Maak 8

Jézu fɛ nɔ mi baa fié lɛ

(LvS 146:7; Mt 15:32–39)

1’Bɛ bléyi ’ko va, mi gu blɛn zén ékeva é ziin, yé fɛblele ’ka wo lee lo. Jézu é zuomunu laa yé é lé wo lɛ léé: 2An nyanai éé zén‐é mi gu ’ko ta. A yi yaa lo ’té wa an va, ’té wo ’ka tan fɛ do kpen ble lɛ lo. 3Wo va mi kenu sina a baa; dé an wo pa zia léé, ’wo go ’wo va lɔrɔ nya, wo dan zɔrɔ lɛ zia. 4A zuomunu lé a lɛ léé: Kaa kɛlɛ kaa yé wo kan buru nya bwi gi ’koo? 5Jézu a laa wo lee léé: Buru a ka lee nɔɔ? Wa zi pa léé: Sɔrafié. 6Yé é mi gu nyana tɛrɛ va, yé é buru sɔrafié si, yé dé é Bale bɔ vɔ faa yé é a bɔi, yé é a nɔ é zuomunu lɛ, wolé a gulile munu ma we gi, yé wa guli mi gu ma. 7Yé pɔné kenu a wo lee é ziin. Dé Jézu Bale bɔ vɔ faa, é a nɔ é zuomunu lɛ yé wa guli munu ma é ziin. 8Yé wo fɛ ble yé wo kan, yé wo kyɛɛné sɔrafié fan a kurunu lé wo vo, wo nya. 9Woo bɔa mi baa fié sɔnɔ. ’Bɛ zuo yé Jézu wo pa zia.

10Tɔɔn, yé Jézu vɔ ’yitagoro gi, yee valé é zuomunu nya, yé é go Dalmanuta tɛrɛ la.

Munu tɔmase ma laa

(Mt 16:1–4; Lk 12:54–56)

11Farizimunu da yé wo kun zavɔle ma Jézu va a gi danle we gi. Wo léé, ’é tɔmase do si ’wo lɛ la gi. 12Jézu flin vɛɛɛn, yé é léma: Mɛmalé mi kulu ’ko éé tɔmase ma laan? Wo ’ka dan tɔmase gɔɔn lɛ mi kulu ’ko lɛ lo. Maa fe ka lɛ.

13Yé é si wo va yé é vɔ é ziin ’yitagoro gi, gole ’yi gɔɔn bɛ ma we gi.

Farizimunu valé Érɔd lé lévɛn lé we

(Mt 16:5–12)

14A zuomunu gi san yé wo ’ka go lɛ buru nya wo lee lo; é a wo lee goro gi do kpen. 15Jézu we pla wo lɛ léé: ’Ka yuɛ pa kabozen va é zima Farizimunu valé Érɔd lé lévɛn lé we ma. 16A zuomunu vo ’wo va we blena yé wo léé: Buru ’ka ko lee lo, ’bɛ lé we ma lé é a fe. 17Jézu a ’ma aan wo, é léé: Mɛmalé ka a ka va we blena léé, buru ’ka ’wo lee lo, ’bɛ we maa? Ka bɔn‐in ’ka ka ma loo? Ka ’ka we gi maan loo? Ka tɔné gi a yuyuu? 18Ka yuɛnu a, yé ka ’ka yɛrɛ yé loo? Ka tɔnénu a, yé ka ’ka we maan loo? We sele ’ka dɔa ka gi monomono loo? 19An buru soru bɔi mi baa fié wuru soru zé nya, kyɛɛné nɔɔ lé ka fan a kurunu nyaa? Wa zi pa léé: Vu ta fié. 20Yé an buru sɔrafié bɔi mi baa fié zé nya, kyɛɛné nɔɔ lé ka fan a kurunu nyaa? Wo léé: Sɔrafié. 21Yé é lé wo lɛ léé: Ka ’ka tan a gi ’ma lɛ loo?

Bɛtsaida yuɛwiizan béli

(Mk 10:46–52; Jn 9:1–11)

22Yé wo go Bɛtsaida, yé munu da yuɛwiizan do nya Jézu va, yé wo zanté vɔ Jézu ma léé, ’é bɛ mane a ma. 23Yé é kun yuɛwiizan bɛ ma yé é goan fla gini ma, yé ’bɛ zuo é ’léli pa a yuɛ ta, yé é bɛ pla a ta, yé é we laa a lee léé: I fɛ do yee? 24Yé é fɛna gini, yé é léé: An munu yé, naa, maa wo yé bélé yilinu zo, ’té wa tawona. 25Jézu é bɛ pla é ziin a yuɛ ta. Yuɛwiizan fɛna gini aan wo téiin, é béli, yé é fɛna faa ye wéiin. 26Yé Jézu a pa zia léé, ’é go kɔn ’léé, yé é léé: Té i go fla dii lo.

Piɛri Jézu ta bɔra

(Mt 16:13–20; Lk 9:18–21)

27Jézu valé é zuomunu go flanu lé wo ke Sézaré Filip tɛrɛ la, wo ta. É we laa wo lee zia léé: Munu léé, maa a de nyaa? 28Wa zi pa léé: Wo léé, bii a mi batizéwozan Jan nya. Mi kenu léé, bii a Éli nya. A kenu léé, bii a balelayemunu va balelayezan do nya. 29Yé é lé wo lɛ léé: Yé ka nii? Ka léé, maa a de nyaa? Yé Piɛri a zi pa léé: Bii a Krist nya. 30Jézu a yi ga wo lee plɛplɛ léé: Fɛan zo lé ka an ta bɔra, té ka fe mi bɛnu lɛ lo.

Jézu é gale fale vɔ

(Mt 16:21–28; Lk 9:22–27)

31Yé é kun we paale ma wo gi yé é léé: É a lé maa blami Be, an nyané ble é baba; é a lé mi segelenu koo, Balebanmunu segelenu koo, sɛbɛgifemunu koo, ’wo sɔn vɔ an ma; é a lé ’wo an gyɛ, yé yi fié a yaazan nya yé an nwa gamunu va. 32É we ’ko fe kpaklaa. Yé Piɛri Jézu si wo va sɛ yé é we pla Jézu lɛ yara tɔntɔn nya. 33Naa, Jézu nɔla, yé é ’é zuomunu pɔné gini, yé é we fe Piɛri lɛ yara tɔntɔn nya yé é léé: Satan, ’i gyɛ i zuo. Wenu lé i gi bɔrɔan ’bɛ nya bɛ, Kazambale zé ’ka ’bɛ zo lo; munu zé bɛ.

34É mi gu valé é zuomunu laa aan wo, yé é lé wo lɛ léé: Dé é sɔ mian lɛ léé, ’é da an zuo, ’é bli si ébozen lɛ yé ’élé yiliblan sia yé ’é da an zuo. 35Naa, mian é sɔ a lɛ léé, é ’élé tɛrɛla kɛlɛ blɛn, é dan vuru lɛ a gi, yé mian é vuru we faa gi maa valé Wenéné ’ko lé we ma, ’bɛzan é dan ézé ye lɛ. 36Yé dé mi tɛrɛlafɛ faa ye, dé ébozen san, ’bɛ tɔnɔ lé ke mɛ fɛ nyaa? 37Yé mi éé mɛ fɛ no ébozen pa gii? 38Naa, mian éé yara gya maa valé an dérenu lé we ma, bléyi ’ko vamunu lé wo ke pɛnpɛnnégyɛzannu valé wenyanékɛlɛzannu nya, wo méléna, dé maa blami Be da an Ti lé fuasan nya, é valé lanje sauunnu nya an va, yara é dan an gyɛ lɛ ’bɛzan lé we ma é ziin.

Currently Selected:

Maak 8: GOURU

Highlight

Copy