Lɔmukalu 1

1Ǹe Pɔli, Masa Tɔɔmasenin Isa ya jɔn ne yi lɛtɛlɛ min sɛvɛla, ǹe min kilinin ka ǹ kɛ keladen ne, ani ka m̀ bila ǹ ta fan Ala ya Samakan Kein yɛ. 2Samakan Kein wo le lahedi tanin Ala bolo ka ta waate jaan ma aa kelalu fɛ lɔhɔlɔma kitabulu kɔnɔ. 3Samakan Kein wo yi kumala ka bɛn a Denkɛ le ma, min taanin kɛla mɔ Tii Masa Tɔɔmasenin Isa le. Mɔɔnivinya ta boloma, Masakɛ Dawuda bɔzɔn ne a le. 4Kɛɛ Nii Sɛnɛyanin na aa ko jiyala fanga le boloma k'a fɔ ko Ala Denkɛ le a le, ka bɛn a wuliko ma ka bɔ saya lɔ. 5Ale le sabu la, Ala ya nɛɛma vɛ kɛ mɔ yɛ ka mɔ lasii keladenya la, min y'a kɛ sibolomalu bɛ yi limaniya Isa ma ka kolo a yɛ a tɔɔ buɲako lɔ. 6Àilu gbu fɛ yi mɔɔ wolu la, àilu minu kilinin k'ài kɛ Masa Tɔɔmasenin Isa ta le.

7Àilu minu yi Lɔmu so kɔnɔ, Ala na minu kanula k'ài kili k'ài kɛ mumininnu le, ǹ'i lɛtɛlɛ min sɛvɛla ài bɛ le ma.

Mɔ Fa Ala ni mɔ Tii Masa Tɔɔmasenin Isa ya nɛɛma yi kɛ ài yɛ, k'ài josolajii.

Lɔmukalu yenlɔɔ ka Pɔli mina teme

8Ǹ'i balika bɔla ǹ Tii Ala yɛ kunfɔlɔ le bene ài bɛ ya ko lɔ Masa Tɔɔmasenin Isa fɛ, kamasɔlɔn àiya limaniyako la yi sena dunuɲa fan bɛ lɔ. 9Ǹ'i baalela Ala min yɛ ǹ josokun bɛ le a Denkɛ ya Samakan Kein lasenko lɔ, wo le ǹ sele le k'a fɔ ko ǹ'àiya ko lasena a ma waate bɛ lɔ 10ǹa madaililu lɔ. Ǹ'i Ala dalila, ǹ ko, ni a ka diɲa a ma, a yi siya laka ǹ yɛ butu fɔsa ǹ'i taa bɔ ài ma. 11Tuɲa le, ài yenlɔɔ yi gbala ǹ na bubale, fɔsa ǹ'i Nii Sɛnɛyanin ya sɔli dɔ lase ài ma ka bɛn ài sɛmɛdonko ma. 12N'i min fɔla yi ne, wo le k'a fɔ ko ǹe ni àilu kɛtɔ i ɲɔɔ sɛmɛdonna. Ǹ kɛtɔ a dɔ sɔlɔnna àiya limaniya lɔ. Àilu fana kɛtɔ a dɔ sɔlɔnna ǹ ta limaniya lɔ.

13 # Kɛkolu 19.21. M̀ badenmalu, ǹ'a fɛ ài y'a lɔn ko m̀'ɛ a latɛɛ siɲa siyama le ko ǹ natɔ ài fɛlɔ, kɛɛ m̀ ma siya sɔlɔn ba bene hali bi. Ǹ'a fɛ ǹ'i na fɔsa àilu fana yi ǹa baale nafa dɔ sɔlɔn, iwo siboloma gbɛlɛ mɔɔ tɔlu na a nafa sɔlɔnna teme. 14A yi diyanigbeya le le m̀ ma ko ǹ'i Samakan Kein lase mɔɔ bɛ ma, sobakɔnɔmɔɔ ni toodalamɔɔlu bɛ, ani lɔnnila ni kalanbalilu bɛ. 15Wo le n'a kɛla, ǹ kunfanin Samakan Kein lasenko lɔ àilu gbu ma, minu siinin Lɔmu so kɔnɔ.

Mɔɔ telennin kɛtɔ niimaya kɛla limaniya le fɛ

16 # Malɛkɛ 8.38. Ǹ tɛ maloyala Samakan Kein ya ko lɔ, kamasɔlɔn Ala ya seetiiya le wo le min yi nala kisiko le Isa malimaniyamɔɔlu bɛ yɛ, ka damina Jahudiyalu ma ani siboloma gbɛlɛ mɔɔlu fana. 17Kamasɔlɔn Samakan Kein y'a jiyala ko Ala yi mɔɔlu jatela telenmande le a ɲakɔlɔ boloɲa min ne ma. A da yi minala limaniya le ma dein, a do la yi banna limaniya le ma, iwo a sɛvɛnin teme kitabu kɔnɔ, ko: «Mɔɔ telennin kɛtɔ niimaya kɛla limaniya bolo le ma.»

Dunuɲamɔɔlu ya telenbaliya

18Ala tonin haijɛnɛ ka aa mɔnɛya jiya ka bɛn adamadennu ya julumbu ni koyon bɛ ma, minu yi tuɲa doonna aiya koyonkɛ sabu la. 19Kamasɔlɔn ko minu yi se lɔnna ka bɛn Ala ya ko ma, wolu lankɛnɛmayayine gbesekele, kamasɔlɔn Ala gbu le na wolu lagbɛla ai yɛ. 20Kamasɔlɔn ka ta dunuɲa dan waate ma, Ala kɛɲa minu tɛ se yena ɲa la: aa foniseleya banbali ni aa Alaya koni, wolu yi yena gbesekele ni mɔ k'i mili aa dannifennu ma. Wo le n'a kɛla, adamadennu tɛ se ai kumanɔbɔla. 21#Ɛfɛsikalu 4.17, 18.Hali ai yi Ala ya ko kalama, ai ma magbiliyali di a ma iwo Ala, niwotɛ ka balika bɔ a yɛ. Mafɔ, ai hangili la ka gbasi, ado aiya hangilindanya vɛ ai bila divi lɔ. 22Ai tɛɛ a fɔla ai jɛlɛ ma ko hangilima, k'a talan ai vɛ kɛ hangilindan ne feu. 23Ai k'i ban habadan Ala magbiliyala, ka fen kaijakaijalu sawula bato, iwo mɔɔnivin satalu, ani kɔnɔlu, ani kolofennu, ani fɔnfɔnnifennu.

24Wo le n'a kɛla, Ala k'ai bila ai jɛlɛ ma ko ai y'ai kɔnɔlɔko kɔsɔnin suu bɛ dɔ kɛ, ai do vɛ malobaliyakolu kɛla i ɲɔɔ falikololu la. 25Ai ka Ala ya tuɲa mafalin faɲa la, ka dannifennu bato ani ka baale kɛ wolu yɛ Dannimasa gbu nɔ lɔ, tanuli yi min yɛ kudein. Amiina!

26Wo le n'a kɛla, Ala k'ai bila ai jɛlɛ ma ko ai y'ai niikanukolu kɛ malobaliya boloma. Wo lɔ, aiya mosolu ma kafonɲɔɔya kɛ butu a kɛɲa ma, mafɔ ai ka kafonɲɔɔya kɛ i ɲɔɔ le fɛ. 27Kɛ́lu fana n'a kɛla wo boloɲa kelen ne ma. Ai ka mosoko to ten, ai kɛ́ ɲɔɔlu lɔɔ vɛ gbala ai la. Kɛ́lu ka malobaliyakolu kɛ ai kɛ́ ɲɔɔlu la, ka kolatɔn lase ai jɛlɛ ma iwo a bɛnnin ai ma teme ka bɛn ai filiko ma.

28Komi ai ma Ala lɔnko ta ko sɔvɛ le, wo le k'a kɛ, Ala k'ai bila ai jɛlɛ ma ai miliya kolonnu kɔ, fɔsa ai yi kolu kɛ minu man kan ka kɛ. 29Ai josokun lafanin tɛɛ telenbaliyako suu bɛ dɔ la, ani koyon, ani natabaya, ani juuya, ani keleya, ani mɔɔfaako, ani mɔɔwotɛfalanko, ani janvandeya, ani kɔnɔlɔgbeya. Tɔɔfɔlikɛba le ai le, 30ani mɔɔtɔɔtiɲaba, ani Ala lagbeyaɲɛmɔɔ, ani jɛvɛlikɛba, ani mɔɔ fannɔba, ani wasokɛba. Ai do yi koyon kɛɲa kula le lɔbɛnna. Ai tɛ ai wolobalu kumakan labatola. 31Hangilindan ne ai le, ani lanandeyabali, ani maɲumayenbali, ani henandeyabali. 32Mɔɔ wolu k'a lɔn feu ko Ala na ko min latɛɛla telenmandeya bolo le ma ko mɔɔ minu yi ko suu wolu kɛla, wolu ni faali le kaannin. Kɛɛ wo bɛ n'a kɛ, ai yi ko wolu kɛla ka ban ka dɔlu fana sɛmɛdon ko suu wolu kɛko lɔ.

Currently Selected:

Lɔmukalu 1: MBT2023

Highlight

Copy