Lɔmukalu 5

Mɔ vɛ jate telenmande le Ala ɲakɔlɔ limaniya fɛ

1Mɔ vɛ jate telenmande le Ala ɲakɔlɔ limaniya fɛ, wo lɔ, josolajii vɛ don ǹu ni Ala wotɛ mɔ Tii Masa Tɔɔmasenin Isa sabu la. 2Ka bɛn Isa ma, mɔ fɛ vɛ kɛ nɛɛma min sɔlɔnko la limaniya sabu la, m'i nɛɛma min nɔ yi ne. Ado m'i sawala, kamasɔlɔn mɔ jei siinin Ala ya magbiliyali sɔlɔnko le la. 3K'a dɔ la wo kɔkan, m'i sawala hali maa tɔlɔyalu lɔ, kamasɔlɔn mɔ k'a lɔn ko tɔlɔya yi nala sawali le le. 4Ado sawali yi nala dajoo ɲuma le le, ani dajoo ɲuma yi nala jeisii le le. 5Jeisii wo tɛnala maloya lasena mɔ ma, kamasɔlɔn mɔ josola vɛ fa Ala ya kanundeya la Nii Sɛnɛyanin sabu la, a na min dila mɔ ma.

6A waate bɛlɛ ka se mingɛ, ka mɔ to fangandanya lɔ, Masa Tɔɔmasenin ka sa Alaɲasiyanɲɛbalilu yɛ. 7A gbeleyayine k'a fɔ ko mɔɔ dɔ yi diɲa saya ma mɔɔ telennin ya ko lɔ. Kɛɛ tumadɔ, dɔ tɛɛ a wakalile ka sa mɔɔ ɲuma ya ko lɔ. 8Kɛɛ Ala na aa kanundeya jiyala mɔ la teme, wo le ne: Ka mɔ to julumbutɔya boloma, Masa Tɔɔmasenin ka sa mɔ yɛ. 9Wo lɔ saa, komi mɔ vɛ jate telenmande le butu Isa jeli bɔnko fɛ, a lagbɛyine feu ko a kɛtɔ mɔ lakisila ka mɔ bɔ Ala ya mɔnɛya kɔlɔ. 10Ala juu le tɛɛ mɔ le, kɛɛ a na ale ni ǹu wotɛbɛnna a Denkɛ ya saya le fɛ. Komi mɔ wotɛ vɛ bɛn butu, a lagbɛyine feu ko mɔ kɛtɔ kisila a Denkɛ ya niimaya le fɛ. 11K'a dɔ la wo kɔkan, m'i sawala Ala ya kafonɲɔɔya lɔ, kamasɔlɔn ale ni ǹu wotɛ vɛ bɛn mɔ Tii Masa Tɔɔmasenin Isa sabu la.

Mɔ bema Adama ani Masa Tɔɔmasenin

12Wo ma, julumbu donnin dunuɲa mɔɔ kelen ne sabu la, ado julumbu nanin saya le le. Wo le n'a kɛla, saya vɛ se mɔɔ bɛ ma, kamasɔlɔn bɛ vɛ kɛ julumbutɔ le. 13Tuɲa le, jani seliya la tɛɛ jii Nabi Musa ma, julumbuko tɛɛ dunuɲa butu. Kɛɛ julumbu tɛ jatela ni seliya ma kɛ je. 14Kɛɛ wo bɛ n'a kɛ, ka ta mɔ bema Adama ya waate ma ka na sii Nabi Musa ya waate la, saya fanga le tɛɛ adamaden bɛ kunna, hali minu tɛɛ ma julumbu ta iwo Adama n'a kɛla teme ka Ala ya seliya tiɲa.

Mɔɔ min tɛɛ ka kan ka na, mɔ bema Adama kɛnin wo misali le le. 15Kɛɛ julumbu min tanin Adama bolo ani Ala ya sɔli, wolu tɛ se lala i ɲɔɔ ma. Kamasɔlɔn ni mɔɔ siyama na sala ka bɛn kɛ́ kelen ya julumbu taya kelen ne ma, a lagbɛyine feu ko Ala ya nɛɛma ni aa sɔli vɛ siyaya mɔɔ jilika jilika yɛ ka bɛn kɛ́ kelen ya nɛɛma ma, min kɛnin Masa Tɔɔmasenin Isa le. 16Ado Ala ya sɔli ani kɛ́ kelen wo ya julumbu kɔjavi, wolu tɛ se lala i ɲɔɔ ma. Kamasɔlɔn kɛ́ kelen ne ya julumbu na nala kolatɔn ne, k'a talan Ala ya sɔli min dinin julumbu siyama ta kɔla, wo na nala telenmandeya le le a ɲakɔlɔ. 17Ado ni saya fanga na siila bɛ kunna ka bɛn kɛ́ kelen ya julumbu taya kelen ma, a lagbɛyine feu ko mɔɔ minu yi Ala ya nɛɛma ba ni aa telenmandeya sɔli sɔlɔnna, wolu kɛtɔ masaya kɛla niimaya lɔ kɛ́ kelen ne sabu la, min kɛnin Masa Tɔɔmasenin Isa le.

18Wo lɔ saa, iwo julumbu taya kelen na kɛla sabu le teme ka mɔɔ bɛ jobaliya, wo boloɲa kelen ma, kɛko telennin kelen vɛ kɛ telenmandeya ni niimaya sabu le mɔɔ bɛ yɛ. 19Kɛ́ kelen ya kolobaliya na kɛla sabu le ka mɔɔ siyama kɛ julumbutɔ le. Wo boloɲa kelen ma, ka bɛn kɛ́ kelen ya kannabatoli ma, mɔɔ siyama jatetɔ telenmande le le.

20Nabi Musa ya seliya la ka jii fɔsa maa julumbu dɔ yi to lala a kɔkan. Kɛɛ julumbu ka wala ɲa o ɲa ma, Ala ya nɛɛma walayine ka timin wo la feu. 21Julumbu na fanga sɔlɔnna ka bɛn saya le ma. Wo boloɲa kelen ma, Ala ya nɛɛma yi fanga sɔlɔnna ka bɛn telenmandeya le ma, min yi nala niimaya banbali le mɔ Tii Masa Tɔɔmasenin Isa sabu la.

Currently Selected:

Lɔmukalu 5: MBT2023

Highlight

Copy