Jan 15

Jézu a bélé dɔrɔyili bozen zo

(Lk 13:6–9; Gal 2:20; Éf 3:14–19)

1Maa a bélé dɔrɔyili bozen zo, yé an Ti a bélé féipazan zo. 2An bɛ faa lé wo ke an ma yé wo ’ka baan lo, éé wo kinié an ma, yé an bɛnu faa lé woo baan éé wo ma bɔié yé wo va ’é kɛlɛ é sésé, wo taa baale é ziin wo ma we gi. 3Ka va kɛlɛ é sésé é kyɛn, dére lé maa a fe ka lɛ, a nya. 4’Ka vo an gi, yé maa dan vo lɛ ka gi. Fɛan zo lé dé yilibɛ ’ka yili ma lo, yee a bɛ ’ka bɔa baale lɛ éboan lo, a zo duo lé ka é ziin, dé ka ’ka voo an gi lo, ka ’ka bɔa baale lɛ lo. 5Maa a bélé dɔrɔyili zo, yé ka a bélé a bɛnu zo. Mi lé éé voo an gi yé maa voo a gi, éé baan di, naa, dé an ’ka lo, ka ’ka bɔa we do kɛlɛle lɛ lo. 6Dé mian é ’ka voo an gi lo, wa vulian béera bélé yilibɛ zo, yé ’é ga; ’bɛ zuo yé woo yee yilibɛnu sian yé woo wo vɔa kyɛ va, yé wo kyɛ é ble. 7Dé ka vo an gi yé an dérenu vo ka gi, fɛ faa lé é sɔ ka lɛ, ’ka a ma laa, yé wo dan a nɔ lɛ ka lɛ. 8Dé ka baan di, ’bɛ a gɔɔn léé, ka a an zuomunu nya, yé ’bɛ é dan an Ti tɔ bié lɛ.

9Fɛan zo lé an sɔ an Ti lɛ, a zo duo lé ka sɔ an lɛ. ’Ka vo anlé sɔlɛle gi. 10Dé ka anlé bélidɔwenu kɛla, ka dan vo lɛ anlé sɔlɛle gi, bélé fɛan zo lé maa an Ti lé bélidɔwenu kɛlɛ yé maa vo alé sɔlɛle gi, a zo. 11Maa we ’konu fe ka lɛ anlé gi nanale kɛlɛle ka gi we ma, ’é valé ka gi nanale tegelee we ma.

12Anlé bélidɔwe lé é ke ’ko: ’Ka sɔ ka ke lɛ, bélé fɛan zo lé ka sɔ an lɛ, a zo. 13Sɔlɛle lé é ke blɛn é mini mi gale é béénu ta lɛ, ’bɛ sɔlɛle ’ka lo. 14We lé maa ka béli dɔ a nya, dé ka a kɛla, ’té ka a an béénu nya. 15We lé mi a kɛla, a wuozan ’ka a dɔɔa lo, bɛwemalé maa ’ka ka laan an wuomunu é dɛrɛ lo; we faa lé maa a ’ma an Ti va, maa ka bɔn‐in kini a nya, bɛwemalé maa ka laa an béénu. 16Ka‐an, ka an si a va lo; naa, maa ɛ ka si a va, yé maa ka dɔ gligli, ka gole valé ka baale we ma, léé, ka poro ’é vo ana yé fɛofɛan ka a ma laan Ti lee an tɔ gi, ’é a nɔ ka lɛ. 17We lé maa ka béli dɔ a nya, ka sɔle ka ke lɛ lé.

Tɛrɛlamunu woo Bale lé munu za paan

(LvS 35:19; 69:5; Mt 10:22–33)

18Dé ka za a tɛrɛlamunu gi, ka gi dɔɔ léé, maa ɛ za ke wo gi é vinin ka ’lɛ. 19Dé é vo kɔɔn léé, ka a tɛrɛlamunu zé nya, ’té ka sɔ wo lɛ, naa, ka ’ka tɛrɛlamunu zé nya lo, yé maa ka si tɛrɛlamunu méléna, bɛwemalé ka za a tɛrɛlamunu gi. 20Dére lé maa a fe ka lɛ, a sele ’é dɔ ka gi; maa fe kɔɔn ka lɛ léé, mi wuozan ’ka minié ézan lɛ lo. Dé wo nyané pa an ta, wo dan nyané pa lɛ é ziin ka ta; dé wo tawo an dére ta, wo dan tawo lɛ é ziin ka dére ta. 21Naa, mi lé é an pa zia wo ’ka a dɔɔa lo, bɛwemalé wo dan we ’konu faa kɛlɛ lɛ ka lɛ an tɔ lé we ma. 22Dé maa ’ka da lɛ lo, dé maa ’ka we fe lɛ wo lɛ monomono lo, ’té wolé wenyané ’ka kɔɔn lo; naa, sin, wo dɔna ’ka, yé wo wenyané kɛlɛ é dɛrɛ lo. 23Mi lé an za ke a gi, an Ti za a ’bɛzan gi é ziin. 24Nyanamanu lé mi bɛ do kpen ’ka a pa lɛ lo, dé maa ’ka wo pa lɛ wo méléna lo, ’té wolé wenyané ’ka kɔɔn lo; naa, sin, wa ye, yé maa koo, an Ti koo, ko za a wo gi. 25Naa, we ’ko bɔ, dére lé é ke é gyɛle wolé bélidɔwe gi, a lɛsɔɔle we ma; é léé:

Wo an za pa é pla.

26Tɔrɔpaazan lé, maa dan a pa lɛ ka lɛ zia an Ti tɔ gi, yee ɛ ke webozen Léli lé éé sié an Ti va, a nya, dé é da é dan anlé we fe lɛ; 27é sia a pélisiana ka a an va, bɛwemalé ka é ziin, ka dan anlé we fe lɛ.

Currently Selected:

Jan 15: GOURU

Highlight

Copy