Maak 9

Jézu dɔbɛ nɔla gɔ nwiin

(Mt 17:1–13; Lk 9:28–36; 2 Pi 1:16–18)

1Jézu lé wo lɛ é ziin léé: Munu lé wo ke ’ko, wo va mi kenu ’ka dan ga lɛ lo fɔɔ yé wa ye léé, Kazambale a é plale munu nwiin plɛplɛ. Maa fe ka lɛ.

2’Bɛ zuo yi suiɛdo, Piɛri koo, Jak koo, Jan koo, Jézu wo si yé é go wo nya gɔ torole nwiin é yɛrama. A yara dɔbɛ nɔla wo yuɛ va; 3alé sɔnu kɛlɛ nyananyana, yé wo kɛlɛ fu tata. Mian é sɔ zuruwo yé é kɛlɛ fu tata bélé sɔ ’ko zo, ’bɛzan ’ka tɛrɛ la ’ko lo. 4Éli valé Moizi bɔra wo va, ’té woo glewoo Jézu va. 5Yé Piɛri lé Jézu lɛ léé: Anzan, kaa vole ’ko a é zima; ’ko ban yaa dɔ ma; izé do, Moizi zé do, yé Éli zé do. 6Gligli zén wo gi, bɛwemalé Piɛri ’ka wefedére dɔɔ lɛ lo. 7Yé lafu tua wo nwiin, yé Bale we fe lafu gi yé é léé: Mi ’ko a an be lé é sɔ an lɛ é baba, a nya. ’Ka tɔné dɔ a lɛ. 8’Bɛna tɔɔn yé Jézu zuomunu ’wo zi gini, yé wo Jézu do kpen ɛ ye ’wo va.

9Jézu valé é vamunu yaa ke aan wo gɔ zunna, Jézu lé wo lɛ léé, wean wa ye bɛ, té wa fe mi do kpen lɛ lo, fɔɔ ’té ’yee blami Be nwa ɛ wo gamunu va. 10Wo we ’ko yɔɔ ’wo méléna, yé wo we laa ’wo ke lee léé: Mɛ fɛ ɛ ke mi nwale gamunu va nyaa?

11Jézu zuomunu we laa é lee léé: Mɛmalé sɛbɛgifemunu léé, é a lé Éli é da é viniin? 12Jézu a zi pa wo lɛ léé: Éli é dan da lɛ é vinin, weboen nya. É dan wenu faa dɔ lɛ wo dɔbɛ gi é ziin. Yé mɛmalé wo maa blami Be lé we gyɛ sɛbɛ gi léé, é a lé an nyané ble é baba yé wan ye boami nyaa? 13Naa, maa lé ka lɛ léé, Éli da, yé fɛan zo lé é sɔ munu lɛ, wa kɛlɛ a lɛ a zo, alé wean wa gyɛ sɛbɛ gi, a yɛrama.

Né lé yo ke a gi, Jézu a béli

(Mt 17:14–21; Lk 9:37–43)

14Wo bɔ aan wo Jézu zuomunu pɔnénu va, wo mi gu blɛn ye wo zi, ’té sɛbɛgifemunu a zavɔna wo va. 15Mi gu Jézu ye tɔɔn, wo kɛlɛ wɛ, yé wo vlan si a vazia, wele a va we ma. 16Yé Jézu we laa wo lee léé: Mɛ we ta lé ka a zavɔna wo vaa? 17Yé mi gu va mi do a zi pa léé: Anzan, an da an be nya i va. Bobogyɛ yo a a gi. 18Dé yo a kun fɛofɛana, éé a diaan tɛrɛ va, ’té né ’léé buiɛ éé bɔa; ’té éé suiɛ la blé; yé a wi faa tere éé plaan a ma. Maa zanté vɔ i zuomunu lɛ léé, wo yo si a gi, naa, wo ’ka bɔ lɛ a lɛ lo. 19Jézu lé wo lɛ léé: Blipaanlo bɛn, ka léé, an lɛɛ nɔɔ ɛ kɛlɛ ka va faa ’lɛ yé ka bli é vo an lɛɛ? Ka léé, maa kɛlɛ kaa? ’Ka da a nya an va. Yé wo da a nya a va. 20Yo Jézu ye tɔɔn, é né manyɔɔn plɛplɛ. Né dia tɛrɛ va, yé é burula ’é ’léli buiɛ bɔle nya. 21Jézu a laa a ti lee léé: A péli sia aan wo a lɛɛ nɔɔ loo? É léé: A péli sia a kiéné la. 22Yé gɔnɔ kiɛre nya yo a diaan kyɛ valé ’yi va, alé zamaga wole we ma. Dé i bɔa we do kɛlɛle lɛ, ’i nyanai zén ko ta; ’i bɔ ko va. 23Jézu lé a lɛ léé: Mɛmalé i léé, dé an bɔalɛɛ? Mian éé bli paan, éé bɔa we faa kɛlɛle lɛ. 24’Bɛna tɔɔn, gɔnéné ti siaa léé: An bli a i lɛ, naa, ’i bɔ an va anlé bli paan lo we ma. 25Jézu a ye aan wo léé, mi faa a dana ’é va, é siaa yo tiridɔle ta, yé é léé: Bii bobogyɛ yo lé i mi gya bobo nya ’té i mi tɔné ’wiié, ’i si né ’ko gi, té i wɔra a gi é dɛrɛ lo. 26Yé é si a gi siaalenu nya, yé é né manyɔɔn plɛplɛ. Né kɛlɛ bélé mi gale zo; bɛwemalé mi kiɛre léé, é ga. 27Naa, Jézu a kun é bɛ ma, yé é a nwa yé é dɔ loru.

28Jézu wɔra aan wo kɔn gi, ’té wa wo saa, a zuomunu a laa a lee léé: Mɛmalé ko ’ka bɔalɛ yé ko yo ’ko si né gi loo? 29É lé wo lɛ léé: Bazorole saa nya lé yo gɔnɔ ’ko zo éé sié mi gi.

Jézu é gale fale vɔ é ziin

(Mt 17:22–23; Lk 9:43–45)

30Yé wo si ’bɛna, yé wo Galilé tɛrɛ kini. É ’ka sɔ lɛ Jézu lɛ léé, munu a gi dɔɔ lo. 31Yé é we paa é zuomunu gi, yé é lé wo lɛ léé: Wo dan maa blami Be pa lɛ munu lee, yé wo dan an gyɛ lɛ, yé dé wo an gyɛ faa, yi fié a yi yaazan nya an dan nwa lɛ é ziin. 32Naa, a zuomunu ’ka we ’ko gi ’ma lɛ lo, yé wo kana a gi laale ma a lee.

Mi kyɛn a mi blɛn nyaa?

(Mt 18:1–5; Lk 9:46–48; Fil 2:5–11)

33Yé wo bɔ Kapɛnaum. Bléyian va lé wa kɔn gi, Jézu we laa wo lee léé: Mɛ lé za lé ka a vɔa lao ziaa? 34Naa, wo ta vo é dɔle. Wo za vɔ zia léé, dé wo va mi kyɛn ɛ ke mi blɛn nyaa? azama. 35Yé Jézu nyana, yé é mi vu ta fié laa, yé é lé wo lɛ léé: Dé é sɔ mian lɛ léé, ’é kɛlɛ mi vininzan nya, é a lé ’bɛzan ’é kɛlɛ mi voélazan nya; é valé mi faa wuozan nya. 36Yé é né kiéné do si yé é da a nya wo méléna, yé é a sia yé é a nyana é boro la, yé é lé wo lɛ léma: 37Dé miomian né kiéné ’ko zo sié anlé we ma, ’té éé maabozen sié é ziin, yé mian éé maa sié, maa‐an é an si lo, naa, mi lé é an pa zia, ’té ’bɛzan lé é a si.

Mi lé é ’ka ko ma lo, é a ko va

(Lk 9:49–50)

38Jan lé a lɛ léé: Mizan, ko mi do ye yonu sina munu gi i tɔ nya, yé ko a yi ga a lee. É ’ka ko va lo, ’bɛzama. 39Yé Jézu léé: Té ka a yi ga a lee lo. Mian éé gyɛzorowe kɛla an tɔ nya yé ’bɛ zuo tɔɔn yé é wenaané fe an ma, ’bɛzan ’ka lo. 40Mi lé é ’ka ko mazan nya lo, é a ko va. 41Yé dé miomian é ’yi kanané do nɔ ka lɛ, ka kɛlɛle Krist zé nya we ma, maa lé ka lɛ webozen nya léé, ’bɛzan é dan a ma gooli ye lɛ kpɔ. É ’ka dan vuru lɛ a ma lo.

Mi gi danle

(Mt 18:6–9; Lk 17:1–2)

42Naa, né kiénénu lé woo bli paan an lɛ, dé mi do wo va né do ’wuo sɛrɛ, azé fila vɔ kɔɔn léé, wo fɛzɔngɔlɛ yere a bɔrɔ ma yé wa vuli wɛyi va.

43Dé i bɛ i vɔ wenyané gi, bé kini; a fila vɔ léé, i vo é yuɛma la gi bɛ kinizan nya é mini i gole i bɛ fié nya jéɛna kyɛ lé é ’ka dirian monomono lo, a va ta, 44fɛana lé wo ziri ’ka gaan monomono lo, yé kyɛ ’ka dirian monomono lo, ana. 45Yé dé i gane i vɔ wenyané gi, bé kini; a fila vɔ léé, i vo é yuɛma la gi tunbozan nya é mini i gole i gane fié nya jéɛna kyɛ lé é ’ka dirian lo, a va ta, 46fɛana lé wo ziri ’ka gaan monomono lo, yé kyɛ ’ka dirian monomono lo, ana. 47Yé dé i yuɛ i vɔ wenyané gi, bé bɔra a gi; a fila vɔ léé, i wɔra Kazambale lé fla i yuɛ do kpen nya é mini wolé i vulile i yuɛ fié nya jéɛna kyɛ va ta, 48fɛana lé wo ziri ’ka gaan monomono lo, yé kyɛ ’ka dirian monomono lo, ana. 49Kyɛ é dan kɛlɛ lɛ mi faa ma wɛ nya. 50Wɛ a fɛ zin nya, naa, dé wɛ néné si é ma, mɛ fɛ nya lé wa kɛla nénéé? Wɛ ’é kɛlɛ ka ma ma, yé ’ka vo ka ke va drɔɔ ma.

Currently Selected:

Maak 9: GOURU

Highlight

Copy