Jan 9

Mi lé wa yaa é yuɛ ’wiile nya, Jézu a béli

(Mal 4:2; Mk 8:22–25)

1Jézu a giéna aan wo, mi lé wa yaa é yuɛ ’wiile nya, é a ye. 2Yé a zuomunu we laa a lee léé: Kozan, mɛmalé wo mi ’ko yaa é yuɛ ’wiile nyaa? Abo lé wenyané ma lé laa, taa, a bu valé a ti lé wenyané ma léé? 3Jézu a zi pa wo lɛ léé: Yee koo, é yaamunu koo, wolé wenyané ma kaan lo, naa, Kazambale panyanama a fɛan zo, yé munu a ye mi ’ko lé we ma, amalé é kɛlɛ. 4Bléyian va lé fɛna a é kinile, mi lé é an pa zia, é a lé maa alé nyanama pa; béli a dana tan lɛ, ’té mi do kpen ’ka bɔa nyanama pale lɛ lo. 5Bléyian va lé maa ke tɛrɛ la ’ko, maa a tɛrɛlamunu lé san nya.

6We ’ko fele zuo, é ’léli zana tɛrɛ va, yé é voli kɛlɛ ’é ’léli nya. ’Bɛ zuo, yé é voli ’ko pa yuɛwiizan yuɛnu ta, 7yé é lé a lɛ léé: I go zuru Siloé ’yiguru va, ’bɛ gi léé, pale zia. Yé é go ana yé é zuru, yé é nɔla ’té a yuɛ a é fuole wéiin. 8A bɔlunu valé munu lé wa dɔɔ é kyɛn doropazan nya, wo léé: Mi lé é ke turu é nyanale doro pana bɛ, yeean é ke bɛ loo? 9Mi kenu léé: Yee lé. Yé a kenu léé: Gba, a bɔmazan lé. Yé yeebozen léé, ’yee lé. 10Yé wo lé a lɛ léé: É kɛlɛ kaa yé i yuɛ fuoo? 11Yé é léé: Mi lé wa laama Jézu, yee ɛ voli kɛlɛ yé é a pa an yuɛ ta, yé é lé an lɛ léé: ’I go zuru Siloé ’yiguru va. Yé an go ana, yé an zuru, yé an yuɛ fuo. 12Yé wo lé a lɛ léé: Mi ’ko a kyɛɛn? Yé é léé: Maa ’ka a gi dɔɔa lo.

Farizimunu we ’ko gi kuli

(WGV 29:25; Éz 6:9–10; Lk 6:22–23)

13Mi lé a yuɛ ke turu é ’wiile, wo go a nya Farizimunu va. 14Yian nya lé Jézu voli kɛlɛ yé é a yuɛ fuo, é a flinyi do nya, azama. 15Yé Farizimunu ’wozé laa a lee léé: É kɛlɛ kaa yé i yuɛ fuoo? Yé é lé wo lɛ léé: É voli pa an yuɛnu ta, yé maa zuru, yé maa yɛrɛ ye. 16’Bɛ ta lé Farizimi kenu léé: Mi ’ko ’ka flinyi tawe kɛla lo, amalé é ’ka si lɛ Kazambale va lo. Mi kenu léé: Wenyanékɛlɛzan é bɔa gyɛzorowe ’ko zoɛnu kɛlɛle lɛ kaa? Yé wo gi bɔi. 17Yé wo lé yuɛwiizan lɛ léé: Bii lé é i yuɛ fuo, bii lé ’bɛ gi nɔɔ? É léé: Balelayezan lé.

18Juifinu ’ka pa lɛ a ta léé, é a yuɛwiizan nya yé wa yuɛ fuo lo, fɔɔ yé wa yaazannu laa yé wo da. 19Yé wo we laa ’bɛnu lee léé: Ka be lé, ka léé, wa yaa é yuɛ ’wiile nya, yee lé é ke ’koo? É kɛlɛ kaa yé éé yɛrɛ yé siin? 20A yaamunu lé wo lɛ léé: Ko a gi dɔɔ léé, é a ko be nya, yé ko a gi dɔɔ é ziin léé, ko a yaa é yuɛ ’wiile nya, 21naa, we lé ’bɛ bɔ a ma yé éé yɛrɛ yé, é valé mi lé ’bɛ a yuɛ fuo, ko ’ka ’bɛ gi dɔɔa lo. ’Ka we laa yeebozen lee. É a segele, yé é dan ébo ma we fe lɛ. 22A yaamunu a kanana Juifinu lee, amalé wo we ’ko fe. Juifinu ’wo gi pa kɔɔn do léé, dé miomian é a nyi si léé, Jézu a Krist nya, wo dan ’bɛzan bɔra lɛ bazorokɔn gi. 23Bɛwemalé a yaamunu léé: É a segle; ’ka we laa yeebozen lee.

24Mi lé a yuɛnu ke turu é ’wiile, Farizimunu a laa a gɔnɔ fiézan nya yé wo léé: ’I Kazambale tɔ bɔ. Ko gi dɔɔ léé, mi ’ko a wenyanékɛlɛzan nya. 25Yé é a zi pa léé: Dé é a wenyanékɛlɛzan nya, maa ’ka ’bɛ gi dɔɔa lo. Maa we do dɔɔ, yee lé é ke léé, maa a turu yuɛwiizan nya, yé sin maa yɛrɛ yé. 26Yé wo lé a lɛ léé: É mɛ fɛ ɛ kɛlɛ i lɛɛ? É i yuɛ fuo kaa? 27É lé wo lɛ léé: Maa a fe ka lɛ é kyɛn, yé ka ’ka ka tɔné dɔ lɛ lo. Mɛmalé é sɔ ka lɛ léé, ka a ’ma é ziin? Kanu é ziin, ka a va léé, ka kɛlɛ a zuomunu nyaa? 28Yé wa sɔnɔ yé wo léé: Bii ɛ ke a zuozan nya. Ko a Moizi zuozannu nya. 29Ko a gi dɔɔ léé, Kazambale we fe Moizi lɛ. Naa, mi ’ko, ko ’ka a sina dɔɔa lo. 30Mi ’ko a zi pa wo lɛ léé: Dé ka ’ka a sina dɔɔa lo, ’bɛ a givuruwe nya; yé é an yuɛ fuo duowo. 31Ko a gi dɔɔ léé, Kazambale ’ka wenyanékɛlɛzannu dére maan lo. Naa, dé mi a bɔa, ’té éé alé blibɔmawe kɛla, ’bɛzan dére lé éé a maan. 32Wo ’ka tan a ’ma lɛ léé, mi lé wa yaa é yuɛ ’wiile nya, mi do ’bɛ yuɛ fuo monomono lo. 33Dé mi ’ko ’ka si lɛ Kazambale va lo, é ’ka bɔa we do kɛlɛle lɛ lo. 34Yé wa zi pa a lɛ léé: Wo i yaa wenyanékɛlɛzan nya tegele boenwo yé bii ɛ we paan ko gii? Yé wa bin.

Mi bli gi yuɛ ’wiile

(Éz 42:16; Lk 10:21; 2 Kor 4:3–6)

35Jézu a ’ma léé, wa bin. Dé é a ye é lé a lɛ léé: I bli a Kazambale Be lɛɛ? 36Yé é lé a lɛ léé: Mizan, de ɛ ke a nya yé an bli é vo a lɛɛ? 37Jézu lé a lɛ léé: I ’ka an yé loo? Maa lé an ke wefena i lɛ ’ko, maa lé. 38Yé é léé: Mizan, an bli a i lɛ. Yé é dia ’é bli la a ’lɛ.

39Yé Jézu léé: An da tɛrɛ la ’ko we do gi bɔile we ma, yee lé ke ’ko: munu lé wo ’ka yɛrɛ yé lo, wolé yɛrɛ yele we ma, yé munu lé woo yɛrɛ yé, wo kininle yuɛwiizannu nya we ma. 40Farizimi kenu lé wo ke ana bɛ, wo dére ’konu ’ma aan wo yé wo lé a lɛ léé: Ko é ziin, ko a yuɛwiizannu nyaa? 41Jézu lé wo lɛ léé: Dé é vo kɔɔn lé ka a yuɛwiizannu nya, ’té kalé wenyané ’ka lo. Sin ka léé, ’wo fɛna yé, bɛwemalé kalé wenyané ana.

Currently Selected:

Jan 9: GOURU

Highlight

Copy