Markɩ 8

Kɩɛr Jeju ha tɩbɩla gbɩlanɩ yenã dɩkɔ

(Mat 15:32–39)

1Ga bɔɔlera tibil jɔ bir gbɛbɩ wo, sɩ wa hana thɩ̃ɛ na khoaˈ; dɩ Jeju we ɔɔ kpãkpãadara a so war ayɩ: 2Bʋɔ fʋ mɛr tɩbɩlalaakɛ, gɩdonɩ wire yẽther ha gɩrɛ wɩ hanɩ kha na mɛrɛ, sɩ wa hana thɩ̃ɛ na khoaˈ. 3Ado mɩ bɩlã wɩ wɩ kɔna sɩ dɩ wa yɩ dɩkoraˈ, ga khabɩ wɛr hʋɛra, gɩdonɩ ɩkhasɔ wɛrra ther ƴɔɔ. 4Dɩ ɔɔ kpãkpãadara sʋʋraa: Ka sa puno na yɩ dɩkɔ na ha tibil ca ƴɩrɛ kɩɛr bəənnə dɩ wa hi. 5Dɩ Jeju bule wi: Buru yemɔ̃ nɩ hana? Dɩ wɩ tu: Makonyɔ gɩ. 6Dɩ Jeju so tɩbɩlalaale wɩ dera, sa gba buru makonyɔra a fʋɔr Thãgba pɛr, sa kuur a ha ɔɔ kpãkpãadara, wɩ gba tɩnɛnɛ tibil jɔɔlera; dɩ wɩ gba tɩnɛ wɩ. 7Sɩ wɩ hananɛ dakha dɩkhaa thʋ̃ bi, dɩ Jeju fʋɔr Thãgba a pɛr thʋmanaale, sa so wɩ tɩnɛnɛ wɩ dakha. 8Wɛr fɛʋ bɩɛlbɩɛl kɔɔ khor a hi phi; dɩ kpãkpãadara gbaar dakurusɔɔkɛ sɛnɩ dɩɩ hi kpona makonyɔ. 9Sɩ konaale kɔɔ thɔɔrɛ gbɩlanɩ yenã. Agɩpɩ Jeju bɩlã wɩ, 10sa lõ dapaara gboroona na ɔɔ kpãkpãadara a jal Dalmanuta khʋra.

Kɩɛr jɔfʋ bʋ dʋdara n ƴaal nɔ kpaa thɩ̃ɛ Jejura

(Mat 16:1–4)

11Jɔfʋ bʋ dʋdara wɛ, a pɔ a ma dɩ wa‐n bana kha na Jeju wɩ pɩɛraa pheru, a bulee ayɩ, a nɛ nar na nɔ kpaa thɩ̃ bɩɛl dɩ ɔɔ punona thãgbara ƴũ gɩ the.#Mat 12:38; Lu 11:16 12Dɩ Jeju ˈwɩɩ na bɩnɛ sa so: Mɔ̃gɩdo dɩ nɩ̃dara na‐n ƴaal nɔ kpaa thɩ̃ɛ ya fɛ? Sobɔr mɩ so nar, wa nɩna wɩ nɔ kpaa thɩ̃ bɩɛllakaˈ.#Mat 12:39; Lu 11:29

13Agɩpɩ dɩ faa wɩ, sa bir lõ gboroona a iir gɩ̃ iiro.

Jɔfʋ bʋ dʋdaraa dɩɩr na Ɛrɔɔdɩɩda tabɩɩr n mɩɩ

(Mat 16:5–12)

14Sɩ kpãkpãadara kɔɔ diinəne buru gbaar, sɩɩ do bɩɛl dɩbara wɩ hana le gboroona. 15Dɩ Jeju kpãkpãa warɛ ayɩ: Na‐n jɩɛ dʋ bʋrɛ, na‐n tɛ̃tɛna jɔfʋ bʋ dʋdara na Ɛrɔɔdɩɩ tabaˈ.#Lu 12:1 16Dɩ kpãkpãadara na‐n mɩɩ kha bururaakɛ wa kɔɔ gbanaˈ. 17Dɩ Jeju jɩ mɔ̃ wɩ‐n mɩɩnɩ kha a bule wi: Mɔ̃gɩdo dɩ na‐n mɩɩ kha bururaakɛ na kɔɔ gbana? Na yɩ gaa, dɩ na jɩ kɩrʋ paa? Anɩdara khɩɩrɛ waa gel koe. 18Yinəna nɩ hananɩ wo na‐n yaa? A hanana nũu wo na‐n naa? Dɩ na jɩna gaa?#Jer 5:21; Eje 12:2; Mar 4:12 19Ɔbɔɔkɛ mɩ kɔɔ kuurni buru yemɔɩ a ha kona gbɩlanɩ yemɔɩ, kpona yemɔ̃ nɩ kɔɔ gba dakuruukɛ sɛnɩ dɩɩ hi? Dɩ wɩ tu: Kpona yʋɔr yenyɔ gɩ. 20Dɩ ɔbɔɔkɛ mɩ kɔɔ kuurni buru makonyɔ a ha kona gbɩlanɩ yenã, kpona yemɔ̃ nɩ kɔɔ gba dakuruukɛ sɛnɩ dɩɩ hi? Dɩ wɩ tu: Makonyɔ gɩ. 21Dɩ Jeju so war: Na yɩ gɩ a thʋ̃ jɩ kɩrʋ pɩrakɛ mãa?

Kɩɛr Jeju khɛr Bɛcaɩda yaarʋ yinə

22Wɩ kɔɔ danɩ Bɛcaɩda le tɩbɩla kpa yaarʋ, a pɔna Jejura dɩ wa‐n phʋʋrnaa a thaaraa. 23Dɩ Jeju fʋrɛ yaarʋʋle nyɔ̃ɔ, a kpaa thena dɩ khuirə, a phii nyɔ̃thɩ̃ɩ pɩɛraa yinəna, a dɛɛnanaa nyɛ̃ɛ sa bulee: Fɩ yɩrɛ thɩ̃ɛ ya? 24Dɩ yaarʋ gba ƴɩɛ ƴũ sa so: Mɩ yɩrɛ tɩbɩla, sɩ mɩ yɩ wɛr dɩ wɩ ho thɩra dɩ wa‐n ɩɩr. 25Sɩ Jeju bir thaaraa yinəna wo, dɩ dabɔɔkɛ yaarʋ kponɩ yinə, dɩɩ do a khɛrrɛ da‐n yɩ thɩ̃ɛ fɛʋ wawawal. 26Sɩ Jeju sʋʋraa: Kɔna, fa‐n kɛr bir lõ dɩɩra sa kɔ̃aˈ.

Kɩɛr Pɩɛr yɩ Jeju dʋɔn Kirisiti

(Mat 16:13–20; Lu 9:18–21)

27Agɩpɩ Jeju na ɔɔ kpãkpãadara gba jal Sejare Filipi dɩ khʋra; dɩ le a bule ɔɔ kpãkpãadara hʋɛra: Amɛ tɩbɩla n yɩ mɩ dor? 28Dɩ wɩ tu: Ɩkhasɔ n yɩ, Jã Batɩsɩtɩ fɩ do; wɛ n yɩ, Elɩ fɩ do; wɛ n yɩ wo, Thãgbaa bobon fɩ do.#Mar 6:14–15; Lu 9:7–8 29Sɩ Jeju bule wi: Sɩ ner, amɛ nɩ‐n yɩ mɩ dor? Dɩ Pɩɛr tu: Kirisiti fɩ do.#Jã 6:68–69 30Sɩ Jeju kpãkpãa warɛ, wa‐n so tibillə ga.

Kɩɛr Jeju mɩɩ ɔɔ khi na ɔɔ khi ɩɩr

(Mat 16:21–28; Lu 9:22–27)

31Agɩpɩ Jeju ma da‐n dɩɩr ɔɔ kpãkpãadara, da‐n sona war ayɩ: Dɔ mɛrkɛ dʋɔnnɩ tibili Bikuun n gaar bʋɔ jɔɔ; dɩ kɔ̃tɩna, na bonɩ jidaar kɔ̃tɩna, na jɔfʋ dɩɩrdarasɔ na bo mer, sɩ dakha wa kʋ mɛr, sɩ a wire yẽther ka ma ɩɩrɛ khirera. 32Casɩ a‐n mɩɩ wɩ gele. Sɩ Pɩɛr kpaa kana pa kpɩɩ da‐n phaan. 33Sɩ Jeju kɛr, da‐n hɩɩn ɔɔ kpãkpãadara, sa phã Pɩɛr dɩɩ khɩɩr ka ayɩ: Hala mɩ ƴɔɔ Satã, gɩdonɩ fa‐n kpɩɛr Thãgbaa kha ga, sɩ tibil khaa fɩ‐n kpɩɛr.

34Agɩpɩ Jeju we tibil jɔ na ɔɔ kpãkpãadara dɩ wɩ pʋɔraa dɩ so war: A ntɛ pɛr haar ɩna‐n kpa mar, dɔ a faa dɩbara yɩrnanɛ, sɩ a gba ɔɔ kʋkʋ thɩr a na‐n kpana mar.#Mat 10:38; Lu 14:27 35Gɩdonɩ tibilikɛ n tɛbanɩ ɔɔ yi, ga ka na buurəəre; sɩ ʋrɛɛkɛ yi na bonɩ mɛrɛra, na Thãgbaa tutugo bʋɔɔ thɩmɩɩra, ɔr na lɛ waa gel.#Mat 10:39; Lu 17:33; Jã 12:25 36Anyee bɔ ga taa tibil, ado a ˈlɛ thɩ̃ɛ fɛʋ thɩɩraakɛ sɩɩ do ɔɔ yi buurəəre. 37Anye haankɛ dɩ tibil na gba na debina ɔɔ yi? 38A yicuru fʋ tibil mɛrɛra na ɩ̃ thɩmɩɩra nĩdaraakɛ thɩ̃thɩɩn, kɛ na telenenɩ Thãgbara ga, sɩ dɩ wa‐n cʋʋ puure, yicuru na fʋrɛ mɛr tibili Bikuun dakha ntɛra, ɔbɔɔkɛ ma ɩnɩ na ɩ̃ Thɩɩ i dʋbɩ nakha thɔ̃thɔ̃daar thu phuusɔ.

Currently Selected:

Markɩ 8: LOBIRI

Highlight

Copy