မ︀ႃက︀ု 11
11
လ︀ွင︀်ႈꩡ︀ဝ်ႛယ︀ေꩬ︀ုၵ︀ဝ်ႛဝီင︀်းယ︀ေရ︀ုꩬ︀လ︀ိမ︀်
1ꩡ︀ဝ်ႛယ︀ေꩬ︀ု တ︀င︀်းတ︀ပ︀ေးꩡ︀ဝ်ႛၵ︀ဝ် တ︀ၢႆ︀ႛဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛက︀ႂ်ႛမ︀ႃးꩬ︀ီ ꩫ︀ွႆ︀ႈတ︀ၢꩫ︀်လ︀ူꩫ︀် ဢ︀ꩫ︀်ႈတ︀ၢႆ︀ႛꩭိမ︀်းမ︀ၢꩫ︀်ႛၿႅတ︀်ၸ︀ႃက︀ေꩫ︀ၵ︀ႃ ၿေတ︀ꩫ︀ိမ︀ႆ︀ႛထိုင︀်က︀ီး တ︀ပ︀ေးꩡ︀ဝ်ႛꩬ︀ွင︀်က︀ူဝ်ႇမ︀ႆ︀ႛ ပ︀ွႆ︀ꩡ︀ႂ်ႇꩬ︀ီမ︀ꩫ︀်းꩡ︀ဝ်ႛꩬ︀င︀်ꩫ︀ႆ︀ႇ 2“ꩬ︀ွင︀်ၵ︀ိူဝ်မ︀ၢꩫ︀်ႛဢ︀ꩫ︀်ႈက︀ꩫ︀်ႛꩫ︀ႃႛပ︀ုꩫ︀်ႛမ︀ႆ︀ႛက︀ႃတ︀ႃႉ။ မ︀ၢꩫ︀်ႛမ︀ႆ︀ႛၵ︀ဝ်ႛက︀ီး မ︀ႃႇလ︀ူဝ်ႇဢ︀ွꩫ︀်ဢ︀ꩫ︀်ႈၸ︀ုက︀်ဝႆ︀ႇတ︀ူဝ်ႈလ︀ိူင︀်ႈ ဢ︀ꩫ︀်ႈၸ︀ႂ်က︀ေႃႇမ︀ဝ်ꩭွꩫ︀်ၵ︀ီမ︀ႆ︀ႛ ꩬ︀ွင︀်ၵ︀ိူဝ်ꩭꩫ︀်ဢ︀ူ။ မ︀ႃႇလ︀ူဝ်ႇဢ︀မ︀ႂ်းမ︀ႆ︀ႛ ꩬ︀ၢႆ︀က︀ေႛꩬ︀ီꩡ︀ုင︀်ႈမ︀ႃးတ︀ႃႉ။ 3ꩬ︀င︀်ဝႃႈꩬ︀ွင︀်ၵ︀ိူဝ်မ︀ႆ︀ႛ ꩭီတ︀်က︀ꩬ︀င︀်ꩫ︀ႆ︀ မ︀ႃႇလ︀ူဝ်ႇဢ︀ွꩫ︀်ꩫ︀ႆ︀ႇမ︀ႆ︀ႛ ꩬ︀ၢႆ︀က︀ေႛꩫ︀ႆ︀ႇꩫ︀ꩬ︀ီ ပ︀ိူꩫ︀်ႈထၢမ︀်က︀ီး ꩡ︀ဝ်ႛၵ︀ႂ်ႈတ︀ိုဝ်းꩬ︀ီꩫ︀မ︀်၊ တ︀ိုဝ်းယ︀ဝ်ႇက︀ီးက︀ꩡ︀ူး ꩬ︀ူင︀်ꩭႂ်ႛပ︀ွက︀်ႉမ︀ႃးက︀ွတ︀်ꩫ︀ꩬ︀ီဝႃႈတ︀ႃႉ” ꩫ︀ဝꩫ︀်ႇ။ 4ꩬ︀ွင︀်ၵ︀ႃက︀ေႃႇက︀ႃက︀ီး ꩭိမ︀်းတ︀ၢင︀်းမ︀ႆ︀ႛမ︀ႃႇလ︀ူဝ်ႇဢ︀ွꩫ︀်တ︀ူဝ်ႈလ︀ိူင︀်ႈ တ︀ၢႆ︀ႛတ︀ၢင︀်းပ︀တ︀ူႈꩭိူꩫ︀်းလ︀ိူင︀်ႈမ︀ႆ︀ႛ လ︀ၢမ︀်ႈဝႆ︀ႇꩫ︀ႆ︀ႇမ︀ႆ︀ႛꩭꩫ︀်ဢ︀ူ။ 5ꩬ︀ွင︀်ၵ︀ႃ မ︀ႃႇလ︀ူဝ်ႇဢ︀မ︀ႂ်းမ︀ႆ︀ႛꩬ︀ၢႆ︀က︀ေႛက︀ီး က︀ူꩫ︀်းဢ︀ꩫ︀်ႈꩭꩫ︀်က︀မ︀်ႈၸ︀ွင︀်းယ︀ႃႇ “ꩭီတ︀်က︀ꩬ︀င︀်ꩫ︀ႆ︀ မ︀ႃႇဢ︀မ︀ႂ်းမ︀ႆ︀ႛက︀ေႛꩫ︀ႆ︀ႇ” ꩫ︀ꩬ︀ီꩬ︀ွင︀်ၵ︀ႃမ︀ႆ︀ႛထၢမ︀်ဢ︀ူ။ 6ꩬ︀ွင︀်ၵ︀ႃက︀ေႃႇ ꩫ︀င︀်ꩡ︀ဝ်ႛယ︀ေꩬ︀ုꩬ︀င︀်ဝႆ︀ႇꩫ︀က︀ꩫ︀်ႈဝႃႈက︀ီး ၵ︀ဝ်က︀ေႃႇ ꩬ︀ွင︀်ၵ︀ႃမ︀ႆ︀ႛ ꩭႂ်ႛဢ︀ဝ်ႈက︀ႃဢ︀ူ။ 7-8ꩬ︀ွင︀်ၵ︀ႃ မ︀ႃႇလ︀ူဝ်ႇဢ︀ွꩫ︀်ဢ︀မ︀ႂ်း ꩡ︀ဝ်ႛယ︀ေꩬ︀ုမ︀ႆ︀ႛ ꩡ︀ုင︀်ႈမ︀ႃးꩬ︀ီ က︀ꩫ︀်ႛꩫ︀ိူဝ်လ︀င︀်မ︀ႃႇလ︀ူဝ်ႇမ︀ႆ︀ႛ ꩬ︀ိူဝ်ႛထမ︀ူင︀်ႇၵ︀ဝ်ꩬ︀ိူဝ်ဝႆ︀ႇဢ︀ူ။ ꩡ︀ဝ်ႛယ︀ေꩬ︀ုက︀ေႃႇ မ︀ႃႇလ︀ူဝ်ႇဢ︀မ︀ႂ်းမ︀ႆ︀ႛၵ︀ိုꩫ︀်ႛၵ︀ီက︀ီး ၸ︀ုင︀်က︀ူꩫ︀်းꩫ︀ႆ︀ႇၵ︀ဝ်ယ︀ႃႇ ၵ︀ိူင︀်ႈꩫ︀ုင︀်ႈၵ︀ိူင︀်ႈမ︀ႆ︀ႈၵ︀ဝ် ၵ︀ူꩫ︀်တ︀ၢင︀်းဢ︀ꩫ︀်ႈမ︀ꩫ︀်းꩡ︀ဝ်ႛတ︀ီက︀ႃမ︀ႆ︀ႛ ꩬ︀ိူဝ်ဝႆ︀ႇက︀ꩫ︀်ႈဢ︀ူ။ က︀ူꩫ︀်းက︀မ︀်ႈၸ︀ွင︀်းယ︀ႃႇ လ︀ုက︀်ႉပ︀ၢင︀်မ︀ႆ︀ႛ ၵ︀ႃႈမ︀ႂ်ႈတ︀ၢꩫ︀်လ︀ူꩫ︀်ꩫ︀ႆ︀ႇၵ︀ဝ်တ︀တ︀်မ︀ႃးꩬ︀ီ ၵ︀ူꩫ︀်တ︀ၢင︀်းမ︀ႆ︀ႛꩬ︀ိူဝ်က︀ꩫ︀်ႈဢ︀ူ။ 9က︀ူꩫ︀်းဢ︀ꩫ︀်ႈက︀ႃလ︀ွေႛမ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ်ယ︀ႃႇ လ︀ုက︀်ႉက︀ꩫ︀်ႛꩫ︀ႃႛက︀ꩫ︀်ႛလ︀င︀်မ︀ꩫ︀်းꩡ︀ဝ်ႛမ︀ႆ︀ႛ “ꩭေလ︀ိူဝ်း၊ ꩭေလ︀ႃး၊ ယ︀ူက︀်ႉယ︀ွင︀်ႛမ︀ူꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛက︀ꩫ︀်ႈလ︀ိူဝ်း ꩡ︀ဝ်ႛဢ︀ꩫ︀်ႈတ︀ၢင︀်ႈတ︀ူဝ်ႈ ꩡ︀ဝ်ႛထႃဝရ︀ၸ︀ြႃးꩬ︀ီ က︀ျွႃးမ︀ႃးꩫ︀ႆ︀ႇ မ︀ၢင︀်က︀လ︀ႃꩭႂ်ႛယ︀င︀်းတ︀ီၵ︀ႃႛက︀တ︀ႃႉ။ 10မ︀ိူင︀်းပ︀ူဝ်ꩡ︀ဝ်ႛꩭူဝ်ၵ︀မ︀်းၻႃဝိ ဢ︀ꩫ︀်ႈတ︀ီတ︀င︀်ႛတ︀ေꩫ︀ႆ︀ႇ မ︀ၢင︀်က︀လ︀ႃꩭႂ်ႛယ︀င︀်းတ︀ီၵ︀ႃႛက︀တ︀ႃႉ။ မ︀ူꩫ︀်ႈꩡ︀ဝ်ႛထႃဝရ︀ၸ︀ြႃးမ︀ႆ︀ႛယ︀ူဝ်းယ︀ွင︀်ႛက︀ꩫ︀်ႈလ︀ိူဝ်း” ꩫ︀ꩬ︀ီꩭေက︀ꩫ︀်ႈဢ︀ူ။ 11ꩡ︀ဝ်ႛယ︀ေꩬ︀ု ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛၵ︀ဝ်ႛက︀ႃꩬ︀ီ ꩡ︀ွင︀်းၿိက︀်ႉမ︀ၢꩫ︀် က︀ူႈတ︀ီႈက︀ူႈဢ︀ꩫ︀်ႈမ︀ႆ︀ႛပ︀ꩫ︀်လ︀ႅမ︀်းဢ︀ူ။ ၸ︀ႃႇတ︀ီၵ︀မ︀်ႈမ︀ႃးက︀ီး မ︀ꩫ︀်းꩡ︀ဝ်ႛတ︀င︀်းတ︀ပ︀ေးꩡ︀ဝ်ႛꩬ︀ိပ︀်ꩬ︀ွင︀်က︀ူဝ်ႇ က︀ႃမ︀ၢꩫ︀်ႛၿေတ︀ꩫ︀ိဢ︀ူ။
လ︀ွင︀်ႈက︀ိꩫ︀်တ︀ူꩫ︀်ႛမ︀က︀်ဝႃႈ
12ꩫ︀င︀်မ︀ိူဝ်ႈꩭုက︀်ႉ ၵ︀ဝ်ꩡ︀ဝ်ႛလ︀ုက︀်ႉမ︀ၢꩫ︀်ႛၿေတ︀ꩫ︀ိမ︀ႆ︀ႛပ︀ွက︀်ႉမ︀ႃးက︀ီး ꩡ︀ဝ်ႛယ︀ေꩬ︀ုယ︀ႃႇတ︀ွင︀်ႇမ︀ႆ︀ႛလ︀ူင︀်ꩫ︀မ︀်။ 13မ︀ꩫ︀်းꩡ︀ဝ်ႛတ︀ူꩫ︀်ႛမ︀က︀်ဝႃႈတ︀ူꩫ︀်ႛလ︀ိူင︀်ႈမ︀ႆ︀ႛꩭꩫ︀်က︀ီး မ︀ၢင︀်ႈမ︀ိုဝ်ႇမ︀က︀်ယ︀င︀်းက︀လ︀ူꩫ︀ꩬ︀ီ တ︀ၢႆ︀ႛတ︀ူꩫ︀်ႛမ︀ႆ︀ႛ က︀ႃလ︀ႅမ︀်းဢ︀ူ။ ꩫ︀ႆ︀ႇꩫ︀က︀ေႃႇ ယ︀ၢမ︀်းမ︀က︀်ပ︀ီꩫ︀်ႈမ︀ဝ်ꩡ︀ႂ်ႈꩫ︀ႆ︀ႇꩬ︀ီ မ︀ႂ်ႈꩫ︀ႆ︀ႇၵ︀ဝ်ꩫ︀ၢႆ︀ႈꩬ︀ိုင︀်ꩭꩫ︀်ဢ︀ူ။ 14င︀ႆ︀းက︀ီး မ︀ꩫ︀်းꩡ︀ဝ်ႛယ︀ႃႇ တ︀ူꩫ︀်ႛမ︀က︀်ဝႃႈမ︀ႆ︀ႛ “မ︀က︀်မ︀ႂ်း မ︀ိူဝ်ႈလ︀ႂ်ႈက︀ေႃႇ ပ︀ီꩭႂ်ႛပ︀ီꩫ︀်ႈက︀တ︀ႃႉ” ꩫ︀ꩬ︀ီက︀ိꩫ︀်ဢ︀ူ။ မ︀ꩫ︀်းꩡ︀ဝ်ႛဝႃႈင︀ႆ︀းꩫ︀ႆ︀ႇမ︀ႆ︀ႛ တ︀ပ︀ေးꩡ︀ဝ်ႛၵ︀ဝ်က︀ေႃႇꩫ︀ႆ︀ႛꩥ︀ိꩫ︀်းက︀ꩫ︀်ႈဢ︀ူ။
လ︀ွင︀်ႈꩡ︀ဝ်ႛယ︀ေꩬ︀ုက︀ႃꩡ︀ွင︀်းၿိက︀်ႉမ︀ၢꩫ︀်
15ၵ︀ဝ်ꩡ︀ဝ်ႛ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛထိုင︀်က︀ီး မ︀ꩫ︀်းꩡ︀ဝ်ႛꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛၵ︀ဝ်ႛꩬ︀ီ က︀ူꩫ︀်းဢ︀ꩫ︀်ႈၵ︀ၢႆ︀က︀ꩫ︀်ႈꩬ︀ိုဝ်ႇက︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛ ꩭူဝ်ႛဢ︀ွက︀်ဢ︀ူ။ ၸ︀ိူꩫ︀်ၸ︀ူႛလ︀ၢႆ︀ႈင︀ိူꩫ︀်းꩫ︀ႆ︀ႇၵ︀ဝ်၊ တ︀င︀်ၸ︀ူႛၵ︀ၢႆ︀ꩫ︀ူက︀်ႉတ︀ူႛꩫ︀ႆ︀ႇၵ︀ဝ်မ︀ႆ︀ႛက︀ေႃႇ မ︀ꩫ︀်းꩡ︀ဝ်ႛပ︀ိꩫ︀်ႛၵ︀ွတ︀်ဢ︀ူ။ 16မ︀ꩫ︀်းꩡ︀ဝ်ႛၸ︀ႂ်မ︀ႆ︀ႛက︀ေႃႇ ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ၵ︀ိူင︀်ႈက︀ႃႇꩫ︀ႆ︀ႇၵ︀ဝ် ꩵ︀ႈꩭႂ်ႛဢ︀ဝ်ႈမ︀ႃး။ 17က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛက︀ေႃႇ
“ꩡ︀ွင︀်းၿိက︀်ႉမ︀ၢꩫ︀်က︀ဝ်ႈယ︀ႃႇ တ︀ီပ︀ီꩫ︀်ႈꩭိူꩫ︀်းဢ︀ꩫ︀်ႈယ︀ွꩫ︀်းꩬ︀ူးꩫ︀မ︀်”
ꩫ︀ꩬ︀ီ က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇမ︀ဝ်ꩡ︀ႂ်ႈက︀ျႃး။ ꩭီတ︀်က︀ꩬ︀င︀်ꩫ︀ႆ︀ ꩬ︀ူဢ︀ဝ်ႈပ︀ီꩫ︀်ႈတ︀ီႈꩬ︀ွꩫ︀်ႈ က︀ူꩫ︀်းꩡ︀ူꩫ︀်ႈꩫ︀ႆ︀ႇၵ︀ဝ်ꩫ︀ႆ︀ႇ” ꩫ︀ꩬ︀ီမ︀ꩫ︀်းꩡ︀ဝ်ႛꩬ︀ွꩫ︀်ꩬ︀ုင︀်းမ︀ႃးဢ︀ူ။ 18ယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ် ꩬ︀ြႃတ︀ြႃးꩫ︀ႆ︀ႇၵ︀ဝ်ယ︀ႃႇ လ︀ွင︀်ႈꩫ︀ႆ︀ႇမ︀ႆ︀ႛꩫ︀ႆ︀ႛꩥ︀ိꩫ︀်းက︀ီး ꩡ︀ဝ်ႛယ︀ေꩬ︀ုမ︀ႆ︀ႛ ၵ︀ႃတ︀ၢင︀်းဢ︀ဝ်ႈတ︀ၢႆ︀ႈက︀ꩫ︀်ႈဢ︀ူ။ ꩫ︀ႆ︀ႇꩫ︀က︀ေႃႇ ၵ︀ဝ်ယ︀ႃႇ က︀ွပ︀်ႉပ︀ိူဝ်ႈၸ︀ုင︀်က︀ူꩫ︀်းꩫ︀ႆ︀ႇၵ︀ဝ် ဢ︀ꩫ︀်ႈမ︀ꩫ︀်းꩡ︀ဝ်ႛꩬ︀ွꩫ︀်မ︀ႆ︀ႛ ဢ︀ၢမ︀်းက︀ꩫ︀်ႈꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ တ︀ီဢ︀ဝ်ႈတ︀ၢႆ︀ႈꩫ︀ႆ︀ႇက︀ူဝ်ႈက︀ꩫ︀်ႈဢ︀ူ။ 19က︀ၢင︀်ႈဝꩫ︀်းꩡ︀ၢႆ︀ႇမ︀ႃးက︀ီး ꩡ︀ဝ်ႛယ︀ေꩬ︀ု တ︀င︀်းတ︀ပ︀ေးꩡ︀ဝ်ႛၵ︀ဝ် လ︀ုက︀်ႉဝီင︀်းမ︀ႆ︀ႛ ဢ︀ွက︀်က︀ႃဢ︀ူ။
ၵ︀ူဝ်ႛꩬ︀ွꩫ︀်လ︀ုက︀်ႉတ︀ူꩫ︀်ႛမ︀က︀်ဝႃႈဢ︀ꩫ︀်ႈꩭိဝ်က︀ႃ
20ꩫ︀င︀်မ︀ိူဝ်ႈꩭုက︀်ႉက︀ၢင︀်ႈလ︀ႂ်ꩡ︀ဝ်ႇꩰ ၵ︀ဝ်ꩡ︀ဝ်ႛပ︀ႆ︀ႈတ︀ၢင︀်းက︀ႃက︀ီး တ︀ူꩫ︀်ႛမ︀က︀်ဝႃႈ ဢ︀ꩫ︀်ႈမ︀ꩫ︀်းꩡ︀ဝ်ႛက︀ိꩫ︀်ဝႆ︀ႇꩫ︀ႆ︀ႇမ︀ႆ︀ႛꩭꩫ︀်ပ︀ွက︀်ႉဢ︀ူ။ တ︀ူꩫ︀်ႛဢ︀မ︀ႂ်းယ︀ႃႇ လ︀ုက︀်ႉꩭၢက︀်ႉမ︀ႆ︀ႛက︀ူဝ်ꩬ︀ီ တ︀င︀်းတ︀ူꩫ︀်ႛꩭႅင︀်ႛꩭိဝ်က︀ႃယ︀ဝ်ႇ။ 21ပ︀ေတ︀ရ︀ုယ︀ႃႇဢ︀ွက︀်ꩡ︀ႂ်ႈꩬ︀ီ “ပ︀လ︀ေႃး ꩡ︀ဝ်ႛꩴ︀း၊ လ︀ႅမ︀်းတ︀ီၵ︀ႃႛလ︀ႃး။ တ︀ူꩫ︀်ႛမ︀က︀်ဝႃႈဢ︀ꩫ︀်ႈꩡ︀ဝ်ႛက︀ိꩫ︀်ဝႆ︀ႇꩫ︀ႆ︀ႇ ꩭႅင︀်ႛꩭိဝ်က︀ႃတ︀ီၵ︀ႃႛယ︀ဝ်ႇ” ꩫ︀ဝꩫ︀်ႇ။ 22ꩫ︀ႆ︀ႇမ︀ႆ︀ႛ မ︀ꩫ︀်းꩡ︀ဝ်ႛယ︀ႃႇ တ︀ပ︀ေးꩡ︀ဝ်ႛၵ︀ဝ်မ︀ႆ︀ႛ “ꩡ︀ဝ်ႛထႃဝရ︀ၸ︀ြႃးမ︀ႆ︀ႛယ︀ုမ︀်ယ︀မ︀်ႈတ︀ႃႉ။ 23က︀ဝ်ႈတ︀ေႇတ︀ေႇဝႃႈက︀ွတ︀် ꩫ︀င︀်ꩬ︀ူဝႃႈꩫ︀က︀ꩫ︀်ႈ မ︀ꩫ︀်းꩡ︀ဝ်ႛဢ︀ဝ်ႈပ︀ီꩫ︀်ႈꩭႂ်ႛဢ︀ူꩫ︀ꩬ︀ီ ꩡ︀ႂ်ႈမ︀ဝ်ၵ︀ႃႈꩬ︀ီ ယ︀ုမ︀်ယ︀မ︀်ႈက︀ီး ꩫ︀ွႆ︀ႈꩫ︀ႆ︀ႇလ︀ုက︀်ႉတ︀ီႈꩫ︀ႆ︀ႇမ︀ႆ︀ႛၵ︀ၢႆ︀ႇꩬ︀ီ ꩫ︀မ︀်ႇပ︀ၢင︀်လ︀ၢႆ︀မ︀ႆ︀ႛက︀ႃတ︀ူက︀်တ︀ႃႉ ꩫ︀ꩬ︀ီဝႃႈꩫ︀က︀ေႃႇ ဢ︀ꩫ︀်ႈꩫ︀င︀်ꩬ︀ူဝႃႈꩫ︀ႆ︀ႇပ︀ီꩫ︀်ႈမ︀ႃးဢ︀ူ။ 24က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ က︀ဝ်ႈဝႃႈက︀ွတ︀်။ မ︀ိူဝ်ႈꩬ︀ူယ︀ွꩫ︀်းꩬ︀ူးꩫ︀ႆ︀ႇ ဢ︀ꩫ︀်ႈꩫ︀င︀်ꩬ︀ူယ︀ွꩫ︀်းꩫ︀ႆ︀ႇ ꩫ︀ႆ︀ႛယ︀ဝ်ႇꩫ︀ꩬ︀ီယ︀ုမ︀်တ︀ႃႉ။ င︀ႆ︀းက︀ီး က︀ႃႈꩫ︀င︀်ꩬ︀ူယ︀ွꩫ︀်းꩫ︀ႆ︀ႇꩫ︀ႆ︀ႛတ︀ေႇတ︀ေႇဢ︀ူ။ 25မ︀ိူဝ်ႈꩬ︀ူꩬ︀ဝ်းꩬ︀ီယ︀ွꩫ︀်းꩬ︀ူးꩫ︀ႆ︀ႇ ဢ︀ꩫ︀်ႈပ︀ိူꩫ︀်ႈၸ︀ိတ︀်မ︀ႆ︀ႛ ꩬ︀ူဝႃႈပ︀ွႆ︀ꩭႂ်ႛဢ︀ူ။ င︀ႆ︀းက︀ီးꩬ︀ိုင︀် ပ︀ူဝ်ꩡ︀ဝ်ႛထႃဝရ︀ၸ︀ြႃးꩬ︀ူ ဢ︀ꩫ︀်ႈၵ︀ိင︀်းက︀ꩫ︀်ႛꩫ︀ိူဝ်က︀ၢင︀်ႈꩭၢဝ်ꩫ︀ႆ︀ႇ ဢ︀ꩫ︀်ႈꩬ︀ူၸ︀ိတ︀်မ︀ႆ︀ႛ ပ︀ွႆ︀ꩭႂ်ႛဢ︀ူ။ 26ꩬ︀ူဢ︀ꩫ︀်ႈပ︀ိူꩫ︀်ႈၸ︀ိတ︀်မ︀ႆ︀ႛ မ︀ဝ်ပ︀ွႆ︀ꩭႂ်ႛက︀ီး ဢ︀ꩫ︀်ႈꩬ︀ူၸ︀ိတ︀်မ︀ႆ︀ႛက︀ေႃႇ ပ︀ူဝ်ꩬ︀ူဢ︀ꩫ︀်ႈၵ︀ိင︀်းက︀ꩫ︀်ႛꩫ︀ိူဝ်က︀ၢင︀်ႈꩭၢဝ်ꩫ︀ႆ︀ႇ ꩵ︀ႈပ︀ွႆ︀ꩭႂ်ႛ” ꩫ︀ဝꩫ︀်ႇ။
လ︀ွင︀်ႈဢ︀ႃꩫ︀ႃꩡ︀ဝ်ႛယ︀ေꩬ︀ု
27ၵ︀ဝ်ꩡ︀ဝ်ႛ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ ထိုင︀်ပ︀ွက︀်ႉမ︀ႃးဢ︀ူ။ မ︀ိူဝ်ႈမ︀ꩫ︀်းꩡ︀ဝ်ႛꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ၸ︀ၢႆ︀ႛလ︀ေꩬ︀ီဢ︀ူꩫ︀ႆ︀ႇ ယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩫ︀ႆ︀ႇၵ︀ဝ်၊ ꩬ︀ြႃတ︀ြႃးꩫ︀ႆ︀ႇၵ︀ဝ်၊ ꩭူဝ်က︀ေၸ︀ႃꩬ︀ႃꩫ︀ႆ︀ႇၵ︀ဝ် မ︀ꩫ︀်းꩡ︀ဝ်ႛမ︀ႆ︀ႛမ︀ႃးꩬ︀ီ 28“မ︀ႂ်းꩡ︀ဝ်ႛဢ︀မ︀ူးဢ︀ꩫ︀်ႈꩫ︀ႆ︀ႇၵ︀ဝ် ဢ︀ဝ်ႈဢ︀ႃꩫ︀ႃၸ︀ႂ်ꩫ︀ႆ︀ꩭီတ︀်တ︀ီၵ︀ႃႛꩫ︀ႆ︀ႇ။ ဢ︀ႃꩫ︀ႃဢ︀ꩫ︀်ႈꩫ︀ႆ︀ႇၵ︀ဝ် မ︀ႂ်းꩡ︀ဝ်ႛမ︀ႆ︀ႛၸ︀ႂ်ꩫ︀ႆ︀ဢ︀ၢပ︀်ႉꩭႂ်ႛတ︀ီၵ︀ႃႛꩫ︀ႆ︀ႇ” ꩫ︀ꩬ︀ီꩬ︀ွက︀်ႉထၢမ︀်ဢ︀ူ။ 29ꩡ︀ဝ်ႛယ︀ေꩬ︀ုယ︀ႃႇ “ꩬ︀ူမ︀ႆ︀ႛက︀ဝ်ႈဢ︀ꩫ︀်ႈလ︀ိူင︀်ႈထၢမ︀်ဢ︀ွꩫ︀်ႈက︀ွတ︀်။ ꩬ︀ူက︀ေႛယ︀ဝ်ႇက︀ီးꩬ︀ိုင︀် ဢ︀မ︀ူးꩫ︀ႆ︀ႇၵ︀ဝ် က︀ဝ်ႈဢ︀ဝ်ႈဢ︀ႃꩫ︀ႃက︀ꩬ︀င︀် ꩭီတ︀်ꩫ︀ꩫ︀ႆ︀ႇၵ︀ႆ︀ႈꩭႂ်ႛက︀ွတ︀်။ 30ꩬ︀လ︀ႃး၊ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ ꩬ︀ြႃယ︀ေႃးꩭၢꩫ︀်မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭႂ်ႛꩫ︀ႆ︀ႇ ဢ︀ဝ်ႈဢ︀ႃꩫ︀ႃၸ︀ြႃးပ︀ီꩫ︀်ႈꩡ︀ဝ်ႛက︀ျႃး။ ဢ︀ဝ်ႈဢ︀ႃꩫ︀ႃက︀ူꩫ︀်းက︀ျႃး။ က︀ဝ်ႈမ︀ႆ︀ႛက︀ေႛမ︀ႃးတ︀ႃႉ” ꩫ︀ဝꩫ︀်ႇ။ 31ꩫ︀ႆ︀ႇမ︀ႆ︀ႛၵ︀ဝ်ယ︀ႃႇ “ꩬ︀င︀်ဝႃႈဢ︀ဝ်ႈဢ︀ႃꩫ︀ႃၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်ꩫ︀ꩬ︀ီ ꩭဝ်းဝႃႈက︀ီး ꩭီတ︀်က︀ꩬ︀င︀်ꩫ︀ႆ︀ꩬ︀ြႃယ︀ေႃးꩭၢꩫ︀်မ︀ႆ︀ႛ ꩬ︀ူမ︀ဝ်ယ︀ုမ︀်ꩫ︀ႆ︀ႇꩫ︀ꩬ︀ီ င︀ႆ︀ႚမ︀ꩫ︀်းထၢမ︀်မ︀ႃးဢ︀ူ။ 32ꩫ︀ႆ︀ႇꩫ︀က︀ေႃႇ ဢ︀ဝ်ႈဢ︀ႃꩫ︀ႃက︀ူꩫ︀်းꩫ︀မ︀်ꩫ︀ꩬ︀ီ ꩭဝ်းဝႃႈပ︀ီꩫ︀်ႈဢ︀ေႃး” ꩫ︀ꩬ︀ီၵ︀ဝ်ၸ︀ူႛꩡ︀ဝ်ႛꩫ︀ၢႆ︀ႈမ︀ူꩫ︀်ႈက︀ꩫ︀်ႈဢ︀ူ။ ၵ︀ဝ်ယ︀ႃႇၸ︀ုင︀်က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛက︀ူဝ်ႈꩬ︀ီ ဢ︀ꩫ︀်ႈမ︀ꩫ︀်းꩡ︀ဝ်ႛထၢမ︀်မ︀ႆ︀ႛ တ︀ွပ︀်ꩭႂ်ႛꩵ︀ႈပ︀ီꩫ︀်ႈ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ူꩫ︀်းꩫ︀ႆ︀ႇၵ︀ဝ်တ︀င︀်းမ︀ိူင︀်းယ︀ႃႇ ꩬ︀ြႃယ︀ေႃးꩭၢꩫ︀်မ︀ႆ︀ႛ ပ︀ရ︀ေႃးၸ︀ႅတ︀်ႉꩫ︀မ︀်ꩫ︀ꩬ︀ီ ယ︀ုမ︀်ယ︀မ︀်ႈက︀ꩫ︀်ႈꩬ︀ီꩫ︀မ︀်။ 33င︀ႆ︀းꩬ︀ီၵ︀ဝ်ယ︀ႃႇ “တ︀ူႈꩵ︀ႈတ︀ွင︀်းတ︀ီၵ︀ႃႛ” ꩫ︀ဝꩫ︀်ႇ။ မ︀ꩫ︀်းꩡ︀ဝ်ႛက︀ေႃႇ “ꩫ︀ႆ︀ႇက︀ီးက︀ဝ်ႈက︀ေႃႇဢ︀မ︀ူးꩫ︀ႆ︀ႇၵ︀ဝ် ဢ︀ဝ်ႈဢ︀ႃꩫ︀ႃက︀ꩬ︀င︀်ꩭီတ︀်ꩫ︀ꩫ︀ႆ︀ႇꩵ︀ႈၵ︀ႆ︀ႈ” ꩫ︀ဝꩫ︀်ႇ။
Currently Selected:
မ︀ႃက︀ု 11: kht
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
