Wepélisiananu 33
33
Jakɔb valé Ézau kee
1Jakɔb yara nwa yé é a nagini, ’té Ézau a dana mi wuru fié nya é va. Yé Jakɔb nénu guli Léa koo, Rasɛl koo, wuolomu fié koo, wo ma. 2É wuolomu valé wolé nénu dɔ zi ’lɛ, ’bɛ zuo Léa valé élé nénu, yé Rasɛl valé Jozɛfu vo é voéla. 3Yeebozen gié wo ’lɛ, yé é dia é bli la tɛrɛ va fɔɔ gɔnɔ sɔrafié yé é bɔ é bwe sɔnɔ. 4Ézau da a va vlan nya; é Jakɔb tuu gyɛ, é vɔ a bɔrɔ ma yé é pwɛpwɛ vɔ a ma. Yé wo wuvɔ.
5Ézau é yuɛ vɔ yé é lomu valé nénu ye yé é léé: De lé nénu ɛ ke i va bɛɛ? Yé Jakɔb léé: Nénu lé Kazambale a nɔ i wuozan lɛ, wo lé. 6A wuolomu bié, wo valé wolé nénu nya, yé wo dia ’wo bli la; 7Léa valé élé nénu bié é ziin yé wo dia ’wo bli la; ’bɛ zuo Jozɛfu valé Rasɛl bié yé wo dia ’wo bli la. 8Ézau léé: Fɛnu faa lé maa kee wo nya bɛ, i a mɛ kɛlɛna wo nyaa? Yé Jakɔb léé: Anzan lé an ma we vole mafɛnu lé. 9Ézau léé: An zuan, fɛ a an lee di. Ilé fɛnu ’é vo i lee ma. 10Jakɔb léé: Gba, ilé zanté. Dé maa i yuɛi bɔ, ’i blan si an lee ma. Naa, maa i yara ye bélé woo Bale yara yé fɛan zo, a zo, yé i an si é zima. 11Blan lé maa a nɔ i lɛ, bé si, naa, Kazambale zin kɛlɛ an lɛ kiɛre yé fɛ do kpen ’ka vuru lɛ an ma lo. É Ézau tunu amalé ’bɛ a si.
12Ézau léé: ’I da, kaa zi sia. Maa dan gié lɛ i ’lɛ. 13Jakɔb lé a lɛ léé: Anzan a gi dɔɔ léé, nénu ’ka plɛplɛ lo, yé ’bladanu valé diridanu lé wolé nénu ke nyɔ ma, wa an va; dé wo tawo gla nya yi do kpen nya, trubɛ faa éé gaan. 14Anzan ’é gié é wuozan ’lɛ ma, yé maa dan da lɛ a zuo drɔɔ, trubɛnu valé nénu lé tawobɛ yɛrama, fɔɔ yé an bɔ anzan va Séii. 15Ézau léé: ’Maa anlé mi kenu vo i va ma. Jakɔb léé: Mɛmaléé? ’Maa anzan yuɛi bɔ ma. 16A yi duo nya Ézau Séii zi sia.
17Jakɔb Sukɔt zi sia. É élé kɔn dɔ yé é trubɛnu zé dɔ é ziin. Bɛwemalé wo fɛkona tɔ laa Sukɔt.
18Jakɔb si aan wo Padan‐Aram, é bɔ drɔɔ Sisɛin, Kanaan tɛrɛ la yé é nyana fla ’lɛ zia. 19Féi bɛ do lé é ’élé sɔkɔn dɔ ana, é a lɔ Sisɛm ti Amɔɔ benu lee gɔɔli fu wɔlɛ yɔ soru nya. 20É balebanna do kɛlɛ ’bɛna yé é a laa El‐Eloé‐Izraɛl.
Currently Selected:
Wepélisiananu 33: GOURU
Highlight
Share
Copy
Want to have your highlights saved across all your devices? Sign up or sign in
Alliance Biblique de Cote d'Ivoire 1979
