Kɛkolu 10
10
Sɔdasi kuntii dɔ ka Piyɛli kili teme
1Wo k'a talan, kɛ́ dɔ tɛɛ Sezale so kɔnɔ, min tɔɔ tɛɛ ko Kɔɔnɛli. Lɔmu sɔdasi kuntii dɔ le tɛɛ a le, min siinin tɛɛ sɔdasi kɛmɛ (100) jate kunna, minu fɛ tɛɛ sɔdasi jama dɔ la, ai tɛɛ a fɔla min ma ko Itali kɛlɛkɛjama. 2Kɔɔnɛli tɛɛ Alaɲasiyanɲɛmɔɔ le le, ale ni aa bonnamɔɔlu bɛ. A do tɛɛ koɲuma kɛla mɔɔlu yɛ kosɛvɛ, ani ka Ala dali kudein. 3Lon dɔ, wuladala lɛlɛ sawa waate, Ala ka ko dɔ lajɛlɛ Kɔɔnɛli ɲa ma. A do ka Ala ya mɛlɛka dontɔla ye bon na k'a fɔ a yɛ, a vɛɛ: «Kɔɔnɛli!»
4A do k'i ɲa kaa mɛlɛka lɔ siyan boloma k'a javi, a vɛɛ: «Ǹ Kuntii, mindɛ le?»
Mɛlɛka do vɛɛ a yɛ: «Iya Aladali ni iya koɲuma kɛninnu fandannilu yɛ, wolu vɛ jɛlɛ Ala ɲakɔlɔ iwo hangilitonɔ salaka. 5Tandainɔ, i yi mɔɔ dɔlu lataa Jopa so kɔnɔ ka taa kɛ́ dɔ kili, min tɔɔ yi ko Simɔn, ai y'a fɔla min ma ko Piyɛli. 6A jiyanin mɔɔ min fɛlɔ, wo fana tɔɔ le ko Simɔn, min taanin kɛla gbolobaalekɛba le. Aa bon yi kɔɔji da le la.»
7Mɛlɛka ka ban kumala a yɛ ka taa feeya, Kɔɔnɛli ka aa bonnabɔiden fila kili ani aa sɔdasikɛ dɔ min tɛɛ Alaɲasiyanɲɛmɔɔ ni a madɛmɛnba le. 8A wɔlinin ko bɛ ɲafɔla ai yɛ, a k'ai lataa Jopa so kɔnɔ.
Ala ka ko dɔ lajɛlɛ Piyɛli ɲa la teme
9Wo kɛnɛbɔlon, mɔɔ sawa wolu masulunyatɔla Jopa so la, Piyɛli ka jɛlɛ bon kɔkan telelatelen waate Aladaliko lɔ. 10Kɔɔn k'a mina, a tɛɛ a fɛ ka dɔnni kɛ. Ai ka to gbadonna a yɛ, Ala ka ko dɔ lajɛlɛ a ɲa ma. 11A do ka sangbolo dalakanin ye, ka fen dɔ jiitɔla ye min kɛnin tɛɛ iwo bilingan ba, a minanin tɛɛ a tungun naani la. 12Tuukɔlɔsoo ni tuukɔlɔkɔnɔ ani fɔnfɔnnifen suu bɛ dɔ tɛɛ a lɔ. 13Wo kɛ, Piyɛli ka kumakan dɔ mɛn, wo vɛɛ: «Piyɛli, i wuli, i y'a dɔ faa k'a dɔn.»
14Kɛɛ Piyɛli vɛɛ: «Ǹ Tii, wo tɛ kɛ feu! M̀ ma fen sɛnɛyabali dɔn ba tuun, kumatɛ fen kɔsɔnin ma!»
15Kumakan ka bɔ a siɲa filana lɔ k'a fɔ a yɛ, a vɛɛ: «Ala na fen min lasɛnɛyala, i kà a fɔ wo ma ko fen kɔsɔnin.» 16Wo ka kɛ siɲa sawa le mingɛ, bilingan la ka jɛlɛ sangbolo lɔ.
Kɔɔnɛli ya keladennu ka na ka Piyɛli talan teme
17Piyɛli kɔnɔlɔfilinin ka to ka bɛn kojiyanin wo kɔlɔ ma, kɛ́ minu lataanin tɛɛ Kɔɔnɛli bolo, wolu tɛɛ vɛ Simɔn ya bon dingila lɔn. Ai do tɛɛ lɔnin luu da la. 18Ai k'ai kan labɔ ka ɲiningali kɛ, ai vɛɛ: «Simɔn, ai y'a fɔla min ma ko Piyɛli, a jiya le ne?» 19Piyɛli ka to a milila ka bɛn kojiyanin wo ma, Nii Sɛnɛyanin k'a fɔ a yɛ, a vɛɛ: «I tolomalɔ! Kɛ́ sawa nanin jan, ai i ɲininna. 20I wuli, i yi jii ka bila ai kɔ. I do kà sika, kamasɔlɔn ǹe le n'ai lanala.» 21Wo lɔ, Piyɛli ka jii ka taa ai ma, a vɛɛ: «Ài yi mɔɔ min ɲininna, ǹe le wo le. Ài nanin mindɛ la?»
22Ai do ka Piyɛli javi, ai vɛɛ: «Sɔdasi kuntii Kɔɔnɛli le na mɔ lanala. Mɔɔ telennin ne a le, ani Alaɲasiyanɲɛmɔɔ, Jahudiyalu bɛ yi min buɲala kosɛvɛ. Lɔhɔlɔma mɛlɛka dɔ le n'a fɔla a yɛ ko a y'i kili aa bon na, fɔsa a a tolomalɔ i kumakan na.» 23Wo kɛ, Piyɛli k'ai ladon bon na k'ai jiya.
Piyɛli ka taa Kɔɔnɛli fɛlɔ teme
Wo dusagbɛlon, Piyɛli k'i wuli ka bila ai kɔ ka taa, ado Jopa limaniyamɔɔ dɔlu ka taa a fɛ. 24Wo kɛnɛbɔ, ai ka se Sezale so kɔnɔ. Wo k'a talan Kɔɔnɛli tɛɛ v'a badenmalu ni a tɔva bɛlɛbɛlɛlu ladɛn, a vɛ Piyɛli nu makɔnɔna. 25Wo lɔ, Piyɛli dontɔla, Kɔɔnɛli ka taa a labɛn k'i bilin a sen kɔlɔ batoli boloma. 26Kɛɛ Piyɛli k'a lawuli k'a fɔ a yɛ, a vɛɛ: «I wuli, ǹ'i mɔɔnivin ne le iwo ile gbu.»
27Piyɛli ka to kumala Kɔɔnɛli fɛ, ai ka don bon na ka mɔɔ siyama ladɛnnin ye je. 28A do vɛɛ ai yɛ: «Àilu gbu k'a lɔn a ladaannin tɛ ǹu Jahudiyalu ma k'i madon siboloma gbɛlɛ mɔɔlu la, kumatɛ ka taa bɔ ai ma. Kɛɛ Ala v'a jiya ǹ na ko ǹ kà a fɔ mɔɔ suu suu ma mɔɔ sɛnɛyabali, niwotɛ mɔɔ kɔsɔnin. 29Wo le n'a kɛla, ài na ǹ kilila mingɛ, m̀ ma sɔsɔyali bila a lɔ, mafɔ ka na. Ǹ'ài maɲiningala wo lɔ, ài na ǹ kilila mindɛ la?»
30Kɔɔnɛli do vɛɛ a yɛ: «A vɛ tele naani bɔ, waate suu min nɔ, ǹ tɛɛ Ala dalila ǹa bon na wuladala lɛlɛ sawa waate. Ado kɛ́ dɔ k'i lɔ ǹ ɲakɔlɔ telemanin, faani gbɛ pepe v'a kanna. 31A vɛɛ: ‹Kɔɔnɛli, Ala v'iya madailikan mɛn, k'a hangili to iya koɲuma kɛninnu lɔ fandannilu yɛ. 32Wo ma yi ne, i yi mɔɔ dɔlu lataa Jopa so kɔnɔ ka Simɔn kili, ai y'a fɔla min ma ko Piyɛli. A jiyanin mɔɔ min fɛlɔ, wo fana tɔɔ le ko Simɔn, min taanin kɛla gbolobaalekɛba le. Aa bon yi kɔɔji da le la.› 33Wo le n'a kɛla, ǹ na mɔɔlu lataala i kɔ telemanin. Ado i nako vɛ iya ɲumaya jiya mɔ la. Mɔ Tii n'i lɔla ko minu fɔla mɔ yɛ, mɔ bɛ yi jan Ala ɲakɔlɔ ka mɔ tolomalɔ wolu bɛ ma.»
Piyɛli ka kawanili kɛ Kɔɔnɛli ya bon na teme
34Wo lɔ, Piyɛli vɛ kumala, a vɛɛ: «Tuɲa le, m̀'ɛ a ɲaye butu ko Ala tɛ lafisayali kɛla. 35Siboloma bɛ lɔ, ni mɔɔ minu ka siyan Ala ɲa ka kotelenninu kɛ, a a bolo siila wolu bɛ le kɔlɔ. 36Àilu gbu k'a lɔn ko Ala ka Samakan Kein lase Bani Isilankalu ma, k'a fɔ ko josolajii yi sɔlɔnna Masa Tɔɔmasenin Isa le fɛ, min yi mɔɔ bɛ Tii le. 37Ài do k'a lɔn ko minu na kɛla Jude fan bɛ lɔ, ka damina Galile, Yaya ya kawanili kɔ ka bɛn makoliko ma. 38Ala ka Nazalɛtika Isa ta ka a sɔ a Nii Sɛnɛyanin sɔ, ani seetiiya. A do tɛɛ timintiminna kokeinnu kɛla, ka mɔɔlu lakɛnɛya minu bɛ tɔlɔyanin tɛɛ Soitana bolo, kamasɔlɔn Ala tɛɛ a fɛ. 39Isa ka ko minu kɛ Jelusalɛmu so kɔnɔ ani Jahudiyalu ya jamana lɔ, ǹu le kɛnin wo bɛ sele le. Ai k'a gbaan kɔlɔman ma k'a faa, 40kɛɛ a tele sawana lon, Ala k'a lawuli ka bɔ saya lɔ, k'a lankɛnɛmaya. 41Kɛɛ mɔɔ bɛ m'a ye, mafɔ Ala na ǹu minu tala ka mɔ kɛ sele le, ǹu minu na dɔnni kɛla ani k'i min a fɛ a lawuli kɔ ka bɔ saya lɔ. 42Ado Isa ka mɔ lɔ kawanilila ani ka seleya di ko Ala v'a lasii k'a kɛ kititɛɛba le niima ni fulenilu bɛ kunna. 43Seleya dinin ka bɛn a ma kelalu bɛ bolo, ko ni mɔɔ mɔɔ ka limaniya a ma, wo tii ya julumbulu lɔ yi kotole a tɔɔ sabu la.»
Kɔɔnɛli ni aa mɔɔlu ka Nii Sɛnɛyanin sɔlɔn teme
44Piyɛli ka to kumala, Nii Sɛnɛyanin ka jii a kumakan lamɛnbalu bɛ kɔkan. 45Jahudiya limaniyamɔɔ minu nanin tɛɛ Piyɛli fɛ, wolu ka kawakoya kamasɔlɔn Ala na a Nii Sɛnɛyanin dila k'a lajii hali siboloma gbɛlɛ mɔɔlu gbu kɔkan, 46kamasɔlɔn ai tɛɛ ai kannu mɛnna, ai vɛ kumala kan gbɛlɛlu lɔ ka Ala tanu. Wo lɔ, Piyɛli vɛɛ: 47«Mɔɔ minu na Nii Sɛnɛyanin sɔlɔnna iwo ǹu n'a sɔlɔnna teme. Wo lɔ, jene yi se ai dansiila ai makoko la?»
48Wo le y'a ma, Piyɛli ka jamali di ko ai yi makoli sɔlɔn Masa Tɔɔmasenin Isa tɔɔ lɔ. Wo kɛnin, ai ka Piyɛli madiya ko a yi tele dana kɛ ai fɛlɔ.
Currently Selected:
Kɛkolu 10: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
