Lɔmukalu 2

Ala ya kititɛɛ telennin

1 # Matiyu 7.1; Luka 6.37. Wo lɔ saa, ile adamaden, ni i ka dɔlu kiti, kumanɔbɔ dailu t'i bolo, hali ni i ka kɛ mɔɔ suu suu le. Kamasɔlɔn ni i ka dɔlu kiti, i i jɛlɛ le jobaliyala wo le, kamasɔlɔn ile gbu yi ko suu wolu le kɛla. 2Mɔ do k'a lɔn ko Ala jo le ko suu wolu kɛbalu latɔnko le. 3Ile adamaden min yi ko suu wolu kɛbalu kitila k'a talan ile gbu sen yi ko wolu lɔ, jalasa a y'i kɔnɔ ko Ala ya kolatɔn polotɔle i ma? 4Niwotɛ, i jɔyine Ala ya ɲumaya ba ma, ani aa sɔniyali ni aa sawali? Jalasa i m'a lɔn ko Ala ya ɲumaya le ka kan ka kɛ sabu le i i jɛlɛ lasei a ma? 5Kɛɛ ka bɛn iya josokunja ni i dajoo mafalinbaliya ma, i y'a dɔ le lala iya kolatɔn kɔkan kudein ka bɛn Ala ya mɔnɛya lonba ma, aa kiti telenninu la kɛtɔ nkɛnɛmayala waate min nɔ. 6A do kɛtɔ mɔɔ kelenkelenna bɛ salala ka bɛn ai kɛkolu le ma. 7Wo ma, mɔɔ minu sawalinin aiya koɲumakɛko ma fɔsa ai yi magbiliyali ni buɲali ni habadan niimaya ɲinin ai jɛlɛ yɛ, Ala kɛtɔ niimaya banbali dila wolu le ma. 8Kɛɛ do, mɔɔ minu gbalanin ai jɛlɛ kunko le ani minu tɛ tuɲandeya labatola, mafɔ ka telenbaliya labato, Ala ya mɔnɛya ni aa josolakuna wulitɔ mɔɔ suu wolu le kanma. 9Adamaden suu suu yi koyon kɛla, tɔlɔya ni kunnagbeya le kɛtɔ wo tii minala, ka damina Jahudiyalu ma ka taa sii siboloma gbɛlɛ mɔɔlu la. 10Kɛɛ do, mɔɔ suu suu yi koɲuma kɛla, magbiliyali ni buɲali ni josolajii le kɛtɔ kɛla wo tii ta le, ka damina Jahudiyalu ma ka taa sii siboloma gbɛlɛ mɔɔlu la. 11Kamasɔlɔn Ala tɛ lafisayali kɛla.

12Wo le y'a ma, mɔɔ minu yi julumbu tala k'a talan ai ma kɛ Nabi Musa ya seliyako kalama, wolu kɛtɔ halakila. Kɛɛ aiya kiti tɛnala tɛɛla ka bɛn seliya wo ma. Mɔɔ minu do yi julumbu tala, k'a talan ai yi seliya wo kalama, wolu ya kiti kɛtɔ tɛɛla ka bɛn seliya wo le ma. 13Kamasɔlɔn mɔɔ minu yi seliya lamɛnna dein, Ala tɛ wolu jatela telenmande le, mafɔ minu yi seliya latelenna. 14Siboloma gbɛlɛ mɔɔ minu ma Nabi Musa ya seliya sɔlɔn, ni wolu dɔlu ka kɛ seliya latelenna ai jɛlɛ yɛ, wo y'a jiya le la ko seliya wo y'ai josokun ne lɔ, hali ni seliya wo ma kɛ ai bolo. 15Ai kɛkolu y'a jiyala ko seliya yi mɔɔ lɔla ko minu la, wolu sɛvɛnin ai josokun ne lɔ. Ai miliya fana kɛnin wo sele le le. Waate dɔlu lɔ, ai miliya y'ai jɛlɛ jobaliyala, ado waate dɔlu lɔ, ai miliya y'ai jɛlɛ jo. 16Wo bɛ la kɛtɔ nkɛnɛmayala kititɛɛlon, Ala vɛ adamadennu kɔnɔlɔkolu kiti tɛɛla Masa Tɔɔmasenin Isa sabu la, iwo a fɔnin teme Samakan Kein nɔ, ǹ'i min lasena.

Jahudiyalu jobaliyako

17Kɛɛ ile do? I y'a fɔla i jɛlɛ ma ko Jahudiya, k'i bolomala Nabi Musa ya seliya ma, ani k'i waso ko Ala ta le i le. 18I do ka Ala sawo lɔn ka koyon ni koɲuma wotɛbɔ lɔn, kamasɔlɔn i kalanyine seliyako la. 19I lanin i jɛlɛ la ko ɲagbɛlu ya ɲabila le i le, ani divilɔmɔɔlu ya kɛnɛya. 20A do y'i kɔnɔ ko i vɛ lɔnni ni tuɲa dafanin sɔlɔn Nabi Musa ya seliya fɛ. Wo ma, kolɔnbalilu makoloba le i le, ani dennilu ya kalanmɔɔ. 21Wo lɔ saa, ile min yi dɔlu kalanna, mindɛ lɔ i t'i jɛlɛ kalanna? Ile min yi mɔɔlu kawanila ko ài kà suɲali kɛ, ile do? Jalasa ile gbu tɛ suɲali kɛla? 22Ile yi min y'a fɔla ko mɔɔ kà jalonya kɛ, ile do? Jalasa ile gbu tɛ jalonya kɛla? Ile min yi joolu lagbeyaɲɛla, jalasa ile gbu tɛ fennu suɲala joosɔyalu lɔ? 23I i jɛlɛ matɔɔla seliya lɔnko lɔ, k'a talan i yi Ala dɔɔyala ka bɛn aa seliyatiɲako ma. 24A do sɛvɛnin tan ne kitabu kɔnɔ, ko: «Ala tɔɔ la yi feyala siboloma gbɛlɛ mɔɔlu bolo ka bɛn àilu le ma.»

25Tuɲa le, nafa yi kɛnɛkɛko la ni i ka seliya latelen. Kɛɛ ni i ka seliya tiɲa, iya kɛnɛkɛnin vɛ kɛ kɛnɛkɛbaliya le. 26Wo lɔ, ni kɛ́ kɛnɛkɛbali ka seliya siya lataama, jalasa Ala tɛnala wo tii yena iwo aa mɔɔ makɛnɛkɛnin dɔ? 27Wo vɛ kɛla, kɛ́ kɛnɛkɛbali min yi seliya siya lataamana, wo le kɛtɔ ile jobaliyala ka bɛn iya seliya tiɲako ma, k'a talan seliya kitabu i bolo ani i makɛnɛkɛnin. 28Tuɲa le, dɔ tɛ Jahudiya le ka bɛn a falimako ma, niwotɛ ka bɛn aa kɛnɛkɛ nɔ ma min y'a fali ma. 29Kɛɛ mɔɔ kɔnɔlɔko le y'a kɛla Jahudiya le, ado kɛnɛkɛko bɛlɛbɛlɛ yi kɛla mɔɔ josokun ne lɔ Nii Sɛnɛyanin sabu la, seliya sɛvɛko tɛ. Mɔɔ suu wo tɛ matɔɔli sɔlɔnna adamadennu bolo, mafɔ Ala.

Currently Selected:

Lɔmukalu 2: MBT2023

Highlight

Copy