Wepélisiananu 32

Jakɔb we pa Ézau lɛ zia

(WGV 15:1; LvS 91:11)

1Jakɔb zi sia; yé woo valé Bale lé lanjenu kee. 2Jakɔb wo ye aan wo, é léé: Kazambale lé sunya palu do lé. Yé é fɛkona laa Maanaim.

3Jakɔb munu nwunvɔ ’é ’lɛ é bwe Ézau va Séii tɛrɛ la, Édom bɛn gi. 4É lé wo lɛ léé: ’Ka fe anzan Ézau lɛ léma: i wuozan Jakɔb léma: ’é nyana Laban va yé é vo ana mi fɔɔ bléyi ’ko va; 5dirinu koo, sokofalenu koo, ’blanu koo, nyanamapagɔnénu valé nyanamapalomu koo, wa ’é lee, yé ’é we ’ko pa ’ézan lɛ zia, léé, ’é ’ é ye mi zin nya ma.

6Nwunvɔzannu da é ziin Jakɔb va yé wo léé: Ko go i bwe Ézau va; é a dana keena i nya, mi wuru fié nya é va. 7Kana zén Jakɔb gi é baba yé a gi nyɛ kini. É vamunu koo, ’blanu koo, dirinu koo, nyɔgɔménu koo, é wo gi bɔi fié yé é léé: 8Dé Ézau da guli dan lɛ a palu do va yé é wo gyɛ, a palu koɛzan ’ko, wo bɔa sole lɛ a lee.

9Jakɔb léé: An ti Abraam zé Bale, an ti Izak zé Bale, Gakelebale, bii a fe an lɛ léé, ’an go anlé tɛrɛ la an yaafla la yé ’é dan wezin kɛlɛ lɛ an lɛ. 10Zin faa lé bé kɛlɛ i wuozan lɛ, é valé i yara pale an mawe faa kɛlɛle ta, maa a ’bɛ ma kiéné; an Juudɛn ’ko kini, ’té tawomayili do kpen ɛ ke an lee, yé sin an kɛlɛ palu fié nya. 11Ilé zanté, ’i an si an bwe Ézau leeoo, Ézau lee! Naa, kana a an gi léé, é dan da lɛ yé é maa gyɛ, maa valé né bunu valé nénu nya. 12Yé bii, i léé, ’é dan wezin kɛlɛ lɛ an lɛ, yé ’é dan an kulunu kɛlɛ lɛ di bélé wɛyi gɔɔn ma nyéné zo, ’té wo ’ka bɔa wo nɔnɔle lɛ lo.

13Fɛkona lé Jakɔb yii. É ’é leefɛnu ke si é bwe Ézau blan nya. 14Bolida wuru do valé boligɔné yɔ do koo, ’blada wuru do valé ’blagɔné yɔ do koo, 15nyɔgɔméda yɔ do wɔlɛ vu valé wolé nénu lé wo ke nyɔ ma koo, dirida yɔ fié koo, dirigɔné vu koo, sokofaleda yɔ do ko, sokofalegɔné vu koo, wo lé é wo si. 16É trubɛnu lɛ pa é wuomunu lee do do yé é lé é wuomunu lɛ léé: ’Ka gié an ’lɛ trubɛ ’konu nya. 17É lé a vininzan lɛ léé: Dé ka valé an bwe Ézaunu kee, dé é a laa i lee léé, de lé mi lé i nyaa? i go kyɛɛn? trubɛ lé ke i ’lɛ ’ko, de zé léé? 18bé fe a lɛ léma: i wuozan Jakɔb zé lé; anzan Ézau blan lé é a pa zia, yee lé, yeeboen a dana ko zuo. 19É dére ’ko duo fe a fiézan lɛ yé é yee duo fe a yaazan lɛ, yé munu faa lé wo ke trubɛnu zuo, é yee dére duo fe wo faa do do lɛ. É léé: Dé ka valé anzan Ézaunu kee, a zo lé ’ka fe a lɛ. 20’Ka fe léé, i wuozan Jakɔb a dana ko zuo é ziin. Naa, Jakɔb léé: Maa dan a bli dɔrala lɛ blan ’ko lé é go an ’lɛ, a nya; a zuo dé an dɔ a yara, dé é dan an si lɛ é zimaa? 21Alé blɛfɛnu gié a ’lɛ; yé ’bɛ béli é yii kampéman la bɛ.

22’Bɛ béli duo nya é nwa; é na fiénu koo, é wuolomu fiénu koo, élé né vu ta do koo, é wo si yé wo gié Jabɔk lé ’yikinina. 23É wo si yé é yuu kini wo nya yé fɛnu faa lé ke a lee, é yuu kini wo faa nya.

Jakɔb buo si lanje va

(2 Kor 12:6–10)

24Jakɔb vo é do. Yé mi do vo buo sina a va fɔɔ yé tu kini. 25Mi ’ko a ye aan wo léé, ’é ’ka Jakɔb kelena lo, é fɛ duun a binla polu la yé Jakɔb boro so é ke ’léé bléyian va lé é a buo sina a va, a bléyi va. 26Mi ’ko léé: ’I daan an ma ’an go, naa, tu a kinina. Yé Jakɔb léé: Dé i ’ka an drɔɔ vo lɛ lo an ’ka dan daan lɛ i ma pelo. 27É lé a lɛ léé: Wo i tɔ laama nɔɔ? Yé é léé: Wo an laama Jakɔb. 28É lé é ziin léé: I tɔ ’ka dan kɛlɛ lɛ Jakɔb é dɛrɛ lo, naa, wo dan i laa lɛ Izraɛl; i buo si Kazambale valé munu va yé i wo kele a nya, azama. 29Jakɔb léé: Wo i tɔ laama nɔɔ? É léé: Mɛmalé i an tɔ laa an lee? yé é a drɔɔ vo ’bɛna. 30Jakɔb fɛkona tɔ pa Péniɛl, naa, é léé: Maa Kazambale yara ye, yé an béli. 31É si Péniɛl bléyian va, ’té yiri a nwana. Jakɔb boro sona é ke ’léé lé we ma lé é tun bo, 32bɛwemalé wi boro gi wɔlɛ sona é ke ’léé miin fu bɛ, Izraɛl lé nénu ’ka a blé lo, fɔɔ kyɔ; naa, Kazambale Jakɔb gyɛ é binla polu la é boro sona é ke ’lééna.

Currently Selected:

Wepélisiananu 32: GOURU

Highlight

Copy