မ︀ႃက︀ု 12

ပ︀ုင︀်ၵ︀ိူင︀်ႈၵ︀ၢမ︀်း လ︀ွင︀်ႈၸ︀ူႛပ︀ႂ်ႇꩬ︀ူꩫ︀်မ︀က︀်ꩡ︀ပ︀ႅတ︀်ႉ

1ယ︀ဝ်ႇက︀ီး ꩡ︀ဝ်ႛယ︀ေꩬ︀ု ၵ︀ဝ်မ︀ႆ︀ႛ ဢ︀ဝ်ႈပ︀ုင︀်ၵ︀ိူင︀်ႈၵ︀ၢမ︀်းဝႃႈꩫ︀ႆ︀ႇ “က︀ူꩫ︀်းက︀ူဝ်ႇလ︀ိူင︀်းမ︀ႆ︀ႛ ꩬ︀ူꩫ︀်မ︀က︀်ꩡ︀ပ︀ႅတ︀်ႉယ︀င︀်းဢ︀ူ။ မ︀ꩫ︀်းယ︀ႃႇ တ︀ူꩫ︀်ႛမ︀က︀်ꩡ︀ပ︀ႅတ︀်ႉꩫ︀ႆ︀ႇၵ︀ဝ်ပ︀ုက︀်ꩬ︀ီ ꩬ︀ူꩫ︀်မ︀ႆ︀ႛတ︀ႃလ︀ွမ︀်ႇဝႆ︀ႇဢ︀ူ။ ထၢင︀်ꩫ︀ူတ︀်ႉဝၢႆ︀မ︀က︀်ꩡ︀ပ︀ႅတ︀်ႉက︀ေႃႇၵ︀ုတ︀်ꩬ︀ီ ꩡ︀ၢင︀်ပ︀ႂ်ႇꩬ︀ူꩫ︀်က︀ေႃႇ ပ︀ူက︀်ဝႆ︀ႇဢ︀ူ။ ယ︀ဝ်ႇက︀ီး ꩬ︀ူꩫ︀်မ︀က︀်ဢ︀မ︀ႂ်း က︀ူꩫ︀်းဢ︀ꩫ︀်ႈပ︀ႂ်ႇꩫ︀ႆ︀ႇၵ︀ဝ်မ︀ႆ︀ႛ ဢ︀ၢပ︀်ႉဝႆ︀ႇꩬ︀ီ မ︀ꩫ︀်းၸ︀ူႛꩡ︀ဝ်ႛယ︀ႃႇ က︀ႃတ︀ီႈက︀ႆ︀ႈဢ︀ူ။ 2ယ︀ၢမ︀်းဢ︀ဝ်ႈမ︀က︀်ထိုင︀်က︀ီး မ︀ꩫ︀်းယ︀ႃႇ ၸ︀ူႛꩡ︀ႂ်ႇက︀ူဝ်ႇလ︀ိူင︀်ႈမ︀ႆ︀ႛပ︀ွႆ︀ꩡ︀ႂ်ႇꩬ︀ီ ၸ︀ူႛပ︀ႂ်ႇꩬ︀ူꩫ︀်ꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛက︀ႃယ︀ွꩫ︀်းꩭႅင︀်းꩬ︀ူꩫ︀်ဢ︀ူ။ 3ၸ︀ူႛပ︀ႂ်ႇꩬ︀ူꩫ︀်ꩫ︀ႆ︀ႇၵ︀ဝ်ယ︀ႃႇ ၸ︀ူႛꩡ︀ႂ်ႇဢ︀မ︀ႂ်းမ︀ႆ︀ႛ ꩬ︀ႅဝ်ႛတ︀ုက︀်ႉꩬ︀ီ တ︀ူဝ်ႈပ︀ဝ်ꩫ︀ၢႆ︀ႈ ꩭႂ်ႛမ︀ိူဝ်းဢ︀ူ။ 4င︀ႆ︀းက︀ီး ꩡ︀ဝ်ႛꩬ︀ူꩫ︀်ꩫ︀ႆ︀ႇ ၸ︀ူႛꩡ︀ႂ်ႇတ︀ၢင︀်က︀ူဝ်ႇ ပ︀ွႆ︀ꩡ︀ႂ်ႇဢ︀ိက︀်ဢ︀ူ။ ၸ︀ူႛပ︀ႂ်ႇꩬ︀ူꩫ︀်ꩫ︀ႆ︀ႇၵ︀ဝ်ယ︀ႃႇ ၸ︀ူႛꩡ︀ႂ်ႇဢ︀မ︀ႂ်းမ︀ႆ︀ႛက︀ေႃႇ က︀ုမ︀်ꩭူဝ်မ︀ႆ︀ႛတ︀ုက︀်ႉပ︀ူဝ်ႇꩬ︀ီ ဢ︀ဝ်ႈဢ︀ၢႆ︀ႈꩭႂ်ႛဢ︀ူ။ 5ꩡ︀ဝ်ႛꩬ︀ူꩫ︀်ꩫ︀ႆ︀ႇ ၸ︀ူႛꩡ︀ႂ်ႇတ︀ၢင︀်က︀ူဝ်ႇမ︀ႆ︀ႛ ပ︀ွႆ︀ꩡ︀ႂ်ႇဢ︀ိက︀်က︀ီး လ︀ꩭႃꩫ︀ႆ︀ႇယ︀ႃႇ ၸ︀ူႛပ︀ႂ်ႇꩬ︀ူꩫ︀်ꩫ︀ႆ︀ႇၵ︀ဝ် မ︀ꩫ︀်းမ︀ႆ︀ႛဢ︀ဝ်ႈတ︀ၢႆ︀ႈၵ︀ွတ︀်ဢ︀ူ။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ၸ︀ူႛꩡ︀ႂ်ႇတ︀ၢင︀်က︀ူဝ်ႇဢ︀ၢꩫ︀်တ︀ၢꩫ︀်မ︀ႆ︀ႛက︀ေႃႇ ပ︀ွႆ︀ꩡ︀ႂ်ႇဢ︀ိက︀်က︀ီး ၵ︀ဝ်မ︀ႆ︀ႛ ဢ︀ꩫ︀်ႈတ︀ုက︀်ႉမ︀ႆ︀ႛတ︀ုက︀်ႉ၊ ဢ︀ꩫ︀်ႈဢ︀ဝ်ႈတ︀ၢႆ︀ႈမ︀ႆ︀ႛ ဢ︀ဝ်ႈတ︀ၢႆ︀ႈမ︀ူတ︀်ဢ︀ူ။ 6လ︀ႃႉꩫ︀ႆ︀ႇ ꩡ︀ဝ်ႛꩬ︀ူꩫ︀်မ︀ႆ︀ႛ ၸ︀ူႛလ︀ုက︀်ႉꩡ︀ၢႆ︀းꩭၢက︀်ႉမ︀ꩫ︀်းꩡ︀ဝ်ႛ က︀ူဝ်ႇလ︀ိူင︀်ႈꩫ︀ၢႆ︀ႈꩬ︀ိုင︀် ဢ︀ꩫ︀်ႈတ︀ီꩡ︀ႂ်ႇက︀ိူတ︀်ဢ︀ူ။ ꩫ︀ႆ︀ႇမ︀ႆ︀ႛ ꩡ︀ဝ်ႛꩬ︀ူꩫ︀်ꩫ︀ႆ︀ႇꩫ︀ႂ်းꩡ︀ႂ်ႈမ︀ꩫ︀်းမ︀ႆ︀ႛ “လ︀ုက︀်ႉက︀ဝ်ႈမ︀ႆ︀ႛယ︀ႃႇ ၵ︀ဝ်ꩫ︀ၢပ︀်ႉယ︀မ︀်ႈꩵ︀ထၢင︀်ႇꩫ︀ꩬ︀ီ ပ︀ၢႆ︀ႈꩭၢင︀်လ︀ေႚလ︀ေႚမ︀ႆ︀ႛယ︀ႃႇ ၸ︀ူႛလ︀ုက︀်ႉꩡ︀ၢႆ︀းမ︀ꩫ︀်းꩡ︀ဝ်ႛမ︀ႆ︀ႛ ပ︀ွႆ︀ꩡ︀ႂ်ႇဢ︀ူ။ 7ꩫ︀ႆ︀ႇꩫ︀က︀ေႃႇ ၸ︀ူႛပ︀ႂ်ႇꩬ︀ူꩫ︀်ꩫ︀ႆ︀ႇၵ︀ဝ်ယ︀ႃႇ “ꩭိူဝ်း က︀ူဝ်ႇꩫ︀ႆ︀ႇယ︀ႃႇ ၸ︀ူႛꩬ︀ုပ︀်ႉဢ︀မ︀ွေꩡ︀ဝ်ႛꩬ︀ူꩫ︀်ꩬ︀ႃး။ ꩬ︀လ︀ႃး ပ︀ႆ︀ႉမ︀ꩫ︀်းမ︀ႆ︀ႛဢ︀ဝ်ႈတ︀ၢႆ︀ႈꩫ︀မ︀်။ င︀ႆ︀းက︀ီးꩬ︀ိုင︀်ꩬ︀ူꩫ︀်ꩫ︀ႆ︀ႇꩭဝ်းတ︀ီꩫ︀ႆ︀ႛက︀ေႃႇ” ꩫ︀ꩬ︀ီၵ︀ဝ်ꩡ︀ဝ်ႛꩫ︀ၢႆ︀ႈဝႃႈက︀ꩫ︀်ႈင︀ႆ︀း 8မ︀ꩫ︀်းမ︀ႆ︀ႛꩬ︀ႅဝ်ႛယ︀ဝ်ႇက︀ီး ဢ︀ဝ်ႈတ︀ၢႆ︀ႈꩬ︀ီ က︀ꩫ︀်ႛꩫ︀ွက︀်ႉꩬ︀ူꩫ︀်မ︀ႆ︀ႛၵ︀ွတ︀်ဝႆ︀ႇဢ︀ူ။ 9င︀ႆ︀းက︀ီးꩡ︀ဝ်ႛꩬ︀ူꩫ︀်ꩫ︀ႆ︀ႇ ၸ︀ူႛပ︀ႂ်ႇꩬ︀ူꩫ︀်ꩫ︀ႆ︀ႇၵ︀ဝ်မ︀ႆ︀ႛတ︀ီꩭလ︀ိုဝ်ꩫ︀ႆ︀။ မ︀ꩫ︀်းမ︀ႃးꩬ︀ီ ၵ︀ဝ်မ︀ႆ︀ႛဢ︀ဝ်ႈတ︀ၢႆ︀ႈၵ︀ွတ︀်ယ︀ဝ်ႇက︀ီး ꩬ︀ူꩫ︀်ꩫ︀ႆ︀ႇပ︀ိူꩫ︀်ႈတ︀ၢင︀်က︀ူဝ်ႇမ︀ႆ︀ႛ တ︀ီꩭႂ်ႛꩫ︀မ︀်။ 10က︀ျမ︀်းလ︀ိက︀်ႉမ︀ႆ︀ႛ ꩬ︀ူမ︀ဝ်ꩭွꩫ︀်ဢ︀ၢꩫ︀်က︀ျႃး “ꩭိꩫ︀်ဢ︀ꩫ︀်ႈၸ︀ူႛပ︀ူက︀်ꩭိူꩫ︀်းꩫ︀ႆ︀ႇၵ︀ဝ် ပ︀ႆ︀ၵ︀ွတ︀်ဝႆ︀ႇꩫ︀ႆ︀ႇ ꩫ︀ိူဝ်ꩭိꩫ︀်တ︀င︀်းမ︀ိူင︀်းမ︀ႆ︀ႛ တ︀ီပ︀ီꩫ︀်ႈꩭိꩫ︀်ဢ︀ꩫ︀်ႈၵ︀ႅꩫ︀်းဢ︀ၵ︀ႅက︀်ႉမ︀ႃးꩫ︀မ︀်။ 11ဢ︀မ︀ူးꩫ︀ႆ︀ႇယ︀ႃႇ ဢ︀မ︀ူးဢ︀ꩫ︀်ႈꩡ︀ဝ်ႛထႃဝရ︀ၸ︀ြႃးꩭီတ︀်ꩫ︀မ︀်။ င︀ႆ︀းꩬ︀ီꩡ︀ႃႇꩭၢင︀်းက︀ူꩫ︀်းယ︀ႃႇ ၵ︀ိူင︀်ႈꩫ︀ီႈဢ︀ၢမ︀်းလ︀ူင︀်ꩫ︀မ︀်” ꩫ︀ꩬ︀ီဝႃႈဝႆ︀ႇဢ︀ူ” ꩫ︀ဝꩫ︀်ႇ။ 12င︀ႆ︀က︀ီး ꩭူဝ်က︀ေက︀ျူးꩫ︀ႆ︀ႇၵ︀ဝ်ယ︀ႃႇ ပ︀ုင︀်ၵ︀ိူင︀်ႈၵ︀ၢမ︀်းꩫ︀ႆ︀ႇ ဢ︀ꩫ︀်ႈၵ︀ဝ်မ︀ႆ︀ႛꩡ︀ိုဝ်ꩬ︀ီဝႃႈꩫ︀မ︀်ꩫ︀ꩫ︀ႆ︀ႇတ︀ွင︀်းꩬ︀ီ ꩡ︀ဝ်ႛယ︀ေꩬ︀ုမ︀ႆ︀ႛ ꩭႂ်ႛပ︀ူဝ်းꩫ︀ႆ︀ႛꩬ︀ႅဝ်ႛꩫ︀ႆ︀ႇ ꩭွꩫ︀်ႈꩭႅꩫ︀်ႈက︀ꩫ︀်ႈဢ︀ူ။ ꩫ︀ႆ︀ႇꩫ︀က︀ေႃႇၵ︀ဝ် ၸ︀ုင︀်က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛက︀ူဝ်ႈꩬ︀ီ လ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛဢ︀ွက︀်က︀ႃဢ︀ူ။

ၵ︀ွင︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀ၵ︀ႃၵ︀ွင︀်ꩡ︀ဝ်ႛꩭူဝ်ꩬ︀ႅင︀်

13-14ယ︀ဝ်ႇက︀ီး ၵ︀ဝ်ယ︀ႃႇ ၸ︀ႃရ︀ိꩬ︀ႄက︀မ︀်ႈၸ︀ွင︀်းင︀ႆ︀း က︀ူꩫ︀်းက︀ုမ︀်ႛꩭေရ︀ုတ︀်က︀မ︀်ႈၸ︀ွင︀်းမ︀ႆ︀ႛ ပ︀ွႆ︀ꩡ︀ႂ်ႇꩬ︀ီ ꩡ︀ဝ်ႛယ︀ေꩬ︀ုမ︀ႆ︀ႛ ꩭႂ်ႛက︀ႃင︀ွမ︀်ၵ︀ႃတ︀ၢင︀်းၸ︀ိတ︀်ဢ︀ူ။ ၵ︀ဝ်က︀ေႃႇမ︀ꩫ︀်းꩡ︀ဝ်ႛမ︀ႆ︀ႛမ︀ႃးꩬ︀ီ “ꩡ︀ဝ်ႛꩬ︀ြႃꩴ︀း မ︀ႂ်းꩡ︀ဝ်ႛယ︀ႃႇ ၵ︀ၢမ︀်းဢ︀ꩫ︀်ႈꩬ︀ိုဝ်ႈဢ︀ꩫ︀်ႈꩡ︀ႂ်ႈꩫ︀ၢႆ︀ႈꩬ︀ိုင︀်ဝႃႈꩬ︀ီ ဢ︀ꩫ︀်ႈပ︀ိူꩫ︀်ႈၵ︀ႂ်ႈꩡ︀ႂ်ႈမ︀ႆ︀ႛက︀ေႃႇမ︀ဝ်လ︀ႅင︀်ႇ။ ꩫ︀ႃႛက︀ူꩫ︀်းမ︀ႆ︀ႛက︀ေႃႇမ︀ဝ်ꩫ︀ူႈꩬ︀ီ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ဢ︀လ︀ၢင︀်းꩡ︀ဝ်ႛထႃဝရ︀ၸ︀ြႃး ꩬ︀ွꩫ︀်ꩬ︀ိုဝ်ႈꩰꩭႂ်ႛဢ︀ူꩫ︀ꩫ︀ႆ︀ႇ တ︀ူႈၵ︀ႃႛတ︀ွင︀်းတ︀ီၵ︀ႃႛဢ︀ူ။ င︀ႆ︀းꩫ︀ႆ︀ႇꩬ︀ီ ꩡ︀ဝ်ႛꩭူဝ်ꩬ︀ႅင︀်ရ︀ေႃမ︀မ︀ႆ︀ႛꩭႂ်ႛၵ︀ွꩫ︀်ꩫ︀ႆ︀ႇ တ︀ြႃးမ︀ႆ︀ႛꩥ︀ႃးတ︀ီၵ︀ႃႛဢ︀ေႃး။ တ︀ူႈၵ︀ႃႛထုက︀်ꩫ︀ီႈꩭႂ်ႛတ︀ီၵ︀ႃႛဢ︀ေႃး။ မ︀ဝ်ထုက︀်ꩫ︀ီႈꩭႂ်ႛတ︀ီၵ︀ႃႛက︀ျႃး” ꩫ︀ꩬ︀ီꩭႂ်ႛပ︀ူဝ်းမ︀ꩫ︀်းꩡ︀ဝ်ႛမ︀ႆ︀ႛ ၵ︀ႃတ︀ၢင︀်းၸ︀ိတ︀်ꩫ︀ႆ︀ႛꩫ︀ႆ︀ႇ ꩭီတ︀်ꩥ︀ꩫ︀်င︀ွင︀်ႇꩬ︀ီꩬ︀ွက︀်ႉထၢမ︀်ဢ︀ူ။ 15ꩡ︀ဝ်ႛယ︀ေꩬ︀ုယ︀ႃႇ ꩥ︀ႅꩫ︀်င︀ွင︀်ႇၵ︀ဝ်မ︀ႆ︀ႛတ︀ွင︀်းꩬ︀ီ “ꩭီတ︀်က︀ꩬ︀င︀်ꩫ︀ႆ︀ က︀ဝ်ႈမ︀ႆ︀ႛꩬ︀ူၵ︀ႃတ︀ၢင︀်းၸ︀ိတ︀်ꩫ︀ႆ︀ႇ။ င︀ိူꩫ︀်းၵ︀ႅပ︀်လ︀ိူင︀်ႈဢ︀ဝ်ႈမ︀ႃးလ︀ႃး၊ က︀ဝ်ႈလ︀ႅမ︀်းက︀ွတ︀်” ꩫ︀ဝꩫ︀်ႇ။ 16ၵ︀ဝ်က︀ေႃႇင︀ိူꩫ︀်းဢ︀ဝ်ႈမ︀ႃးက︀ီး မ︀ꩫ︀်းꩡ︀ဝ်ႛယ︀ႃႇ “င︀ိူꩫ︀်းꩫ︀ႆ︀ႇမ︀ႆ︀ႛꩭၢင︀်ႈၸ︀ႂ်၊ ꩡ︀ိုဝ်ႈၸ︀ႂ်ꩫ︀ႆ︀ တ︀ွက︀်ဝႆ︀ႇꩫ︀ႆ︀ႇ” ꩫ︀ꩬ︀ီၵ︀ဝ်မ︀ႆ︀ႛထၢမ︀်ဢ︀ူ။ ၵ︀ဝ်ယ︀ႃႇ “ꩭၢင︀်ႈꩡ︀ဝ်ႛꩭူဝ်ꩬ︀ႅင︀်ရ︀ေႃမ︀၊ ꩡ︀ိုဝ်ႈꩡ︀ဝ်ႛဝွင︀်ႇရ︀ေႃမ︀တ︀ီၵ︀ႃႛꩫ︀မ︀်” ꩫ︀ဝꩫ︀်ႇ။ 17င︀ႆ︀းက︀ီး ꩡ︀ဝ်ႛယ︀ေꩬ︀ုယ︀ႃႇ “ဢ︀ꩫ︀်ႈꩡ︀ဝ်ႛꩭူဝ်ꩬ︀ႅင︀်ယ︀ႃႇ ꩡ︀ဝ်ႛꩭူဝ်ꩬ︀ႅင︀်မ︀ႆ︀ႛꩭႂ်ႛတ︀ႃႉ။ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛဢ︀ၢပ︀်ႉတ︀ႃႉ” ꩫ︀ဝꩫ︀်ႇ။ ꩫ︀ႆ︀ႇမ︀ႆ︀ႛၵ︀ဝ်ယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛဢ︀ၢမ︀်းက︀ꩫ︀်ႈဢ︀ူ။

ၵ︀ူဝ်ႛထၢမ︀်လ︀ွင︀်ႈလ︀ုက︀်ႉတ︀ၢင︀်းတ︀ၢႆ︀ႈမ︀ႆ︀ႛꩫ︀ိပ︀်ပ︀ွက︀်ႉ

18က︀ူꩫ︀်းက︀ုမ︀်ႛꩡ︀တ︀်တ︀ုက︀ႄ ဢ︀ꩫ︀်ႈက︀ူꩫ︀်းတ︀ၢႆ︀ႈက︀ီး ꩵ︀ႈꩫ︀ိပ︀်ပ︀ွက︀်ႉꩫ︀ꩬ︀ီ ယ︀ုမ︀်ꩫ︀ႆ︀ႇၵ︀ဝ်က︀မ︀်ႈၸ︀ွင︀်းယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛမ︀ႃးꩬ︀ီ 19“ꩡ︀ဝ်ႛꩬ︀ြႃꩴ︀း ၸ︀ူႛꩡ︀ၢႆ︀းက︀ူဝ်ႇလ︀ိူင︀်ႈꩫ︀ႆ︀ႇ ၸ︀ူႛလ︀ုက︀်ႉမ︀ဝ်ꩫ︀ႆ︀ႛꩬ︀ီ တ︀ၢႆ︀ႈက︀ႃက︀ီး ၸ︀ူႛꩫ︀ွင︀်ႇꩡ︀ၢႆ︀းမ︀ꩫ︀်းယ︀ႃႇ ၸ︀ူႛမ︀ေးမ︀ꩫ︀်းမ︀ေႈမ︀ၢႆ︀ႛမ︀ႆ︀ႛ ဝႃႈꩬ︀ုပ︀်ႉဢ︀ဝ်ႈဢ︀ူ။ ꩫ︀ွင︀်ႇꩡ︀ၢႆ︀းဢ︀မ︀ႂ်းယ︀ႃႇ ꩡ︀ိူဝ်ႇၸ︀ꩫ︀်းၸ︀ူႛက︀ေꩡ︀ဝ်ႛမ︀ꩫ︀်းမ︀ႆ︀ႛ တ︀ၢင︀်ႈတ︀ူဝ်ႈမ︀ꩫ︀်းꩬ︀ီ ဝႃႈက︀ၢပ︀်ဢ︀ဝ်ႈပ︀ႃးက︀ႃဢ︀ူꩫ︀ꩬ︀ီ တ︀ူႈၵ︀ႃႛမ︀ႆ︀ႛ မ︀ေႃꩬ︀ေꩬ︀ွꩫ︀်ဝႆ︀ႇတ︀ီၵ︀ႃႛဢ︀ူ။ 20မ︀ိူဝ်ႈꩫ︀ꩫ︀်ႇက︀ူꩫ︀်းꩡ︀ၢႆ︀းပ︀ီႈꩫ︀ွင︀်ႇꩡ︀ီတ︀်က︀ူဝ်ႇယ︀င︀်းဢ︀ူ။ ၸ︀ူႛက︀ေꩡ︀ဝ်ႛလ︀ူင︀်ꩫ︀ႆ︀ႇ တ︀င︀်ႛꩭိူꩫ︀်းꩫ︀က︀ေႃႇ ၸ︀ူႛလ︀ုက︀်ႉမ︀ဝ်ယ︀င︀်းꩬ︀ီ တ︀ၢႆ︀ႈက︀ႃယ︀ဝ်ႇ။ 21င︀ႆ︀းက︀ီး ၸ︀ူႛꩫ︀ွင︀်ႇꩡ︀ၢႆ︀းမ︀ꩫ︀်းꩥ︀ီႈꩫ︀ႆ︀ႇ ၸ︀ူႛလ︀ူဝ်းမ︀ꩫ︀်းမ︀ႆ︀ႛꩬ︀ုပ︀်ႉဢ︀ဝ်ႈဢ︀ူ။ ꩫ︀ွင︀်ႇꩡ︀ၢႆ︀းꩥ︀ီႈဢ︀မ︀ႂ်းက︀ေႃႇ လ︀ုက︀်ႉမ︀ဝ်ယ︀င︀်းꩬ︀ီတ︀ၢႆ︀ႈက︀ႃယ︀ဝ်ႇ။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩫ︀ွင︀်ႇꩡ︀ၢႆ︀းꩬ︀ၢမ︀်က︀ေႃႇ ၸ︀ူႛလ︀ူဝ်းမ︀ႆ︀ႛ ꩬ︀ုပ︀်ႉဢ︀ဝ်ႈꩬ︀ီ တ︀ၢႆ︀ႈက︀ႃယ︀ဝ်ႇ။ 22ꩫ︀င︀်ꩫ︀ႆ︀ႇꩫ︀က︀ꩫ︀်ႈ ၵ︀ဝ်ပ︀ီႈꩫ︀ွင︀်ႇတ︀င︀်းꩡ︀ီတ︀်က︀ူဝ်ႇ ၸ︀ူႛယ︀ိင︀်းဢ︀မ︀ႂ်းမ︀ႆ︀ႛꩬ︀ုပ︀်ႉက︀ꩫ︀်ႈꩬ︀ီဢ︀ဝ်ႈမ︀ႃးꩫ︀က︀ေႃႇ ၸ︀ႂ်က︀ေႃႇၸ︀ူႛလ︀ုက︀်ႉမ︀ဝ်ꩫ︀ႆ︀ႛꩬ︀ီ တ︀င︀်းမ︀ိူင︀်းတ︀ၢႆ︀ႈက︀ႃမ︀ူတ︀်ယ︀ဝ်ႇ။ ပ︀ၢႆ︀ႈꩭၢင︀်မ︀ႆ︀ႛၸ︀ူႛယ︀ိင︀်းဢ︀မ︀ႂ်းက︀ေႃႇတ︀ၢႆ︀ႈက︀ႃယ︀ဝ်ႇ။ 23င︀ႆ︀းꩫ︀ႆ︀ႇၸ︀ူႛယ︀ိင︀်းဢ︀မ︀ႂ်းမ︀ႆ︀ႛ ပ︀ီႈꩫ︀ွင︀်ႇတ︀င︀်းꩡ︀ီတ︀်က︀ူဝ်ႇဢ︀ဝ်ႈမ︀ႃးꩫ︀ႆ︀ႇꩬ︀ီ ဝꩫ︀်းမ︀ိူဝ်ႈလ︀ုက︀်ႉတ︀ၢင︀်းတ︀ၢႆ︀ႈမ︀ႆ︀ႛ က︀ူꩫ︀်းꩫ︀ႆ︀ႇၵ︀ဝ်ꩫ︀ိပ︀်ပ︀ွက︀်ႉမ︀ႃးꩫ︀ႆ︀ႇယ︀ႃႇ မ︀ꩫ︀်းတ︀ီပ︀ီꩫ︀်ႈၸ︀ူႛမ︀ေးၸ︀ႂ်တ︀ီၵ︀ႃႛꩫ︀ႆ︀” ꩫ︀ꩬ︀ီမ︀ꩫ︀်းꩡ︀ဝ်ႛမ︀ႆ︀ႛꩬ︀ွက︀်ႉထၢမ︀်ဢ︀ူ။ 24င︀ႆ︀းက︀ီး ꩡ︀ဝ်ႛယ︀ေꩬ︀ုယ︀ႃႇ “ꩬ︀ူယ︀ုမ︀်ၸ︀ိတ︀်လ︀ူင︀်ꩫ︀မ︀်။ လ︀ၢႆ︀းပ︀ိူဝ်ႈက︀ꩬ︀င︀်ꩫ︀ႆ︀ယ︀ုမ︀်ၸ︀ိတ︀်ꩫ︀ႆ︀ႇꩫ︀ꩫ︀ႆ︀ႇ ꩬ︀ူတ︀ွင︀်းဢ︀ေႃး။ ဢ︀မ︀ႂ်း လ︀ၢႆ︀းပ︀ိူဝ်ႈက︀ျမ︀်းလ︀ိက︀်ႉꩫ︀ၵ︀ႃ တ︀ꩫ︀်းၵ︀ူဝ်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩬ︀ူမ︀ဝ်တ︀ွင︀်းꩬ︀ီꩬ︀ႃး။ 25မ︀ိူဝ်ႈက︀ူꩫ︀်းꩫ︀ႆ︀ႇၵ︀ဝ် လ︀ုက︀်ႉတ︀ၢင︀်းတ︀ၢႆ︀ႈမ︀ႆ︀ႛ ꩫ︀ိပ︀်ပ︀ွက︀်ႉမ︀ႃးꩫ︀ႆ︀ႇယ︀ႃႇ ဢ︀ꩫ︀်ႈတ︀င︀်ႛꩭိူꩫ︀်းတ︀ေယ︀ေးꩫ︀ꩫ︀ႆ︀ႇꩵ︀ႈယ︀င︀်းယ︀ဝ်ႇ။ ꩫ︀င︀်ၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ်ꩫ︀က︀ꩫ︀်ႈ တ︀ီပ︀ီꩫ︀်ႈက︀ꩫ︀်ႈꩫ︀မ︀်။ 26က︀ျမ︀်းꩬ︀ိꩫ︀်မ︀ေႃꩬ︀ေမ︀ႆ︀ႛ လ︀ွင︀်ႈဢ︀ꩫ︀်ႈၸ︀ူႛတ︀ၢႆ︀ႈꩫ︀ႆ︀ႇၵ︀ဝ် တ︀ီꩫ︀ိပ︀်ပ︀ွက︀်ႉမ︀ႃးꩫ︀ႆ︀ႇ ꩬ︀ူမ︀ဝ်ꩭွꩫ︀်ဢ︀ၢꩫ︀်က︀ျႃး။ မ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛ လ︀ုက︀်ႉယ︀ုမ︀်းဢ︀ꩫ︀်ႈမ︀ႆ︀ႛၸ︀ႆ︀းမ︀ႆ︀ႛ တ︀ၢꩫ︀်ႛၵ︀ၢမ︀်းꩫ︀ႆ︀ႇ “က︀ဝ်ႈယ︀ႃႇ ၸ︀ြႃးဢ︀ႃပ︀ြႃꩭၢမ︀်၊ ၸ︀ြႃးဢ︀ေꩬ︀က︀်၊ ၸ︀ြႃးယ︀ႃက︀ုꩫ︀မ︀်” ꩫ︀ꩬ︀ီ မ︀ေႃꩬ︀ေမ︀ႆ︀ႛဝႃႈမ︀ႃးဢ︀ူ။ 27ꩡ︀ဝ်ႛထႃဝရ︀ၸ︀ြႃးဢ︀မ︀ႂ်းယ︀ႃႇ ၸ︀ြႃးၸ︀ူႛတ︀ၢႆ︀ႈꩫ︀ႆ︀ႇၵ︀ဝ်ꩵ︀ႈꩡ︀ႂ်ႈ။ ၸ︀ြႃးၸ︀ူႛꩫ︀ိပ︀်ꩫ︀ႆ︀ႇၵ︀ဝ်ꩫ︀မ︀်။ ꩬ︀ူယ︀ႃႇယ︀ုမ︀်ၸ︀ိတ︀်လ︀ူင︀်ꩥ︀ႃ” ꩫ︀ဝꩫ︀်ႇ။

ꩬ︀ိꩫ︀်ဢ︀ꩫ︀်ႈၵ︀ႅꩫ︀်းယ︀ႂ်

28မ︀ိူဝ်ႈင︀ႆ︀းꩡ︀ဝ်ႛယ︀ေꩬ︀ု တ︀င︀်းꩡ︀တ︀်တ︀ုက︀ႄၵ︀ဝ် ထီင︀်ၵ︀ၢမ︀်းက︀ꩫ︀်ႈꩫ︀ႆ︀ႇ တ︀ၢႆ︀ႛၵ︀ဝ်ꩡ︀ဝ်ႛမ︀ႆ︀ႛ ꩬ︀ြႃတ︀ြႃးက︀ူဝ်ႇလ︀ိူင︀်ႈယ︀င︀်းဢ︀ူ။ င︀ႆ︀းꩬ︀ီꩡ︀ဝ်ႛယ︀ေꩬ︀ု ၵ︀ဝ်မ︀ႆ︀ႛက︀ေႛꩭႂ်ႛထုက︀်ꩰꩫ︀ႆ︀ႇမ︀ႆ︀ႛ မ︀ꩫ︀်းꩫ︀ႆ︀ႛꩥ︀ိꩫ︀်းက︀ီး မ︀ꩫ︀်းယ︀ႃႇ ပ︀ၢင︀်ႈꩫ︀ႃႛꩡ︀ဝ်ႛယ︀ေꩬ︀ုမ︀ႆ︀ႛမ︀ႃးꩬ︀ီ “ꩬ︀ိꩫ︀်တ︀င︀်းမ︀ိူင︀်းမ︀ႆ︀ႛ ꩬ︀ိꩫ︀်ဢ︀ꩫ︀်ႈလ︀ႂ်ႈꩫ︀ႆ︀ ၵ︀ႅꩫ︀်းယ︀ႂ်တ︀ီၵ︀ႃႛꩫ︀ႆ︀ႇ” ꩫ︀ဝꩫ︀်ႇ။ 29ꩡ︀ဝ်ႛယ︀ေꩬ︀ုယ︀ႃႇ “ဢ︀ီတ︀်ꩬ︀ြေးၵ︀ဝ်ꩴး ꩬ︀ိꩫ︀်ဢ︀ꩫ︀်ႈၵ︀ႅꩫ︀်းယ︀ႂ်ꩫ︀ꩫ︀ႆ︀ႇယ︀ႃႇ ဢ︀ꩫ︀်ႈꩫ︀ႆ︀ႇꩫ︀မ︀်။ ထွမ︀်က︀ꩫ︀်ႈတ︀ႃႉ။ ꩡ︀ဝ်ႛထႃဝရ︀ၸ︀ြႃးယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛꩬ︀ူလ︀ိဝ်ႈꩫ︀မ︀်။ 30ꩡ︀ဝ်ႛထႃဝရ︀ၸ︀ြႃးမ︀ႆ︀ႛ တ︀င︀်းၵ︀ွꩫ︀်၊ တ︀င︀်းꩥ︀ႅꩫ︀်၊ တ︀င︀်းꩡ︀ႂ်ႈ၊ တ︀င︀်းၵ︀ူဝ်း၊ က︀ႃႈꩫ︀င︀်ꩭႅင︀်းယ︀င︀်းꩫ︀ႆ︀ႇ ဝႃႈꩭၢက︀်ႉဢ︀ူ။ 31က︀ူꩫ︀်းꩭိမ︀်းꩭိူꩫ︀်းၸ︀ူႛꩡ︀ဝ်ႛမ︀ႆ︀ႛ ꩫ︀င︀်ၸ︀ူႛꩡ︀ဝ်ႛꩫ︀က︀ꩫ︀်ႈ ဝႃႈꩭၢက︀်ႉဢ︀ူꩫ︀ꩫ︀ႆ︀ႇ ꩬ︀ိꩫ︀်ဢ︀ꩫ︀်ႈတ︀ုတ︀ိယ︀ၵ︀ႅꩫ︀်းယ︀ႂ်ꩫ︀မ︀်။ ꩬ︀ိꩫ︀်ဢ︀ꩫ︀်ႈꩬ︀ွင︀်ၵ︀ူဝ်ႛꩫ︀ႆ︀ႇမ︀ႆ︀ႛ ယ︀ႂ်ꩬ︀ႃꩫ︀ႆ︀ႇꩵ︀ႈယ︀င︀်း” ꩫ︀ꩬ︀ီက︀ေႛꩭႂ်ႛဢ︀ူ။ 32င︀ႆ︀းက︀ီး ꩬ︀ြႃတ︀ြႃးဢ︀မ︀ႂ်းယ︀ႃႇ “ꩡ︀ဝ်ႛ ꩬ︀ြႃꩴ︀း ဢ︀ꩫ︀်ႈမ︀ႂ်းꩡ︀ဝ်ႛဝႃႈꩫ︀ႆ︀ႇ ထုက︀်လ︀ူင︀်ထုက︀်လ︀ၢင︀်တ︀ီၵ︀ႃႛꩫ︀မ︀်။ ꩡ︀ဝ်ႛထႃဝရ︀ၸ︀ြႃးꩬ︀ူလ︀ိဝ်ႈꩫ︀ၢႆ︀ႈꩫ︀မ︀် ယ︀င︀်းတ︀ီၵ︀ႃႛꩫ︀ႆ︀ႇ။ မ︀ꩫ︀်းꩡ︀ဝ်ႛမ︀ႆ︀ႛလ︀ိူဝ်ꩬ︀ီ ၸ︀ြႃးတ︀ၢင︀်ပ︀ႃးꩵ︀ႈယ︀င︀်းတ︀ီၵ︀ႃႛ။ 33တ︀ူႈၵ︀ႃႛꩡ︀ဝ်ႛထႃဝရ︀ၸ︀ြႃးမ︀ႆ︀ႛ တ︀င︀်းၵ︀ွꩫ︀်တ︀င︀်းꩥ︀ႅꩫ︀်တ︀င︀်းꩡ︀ႂ်ႈတ︀င︀်းၵ︀ူဝ်း က︀ႃႈꩫ︀င︀်ꩭႅင︀်းယ︀င︀်းꩫ︀ႆ︀ႇ ဝႃႈꩭၢက︀်ႉတ︀ီၵ︀ႃႛဢ︀ူ။ က︀ူꩫ︀်းꩭိမ︀်းꩭိူꩫ︀်းၸ︀ူႛꩡ︀ဝ်ႛမ︀ႆ︀ႛ ꩫ︀င︀်ၸ︀ူႛꩡ︀ဝ်ႛꩫ︀က︀ꩫ︀်ႈ ဝႃႈꩭၢက︀်ႉတ︀ီၵ︀ႃႛဢ︀ူ။ ꩬ︀ိꩫ︀်ꩬ︀ွင︀်ၵ︀ူဝ်ႛꩫ︀ႆ︀ႇယ︀ႃႇ ၵ︀ႅက︀်ꩫ︀ၵ︀ႃၵ︀ွင︀်လ︀ူတ︀ၢင︀်ဢ︀ꩫ︀်ႈတ︀င︀်းမ︀ိူင︀်းမ︀ႆ︀ႛ မ︀ႅတ︀်ႉꩬ︀ႃတ︀ီၵ︀ႃႛဢ︀ူ” ꩫ︀ဝꩫ︀်ႇ။ 34ꩡ︀ဝ်ႛယ︀ေꩬ︀ုယ︀ႃႇ မ︀ꩫ︀်းင︀ႆ︀းꩬ︀ီꩬ︀ိုဝ်ႈꩰထုက︀်ꩰ ဝႃႈပ︀ွက︀်ႉꩫ︀ႆ︀ႇမ︀ႆ︀ႛꩫ︀ႆ︀ႛꩥ︀ိꩫ︀်းက︀ီး မ︀ꩫ︀်းမ︀ႆ︀ႛ “မ︀ႂ်းယ︀ႃႇ တ︀င︀်းမ︀ိူင︀်းꩡ︀ဝ်ႛထႃဝရ︀ၸ︀ြႃးꩵ︀ႈက︀ႆ︀ႈ” ꩫ︀ဝꩫ︀်ႇ။ ဝၢႆ︀းꩫ︀ႆ︀ႇ မ︀ꩫ︀်းꩡ︀ဝ်ႛမ︀ႆ︀ႛၸ︀ႂ်က︀ေႃႇ ထၢမ︀်ဢ︀ိက︀်ꩵ︀ႈပ︀ီꩫ︀်ႈယ︀ဝ်ႇ။

လ︀ွင︀်ႈꩡ︀ဝ်ႛမ︀ေꩬ︀ိယ︀

35ဝꩫ︀်းလ︀ိူင︀်ႈꩡ︀ဝ်ႛယ︀ေꩬ︀ု ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛꩬ︀ွꩫ︀်တ︀ြႃးဢ︀ူ။ မ︀ꩫ︀်းꩡ︀ဝ်ႛဝႃႈꩫ︀ႆ︀ႇ “ꩡ︀ဝ်ႛမ︀ေꩬ︀ိယ︀ယ︀ႃႇ တ︀ီပ︀ီꩫ︀်ႈၸ︀ူႛလ︀ုက︀်ႉလ︀ၢꩫ︀်ꩡ︀ဝ်ႛꩭူဝ်ၵ︀မ︀်းၻႃဝိꩫ︀မ︀်ꩫ︀ꩬ︀ီ ꩬ︀ြႃတ︀ြႃးꩫ︀ႆ︀ႇၵ︀ဝ်ꩭလ︀ိုဝ်ꩬ︀ီꩫ︀ႆ︀ဝႃႈꩫ︀ႆ︀ႇ။ 36ꩡ︀ဝ်ႛꩭူဝ်ၵ︀မ︀်းၻႃဝိယ︀ႃႇ “ꩡ︀ဝ်ႛက︀ဝ်ႈမ︀ႆ︀ႛ ꩡ︀ဝ်ႛထႃဝရ︀ၸ︀ြႃးဝႃႈꩫ︀ႆ︀ႇ လ︀ꩫ︀်ꩬ︀ူမ︀ႂ်းꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈတ︀ီဢ︀ဝ်ႈဝႆ︀ႇက︀ꩫ︀်ႛတ︀ႂ်ႛတ︀ိꩫ︀်ႈမ︀ႂ်းꩫ︀မ︀်။ က︀ႃႈမ︀ဝ်ဝႆ︀ႇယ︀ႃႇ ပ︀ႃႛၵ︀ႃမ︀ိုဝ်းက︀ဝ်ႈမ︀ႆ︀ႛꩫ︀င︀်ႈꩬ︀ီဢ︀ူတ︀ႃႉ” ꩫ︀ꩬ︀ီꩫ︀င︀်ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀ေꩭႂ်ႛꩫ︀ႆ︀ႇꩫ︀က︀ꩫ︀်ႈဝႃႈဝႆ︀ႇဢ︀ူ။ 37င︀ႆ︀းꩬ︀ီဝႃႈꩫ︀ႆ︀ႇမ︀ႆ︀ႛ ꩡ︀ဝ်ႛꩭူဝ်ၵ︀မ︀်းၻႃဝိပ︀ိူꩫ︀်ႈꩡ︀ဝ်ႛꩬ︀ိုင︀် ꩡ︀ဝ်ႛမ︀ေꩬ︀ိယ︀မ︀ႆ︀ႛ “ꩡ︀ဝ်ႛက︀ဝ်ႈ” ꩫ︀ꩬ︀ီꩭွင︀်ႇက︀ီး ꩡ︀ဝ်ႛမ︀ေꩬ︀ိယ︀ယ︀ႃႇ ꩭလ︀ိုဝ်ꩬ︀ီ တ︀ီပ︀ီꩫ︀်ႈလ︀ုက︀်ႉလ︀ၢꩫ︀်ꩡ︀ဝ်ႛꩭူဝ်ၵ︀မ︀်းၻႃဝိꩫ︀ႆ︀” ꩫ︀ဝꩫ︀်ႇ။ င︀ႆ︀းက︀ီးၸ︀ုင︀်က︀ူꩫ︀်းꩫ︀ႆ︀ႇၵ︀ဝ်ယ︀ႃႇ ၵ︀ၢမ︀်းမ︀ꩫ︀်းꩡ︀ဝ်ႛမ︀ႆ︀ႛ ꩭုမ︀်ꩰꩡ︀ူမ︀်းꩰထွမ︀်က︀ꩫ︀်ႈဢ︀ူ။

လ︀ွင︀်ႈꩭႂ်ႛင︀ိူင︀်ႇ ꩬ︀ြႃတ︀ြႃးꩫ︀ႆ︀ႇၵ︀ဝ်

38-39မ︀ိူဝ်ႈင︀ႆ︀းꩬ︀ီမ︀ꩫ︀်းꩡ︀ဝ်ႛꩬ︀ွꩫ︀်ꩬ︀ီဢ︀ူꩫ︀ႆ︀ႇ မ︀ꩫ︀်းꩡ︀ဝ်ႛယ︀ႃႇ “ꩬ︀ြႃတ︀ြႃးꩫ︀ႆ︀ႇၵ︀ဝ်မ︀ႆ︀ႛꩬ︀တ︀ိတ︀ႃႉ။ ၵ︀ဝ်ယ︀ႃႇꩬ︀ိူဝ်ႛယ︀ၢဝ်းဢ︀ꩫ︀်ႈၵ︀ꩫ︀်ꩫ︀က︀်လ︀ူင︀်ꩫ︀ႆ︀ႇၵ︀ဝ်ꩫ︀ုင︀်ႈင︀ႆ︀း က︀ႃꩰမ︀ႃးꩰဢ︀ူ။ က︀တ︀်ꩫ︀ႆ︀ႇၵ︀ဝ်မ︀ႆ︀ႛက︀ႃꩬ︀ီ ꩭႂ်ႛပ︀ူဝ်းၵ︀ဝ်မ︀ႆ︀ႛပ︀ိူꩫ︀်ႈꩫ︀ၢပ︀်ႉယ︀မ︀်ႈꩫ︀ႆ︀ႇက︀ေႃႇ ၵ︀ဝ်ၵ︀ႂ်ႈꩭီတ︀်ဢ︀ူ။ ꩡ︀ွင︀်းꩬ︀ွꩫ︀်တ︀ြႃးꩫ︀ႆ︀ႇၵ︀ဝ် ပ︀ွႆ︀းꩫ︀ႆ︀ႇၵ︀ဝ်မ︀ႆ︀ႛက︀ေႃႇ တ︀ီႈꩫ︀င︀်ႈဢ︀ꩫ︀်ႈꩬ︀ုင︀်ꩫ︀ႆ︀ႇၵ︀ဝ်မ︀ႆ︀ႛ ၵ︀ဝ်ၵ︀ႂ်ႈꩫ︀င︀်ႈဢ︀ူ။ 40ၵ︀ဝ်ယ︀ႃႇ ꩭိူꩫ︀်းမ︀ေႈမ︀ၢႆ︀ႛꩫ︀ႆ︀ႇၵ︀ဝ်မ︀ႆ︀ႛ ꩭူမ︀်းဢ︀ဝ်ႈꩬ︀ီ ꩭႂ်ႛပ︀ူဝ်းပ︀ိူꩫ︀်ႈထွမ︀်ꩬ︀ႅꩫ︀်ႛꩫ︀ႆ︀ႇ ယ︀ွꩫ︀်းꩬ︀ူးဢ︀ဝ်ႈယ︀ၢဝ်းꩰက︀ꩫ︀်ႈဢ︀ူ။ က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၵ︀ဝ်မ︀ႆ︀ႛတ︀ၢမ︀်ဢ︀ပ︀ႅတ︀်ႉဢ︀ꩫ︀်ႈၵ︀ႅꩫ︀်းယ︀ႂ်တ︀ီꩭႂ်ႛꩫ︀မ︀်” ꩫ︀ဝꩫ︀်ႇ။

လ︀ွင︀်ႈင︀ိူꩫ︀်းဢ︀ꩫ︀်ႈမ︀ေႈမ︀ၢႆ︀ႛလ︀ူ

41ဝၢႆ︀းဢ︀မ︀ႂ်း ꩡ︀ဝ်ႛယ︀ေꩬ︀ု က︀ꩫ︀်ႛꩫ︀ႃႛတ︀ႅက︀်ႉၵ︀ွင︀်လ︀ူꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛꩫ︀င︀်ႈꩬ︀ီ က︀ူꩫ︀်ႈဢ︀ꩫ︀်ႈမ︀ႃးꩬ︀ႂ်ၵ︀ွင︀်လ︀ူꩫ︀ႆ︀ႇၵ︀ဝ်မ︀ႆ︀ႛလ︀ႅမ︀်းဢ︀ူ။ ၸ︀ုင︀်ၸ︀ူႛမ︀ီးꩫ︀ႆ︀ႇၵ︀ဝ်ယ︀ႃႇ င︀ိူꩫ︀်းတ︀င︀်းပ︀ုမ︀်းဢ︀ဝ်ႈမ︀ႃးꩬ︀ီ တ︀ႅက︀်ႉၵ︀ွင︀်လ︀ူမ︀ႆ︀ႛ လ︀ူꩬ︀ႂ်က︀ꩫ︀်ႈဢ︀ူ။ 42မ︀ိူဝ်ႈဢ︀မ︀ႂ်း မ︀ေႈမ︀ၢႆ︀ႛၸ︀ၢꩫ︀်က︀ူဝ်ႇလ︀ိူင︀်ႈယ︀ႃႇ င︀ိူꩫ︀်းတ︀ွင︀်းဢ︀ွꩫ︀် ꩬ︀ွင︀်ၵ︀ႅပ︀်လ︀ိူင︀်ႈမ︀ႃးလ︀ူꩬ︀ႂ်ဢ︀ူ။ 43ꩫ︀ႆ︀ႇမ︀ႆ︀ႛ ꩡ︀ဝ်ႛယ︀ေꩬ︀ုယ︀ႃႇ တ︀ပ︀ေးꩡ︀ဝ်ႛၵ︀ဝ်မ︀ႆ︀ႛꩭွင︀်ႇꩬ︀ီ “က︀ဝ်ႈဝႃႈက︀ွတ︀်။ မ︀ေႈမ︀ၢႆ︀ႛၸ︀ၢꩫ︀်ꩫ︀ႆ︀ႇ က︀ူꩫ︀်းဢ︀ꩫ︀်ႈတ︀ႅက︀်ႉၵ︀ွင︀်လ︀ူꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ မ︀ႃးလ︀ူꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ ꩬ︀ႂ်ꩫ︀မ︀်ꩬ︀ႃတ︀ေႇတ︀ေႇယ︀ဝ်ႇ။ 44က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး တ︀ၢင︀်က︀ူဝ်ႇꩫ︀ႆ︀ႇၵ︀ဝ်ယ︀ႃႇ င︀ိူꩫ︀်းဢ︀ꩫ︀်ႈၵ︀ဝ်မ︀ႆ︀ႛလ︀ိူဝ်ꩫ︀ႆ︀ႇၵ︀ဝ်ꩫ︀မ︀် မ︀ႃးလ︀ူက︀ꩫ︀်ႈꩫ︀ႆ︀ႇ။ ꩫ︀ႆ︀ႇꩫ︀က︀ေႃႇမ︀ꩫ︀်းယ︀ႃႇ ၸ︀ၢꩫ︀်ၵ︀ႅတ︀်ႉꩰꩬ︀ီဢ︀ူက︀ေႃႇ ဢ︀ꩫ︀်ႈꩫ︀င︀်မ︀ꩫ︀်းမ︀ႆ︀ႛယ︀င︀်းꩫ︀ႆ︀ႇတ︀င︀်းမ︀ိူင︀်းလ︀ူမ︀ႃးယ︀ဝ်ႇ” ꩫ︀ဝꩫ︀်ႇ။

Currently Selected:

မ︀ႃက︀ု 12: kht

Highlight

Copy