John 9

De ieiangi o taane dee gide mai i dono haanau

1Gai ga seesee huu Iesu i dahi mommee, gai ia gu gidee dahi daane e dee gide mai i dono haanau. 2Gai ana dangada agoago ga ssili ange gi de ia, “Tangada Agoago, niioai baubau ne tee gide ai nei taane nei, niiona aabe niio luoono maadua?”

3Iesu ne hai ange, “E dee go haisala o taane nei aabe go luoono maadua ne hidi ai de mee nei, gai de mee nei ne hai e hagaago mai ai dagodo hegau hagalele mouli a de Maadua i ono daha. 4De masavaa e ao ai de mee, gai gidaadeu e hagaduu ngae e hagalava hegau a de ia ne haia ngau gi humai. Gu baa mai de boo, go de masavaa e dee hai hegau ai dangada. 5Dogu masavaa e noho ai i henua i lalo, gai go au donu de maalama o henua i lalo.” #Mat 5.14; John 8.12

6De masavaa aana e tala ai muna laa, gai ia ga saavale ange gi honga de gelegele, ga hilo ma gelegele ga hulu ange gi luu mada o taane dee gide laa. 7Gai ia ga hai ange gi taane laa, “Hannoo, huuia luoo mada i de vai go Siloam.” (E bei go de “hai gi hano”.) Gai taane laa ga hano ga hhui luoono mada ga ahe mai gu gide.

8Gai dangada e paa ange gi de ia ma gilaadeu ne gidee ia i mua e dangidangi i bale ne ssili ga hagataba, “E dee deenei taane nogo dangidangi laa i bale?” 9Hanu ne hagataba, “Go ia donu deenei.”

Gai hanu ne hagataba, “E dee go ia deenei, gai ia e bei ange taane laa.”

Gai taane laa ga hai ange, “Go au donu deenei.”

10Gai gilaadeu ga ssili ange gi de ia, “Gai dee hee de hai oou ne gide ai naa?”

11Ia ne hai ange gi gilaadeu, “Taane e hagaingoo ange laa go Iesu ne hai hanu gelegele ga hulu ai luoogu mada. Gai ia ga hai mai au gi hano gi huuia luoogu mada i de vai go Siloam. Deelaa ai, au ne hano kilaa ga hhui ai luoogu mada gai au gu gide.”

12Gai gilaadeu ga ssili ange gi de ia, “Gai go hee iai taane naa?”

Ia ne hai ange, “Au e dee iloo.”

Denga Pharisee e hai ssiilingaa muna

13Gai gilaadeu ga gaamai taane nogo dee gide laa gi daho denga Pharisee. 14Gai go de laangi o Sabbath a Iesu ne hai ai gelegele ga hulu ai luu mada o taane laa gai ia gu gide. 15Deelaa ai, denga Pharisee ne ssili ange hogi gi de ia de hai oona ne gide ai. Gai taane laa ga hai ange, “Ia ne hulu ange gelegele gi luoogu mada, gai au ga hano ga hhui, gai au gu gide.”

16Gai hanu Pharisee ne hagataba, “Taane nei tee humai i daho de Maadua, go hiidinga ia e dee hagadabu de laangi o Sabbath.”

Aagai hanu Pharisee ne ssili, “Dee hee de hai a dahi dangada haisala e maua ai i de hai denga hagailonga be mee nei?” Gai gilaadeu gu dee buni.

17Gai gilaadeu ga ssili ange hogi gi taane nogo dee gide laa, “Gai dee hee dau hai e tala ai dagodo o taane laa, i hiidinga go ia ne haia goe ga gide?”

Ia ne hai ange, “Ia se pelaabisi.”

18Gai de gau Ssuu tee hagadonusia e gilaadeu bolo taane laa se daane e dee gide i mua, gai iainei gu gide, ga dae ai gi delaadeu hagahi luu maadua o taane gu gide laa, 19ga ssili ange gi gilaau, “Deenei dooluu dama daane ooluu e hagataba laa bolo e dee gide mai i dono haanau? Gai dee hee dono hai ne gide ai nei?”

20Luoono maadua ne hai ange gi gilaadeu, “Gimaau e iloo bolo deenei demaau dama daane, gai ia ne haanau e dee gide. 21Gai gimaau e dee iloo be dee hee dono hai ne gide ai nei, aabe goai ne haia ga gide ia. Goodou siilia ange gi de ia, ia gu se daane madua, gai gu maua donu e ia i de tala adu gi goodou!” 22Luoono maadua ne tala muna nei i hiidinga gilaau gu maatagu i dagi o de gau Ssuu; de gau Ssuu gu lava i de hagamodu bolo be goai naa huu e daalaa bolo Iesu go de Klisdo gu dee alaange i de ulu i lo te synagogue. 23Aalaa hiidinga a luoono maadua ne hai ange ai laa, “Siilia ange gi de ia, ia gu se daane madua.”

24Gai gilaadeu ga hagahi ange hogi taane nogo dee gide laa i de lua hanonga ga ssili ange gi de ia, “Koe gi hagamahamaha ina de Maadua. Gimaadeu e iloo bolo taane naa se daane haisala.”

25Taane laa ne hai ange, “Au e dee iloo be ia se daane haisala aabe deai. Gai deenei dagu mee e iloo, i mua gai au nogo dee gide, aagai iainei au gu gide!”

26Gai gilaadeu ga ssili ange gi de ia, “Gai ni aha donu aana ne hai adu gi de goe? Gai dee hee dana hai ne hai ai goe ga gide?”

27Ia ne hai ange gi gilaadeu, “Au gu lava i de tala adu gi goodou, gai goodou tee hagallongo agu muna. Gai gu aha goodou gu llodo ai naa e aahe ange e ssili? Goodou gu llodo naa hogi e hai gi ni dangada agoago niiana?”

28Gai gilaadeu ga hagadogaa ia, ga hai ange, “Koe se dangada agoago donu nii taane naa! Gimaadeu ni agoago nii Moses. 29Gimaadeu e iloo bolo de Maadua ne basa ange gi Moses, gai gimaadeu e dee iloo donu be go hee o taane naa ne humai ai naa.”

30Gai taane laa ga hai ange gi gilaadeu, “E kona de hagalele mouli oodou muna; goodou e dee iloo be go hee oona ne humai ai, gai ia gu hai ma gu gide au. 31Gidaadeu e iloo bolo de Maadua e dee hagallongo dalodalo a de gau baubau, gai ia e hagallongo dangidangi a dangada e daumaha ange gi de Maadua ma de daudali ono lodo. 32Mai i taamada o henua i lalo, gai gidaadeu tigi langona, bolo gu dahi dangada ne huugea luu mada o tangada dee gide, mai i dono haanau. 33Noo taane nei tee humai i daho de Maadua, gai ia e dee maua donu i de hai dahi mee daudahi.”

34Gai gilaadeu ga hai ange gi de ia, “Koe se dangada e honu i de baubau mai i doo haanau, gai koe e humai e agoago mai gimaadeu!” Gai gilaadeu ga alualu ia gi hano gee mai i lo te synagogue.

Tee kide i de baasi gi de hagasaalunga

35Gai Iesu ne langona bolo de gau Ssuu gu alualu taane laa gi hano gee mai i synagogue, gai ga hegide ange huu gilaau, gai Iesu ga ssili ange gi de ia, “Koe e hagadonusia Tama a Tangada?”

36Taane laa ne ssili ange gi de ia, “Tangada Aamua, daalaa mai be goai donu go ia, gai au ga hagadonusia ai ia.”

37Iesu ne hai ange gi de ia, “Go au donu deenei aau e gidee naa, gai go au donu e basa adu nei gi de goe.”

38Taane laa ne hai ange gi de ia, “Tagi Maolunga, au e hagadonusia,” gai ia ga duuduli ga daumaha ange gi de ia.

39Iesu ne hai ange gi de ia, “Au se humai gi henua i lalo e hagamodu ai muna; gai gi gidee ai gilaadeu e dee kide, gai gilaadeu e gidee gi dee kide.”

40Gai hanu Pharisee i kilaa ne langona e gilaadeu ana muna, ga ssili ange gi de ia, “E aha, koe e hagadaba naa bolo gimaadeu e dee kide hogi?”

41Iesu ne hai ange gi gilaadeu, “Noo goodou e dee kide, gai goodou e dee hagabaubau i oodou haisala; aagai go hiidinga goodou e hagataba bolo goodou e gidee, deelaa ai, goodou e haisala donu.”

Currently Selected:

John 9: DBD

Highlight

Copy