Luk 2
2
Jézu yaale
(Éz 7:14; 9:5; Mt 1:18–25)
1’Bɛ yinu la, Sézaa Ogisi bélidɔwe fe léé, ’wo tɛrɛlamunu faa nɔnɔ. 2Bléyian va lé Kiriniu a Siri munu lé gbɔrɔnama nya, a bléyi nya lé wo munu nɔnɔle vininzan ’ko kɛlɛ. 3Munu faa go wo tɔ gyɛ lɛ ’wobo lé fla.
4Jozɛfu a David kululazan nya David lé kɔn gi, amalé é si Galilé tɛrɛ la, fla lé wa laama Nazarɛt, a ta, yé é go Judé tɛrɛ la David lé fla lé wa laama Bɛtléɛm, a ta, é tɔ gyɛle we gi, 5yee valé é na Mari nya, ’té ’bɛ bɔn a é ma.
6Wa ’bɛna aan wo, Mari lé néyaabléyi bɔ, 7yé é élé blɛn la né yaa gɔné nya. Wo ’ka nyanana ye lɛ kɔnnu gi lo, amalé é sɔ vuru a ma, yé é a yia winu lé fɛble kɛsu gi.
’Blatabinmunu valé lanjenu
(Éz 41:27; Dan 9:21–26)
8’Bɛna mi, ’blatabinzannu éé yiié féi, yuɛpale wolé trubɛnu va we gi é béli. 9Yé Mizambale lé lanje do da wo va yé Mizambale lé fuasan diri wo zi. Wo gi nyɛ blɛn kini. 10Naa, lanje lé wo lɛ léé: Té ka kana monomono lo; naa, wenéné lé é dan munu faa gi nana lɛ é baba, an da a fe lɛ ka lɛ. 11Yee lé é ke ’ko: Mibélizan lé ke Krist nya, Mizan nya, waa yaa ka lɛ kyɔ, David lé fla. 12Tɔmasean ka dan a dɔɔ lɛ a ma, yee lé é ke ’ko: ka dan né dɛrɛ do ye lɛ é yiale winu lé fɛble kɛsu gi, ’té sɔ a é vurule a ma.
13Tɔɔn, lai sunya gu da lanje va Kazambale tɔ zin fele nya, yé wo léé:
14’Wo fua nɔ Kazambale lɛ fɛna loru baa mi,
Yé munu lé wo sɔ a lɛ, ’wo vo drɔɔ tɛrɛ la ma.
15Lanjenu si aan wo ’blatabinmunu va yé wo go la gi, ’blatabinmunu lé ’wo ke lɛ léé: Kaa go Bɛtléɛm yé we lé é bɔ yé Mizambale a fe kaa lɛ, kaa ye. 16Wo go fiéfié, yé Mari koo, Jozɛfu koo, né dɛrɛ lé é ke é yiale winu lé fɛble kɛsu gi koo, wo wo ye. 17Dé wa ye faa, we lé wa fe wo lɛ né dɛrɛ lé we ma, wa zuo fe mi bɛnu lɛ. 18Wean ’blatabinmunu a fe, munu a ’ma aan wo, wo gi vuru. 19Mari we ’konu faa ta dɔ é bli gi, ’té éé wo bɔrɔan é bɔn‐in. 20Yé ’blatabinmunu diéra wo pa gi, Kazambale tɔ bɔle valé a tɔ zin fele nya, we faa lé wa ’ma yé wa ye, a ma, yé é kɛlɛ fɛan zo lé wa fe wo lɛ, a zo.
Wo Jézu gane dɔ yé wa nagɔɔn Balebangikɔn gi
(Fw 13:2, 11–15; Lév 12; Gal 4:4–5)
21Né dɛrɛ yi sɔraazan bɔ aan wo, wo go a gane dɔ lɛ, yé wa tɔ pa Jézu, tɔ lé lanje a fe a bu lɛ a bɔn sile ’lɛ, a nya. 22Dé né vla bole nyaa Moizi lé bélidɔwe yɛrama, Jozɛfu valé Mari go a nya Jérusalɛm a nagɔɔnle Mizambale lɛ we gi, 23fɛan zo lé é ke é gyɛle Mizambale lé bélidɔwe nya, a zo; wo léé: ’Wo négɔné vininnu faa pa é yɛrama Mizambale zé nya. 24É ziin, wo go Bale ban lɛ, dé plala fié léé? dé fla plawuo boroné fié léé? wo nya, fɛan zo lé Mizambale lé bélidɔwe a fe, a zo.
25Yé bé ye, mi do a Jérusalɛm wa laama Siméɔn. Mi ’ko a mi tegele valé Bale bɔzan nya, yé é a Izraɛl tɔrɔpaazan lɛbɛnna, yé Léli Sauun a a ta. 26Léli Sauun a gɔɔn a lɛ léé, dé i ’ka tan Mizambale lé Krist ye lɛ lo, i ’ka gaan lo. 27Kazambale Léli a nyunu léé, ’é go Balebangikɔn gi. Yé dé Jézu yaazannu da Jézu liiné nya bélidɔwe lɛsɔɔle a vazia we gi, 28tɔɔn, Siméɔn a si é bɛ gi, yé é Kazambale tɔ zin fe, yé é léé: 29Anzan, ’i daan maa i wuozan ma sin, yé ’an go drɔɔ, dére lé bé fe an lɛ, a yɛrama. 30Naa, an yuɛ ilé mibélizan ye, 31mi lé bé kɛlɛ mibélizan nya munu faa yuɛ va, maa a ye. 32É a bɛnnu vakinisan nya, ilé munu Izraɛl tɔbɔle nya yé maa a ye an yuɛ nya.
33Wenu lé Siméɔn ke a fena né lé we ma, a ti valé a bu gi vuru wo ma. 34Siméɔn wo drɔɔ vo yé é lé né bu Mari lɛ léé: Bé ye, Bale né ’ko dɔ Izraɛl mi kiɛre saanzan valé wo drɔ?-?zan nya é ziin, yé é a dɔ tɔmase lé wo dan za vɔ lɛ a ta, a nya, 35mi kiɛre bɔn‐in bɔrɔwe ta bɔrale we gi, yé we lé é dan bɔ lɛ a ma, biibozen, é dan yaa lɛ i bɔn‐in bélé kyɛ zo.
36Balelaye le do ana é ziin, é a Azɛɛ mi Fanuɛl lu Ane nya. É a leblané nya; é bo si aan wo é vo bofla lɛɛ sɔrafié. 37’Bɛ zuo yé é vo gyɛzarale nya, yé a lɛɛ a yɔ ziɛn wɔlɛ ziɛn. É ’ka sié Balebangikɔn gi lo, ’té é Kazambale bɔa lɔrɔ sɔnle valé bazorole nya, bladi nyanadi. 38Yee é ziin, é da yee bléyi duo nya yé é Kazambale tɔ zin fe, yé munu faa lé wo ke Jérusalɛm munu vole woboma lɛbɛnna, é Jézu lé we fe wo lɛ.
Wo go Nazarɛt
(Mt 2:22–23)
39Jozɛfu valé Mari nyaa aan wo Mizambale lé bélidɔwe faa lɛsɔɔle nya, wo go ’wolé fla Nazarɛt, Galilé tɛrɛ la.
Pɛniɛné Jézu a Balebangikɔn gi
(Éz 11:1–2)
40Yé né tin yé é dɔ plɛplɛ, É a é fanle wedɔɔle nya, yé Kazambale bɛ zin a a ta.
41Jézu yaamunu éé goo Taboyi lé fɛti kɛlɛ lɛ lɛɛ faa do do ma Jérusalɛm.
42Jézu lɛɛ bɔ aan wo vu ta fié wo go ’bɛna fɛti kɛlɛ lɛ a kɛlɛbɛ kyɛn yɛrama. 43Fɛti kɛlɛle nyaa aan wo, dé wa gona ’wo pa gi é ziin, pɛniɛné Jézu vo zi zuo Jérusalɛm. A ti valé a bu ’ka ’bɛ gi dɔɔa lo. 44É dɔ wo gi léé, é a munu lé wo ke tawona ékeva wo nya zia, wo va, yé wo tawo yi do yé wa nagini ’wo lelenu valé ’wo dɔɔzannu va. 45Naa, wo ’ka aan wo a ye lɛ lo, wo diéra wo pa gi Jérusalɛm a naginile we gi. 46Yi yaazan nya é nyanadi, wa ye Balebangikɔn gi, é nyanale bélidɔwedɔɔmunu méléna, ’té éé tɔné dɔa wo lɛ, ’té éé we laan wo lee. 47Munu lé wa dére ’ma, wo faa ’léé ma wo ma a gi kinile valé alé we zi pale ma. 48A yaamunu a ye aan wo, wo gi vuru yé a bu lé a lɛ léé: Anlé né, mɛmalé i we ’ko zoɛ kɛlɛ ko lɛɛ? I a yé loo? I ti valé maa, ko a i ginina ko zuru va nyɛ kinile blɛn nya. 49É lé wo lɛ léé: Mɛmalé ka a an gininaa? Ka ’ka a gi dɔɔa léé, maa dan kɛlɛ lɛ an ti lé kɔn gi loo? 50Naa, we lé é a fena wo lɛ, wo ’ka a gi ’ma lɛ lo. 51’Bɛ zuo é go wo va Nazarɛt, yé é pla wo wuo. We ’konu faa vo a bu bli gi.
52Yé Jézu tin wedɔɔle koo, é kɔlɛ koo, Bale lé zin koo, wo gi, Kazambale valé munu yuɛ va.
Currently Selected:
Luk 2: GOURU
Highlight
Share
Copy
Want to have your highlights saved across all your devices? Sign up or sign in
Alliance Biblique de Cote d'Ivoire 1979
