Kɛkolu 3

Piyɛli ka namalani dɔ lakɛnɛya teme

1Lon dɔ, wuladala lɛlɛ sawa waate, Piyɛli ni Yohana tɛɛ taala lɔhɔlɔmabonba la Ala daliya lɔ. 2Wo k'a talan, kɛ́ dɔ tɛɛ je min sɔlɔnnin tɛɛ namalaniya lɔ. Lon bɛ, ai tɛɛ nala a le k'a lasii lɔhɔlɔmabonba donda dɔ la, ai tɛɛ a fɔla min ma ko Da Kein, fɔsa a tɛɛ daili kɛ mɔɔlu la minu tɛɛ donna lɔhɔlɔmabonba la. 3A ka Piyɛli ni Yohana dontɔla ye mingɛ, a vɛ ai dalila. 4Ai mɔɔ fila k'ai ɲa kaa a lɔ, ado Piyɛli vɛɛ a yɛ: «I ɲa kaa mɔ lɔ!» 5Wo fɔ, a k'i ɲa kaa ai lɔ, a jii vɛ a sɔko ma.

6Kɛɛ Piyɛli vɛɛ a yɛ: «Sanu tɛ m̀ bolo, niwotɛ wɔligbɛ. Kɛɛ min yi m̀ bolo, ǹ'i wo le dila i ma. I wuli, i yi taama Masa Tɔɔmasenin Isa Nazalɛtika tɔɔ lɔ.» 7Wo fɔ Piyɛli bolo, a k'a mina a bolokini ma k'a lawuli. A sen ni a sengannalu ka fanga sɔlɔn telemanin. 8A do v'i gbanna k'i lɔ a sen na ka taama damina. Wo kɛ, a ka don lɔhɔlɔmabonba luu kɔnɔ Piyɛli ni Yohana fɛ, a vɛ taamana ka to a gbanna ka kɛ Ala tanule. 9Je mɔɔ bɛ k'a ye, a vɛ taamana ka Ala tanu. 10Ai do ɲanɔ ka to a ma k'a fɔ ko mɔɔ min siinin tɛɛ dailila lɔhɔlɔmabonba Da Kein na, wo le. Ai bɛ ka kawakoya fɔɔ k'ai kɔnɔlɔfili ka bɛn ko min kɛnin kɛ́ yɛ.

Piyɛli ka mɔɔlu kawani lɔhɔlɔmabonba la teme

11Kɛ́ wo fasanin ka to Piyɛli ni Yohana ma, mɔɔ bɛ vɛ bɔlila kawakoya boloma ka na ai ma bolon dɔ kɔlɔ, ai tɛɛ a fɔla min ma ko Sulimana ya Bolon. 12Piyɛli ka jama ye mingɛ, a vɛɛ ai yɛ: «Bani Isilankalu, mindɛ kɛnin ài yi kawakoyala ka bɛn ko min ma, k'ai ɲa kaa mɔ lɔ ka kɛ iwo mɔ fanga le na kɛ́ min lataamana, niwotɛ maa Alaɲasiyanɲɛ? 13Mɔ bemanu Tii Ala, min yi Ibulahima ni Isiyaka ani Janguba Tii le, wo le na ko ba min kɛla ka bɛn aa bɔiden Isa magbiliyako ma. Àilu le na a donna mɔɔlu bolo a faako lɔ, k'ài ban a lɔ Pilati ɲakɔlɔ, k'a talan a tɛɛ v'a latɛɛ ko a a bila. 14#Matiyu 27.15-23; Malɛkɛ 15.6-14; Luka 23.13-23; Yohana 19.12-15.Kɛɛ ài do k'ài ban mɔɔ sɛnɛyanin ni telenmande wo lɔ, ka Pilati madiya ko a yi mɔɔfaaba dɔ bila a nɔ lɔ ài yɛ. 15Min yi niimayadiba le, ài na wo le faala, kɛɛ Ala n'a lawulila ka bɔ saya lɔ. Mɔ do vɛ kɛ wo sele le. 16Kawananko min kɛnin limaniya le fɛ Isa tɔɔ lɔ. Ài ɲa yi kɛ́ min nɔ, ài do ka min lɔn, Isa tɔɔ le na fanga dila a ma. Limaniya min falannin Isa tɔɔ la, wo le kɛnin sabu le, ài y'a kɛnɛyanin dafanin yena yi ne.

17«M̀ badenmalu, ǹ k'a lɔn ài na ko min kɛla Isa la kolɔnbaliya le boloma, àilu ni àiya ɲamɔɔlu. 18Kɛɛ Ala na aa kuma mafala boloɲa min ne ma, min fɔnin kelalu bɛ bolo, ko aa Masa Tɔɔmasenin kɛtɔ tɔlɔya masɔlɔnna. 19Wo lɔ saa, ài y'ài dajoo mafalin, k'ài fannɔsei Ala ma, fɔsa àiya julumbulu yi bɔ ài ma. 20Wo vɛ kɛla, mɔ Tii kɛtɔ lafɛlɛ waate dila ài ma, ka Masa Tɔɔmasenin lana min latɛɛnin tɛɛ ài ma, min taanin kɛla Isa le. 21Kɛɛ fɔ a yi to haijɛnɛ bene, haan fɔɔ fen bɛ ma vɛ falinna ka kɛ a kula le waate min nɔ, iwo Ala ya lɔhɔlɔma kelalu tɛɛ min fɔla teme ka ta waate jaan ma. 22Nabi Musa vɛɛ: ‹Ài Tii Ala kɛtɔ kela gbɛlɛ lanala ài ma ka bɔ ài badenmalu tɛma, iwo ǹe. Wo tii vɛ ko ko si fɔla ài yɛ, ài yi wo bɛ labato. 23Ni mɔɔ mɔɔ ma kela wo labato, wo tii bɔtɔle Ala ya mɔɔlu tɛma ka halaki.› 24Ado kelalu bɛ ka kuma ka bɛn Masa Tɔɔmasenin ya waate ma. Ka damina Kela Samuyɛli ma, ani minu nanin a kɔ, ai tɛɛ waate min ne lasena. 25Ala na ko ko jiyala kelalu la, ani a na salatikan min tala ài bemanu yɛ, ài ta le wo bɛ le. A n'a fɔla Nabi Ibulahima yɛ, a vɛɛ: ‹Dunuɲa kabila bɛ kɛtɔ balaka sɔlɔnna i bɔzɔnnu le fɛ.› 26Wo lɔ, Ala na aa bɔiden tala k'a lana ài ma kunfɔlɔ le, fɔsa a yi balaka don ài lɔ, k'ài kelenkelenna bɛ bɔ àiya siya yonnu kɔkan.»

Currently Selected:

Kɛkolu 3: MBT2023

Highlight

Copy