Wepélisiananu 40
40
Jozɛfu mi fié lé nyɛ gi fe
(WBZ 7:13–14)
1We ’konu zuo, Éjipiti mununwiinzan blɛn lé dɔrɔtabinzan segele valé alé burukɛlɛzan segele ’wozan Éjipiti mununwiinzan blɛn ’namawe kɛlɛ. 2Faraɔn bli fli é wuomunu fié ma, dɔrɔtabinzan segele koo, burukɛlɛzan segele koo, woo lé. 3Yé é wo fiénu vɔ bokɔn gi gaadénu nwiinzan lé fɛna, fɛana lé Jozɛfu ke bokɔn gi, ana. 4Gaadénu nwiinzan wo bɛ pa Jozɛfu lee, ’té éé fɛ no wo lɛ, yé wo yi kenu kɛlɛ bokɔn gi.
5Éjipiti mununwiinzan blɛn lé dɔrɔtabinzan valé alé burukɛlɛzan lé wo ke bokɔn gi bɛ, wo fiénu nyɛ gyɛ do do yi do nya é béli, yé wolé nyɛnu gi a do do. 6Jozɛfu da wo va bladi yé é wo nagini, ’té wo bli gi kyɛ a. 7Yé Faraɔn wuomunu lé wo ke Jozɛfu va bokɔn gi ézan lé fɛna bɛ, Jozɛfu we laa wo lee, yé é lé wo lɛ léé: Mɛmalé ka yara kyɛ ke é vɔle a gi kyɔɔ? 8Wo lé a lɛ léé: Ko nyɛ gyɛ yé a gifezan ’ka lo. Jozɛfu lé wo lɛ léé: We gifele ’ka Kazambale ɛ lee loo? Nyɛ lé ka a gyɛ, ’ka a zuo fe an lɛ.
9Dɔrɔtabinzan segele élé nyɛ zuo fe Jozɛfu lɛ yé é léé: An nyɛ gyɛ mi, ’té dɔrɔyili do a an ’lɛ. 10Dɔrɔyili ’ko blan a yaa. É tin aan wo yé a vwi bi yé é baa yé é tana. 11Faraɔn lé dɔrɔminikana a an lee. Maa dɔrɔporo so yé maa wo boro Faraɔn lé dɔrɔminikana gi, yé maa dɔrɔminikana nɔ Faraɔn lɛ. 12Jozɛfu lé a lɛ léé: A gi lé ke ’ko: a blan yaa a yi yaa nya. 13Yi fié a yaazan nya Faraɔn é dan i bɔra lɛ yé é dan i pla lɛ ilé nyanama ta i pai; i dan dɔrɔminikana nɔ lɛ Faraɔn lɛ é ziin, fɛan zo lé bé kɛla é vinin, ’té i a alé dɔrɔtabinzan nya, a zo. 14Naa, dé i gi nana, an sele ’é dɔ i gi ma; ilé zanté, ’i wezin kɛlɛ an lɛ; ’i an tɔ zin fe Faraɔn lɛ yé ’i an bɔra kɔn ’ko gi. 15Naa, wo an si Ébrunu lé tɛrɛ la gla nya yé fɛkona boenwo, maa ’ka we do kpen kɛlɛ lɛ an vɔle bokɔn gi we nya lo.
16Burukɛlɛzan segele a ye aan wo léé, Jozɛfu é bɔluzan zé gi fe é zima, é léé: An nyɛ gyɛ mi, ’té buru fu kyɛɛné yaa a an nwiin. 17Wo ta loru kyɛɛné bɛ, buru nénénu gɔnɔ faa lé wa pane kuru gi Faraɔn zé nya, wa ’bɛ kyɛɛné gi; naa, mianénu da yé wa ble an nwiin kyɛɛné gi. 18Jozɛfu léé: A gi lé ke ’ko: kyɛɛné yaa a yi yaa nya. 19Yi fié a yaazan nya Faraɔn é dan i ’wuo kini lɛ, yé é dan i dun lɛ yili la yé mianénu é dan i wi ble lɛ.
20A yi yaazan nya é kɛlɛ Faraɔn yaayi nya yé é fɛti kɛlɛ é wuomunu faa lɛ; dɔrɔtabinzan segele koo, burukɛlɛzan segele koo, é wo bɔra bokɔn gi é wuomunu faa yuɛ va; 21é dɔrɔtabinzan segele pla élé dɔrɔtabin nyanama ta é ziin, Faraɔn lé dɔrɔminikana pale Faraɔn lee we ma; 22naa, é burukɛlɛzan segele dun yili la, Jozɛfu alé nyɛ gi fe fɛan zo, a yɛrama.
23Dɔrɔtabinzan segele ’ka é gi bɔrɔ lɛ Jozɛfu ma é dɛrɛ lo. ’Bɛ sele saan a gi.
Currently Selected:
Wepélisiananu 40: GOURU
Highlight
Share
Copy
Want to have your highlights saved across all your devices? Sign up or sign in
Alliance Biblique de Cote d'Ivoire 1979
