Wepélisiananu 39

Jozɛfu a Éjipiti tɛrɛ la

(1 Sam 18:12–14; LvS 1:1–3)

1Wo go Jozɛfu nya Éjipiti tɛrɛ la; yé Éjipiti mi Potifaa lé ke Faraɔn bɛgizan valé gaadénu nwiinzan nya, é Jozɛfu lɔ Ismaɛl munu lé wo da a nya ana, wo lee. 2Gakelebale a Jozɛfu va yé a bɛ ma kɛlɛ néné. Éé nyanaan ézan Éjipiti mi lé kɔn gi. 3Azan a ye léé, Gakelebale a a va. Yé we faa lé éé a kɛla, Gakelebale a va gya é zima. 4Jozɛfu kɛlɛ mi zin nya ézan yuɛ gi, ’té éé ’bɛ lé nyanama paan, yé ’bɛ a pla élé kɔngimunu nwiin yé ’bɛ élé fɛnu faa tere bɛ pa a lee. 5Potifaa Jozɛfu pla élé kɔngimunu nwiin yé é ’élé fɛnu faa bɛ pa a lee, tɔɔn, Jozɛfu lé we ma lé Gakelebale Éjipiti mi lé kɔn drɔɔ vo. Fɛnu faa lé ke a lee, dé wa kɔn gioo, dé wa féioo, Gakelebale wo drɔɔ vo. 6Fɛnu faa lé ke azé nya, é wonu faa vo Jozɛfu lee. É ’ka é bɔn‐in bɔrɔan we do kpen ma é dɛrɛ lo, éé fɛ blé é pla; naa, Jozɛfu dɔ gɔné dɔbɛ gi é zima, yé a yara a é nɔnɔmi.

Wo Jozɛfu vɔ bokɔn gi

(Jak 1:12)

7We ’konu zuo, we do bɔ; yee lé ke léé, azan Potifaa na bli bɔ Jozɛfu ma yé é léé: ’I yi gyɛ an va. 8Jozɛfu ’ka a nyi si lɛ lo, yé é lé ézan na lɛ léé: Anzan lé we do kpen kana ’ka ’é gi lo; é ’é leefɛnu faa bɛ pa an lee. 9Yeebozen ’ka blɛn yé é mini maa ta kɔn ’ko gi lo; yé é ’ka fɛ do kpen yi ga lɛ an lee lo, ’té dé é ’ka bii do nya lo; bii a a na nya, azama. An kɛla kaa yé an ’bɛ zo wenaané blɛn kɛlɛ yé an wenyané kɛlɛ Kazambale maa? 10É vo a fena Jozɛfu lɛ yifaama, naa, ’bɛ ’ka yigyɛle a va nyi si lɛ duowo lo. Yé é ’ka a nyi si lɛ lee, é vo lezan sɔnɔ lo. 11Yi do nya é wɔra kɔn gi élé nyanama pale we ma, ’té kɔngimi do kpen ’ka ana lo. 12Lezan kun alé sɔ ma yé é léé: ’I yi gyɛ an va. Yé é ’élé sɔ vo a lee, yé é bɔra vlan nya béera. 13Lezan a ye aan wo léé, alé sɔ vo é lee, yé é go vlan nya béera, 14yé é ’élé kɔngimunu laa yé é lé wo lɛ léé: Ka yua, an zana da Ébru mi do nya ’ko blɛn gle wole ko va we ma. Mi ’ko da yi gyɛle an va we ma, yé maa siaa an dére plɛplɛ nya. 15É a ye aan wo léé, an dére bié yé an siaa, é ’élé sɔ vo an lee yé é bɔra vlan nya béera. 16Yé é Jozɛfu lé sɔ pla é sɔnɔ fɔɔ yé a zana da kɔn’léé. 17Yé é we fe ’bɛ lɛ léé: Ébru luugɔné lé i da a nya ko va, é da blɛn glewo lɛ an va. 18An dére bié yé maa siaa aan wo, é daan ’élé sɔ ma an lee yé é bɔra vlan nya. 19Dérenu lé a na a fe léé, we lé ilé luu a kɛlɛ ’é lɛ, yee lé ke bɛ, Jozɛfu zan a ’ma aan wo, a bli fli é baba. 20É Jozɛfu kun yé é a vɔ bokɔn gi, fɛana lé woo minwiinzan blɛn lé bokɔngimunu vɔa, ana. Yé é vo bokɔn gi mi.

21Gakelebale a Jozɛfu va yé é wezin kɛlɛ a lɛ. É a kɛlɛ mi zin nya bokɔngimunu nwiinzan yuɛ gi. 22Yé bokɔngimunu nwiinzan Jozɛfu pla bokɔngimunu faa nwiin, ’té wo ’ka we do kpen kɛla a ma trɔnné va lo. 23Gakelebale a Jozɛfu va, amalé fɛnu lé ke Jozɛfu lee, bokɔngimunu nwiinzan ’ka é ’wuo gi bɔrɔan ’bɛ ma monomono lo. Yé we faa lé Jozɛfu a kɛla, Gakelebale a vɔa a ma.

Currently Selected:

Wepélisiananu 39: GOURU

Highlight

Copy