i dahi damaa masavaa.

De daamada hegau a Iesu

(Mat 4.12-17; Mark 1.14-15)

14Gai Iesu ga ahe gi Galilee i ssauaa o de Hagasaalunga ⌊Dabu⌋. Gai gu dele ono longo i denga mommee e paa ange gi kilaa. 15Gai ia ga agoago i olaadeu synagogue, aagai dangada alodahi gu tuhi ia.

De gau Nazareth tee hagadubu Iesu

(Mat 13.53-58; Mark 6.1-6)

16Ia ne hano hogi gi Nazareth, go de mommee oona ne madua ai. Gai ia ne hano gi synagogue i de laangi o Sabbath, bei ana hegau e hai i de laa tubua. Gai ia ne duu age e dau de Beebaa Dabu, 17gai gu gaavange gi de ia de beebaa a de pelaabisi go Isaiah. Gai ia ga hhuge de beebaa mulo laa, gai ia gu gidee de mommee e sisi laa e hai ange,

18“De Hagasaalunga o Tagi Maolunga e noho i ogu daha,

go hiidinga ia gu hagadabu au

gi agoagona ange de longo danuaa gi de gau hagaau aloha.

Ia ne hai au gi humai gi hagassao ina mai gilaadeu i lo te hale pono,

ma de hai gi kide gilaadeu e dee kide,

ma de hagailaage gilaadeu e vaivai haia,

19aama de hagailoo de ngadau o de abodonu o Tagi Maolunga.” #Isa 61.1-2

20Gai ia ga mulo de beebaa laa ga hagaahe ange gi tangada doange, gai ia ga noho gi lalo. Aagai dangada alodahi i lo te synagogue gu haaina ia. 21Gai ia ga hai ange gi gilaadeu, “Anailaa nei gai gu hagassula muna a de Beebaa Dabu oodou gu langona nei.”

22Gai dangada alodahi ga tala tuhi ono longo, gai gilaadeu gu llele mouli i muna o de abodonu aana e tala. Gai gilaadeu ga ssili ga hagataba, “E dee go tama daane a Joseph deenei?”

23Ia ne hai ange gi gilaadeu, “Ni muna abodonu, goodou e hagamaanadu mai gi de au de mee hagasengasenga nei, ‘Tangada hai magi, hagaieiangi ina donu huu goe. Haia hogi sauaa amaadeu gu langona laa bolo koe gu hai i Capernaum, i doo aduhale donu.’ ”

24Gai ia ga hai ange, “Ni muna abodonu aagu e hai adu nei gi goodou, e deai donu se pelaabisi e hagadubu ina i dono henua donu.#John 4.44 25Ni muna abodonu aagu e tala adu nei gi goodou, ne soa haahine gu maakau olaadeu bodu i Israel i de masavaa o Elijah, i de masavaa tee pala ai de langi i e dolu ngadau ma e ono malama, ma de hai ai de onge laumalie i honga de henua,#1 Ki 17.1 26gai Elijah tee hai gi hano gi dahi gilaadeu, gai ne hai gi hano gi Zarephath, dahi aduhale o Sidon, gi daho dahi hahine gu magau dono bodu i kilaa.#1 Ki 17.8-16 27Gai ne soa hogi lebelaa i Israel i de masavaa o de pelaabisi go Elisha, aagai teai donu se gilaadeu ne ieiangi gai go Naaman donu huu, taane Syria.” #2 Ki 5.1-14

28Gai de masavaa huu o dangada e nnoho laa i lo te synagogue ne langona ai ana muna, aagai gilaadeu gu kona donu de llili. 29Gai gilaadeu ga hiihidi age e kave ia gi tua de aduhale, gi de hiihii o tuuduu e duu ai laa delaadeu aduhale, e sseu iho ai ia gi lalo. 30Gai Iesu ne seesee laa olaadeu magavaa ga hano gee mai i kilaa.

De hai a Iesu ga hano gee dahi hagasaalunga baubau

(Mark 1.21-28)

31Aagai ia ga hano gi Capernaum, go dahi aduhale o Galilee, ga agoago ai dangada i de laangi o Sabbath. 32Gai dangada i kilaa gu llele mouli i ana agoago, go hiidinga ia e agoago i ssauaa.#Mat 7.28-29

33Gai e dahi daane iai de hagasaalunga baubau i lo te synagogue, gai ia ne oo ga hai ange, 34“Ni aha oou e lodo ai i omaadeu daha, Iesu tangada Nazareth? Koe ga humai naa e daa gimaadeu gi maakau? Au e iloo be go koe goai: koe go de Ia Dabu a de Maadua!”

35Gai Iesu ga hagasee ia ga hai ange, “Aude basa, gai sao mai i ono daha!” Gai de hagasaalunga baubau ga hagabaguu taane laa i magavaa o dangada, gai ia ga sao mai i ono daha, tee hagalagohia ia.

36Gai dangada alodahi gu llele mouli ga hagataba i olaadeu magavaa, “Ni muna bee hee aanei? Ia ne basa ange gi hagasaalunga baubau laa i ssauaa aama de mmahi, aagai gilaadeu ga ssao ga hulo gee!” 37Gai ono longo gu dele i mommee alodahi e paa ange gi kilaa.

De hagaieiangi a Iesu dangada soa

(Mat 8.14-17; Mark 1.29-34)

38Gai Iesu ne hano gee mai i synagogue ga hano gi de hale o Simon. De masavaa laa gai ssaulaba o Simon e magi gai dono angaanga e vvela mmao, gai dangada ne dangidangi ange gi Iesu ia gi balea ange de hine laa. 39Gai Iesu ne hano ga ino iho ga hai gi hano gee de vvela laa, gai dono angaanga gu dee vvela. Gai de masavaa laa donu huu gai hine laa ga hidi age ga hai hanu gai e gaimee ai gilaadeu.

40Gai ga dai danu huu de laa, gai dangada alodahi e hanu olaadeu dangada e mmagi i denga hagadaagangaa magi ga gaamai gilaadeu gi Iesu, gai ia ga dugu ange dono lima gi olaadeu elunga ga hagaieiangi gilaadeu. 41Denga hagasaalunga baubau ne ssao hogi ga hulo gee mai i daho dangada soa, aagai gilaadeu ga hevaalogi ga hagataba, “Go koe donu Tama Daane a de Maadua!” Gai Iesu ga hagasee gilaadeu gi dee pasa, go hiidinga gilaadeu e iloo bolo ia go de Klisdo.

De agoago o Iesu i denga synagogue

(Mark 1.35-39)

42Taiao age gai Iesu ne hano gi lodo henua. Gai dangada ga hulo ga ssala ia ga hagatale de daohi ia gi dee hano gee mai i olaadeu daha. 43Aagai Iesu ne hai ange gi gilaadeu, “Au e hano hogi e agoago de longo danuaa o de nohoanga hodooligi o de Maadua i denga aduhale ange laa. Aanei donu hiidinga oogu ne humai ai nei.” 44Aagai ia ne hagadaga ga agoago i denga synagogue o Judea.

Currently Selected:

Luke 4: DBD

Highlight

Copy