Luk 1
1
Luk sɛbɛ ’ko gyɛle gi fe
(Kw 1:1–3)
1Téofil, mi zin, wenu lé é kɛlɛ ko va, mi kiɛre kwa kuli léé, wa zuo fe sɛbɛ gi. 2Munu lé wo kɛlɛ anayemunu nya a pélisia bléyi va yé wo kinin Dérefezannu nya bɛ, wa fe ko lɛ. 3Yé maa é ziin, an vo we ’konu faa gi kulina tirilii, é sia a pélisiana ma, amalé é dɔ an gi léé, é a é zima léé, maa wo zuo fe i lɛ sɛbɛ gi wo bɔbɛ yɛrama do do, 4yé wenu lé wa paa i gi yé i wo gi dɔɔ tegele léé, wa webozen nya.
Lanje mi batizéwozan Jan yaale fale vɔ
(1 Sam 1; Wbz 13)
5Judé tɛrɛlamunu nwiinzan Érɔd bléyi va, Balebanzan do ana, wa laama Zakari, é a Abia palu gi mi do nya; a na a Arɔn gɔnɔla le do nya, wa laama Élizabɛt. 6Wo fiénu a mi tegele nya Kazambale yuɛ gi. Mizambale lé bélidɔwe faa koo, a ma we tɛtɛnénu faa koo, wa kɛla ’kyɛ, yé gun ’ka vo lɛ wo kɛlɛwe do kpen ma lo. 7Élizabɛt a sɔnzan nya, amalé wolé né do kpen ’ka lo; yé wo fiénu kɛlɛ é kwa.
8Bléyian va lé balebannyanama pale Kazambale yara bɔ Zakarinu zé palu ta, wo Zakari si a va ’munnu zunle nya 9Balebanmunu dɔgɔnɔ yɛrama léé, ’é go lasikɔrɔ kyɛ ble Mizambale lé kɔn gi. 10Lasikɔrɔ kyɛ ble bléyi va, munu faa vo bazorona béera. 11Yé Mizambale lé lanje do bɔra Zakari yuɛ va yé é dɔ fɛana lé lasikɔrɔ kyɛ éé blé, ana bɛyilazia. 12Zakari a ye aan wo, é gi bɔrɔ pa a ma yé kana zén a gi. 13Naa, lanje lé a lɛ léé: Zakari, Bale ilé bazoro dére ’ma, amalé té i kana lo. I na Élizabɛt é dan né yaa lɛ gɔné nya i lɛ yé bé tɔ pa Jan. 14I gi é dan nana lɛ alé we ma yé i bli é dan fan lɛ gi nanale nya, yé mi kiɛre gi é dan nana lɛ a yaale we ma. 15Naa, é dan kɛlɛ lɛ mi blɛn nya Mizambale yuɛ va. É ’ka dan nwɛ valé dɔrɔ mini lɛ lo, dé a bu a yaa tɔɔn, Léli Sauun é dan vɔ lɛ a ta; 16é dan Izraɛl lé nénu kiɛre nɔla lɛ Mizan, ’wozé Bale va é ziin. 17É dan tawo lɛ Kazambale ’lɛ é gi bli nya bélé Éli zé zo, yé alé plɛplɛ é dan kɛlɛ lɛ bélé Éli zé zo, né tinu bli nɔlale ’wolé nénu va koo, tɔnégiplɛplɛ munu nɔlale mi tegelenu lé we dɔɔle vazia koo, munu ma’lɛrɛle wo kɛlɛle Mizambale zé nya koo, wo we ma. 18Zakari lé lanje lɛ léé: Maa dan ’bɛ gi dɔɔ lɛ kaa? Maa kɛlɛ é kwa yé an na kɛlɛ é kwa. 19Lanje lé a lɛ léé: Maa ɛ ke Gabriɛl nya. Maa dɔa Kazambale ’lɛ; Bale an pa zia wefele i lɛ we gi, é valé wenéné ’ko fele i lɛ we ma. 20Bé ye, an dérenu lé maa a fe i lɛ ’ko, ’té wo lɛ é dan sɔɔ lɛ wo lɛsɔɔbléyi va bɛ, i ’ka bli pa lɛ wo gi lo, bɛwemalé i dan kɛlɛ lɛ bobogyɛzan nya, ’té i ’ka bɔa wefele lɛ lo, fɔɔ yé wo yi é bɔ.
21Naa, munu a Zakari lɛbɛnna, yé wo gi vuru léé, é a mɔnna Balebangikɔn gi. 22É bɔra aan wo é ’ka bɔa wefele lɛ wo lɛ lo, yé wa gi dɔɔ léé, é fɛ ye yuɛ zi gi Balebangikɔn gi. É we fe wo lɛ tɔmase saa nya é bɛ nya, yé é ko bobogyɛzan nya.
23Dé azé nyanama pa yi nyaa, é go ’é va. 24Yi kenu giéle zuo, a na Élizabɛt bɔn si, yé é bɔn yɔɔ moné soru, 25yé é léé: Mizambale ɛ we ’ko kɛlɛ an lɛ, sin é dɔ a gi léé, é dan yara si lɛ an ’wuo ma munu va.
Lanje Jézu yaale fale vɔ
(Éz 7:14; Mt 1:18–23)
26Élizabɛt bɔn moné suiɛdozan nya Kazambale yee lanje Gabriɛl duo pa zia Galilé tɛrɛ la, fla do lé wa laama Nazarɛt, a ta. 27É go blɛnzan do lé, é ’ka tan gɔné dɔɔ lɛ lo, a va. Blɛnzan tɔ lé Mari. David gɔnɔlazan do lé wa laama Jozɛfu, ’bɛ a pu dɔ. 28Lanje wɔra a va yé é léé: An we bii lé, Mizambale zin kɛlɛ i lɛ, i va. Mizambale a i va. 29Mari a ye aan wo, dére ’ko gi bɔrɔ pa a ma. Mari a laa ébozen lee léé: Weale ’ko, ’bɛ gi lé nɔɔ? 30Lanje lé a lɛ léé: Mari, té i kana lo. I Kazambale lé zin ye. 31Bé ye, i dan bɔn si lɛ, yé i dan né yaa lɛ gɔné nya, yé bé tɔ pa Jézu. 32É dan kɛlɛ lɛ blɛn yé wo dan a laa lɛ Loruzan Be, yé Mizambale é dan a tra David lé webleblin nɔ lɛ a lɛ. 33É dan pla lɛ Jakɔb gɔnɔlamunu faa nwiin lɛɛfaama, yé a plale munu nwiin glɛ ’ka dan dɔ lɛ lo. 34Yé Mari lé lanje lɛ léé: An ’ka gɔné dɔɔa lo ’naan, ’bɛ é kɛla kaa? 35Lanje lé a lɛ léé: Léli Sauun é dan zén lɛ i ta, yé Loruzan lé plɛplɛ é dan zén lɛ i ta bélé furɔ zo. Amalé né sauun lé i dan a yaa lɛ bɛ, wo dan a laa lɛ Kazambale Be. 36Bé ye, i buru Élizabɛt é ziin, é négɔné bɔn si élé kwa ta gi, yé le lé wa laama sɔnzan bɛ, a moné suiɛdozan lé ke ’ko. 37Naa, we do kɛlɛle ’ka Kazambale keleé lo. 38Mari léé: Maa a Mizambale wuole nya. Dére lé bé fe, ’é kɛlɛ an lɛ a yɛrama ma. Yé lanje si a va.
Mari go we lɛ Élizabɛt va
39’Bɛ yi ’konu zuo, Mari nwa yé é go é kele Juda lé tɛrɛ lé ke gɔ saa nya, ana fla do la. 40Yé é wɔra Zakari lé kɔn gi yé é we Élizabɛt va. 41Dé Élizabɛt Mari lé weale ’ma tɔɔn, alé né kɔɔ a bɔn gi yé Léli Sauun a kun. 42É siaa dére plɛplɛ nya léé: Lomu faa va, bii ɛ drɔɔ ke é vole, yé i bɔn drɔɔ a é vole é ziin. 43Mɛ wezin lé Bale a kɛlɛ an lɛ a zo, yé anzan bu da we lɛ an vaa? 44I yua, dé maa ilé weale dére ’ma tɔɔn, né kɔɔ an bɔn gi gi nanale nya. 45Blivowelɛzan gi a é nanale; wenu lé wa fe a lɛ Mizambale tɔ gi, wo lɛ é dan sɔɔ lɛ, azama.
Mari Bale tɔ zin fe lɛrɛvɔle nya
(1 Sam 2:1–10)
46Yé Mari léma:
Maabozen Mizambale tɔ nwa zégéléé,
47An Siéwegizan Bale lé we ma lé an léli gi éé nanaan,
48Naa, é yuɛ vɔ é wuole kɛlɛle kiéné ta.
É sia bléyi ’ko va mi kulu faa é dan a fe lɛ léé, anzé a néné,
49Plɛplɛfaazan we blɛnnu kɛlɛ an lɛ, azama.
A tɔ a sauun.
50Munu lé woo kanaan a lee, a nyanai éé zén‐é wo ta lɛɛfaama.
51É é bɛ plɛplɛ nagɔɔn;
Munu lé, boblɛn gi bɔrɔle ke wo bli gi, é wo fwila.
52É munu plɛplɛnu lé webleblinnu yara bua,
Yé é bokiénémunu vɔ a ma.
53É lɔrɔgyɛmunu kan
Yé é fuazannu pa zia lɔrɔ nya.
54-55É bɔ é wuozan Izraɛl va,
Abraam valé é kulunu sele a a gi, yé a nyanai éé zén‐é wo ta lɛɛfaama,
Fɛan zo lé é a fe ko tranu lɛ, a zo.
56Mari vo Élizabɛt va, dé moné yaa léé? a zuo yé é go ’wo va.
Mi batizéwozan Jan yaale
(WP 21:1–8; Rut 4:13–17)
57Élizabɛt lé néyaabléyi bɔ, yé é né yaa gɔné nya. 58A bwɛnénu valé a lelenu a ’ma aan wo léé, Mizambale nyanai blɛn zén a ta, yé wo gi nana a va. 59Né yi sɔraazan nya wo da a gane dɔ lɛ yé wa tɔ pa é ti tɔ nya, Zakari. 60Naa, a bu léé: Gba, wa laama Jan. 61Wo lé a lɛ léé: I lelenu do kpen tɔ ’ka tɔ ’ko nya lo. 62Yé wo tɔmase kɛlɛ a ti lɛ léé, dé é sɔ a lɛ léé, wa laa kaa? yé wa dɔɔ. 63Zakari sɛbɛ ma laa yé é sɛbɛ gyɛ léé, a tɔ lé Jan. Munu faa gi vuru. 64A bléyi duo nya Zakari ’léé fuo, a néné fuo, yé é we fe yé é Kazambale tɔ zin fe. 65Kana zén wo punma munu faa gi, yé wo we ’konu faa glewo Judé tɛrɛ la gɔ faa nwiin. 66Munu faa lé wo we ’konu ’ma, wo vo a bɔrɔna wo bli gi, a fele nya léé: Né ’ko é dan kɛlɛ lɛ mɛ fɛ nyaa? Weboen nya, Mizambale bɛ zin a a ta.
Zakari balelawe fe
67Léli Sauun Jan ti Zakari kun, yé é balelawe fe dére ’konu nya léé:
68Mizan, Izraɛl zé Bale da élé munu va yé é wo tabo,
Amalé a drɔɔ ’é vo ma.
69É ko siéwegizan plɛplɛ nwa é wuozan David gɔnɔ gi,
70Fɛan zo lé é a fe élé balelayemunu sauun lɔlu nya é li kwakwa, a zo,
71Ko siéwegizan lé éé ko sié ko nyanézannu lee, é valé munu faa lé ko za ke wo gi, wo lee, yee lé.
72’Bɛ zo lé a nyanai éé zén‐é ko tranu ta, ’té gipawe plɛplɛ sele éé dɔa a gi;
73Naa, Bale ébo ’nyɔɔn ko tra Abraam lɛ léé,
74-75É a se kɛlɛ ko lɛ léé, dé é ko si ko nyanémunu lee faa,
’Té ko ’é bɔa
Kɛlɛle sauun valé we tegele kɛlɛle nya é ’lɛ, kolé tɛrɛ la yinu faa gi, ’té kana ’ka ko gi lo.
76Yé bii liiné, wo dan i laa lɛ Loruzan lé balelayezan;
Naa, i dan tawo lɛ Mizambale ’lɛzia alé zinu ma’lɛrɛle we ma.
77Yé i dan Bale lé munu bɔn gi kini lɛ léé, Bale wo ma we vo, amalé wo béli.
78Nyanai zén bli vɔ kolé Bale gi,
Amalé é san bi ko la bélé bladi yiri zo,
79Munu lé wo ke é nyanale gunutinu va, é valé gale furɔ wuo, wo va kinile we gi,
Yé é go ko nya vole drɔɔ lé zi ’léé.
80Yé né tin, yé a léli ta kɛlɛ plɛplɛ, yé é nyana bwi gi fɔɔ, yé abo nagɔɔn Izraɛl munu lɛ yi bɔ.
Currently Selected:
Luk 1: GOURU
Highlight
Share
Copy
Want to have your highlights saved across all your devices? Sign up or sign in
Alliance Biblique de Cote d'Ivoire 1979
