Jan 8

1Jézu go Ɔlivi gɔ nwiin. 2Naa, bladi pa aan wo é go é ziin Balebangikɔn gi yé munu faa go a va. É nyana, yé é vo we paana wo gi.

3’Bɛna tɔɔn sɛbɛgifemunu valé Farizimunu da, le do lé wo bɔ a ma gɔné ginina, a nya, yé wa dɔ munu méléna. 4Yé wo lé Jézu lɛ léé: Kozan, le ’ko, wo bɔ a ma gɔné ginina. 5Moizi a fe ko lɛ bélidɔwe gi léé, ’wo le ’ko zoɛnu gyɛ gɔlɛ nya. Naa, bii lé nɔɔ? 6Wa we ’ko fena a gi danle we ma, we dɔle a nwiin we gi. Naa, Jézu tua yé é kun sɛbɛ gyɛle ma tɛrɛ va é bɛnwɔlɛ nya. 7Wolé we laale a lee ’ka aan wo nyaana lo, é nwa yé é lé wo lɛ léé: Ka va mi lé é ’ka tan wenyané do kɛlɛ lɛ lo, ’bɛzan ’é gɔlɛ vuli é vinin le ’ko va. 8Yé é tua é ziin yé é vo sɛbɛ gyɛna tɛrɛ va. 9Wo ’bɛ ’ma aan wo, wolé wevasibli we dɔ wo nwiin, yé é sia mi segelenu ma yé é bɔ pɛɛnu ma, wo faa bɔra do do. Yé Jézu valé lezan vo wo fié, ’té lezan a é dɔle é pa duo gi. 10’Bɛ zuo Jézu nwa aan wo, é lé lezan lɛ léé: Lezan, munu lé wo da i tɔ fe lɛ, wa kyɛɛn? Mi do kpen ’ka ga dɔ lɛ i nwiin loo? 11Yé lezan léé: Iin, Mizan. Yé Jézu lé a lɛ léé: Maa é ziin, maa ’ka ga dɔa i nwiin lo. ’I go; té i wenyané kɛlɛ é dɛrɛ lo.

Jézu a tɛrɛlamunu lé san nya

(Jn 1:4–5; 12:46–50)

12Jézu we fe wo lɛ é ziin, yé é léé: Maa lé é ke tɛrɛlamunu lé san nya. Mian éé dan an zuo, é ’ka dan tawo lɛ gunutinu va lo, naa, é dan mibélisan ye lɛ.

13’Bɛ zuo Farizimunu lé a lɛ léé: Bii a ibozen lé wenayezan nya. I dére ’ka webozen nya lo. 14Jézu a zi pa wo lɛ léé: Fɛana lé an si, maa a dɔɔ. Yé fɛana lé an dan go lɛ, maa a dɔɔ, yé an dére a webozen nya, dɔlé ’té maa a anbozen lé wenayezan nya. Naa, ka ’ka an sina dɔɔa lo, yé ka ’ka an gona dɔɔa lo. 15Ka we blé blaminu lé weblebɛ yɛrama. Maa ’ka mi do kpen lé we blé lo. 16Maa ’ka an do lo, an Ti lé é an pa zia, é a an va, bɛwemalé dé maa a we blena, an we blé éboen ma. 17É a é gyɛle kalé bélidɔwe gi léé: Wenayezan fié lé wenayedére a webozen nya; 18maa a anbozen lé wenayezan nya, yé an Ti lé é an pa zia, ’bɛ a anlé wenayezan nya é ziin. 19Yé wo lé a lɛ léé: I Ti a kyɛɛn? Jézu lé wo lɛ léé: Ka ’ka an dɔɔa lo, yé ka ’ka an Ti dɔɔa lo. Dé é a lé ka an dɔɔ, ’té ka an Ti dɔɔ é ziin.

20Bléyian va lé Jézu a we paana munu gi Balebangikɔn gi, fɛana lé gɔɔlizéngi kɛsu ke ana, ’té éé dére ’konu fé. Azé bléyi ’ka tan bɔ lɛ lo, bɛwemalé mi do ’ka a kun lɛ lo.

Fɛana lé maa ke gona, ka ’ka bɔa gole lɛ ana lo

(Jn 5:36–37)

21Jézu lé é ziin wo lɛ léé: Maa a gona, yé ka dan an gini lɛ, yé ka dan ga lɛ kalé wenyané nya ka lee; yé fɛana lé maa ke gona, ka ’ka bɔa gole lɛ ana lo. 22É a fe aan wo léé, fɛana lé é dan go lɛ, ka ’ka bɔa gole lɛ ana lo, bɛwemalé Juifinu léé: É dan ébo gyɛ léé? 23Yé é lé wo lɛ léé: Ka si tɛrɛ va, yé maa si loru. Ka a tɛrɛlamunu nya, yé maa ’ka tɛrɛlami nya lo. 24Bɛwemalé maa lé ka lɛ léé, ka dan ga lɛ kalé wenyanénu nya ka lee. Naa, maa a mian nya, dé ka bli ’ka vo lɛ a lɛ léé, maa a ’bɛ nya lo, ka dan ga lɛ kalé wenyanénu nya ka lee. 25Yé wo lé a lɛ léé: Bii a de nyaa? Jézu a zi pa wo lɛ léé: Maa a mi lé maa a fe ka lɛ a pélisia bléyi va, a nya. 26Ka ma we kiɛre lé maa dan a fe lɛ yé maa dan we ble lɛ a nya ka va, é a an gi, naa, mi lé é an pa zia, é a mi bozen nya, yé we lé maa a ’ma a ta, yee lé maa ke a fena tɛrɛlamunu lɛ. 27Wo ’ka a gi ’ma lɛ léé, a Ti ma we lé é ke a fena lo. 28Jézu lé wo lɛ léé: Yian nya lé ka dan maa blami Be dun lɛ, ’bɛ yi la, dé mi lé maa ke a nya, ka dan a dɔɔ lɛ, yé ka dan a dɔɔ lɛ léé, maa ’ka we do kpen kɛlɛna anbo ’wuo gi lo, naa, we lé an Ti a paa an gi, yee saa lé maa ke a fena. 29Mi lé é an pa zia é a an va; a sɔlɛwe lé maa kɛla yifaama, amalé é ’ka an voo an do lo.

30Jézu lé wefele a zo lé we ma léé, mi kiɛre bli vo a lɛ.

Webozen é dan ka kɛlɛ lɛ minénu nya

(Rom 6:14)

31Yé Juifinu lé wo bli vo a lɛ bɛ, é lé wo lɛ léé: Dé ka tawoo an dére ta, ’té ka a an zuomunu nya webozen nya, 32yé ka dan webozen dɔɔ lɛ, yé webozen é dan ka kɛlɛ lɛ minénu nya. 33Wo lé a lɛ léé: Ko a Abraam kulunu nya, yé ko ’ka mi do kpen lé luunu nya monomono lo. É kɛlɛ kaa yé i léé, ko dan kɛlɛ lɛ minénu nyaa? 34Jézu lé wo lɛ léé: Maa fe ka lɛ kyɔ webozen nya, dé miomian éé wenyané kɛla, ’bɛzan a wenyané lé luu nya. 35Naa, luu ’ka nyanaan yifaama kɔn gi lo, kɔnzan be éé nyanaan yifaama a gi. 36Dé maa Bale Be ka kɛlɛ minénu nya, ka dan vo lɛ kaboma webozen nya. 37Maa a gi dɔɔ léé, ka a Abraam kulunu nya. An dére ’ka voo ka gi lo, bɛwemalé ka a kwa kulina léé, ka an gya. 38We lé maa a ye an Ti va, yee lé maa ke a fena, yé ’kaa, we lé ka a ’ma ka ti ta, yee lé ka ke a kɛlɛna.

Ka ti a yo nya

(1 Jn 3:8–10)

39Wa zi pa a lɛ léé: Ko ti lé ke Abraam nya. Jézu lé wo lɛ léé: Dé é vo léé, ka a Abraam lé nénu nya, ’té Abraam kɛlɛwenu lé ka kɛla. 40Naa, an webozen ’ma Kazambale va, yé maa a fe ka lɛ, yé sin, ka a kwa kulina léé, ka an gya. Abraam ’ka ’bɛ kɛlɛ lɛ lo. 41Ka a ka ti kɛlɛwenu kɛlɛna. Wo lé a lɛ léé: Ko ’ka bwɛlanénu nya lo. Ko ti a do kpen, Kazambale nya. 42Jézu lé wo lɛ léé: Dé é vo léé, Kazambale ɛ ke ka ti nya, ’té an dan sɔ lɛ ka lɛ. Kazambale gi lé an si, yé an da; an ’ka da lɛ anbo ’wuo gi lo, naa, yee ɛ an pa zia. 43Mɛwemalé ka ’ka an dére gi maan loo? Ma a wewɔlɛ boen fena, amalé. 44Ka ti a yonufaatagɔné nya, yé é sɔ ka lɛ léé, ka ka ti lé blibɔmawe kɛlɛle lɛ sɔɔ. A pélisia bléyi va fɔɔ kyɔ é a migyɛzan nya yé é ’ka dɔa wezen zuo lo. Wezen ’ka a gi lo, ’bɛzama. É a viéwozan nya, yé é a vié faa ti nya, bɛwemalé dé é a vié wona, ’té é a ébo dére vɔna. 45Yé maa a wezen fena, amalé ka ’ka dɔna an dére ta lo. 46Ka va mi kyɛn ɛ an bɔn‐in kinié léé, maa wenyané kɛlɛɛ? Dé maa webozen fé, mɛwemalé ka ’ka dɔa an dére ta loo? 47Mi lé é ke Kazambale zé nya, éé tɔné dɔa Kazambale dérenu lɛ. Ka ’ka Kazambale lé munu nya lo, bɛwemalé ka ’ka ka tɔné dɔa a dére lɛ lo.

Dé Abraam ’ka tan lo, maa ana

(Kol 1:17)

48Juifinu lé a lɛ léé: Dé ko a fe léé, bii a Samari mi nya yé yo a i gi, ’té ko ’ka wezen fe lɛ loo? 49Jézu lé wo lɛ léé: Yo ’ka an gi monomono lo, naa, maa an Ti tɔ bɔa, ’té ka an tɔ sɛra. 50Maa ’ka an tɔbɔle naginina lo; mi lé ’bɛ an tɔbɔle naginian, ’té ’bɛ a va sié, ’bɛzan ana. 51Maa fe ka lɛ kyɔ webozen nya, dé mian éé tawoo an dére ta, é ’ka dan ga lɛ monomono lo. 52Juifinu lé a lɛ léé: Sin, ko a gi dɔɔ léé, yo a i gi. Abraam ga, yé balelayemunu ga é ziin, yé bii léé, dé mian tawo ’é dére ta, ’bɛzan ’ka dan ga lɛ monomono loo? 53Ko tra Abraam lé ’bɛ ga, i blɛn mini ’bɛ taa? Yé balelayemunu é ziin, wo ga. Bii a ibo kɛlɛna de ɛ nyaa? 54Jézu a zi pa wo lɛ léé: Dé maa anbo tɔ kɛla blɛn, ’té an tɔbɔle a we pla nya. An Ti ɛ an tɔ kɛla blɛn, yee lé ka léé, é a ’wolé Bale nya. 55Ka ’ka a dɔɔa lo; dé é a maa nya, maa a dɔɔ. Yé dé maa a fe léé, maa ’ka a dɔɔa lo, ’té maa kɛlɛ viéwozan nya bélé ka zo. Naa, maa a dɔɔ, yé an tawoo a dére ta. 56Ka tra Abraam gi nana léé, é dan an dayi na ye lɛ, yé é a ye, yé a gi nana. 57Juifinu lé a lɛ léé: I lɛɛ ’ka tan yɔ fié wɔlɛ vu bɔ lɛ lo ’naan, yé i Abraam yee? 58Jézu lé wo lɛ léé: Maa fe ka lɛ kyɔ webozen nya, bléyian va lé Abraam ’ka lo, ’té maa ana. 59’Bɛ ta lé wo gɔlɛnu sia léé, wa vuli a va, naa, Jézu ta saan yé é bɔra Balebangikɔn gi.

Currently Selected:

Jan 8: GOURU

Highlight

Copy