Lɔmukalu 3

1Wo lɔ saa, nafa mindɛ le yi Jahudiyaya la? Tɔnɔ suu mindɛ le yi kɛnɛkɛko la? 2Tuɲa le, wo nafa walanin boloɲa bɛ le ma! A kunfɔlɔ le, Ala na aa samakan kalifala Jahudiyalu le la. 3Kɛɛ ni ai dɔlu ka kɛ lanandeyabali le do? Jalasa wo le kɛtɔ Ala ya lanandeya tiɲala? 4Ɛnɛn dɛ! Fɔ m'a lɔn Ala yi tuɲande le le, hali ni adamaden bɛ tɛɛ kɛ faɲafɔba le. A do sɛvɛnin tan ne kitabu kɔnɔ, ko:

«Jo yi di i ma i kumakannu lɔ,

i do yi see sɔlɔn iya kiti lɔ.»

5Kɛɛ ni maa telenbaliya vɛ kɛla sabu le ka Ala ya telenmandeya lagbɛ, m'i mindɛ le fɔ wo lɔ? Jalasa ǹ'i kuma mɔɔnivinya boloma k'a fɔ ko jo tɛ Ala bolo ka aa mɔnɛya lajii mɔ kanma? 6Ɛnɛn dɛ! Ni Ala tɛɛ ma kɛ telenmande le, a tɛɛ se dunuɲa kitila di wo lɔ? 7Kɛɛ do, ni ǹa faɲafɔko ka kɛ sabu le k'a dɔ la Ala ya tuɲandeya kɔkan aa magbiliyali lɔ, mindɛ lɔ a yi ǹ jobaliyala bene iwo julumbutɔ? 8Wo lɔ, mindɛ lɔ mɔ t'a fɔla, ko: «M'i koyon kɛ fɔsa koɲuma dɔ yi bɔ a lɔ»? Mɔɔ dɔlu yi tɔɔ lala mɔ la tan ne, ko m'i mɔɔlu kalanna kuma wo le la. Ai kɛtɔ latɔnni sɔlɔnna iwo a bɛnnin ai ma teme.

Mɔɔ foi telennin tɛ

9A yi di vɛ? Jalasa ǹu Jahudiyalu fisayanin ka timin dɔ mɔɔlu la? Wo tɛ dɛ! M̀'ɛ ban a lagbɛla ko Jahudiyalu ni siboloma gbɛlɛ mɔɔlu bɛ yi julumbu ya fanga le kɔlɔ. 10A sɛvɛnin kitabu kɔnɔ tan ne, ko:

«Mɔɔ foi telennin tɛ, hali mɔɔ den kelen gbu!

11Mɔɔ foi tɛ ko ɲayena,

ani ai suu suu tɛ Ala ɲininna!

12Ai bɛ vɛ fili,

k'ai kɛ nafandan ne kelen ne.

Ai suu suu tɛ kokein kɛla,

hali mɔɔ den kelen gbu!

13Ai dalakan kɛwonyayine iwo kabulu dalakanin.

Ai y'ai nɛɛ labaalela janvakolu le lɔ.

Woloto baa le yi bɔla ai nɛɛ kɔlɔ.

14Ai da lafanin daanni ani kuma gbeyanin ne la.

15Ai sen latelejanin jeli bɔnko le lɔ.

16Ai vɛ timinna tɛɛ o tɛɛ lɔ, tiɲali ni bɔnɔ le yi tola je.

17Ai ma josolajii siya lɔn.

18Ai tɛ siyanna Ala ɲa feu.»

19Mɔ do k'a lɔn ne ko Nabi Musa ya seliya yi min min si fɔla, a yi wolu le fɔla mɔɔlu yɛ minu yi seliya wo kɔlɔ, fɔsa mɔɔ bɛ da la yi tuun, ani dunuɲa bɛ lakafonnin yi don Ala ya kiti kɔlɔ. 20#Galatiyakalu 2.16.Wo le n'a kɛla, mɔɔ mɔɔ tɛnala jatela telenmande le Ala ɲakɔlɔ ka bɛn seliya latelenko ma, kamasɔlɔn julumbu lɔnko yi nala seliya le fɛ.

Ala yi mɔɔlu jatela telenmande le teme

21Kɛɛ tandainɔ yi ne, Ala v'a jiya mɔ la a yi mɔɔlu jatela telenmande le teme, hali ni seliya sen t'a lɔ, k'a talan seliya kitabu ani kela dɔgbɛlɛlu ya kitabulu vɛ seleya kelen min di. 22#Galatiyakalu 2.16.Wo le k'a fɔ ko Ala yi mɔɔlu kɛla telenmande le ka bɛn limaniya le ma Masa Tɔɔmasenin Isa ma. Wotɛbɔli tɛ je, 23kamasɔlɔn bɛ vɛ julumbu ta k'ai fo Ala ya magbiliyali la, 24bɛ do vɛ jate telenmande le aa nɛɛma dinin sabu la ka bɛn kunmakako ma, Masa Tɔɔmasenin Isa nanin min ne. 25Ala na ale le bɔla julumbu lɔkoto salaka le ka bɛn a jeli bɔnko ma, min yi se sɔlɔnna limaniya boloma. Wo ka kɛ Ala ya telenmandeya jiyako le lɔ, kamasɔlɔn kɔlɔkɔlɔ le, a tɛɛ a ɲa lagbanna mɔɔlu ya julumbulu kunna ka bɛn aa sawali ma. 26A na wo kɛla aa telenmandeya jiyako le lɔ waate min nɔ, ani k'a jiya ko telenmande le a le, a do yi mɔɔlu jatela telenmande le minu limaniyanin Isa ma.

27Mindɛ le tonin mɔ bolo butu, k'a fɔ ko m'i mɔ waso wo la? Foi! Jalasa m'i sene ka mɔ waso ka bɛn maa seliya latelenko ma? Ɛnɛn dɛ! Mafɔ, limaniya dein! 28Kamasɔlɔn mɔ lanin a la ko Ala yi mɔɔ jatela telenmande le limaniya le fɛ, wo tii ya seliya latelenko tɛ. 29Niwotɛ, Ala yi Jahudiyalu Tii le le dein? Siboloma gbɛlɛ mɔɔlu fana Tii tɛ Ala le? Wolu fana y'a ta le le jɔ! 30#Galatiyakalu 3.20.Komi Ala yi kelen ne le, wo lɔ, a kɛtɔ Jahudiyalu jatela telenmande le limaniya le fɛ, ani siboloma gbɛlɛ mɔɔlu fana. 31Jalasa wo kɔlɔ le ko Nabi Musa ya seliya vɛ kɛ kofuun ne ka bɛn limaniya min ma? Wo tɛ dɛ! Mafɔ, m'i seliya wo lasawatila.

Currently Selected:

Lɔmukalu 3: MBT2023

Highlight

Copy