Lɔmukalu 6

Mɔ kafonnin Masa Tɔɔmasenin kɔkan aa saya lɔ

1M'i mindɛ le fɔ wo lɔ? Jalasa m'i kɛ julumbu tala fɔsa Ala ya nɛɛma yi siyaya bɛlɛbɛlɛ kɛ? 2Ɛnɛn dɛ! Julumbu ta fanfɛla lɔ, mɔ vɛ sa ka bɔ wo kɔlɔ. Wo lɔ saa, m'i se ka maa dunuɲalɔtɛɛ kɛ julumbutɔya lɔ di? 3Ài m'a lɔn ko ǹu minu vɛ makoli masɔlɔn ka mɔ ladon Masa Tɔɔmasenin Isa ya kafonɲɔɔya lɔ, mɔ kafonnin a kɔkan aa saya lɔ fana? 4#Kɔlɔsikalu 2.12.Maa makoliko sabu la, mɔ su vɛ doon a fɛ ka kafon a kɔkan aa saya lɔ, fɔsa Masa Tɔɔmasenin lawulinin teme ka bɔ saya lɔ mɔ Fa Ala ya foniseleya lɔ, ǹu fana yi taama niimaya kula lɔ ten ne.

5Ni mɔ vɛ kafon a kɔkan saya suu min nɔ, mɔ layine a la feu ko mɔ la kɛtɔ wulila fana aa kafonɲɔɔya lɔ, iwo a n'i wulila ka bɔ saya lɔ teme. 6Mɔ do k'a lɔn ko mɔ dajoo kɔlɔ gbaanyine kɔlɔman ma Isa fɛ, fɔsa julumbu min tɛɛ mɔ dajoo kɔlɔ lɔ, wo fanga yi ban ani mɔ kana to julumbu ya jɔnya lɔ butu. 7Kamasɔlɔn mɔɔ min sanin, wo tii ma la vɛ fɛlɛ ka bɔ julumbu fanga kɔlɔ.

8Komi ǹu ni Masa Tɔɔmasenin vɛ sa i ɲɔɔ fɛ, wo ma, mɔ limaniyayine ko ale ni ǹu kɛtɔ niimaya kɛla i ɲɔɔ fɛ fana. 9Mɔ k'a lɔn fana ko Masa Tɔɔmasenin wulinin teme ka bɔ saya lɔ, a tɛnala sala butu, ado fanga tɛ saya bolo a kɔkan wo kɔ. 10Kamasɔlɔn a na saya min kɛla julumbu fanga tiɲako lɔ, wo na kɛla siɲa kelen ne le ka ban. Kɛɛ a yi niimaya min kɛla, wo yi kɛla Ala le yɛ. 11Wo boloɲa kelen ma, àilu gbu y'ài jɛlɛ jate iwo mɔɔ saninnu minu vɛ bɔ julumbu fanga kɔlɔ, ani mɔɔ minu yi niimaya kɛla Ala yɛ Masa Tɔɔmasenin Isa ya kafonɲɔɔya lɔ.

12Ài do kà diɲa julumbu yi fanga sɔlɔn ài falikolo sata ma, ka to ài falikolo niikanukolu kɛla. 13Ài k'ài falikolo fan suu suu di julumbu ma k'a kɛ telenbaliyakokɛfen ne. Mafɔ, ài y'ài jɛlɛ di Ala ma iwo mɔɔ minu wulinin ka bɔ saya lɔ, k'ài falikolo fan bɛ don Ala bolo k'ai kɛ kolatelenninkɛfen ne. 14Wo ma, julumbu tɛnala fanga sɔlɔnna ài ma butu, kamasɔlɔn ài tɛ seliya kɔlɔ butu, mafɔ Ala ya nɛɛma.

M'i kɛ telenmandeya ya jɔn ne

15A yi di vɛ? Fɔ m'i kɛ julumbu tala kamasɔlɔn mɔ tɛ seliya kɔlɔ butu, mafɔ Ala ya nɛɛma? Wo tɛ dɛ! 16Ài m'a lɔn ni ài k'ài jɛlɛ di mɔɔ min ma iwo jɔn k'a kumakan labato, wo vɛ kɛla, ài vɛ kɛ wo tii ma ya jɔn ne? Ni ài vɛ kɛla jɔnya lɔ julumbu bolo, wo laban yi saya le le. Ni ài do vɛ kɛla jɔnya lɔ Ala bolo k'a kumakan labato, wo laban yi telenmandeya le le. 17M'i balika bɔla Ala yɛ, kamasɔlɔn àilu minu tɛɛ julumbu ya jɔn ne kɔlɔman ne, ài vɛ kalan min latelen ài josokun bɛ la, min dinin ai ma. 18Ài do la vɛ fɛlɛ ka bɔ julumbu ya jɔnya lɔ, k'ài kɛ telenmandeya ya jɔn ne.

19Ǹe do yi kumala adamadenya bolo le ma ka bɛn ài falikolo ya fangandanya ma. Waate lɔ, ài n'ài falikolo fannu bilala kokɔsɔninnu ni seliyatiɲakolu ya jɔnya le lɔ, ka to a dɔ lala àiya koyonnu kɔkan kudein. Kɛɛ tandainɔ, fɔ ài y'ài falikolo fannu bɛ bila telenmandeya ya jɔnya lɔ ten ne, min laban yi sɛnɛyali le. 20Ài tɛɛ julumbu ya jɔnya lɔ waate min nɔ, ài lafɛlɛyine tɛɛ ka bɔ telenmandeyako ma. 21Kɛɛ do, ài na nafa mindɛ le sɔlɔnna ài kɛko wolu la, minu maloya ài la bi? Kamasɔlɔn wolu laban yi saya le le. 22Kɛɛ komi ài la vɛ fɛlɛ ka bɔ julumbu lɔ k'ài kɛ Ala ya jɔn ne butu, ài yi nafa min sɔlɔnna, wo le sɛnɛyali le min laban yi niimaya banbali le. 23Kamasɔlɔn julumbu sala le saya le, kɛɛ Ala ya sɔli yi niimaya banbali le le mɔ Tii Masa Tɔɔmasenin Isa ya kafonɲɔɔya lɔ.

Currently Selected:

Lɔmukalu 6: MBT2023

Highlight

Copy