Jan 16

1An we ’konu fe ka lɛ, bɔle ka va we ma, léé, té ka diéra lo. 2Wo dan ka bɔra lɛ bazorokɔnnu gi; yé é ziin bléyi do é dan bɔ lɛ, ’bɛna dé miomian é ka gyɛ é dan dɔ lɛ a gi léé, ’é a Kazambale bɔna. 3Wo ’ka an Ti dɔɔa lo, yé wo ’ka an dɔɔa lo, bɛwemalé wo dan kɛlɛ lɛ a zo. 4Maa we ’konu fe ka lɛ léé, dé a bléyi bɔ, yé a sele ’é dɔ ka gi léé, maa wo fe ka lɛ.

Léli Sauun lé nyanamanu

(Kw 2; 1 Kor 2:7–16)

A pélisiana, ’té maa a ka va, bɛwemalé maa ’ka a fe lɛ ka lɛ ’bɛ bléyi va lo.

5Sin, maa a gona mi lé é an pa zia, a va, yé ka va mi do kpen ’ka a laana an lee léé: I go kyɛɛn? lo. 6Naa, maa we ’konu fe aan wo ka lɛ, amalé ka bli kyɛ dɔ é baba bɛ. 7Naa, webozen lé maa a fe ka lɛ duowo, dé an go ’bɛ fila vɔ ka lɛ; naa, dé an ’ka go lɛ lo, Tɔrɔpaazan ’ka dan da lɛ ka va lo; naa, dé an go maa dan a pa lɛ ka lɛ zia. 8Dé é da, dé mɛ ɛ ke wenyané nyaa? dé mɛ ɛ ke we tegele nyaa? dé mɛ ɛ ke weblele nyaa? é dan tɛrɛlamunu bɔn gi kini lɛ wolé we ma. 9Wo bli ’ka vo lɛ an lɛ lo, bɛwemalé we lé ke wenyané nya, é dan wo bɔn‐in kini lɛ ’bɛ lé we ma; 10yé maa dan go lɛ an Ti va yé ka ’ka dan an ye lɛ é dɛrɛ lo, bɛwemalé we lé é ke we tegele nya, é dan wo bɔn‐in kini lɛ ’bɛ lé we ma; 11wo tɛrɛ ’ko nwiinzan blɛn lé we ble, bɛwemalé we lé ke weblele nya, é dan wo bɔn‐in kini lɛ ’bɛ lé we ma.

12We kiɛre a an gi yé é sɔ an lɛ léé, maa a fe ka lɛ é ziin, naa, ka ’ka bɔa wo gi ’male lɛ lao lo. 13Tɔrɔpaazan lé é ke webozen Léli nya, dé é da é dan go lɛ ka nya webozen faa va. We lé é dan a fe lɛ, abo dére kaan lo, naa, we faa lé é dan a ’ma lɛ, yee lé é dan a fe lɛ, yé é dan wenu fale vɔ lɛ ka lɛ. 14We lé é dan a fe lɛ, anlé we lé, bɛwemalé é dan an tɔ kɛlɛ lɛ blɛn. 15Fɛ faa lé é ke an Ti lee, é a anzé nya, bɛwemalé maa léé, we lé é dan a fe lɛ ka lɛ, anlé we lé.

Bli kyɛdɔle é dan nɔla lɛ gi nanale nya

(Ézék 39:29)

16Maa a gona an Ti va, bɛwemalé é vo bléyi sɛ nya yé ka ’ka dan an ye lɛ é dɛrɛ lo; ’bɛ zuo sɛ ka dan an ye lɛ é ziin.

17’Bɛ zuo a zuomi kenu lé ’wo ke lɛ léé: We lé é a fe léé, é vo bléyi sɛ nya yé ka ’ka dan ’é ye lɛ é dɛrɛ lo, yé ’bɛ zuo sɛ ka dan ’é ye lɛ, naa, ’é a gona ’é Ti va, ’bɛ gi lé nɔɔ? 18Bɛwemalé wo léé: We lé é a fe léé, é vo bléyi sɛ nya, ’bɛ gi lé nɔɔ? We lé é ke a fena, ko ’ka a gi maan lo.

19Jézu a gi dɔɔ léé, é sɔ wo lɛ léé, ’wo we gi laa é lee, yé é lé wo lɛ léé: Ka a we laana ka ke lee, we lé maa a fe léé, é vo bléyi sɛ nya yé ka ’ka dan an ye lɛ é dɛrɛ lo, ’bɛ zuo sɛ ka dan an ye lɛ, a we ma. 20Maa fe ka lɛ kyɔ webozen nya, ka dan wuvɔ lɛ, yé ka dan gyɛ bo lɛ, yé tɛrɛlamunu gi é dan nana lɛ. Ka gi kyɛ é dan dɔ lɛ, naa, kalé gi kyɛ dɔle é dan nɔla lɛ gi nanale nya. 21Dé le a né yaana, dé a yaabléyi bɔ a gi kyɛ éé dɔa, naa, dé é a yaa faa nyanéblele sele ’ka dɔa a gi é dɛrɛ lo, mi yaale tɛrɛ la lé gi nanale we ma. 22Bɛwemalé ka é ziin, ka bli gi kyɛ a sin, naa, maa dan ka ye lɛ é ziin, yé ka gi é dan nana lɛ, yé mi do kpen ’ka dan ka gi nanale si lɛ ka lee lo. 23’Bɛ yi nya, ka ’ka dan we do kpen gi laa lɛ an lee é dɛrɛ lo. Maa fe ka lɛ kyɔ webozen nya, dé ka fɛofɛan laa an Ti lee, é dan a nɔ lɛ ka lɛ an tɔ lé we ma. 24Fɔɔ bléyi ’ko va, ka ’ka tan we do kpen laa lɛ an tɔ gi ’lo. ’Ka fɛ laa, yé ka dan a ye lɛ, ka gi nanale tegelee we ma.

Maa tɛrɛla kele

(Rom 8:35–39)

25Maa we ’ko fe ka lɛ gɔnévɔlenu nya. A bléyi é dan bɔ lɛ, ’té maa ’ka we fé ka lɛ é dɛrɛ gɔnévɔlenu nya lo, naa, maa dan an Ti lé we fe lɛ ka lɛ kpaklaa. 26’Bɛ yi nya ka dan fɛ laa lɛ an tɔ gi, yé maa ’ka a fé ka lɛ léé, maa dan bazoro lɛ an Ti lɛ ka tɔ nya lo; 27an sɔ ka lɛ, yé ka dɔ a ta léé, an si Kazambale va, bɛwemalé ka sɔ an Ti bozen lɛ. 28An si an Ti va, yé an da tɛrɛ la; sin, maa a sina tɛrɛ la yé maa go an Ti va.

29A zuomunu lé a lɛ léé: Sin, bii a we fena kpaklaa, yé i ’ka we do kpen fena gɔnévɔle nya lo. 30Sin ko a gi dɔɔ léé, i we faa dɔɔ, yé é ’ka lé mi do kpen é we laa i lee é dɛrɛ lo; bɛwemalé ko dɔ a ta léé, i si Kazambale va. 31Jézu lé wo lɛ léé: Ka dɔ sin ’bɛ taa? 32Ka ye, a bléyi é dan bɔ lɛ yé é bɔ tɛkɛ, yé ka dan fwila lɛ yé ka faa é go kalé fɛna do do, yé ka an vo an do; naa, an Ti a an va, amalé maa ’ka an do lo. 33Maa we ’konu fe ka lɛ ka vole drɔɔ an gi we ma. Ka dan nyané ble lɛ tɛrɛ la, naa, ’ka bli ta dɔ plɛplɛ; maa tɛrɛla kele.

Currently Selected:

Jan 16: GOURU

Highlight

Copy