ထဝ်ꩡ︀တ︀်ႉၵ︀ဝ် 8

1လ︀ွင︀်ႈဢ︀ဝ်ႈတ︀ႆ︀ၢႈက︀ူꩫ︀်းဢ︀မ︀ႂ်းမ︀ႆ︀ႛ ꩬ︀ေႃလ︀ု က︀ေႃႇၸ︀ွမ︀်ႇလ︀ွေႛဢ︀ူ။

လ︀ွင︀်ႈꩡ︀ိူဝ်းꩡ︀ဝ်ႛမ︀ႆ︀ႛ ꩬ︀ေႃလ︀ုꩫ︀ိက︀်ႉꩬ︀ၢက︀်ႉ

လ︀ုက︀်ႉမ︀ိူဝ်ႈဢ︀မ︀ႂ်းက︀ူဝ်ꩬ︀ီ ၸ︀ူႛယ︀ုမ︀်ယ︀မ︀်ႈဢ︀ꩫ︀်ႈဝီင︀်းယ︀ေရ︀ုꩬ︀လ︀ိမ︀်ꩫ︀ႆ︀ႇၵ︀ဝ်မ︀ႆ︀ႛ ပ︀ိူꩫ︀်ႈꩫ︀ီင︀်ၵ︀ႅပ︀်ႉꩰဢ︀ူ။ င︀ႆ︀းꩬ︀ီၵ︀ဝ်ယ︀ႃႇ တ︀ိူင︀်းယ︀ုတ︀၊ တ︀ိူင︀်းꩬ︀မ︀ႃရ︀ိꩫ︀ႆ︀ႇၵ︀ဝ်မ︀ႆ︀ႛၸ︀ူင︀်ႇပ︀ႆ︀ၢႈက︀ႃမ︀ူတ︀်ꩬ︀ီ တ︀မ︀ၢꩫ︀်ꩡ︀ဝ်ႛၵ︀ဝ်ꩫ︀ႆ︀ၢႈꩬ︀ိုင︀်က︀ိူတ︀်ဢ︀ူ။ 2ၸ︀ူႛယ︀ုမ︀်ယ︀မ︀်ႈဢ︀ꩫ︀်ႈꩭတ︀်ꩭၢꩫ︀်ꩫ︀ႆ︀ႇၵ︀ဝ်ယ︀ႃႇ ꩭၢင︀်ႈတ︀ႆ︀ၢႈꩬ︀တ︀ေၸ︀ꩫ︀်မ︀ႆ︀ႛၸ︀င︀်ꩭႂ်ႛꩬ︀ီ ၵ︀ီၵ︀ီၵ︀ုမ︀်ꩰꩭႆ︀ႛက︀ꩫ︀်ႈဢ︀ူ။ 3ꩫ︀ႆ︀ႇꩫ︀က︀ေႃႇ ꩬ︀ေႃလ︀ုယ︀ႃႇ ꩡ︀ိူဝ်းꩡ︀ဝ်ႛꩭႂ်ႛပ︀ူဝ်းၸ︀ေႛꩫ︀ႆ︀ႇ ꩬ︀ေႈꩡ︀ႃႉꩬ︀ီဢ︀ူဢ︀ူ။ မ︀ꩫ︀်းယ︀ႃႇ ꩭိူꩫ︀်းလ︀ိူင︀်ႈယ︀ဝ်ႇꩭိူꩫ︀်းလ︀ိူင︀်ႈၵ︀ဝ်ႛင︀ႆ︀း ၸ︀ူႛယ︀ုမ︀်ယ︀မ︀်ႈၸ︀ူႛꩡ︀ႆ︀ၢးၸ︀ူႛယ︀ိင︀်းꩫ︀ႆ︀ႇၵ︀ဝ်မ︀ႆ︀ႛ ꩬ︀ႅဝ်ႛꩬ︀ီꩡ︀ꩫ︀်ႈက︀ႃꩬ︀ႂ်ထွင︀်ဢ︀ူ။

လ︀ွင︀်ႈတ︀ိူင︀်းꩬ︀မ︀ႃရ︀ိမ︀ႆ︀ႛ ꩭူဝ်းၵ︀ၢဝ်ႈၵ︀ၢမ︀်းꩫ︀ီႈ

4ၸ︀ူႛယ︀ုမ︀်ယ︀မ︀်ႈ ဢ︀ꩫ︀်ႈၸ︀ူင︀်ႇက︀ႃꩫ︀ႆ︀ႇၵ︀ဝ်ယ︀ႃႇ က︀ူႈတ︀ီႈက︀ူႈꩫ︀ႅꩫ︀်ႈမ︀ႆ︀ႛက︀ႃꩬ︀ီ ꩭူဝ်းတ︀ြႃးလ︀ေဢ︀ူ။ 5ၸ︀ိလ︀ိပ︀်ယ︀ႃႇ ဝီင︀်းလ︀ူင︀်တ︀ိူင︀်းꩬ︀မ︀ႃရ︀ိမ︀ႆ︀ႛက︀ႃꩬ︀ီ လ︀ွင︀်ႈမ︀ေꩬ︀ိယ︀က︀ႃꩭူဝ်းဢ︀ူ။ 6ၸ︀ုင︀်က︀ူꩫ︀်းꩫ︀ႆ︀ႇၵ︀ဝ်ယ︀ႃႇ လ︀ႆ︀ၢးꩫ︀ိမ︀ိက︀်ႉဢ︀ꩫ︀်ႈ ၸ︀ိလ︀ိပ︀်ပ︀ျႃးꩫ︀ႆ︀ႇၵ︀ဝ်မ︀ႆ︀ႛꩭꩫ︀်ꩬ︀ီ တ︀ြႃးမ︀ꩫ︀်းမ︀ႆ︀ႛ ထွမ︀်ဢ︀ၵ︀ႅက︀်ႉဢ︀ၵ︀ျႃက︀ꩫ︀်ႈဢ︀ူ။ 7လ︀ုက︀်ႉက︀ူꩫ︀်းဢ︀ꩫ︀်ႈၸ︀ီၵ︀ဝ်ႛဢ︀ၢꩫ︀်တ︀ၢꩫ︀်မ︀ႆ︀ႛ ၸ︀ီꩭၢႆ︀ႇꩫ︀ႆ︀ႇၵ︀ဝ် ဢ︀ိဝ်ꩬ︀ႅꩫ︀်ꩬ︀ီဢ︀ွက︀်က︀ႃမ︀ူတ︀်ဢ︀ူ။ က︀ူꩫ︀်းဢ︀ꩫ︀်ႈꩬ︀ိက︀်ႉၵ︀ိင︀်းတ︀ႆ︀ၢႈꩫ︀ႆ︀ႇၵ︀ဝ်၊ က︀ူꩫ︀်းဢ︀ꩫ︀်ႈတ︀ိꩫ︀်ႈမ︀ိုဝ်းမ︀ဝ်ꩫ︀ီႈꩫ︀ႆ︀ႇၵ︀ဝ်က︀ေႃႇ ꩫ︀ီႈက︀ႃက︀ꩫ︀်ႈဢ︀ူ။ 8င︀ႆ︀းꩬ︀ီ က︀ူꩫ︀်းဝီင︀်းဢ︀မ︀ႂ်းၵ︀ဝ် ꩡ︀ူမ︀်းလ︀ူင︀်ꩡ︀ူမ︀်းလ︀ၢင︀်က︀ꩫ︀်ႈဢ︀ူ။ 9ဝီင︀်းဢ︀မ︀ႂ်းမ︀ႆ︀ႛ ꩬ︀ႅင︀်မ︀ုꩫ︀်ꩫ︀ꩫ︀ႆ︀ႇက︀ူꩫ︀်းက︀ူဝ်ႇလ︀ိူင︀်ႈယ︀င︀်းဢ︀ူ။ မ︀ꩫ︀်းယ︀ႃႇ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ꩭူဝ်က︀ေလ︀ူင︀်ꩫ︀ꩬ︀ီဝႃႈင︀ႆ︀း က︀ူꩫ︀်းꩬ︀မ︀ႃရ︀ိꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈတ︀ꩫ︀်းၵ︀ူဝ်းၸ︀ီပ︀ျႃးꩬ︀ီ ဢ︀ဝ်ႈဢ︀ၢမ︀်းတ︀ႆ︀ၢႈꩰက︀ꩫ︀်ႈဢ︀ူ။ 10င︀ႆ︀းꩬ︀ီ က︀ူꩫ︀်းဝီင︀်းလ︀ုက︀်ႉက︀ူႈꩡ︀ꩫ︀်ႇꩫ︀ႆ︀ႇၵ︀ဝ်ယ︀ႃႇ “ꩬ︀ႅင︀်မ︀ုꩫ︀် ယ︀ႃႇꩡ︀ဝ်ႛတ︀ꩫ︀်းၵ︀ူဝ်းလ︀ူင︀်ꩫ︀မ︀်” ꩫ︀ꩬ︀ီဝႃႈꩬ︀ီ ၵ︀ၢမ︀်းမ︀ꩫ︀်းမ︀ႆ︀ႛထွမ︀်က︀ꩫ︀်ႈဢ︀ူ။ 11ꩬ︀ႅင︀်မ︀ုꩫ︀်ယ︀ႃႇ ၵ︀ဝ်မ︀ႆ︀ႛၸ︀ၢမ︀်းမ︀ႃးꩫ︀ႆ︀ႇꩭိုင︀်မ︀ႃးꩫ︀ႆ︀ႇꩬ︀ီ ၵ︀ဝ်ယ︀ႃႇ ၵ︀ၢမ︀်းမ︀ꩫ︀်းမ︀ႆ︀ႛ ꩭီတ︀်တ︀ေႇတ︀ေႇဢ︀ဝ်ႈꩬ︀ီထွမ︀်က︀ꩫ︀်ႈဢ︀ူ။ 12ꩫ︀ႆ︀ႇꩫ︀က︀ေႃႇ ၸ︀ိလ︀ိပ︀်ယ︀ႃႇ ၵ︀ၢဝ်ႈၵ︀ၢမ︀်းꩫ︀ီႈ လ︀ွင︀်ႈမ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛ၊ လ︀ွင︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ၵ︀ႆ︀ႈ ꩭႂ်ႛက︀ီး ၵ︀ဝ်ယ︀ုမ︀်ယ︀မ︀်ႈက︀ꩫ︀်ႈꩬ︀ီ ၸ︀ူႛယ︀ိင︀်း၊ ၸ︀ူႛꩡ︀ႆ︀ၢးꩫ︀ႆ︀ႇၵ︀ဝ် မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭၢပ︀်ႉဢ︀ဝ်ႈ က︀ꩫ︀်ႈဢ︀ူ။ 13ꩬ︀ႅင︀်မ︀ုꩫ︀်ပ︀ိူꩫ︀်ႈꩡ︀ဝ်ႛတ︀မ︀ိူင︀်း ယ︀ုမ︀်ယ︀မ︀်ႈမ︀ႃးꩬ︀ီ မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭၢပ︀်ႉဢ︀ဝ်ႈင︀ႆ︀း ꩭီတ︀်တ︀ပ︀ေး ၸ︀ိလ︀ိပ︀်ꩬ︀ီဢ︀ူဢ︀ူ။ မ︀ꩫ︀်းယ︀ႃႇ လ︀ႆ︀ၢးꩫ︀ိမ︀ိက︀်ႉဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်းꩫ︀ႆ︀ႇၵ︀ဝ်ꩭꩫ︀်က︀ီး ဢ︀ၢမ︀်းတ︀ႆ︀ၢႈꩰꩬ︀ီဢ︀ူဢ︀ူ။ 14တ︀မ︀ၢꩫ︀်ꩡ︀ဝ်ႛ ဢ︀ꩫ︀်ႈဢ︀ူဝီင︀်းယ︀ေရ︀ုꩬ︀လ︀ိမ︀်ꩫ︀ႆ︀ႇၵ︀ဝ်ယ︀ႃႇ က︀ူꩫ︀်းတ︀ိူင︀်းꩬ︀မ︀ႃရ︀ိၵ︀ဝ် ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛ ꩭၢပ︀်ႉဢ︀ဝ်ႈယ︀ဝ်ႇꩫ︀ꩫ︀ႆ︀ႇ ꩫ︀ႆ︀ႛꩥ︀ိꩫ︀်းက︀ီး ပ︀ေတ︀ရ︀ုꩫ︀ၵ︀ႃယ︀ေႃးꩭၢꩫ︀်မ︀ႆ︀ႛ ꩡ︀ႂ်ႇꩬ︀ီꩭႂ်ႛက︀ႃတ︀ိူင︀်းꩬ︀မ︀ႃရ︀ိဢ︀ူ။ 15တ︀မ︀ၢꩫ︀်ꩡ︀ဝ်ႛꩬ︀ွင︀်ပ︀ႃးထိုင︀်မ︀ႃးက︀ီး ꩭႂ်ႛပ︀ူဝ်းၵ︀ဝ်ꩫ︀ႆ︀ႛꩭၢပ︀်ႉၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇ ယ︀ွꩫ︀်းꩬ︀ူးꩭႂ်ႛဢ︀ူ။ 16က︀ူꩫ︀်းဝီင︀်းဢ︀မ︀ႂ်းၵ︀ဝ်ယ︀ႃႇ ꩡ︀ိုဝ်ႈꩡ︀ဝ်ႛယ︀ေꩬ︀ုမ︀ႆ︀ႛ ပ︀ိုင︀်ႈဢ︀ိင︀်ႈꩬ︀ီ မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭၢပ︀်ႉဢ︀ဝ်ႈဝႆ︀ႇꩫ︀ႆ︀ၢႈꩫ︀မ︀်။ ၵ︀ဝ်ၸ︀ႂ်က︀ေႃႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ꩵ︀ႈပ︀ႆ︀ꩫ︀ႆ︀ႛꩭၢပ︀်ႉဢ︀ဝ်ႈ။ 17င︀ႆ︀းꩬ︀ီက︀ꩫ︀်ႛꩫ︀ိူဝ်ၵ︀ဝ်မ︀ႆ︀ႛ ပ︀ေတ︀ရ︀ုꩫ︀ၵ︀ႃယ︀ေႃးꩭၢꩫ︀် မ︀ိုဝ်းတ︀ၢင︀်ꩭႂ်ႛက︀ီး ၵ︀ဝ်က︀ေႃႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႛꩭၢပ︀်ႉဢ︀ဝ်ႈက︀ꩫ︀်ႈဢ︀ူ။ 18တ︀မ︀ၢꩫ︀်ꩡ︀ဝ်ႛၵ︀ဝ် က︀ꩫ︀်ႛꩫ︀ိူဝ်ၵ︀ဝ်မ︀ႆ︀ႛ မ︀ိုဝ်းတ︀ၢင︀်ꩭႂ်ႛꩬ︀ီ ၵ︀ဝ်မ︀ႆ︀ႛ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛထိုင︀်မ︀ႃးꩫ︀ႆ︀ႇမ︀ႆ︀ႛ ꩬ︀ႅင︀်မ︀ုꩫ︀်ꩭꩫ︀်က︀ီး မ︀ꩫ︀်းယ︀ႃႇတ︀မ︀ၢꩫ︀်ꩡ︀ဝ်ႛၵ︀ဝ်မ︀ႆ︀ႛ င︀ိူꩫ︀်းꩭႂ်ႛꩬ︀ီ 19“ꩡ︀ဝ်ႛၵ︀ဝ်ꩴ︀း က︀ူꩫ︀်းဢ︀ꩫ︀်ႈက︀ဝ်ႈမ︀ိုဝ်းတ︀ၢင︀်ꩫ︀ႆ︀ႇက︀ေႃႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛပ︀ူဝ်းꩫ︀ႆ︀ႛꩫ︀ႆ︀ႇ က︀ဝ်ႈမ︀ႆ︀ႛတ︀ꩫ︀်းၵ︀ူဝ်းဢ︀မ︀ႂ်းꩭႂ်ႛမ︀ႃးတ︀ႃႉ” ꩫ︀ဝꩫ︀်ႇ။ 20င︀ႆ︀းက︀ီး ပ︀ေတ︀ရ︀ုယ︀ႃႇ ꩬ︀ႅင︀်မ︀ုꩫ︀်မ︀ႆ︀ႛ “မ︀ႂ်းယ︀ႃႇ ဢ︀ဝ်ႈင︀ိူꩫ︀်းၵ︀ႂ်ႈꩬ︀ိုဝ်ႇꩬ︀ူးၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇꩬ︀ီ င︀ိူꩫ︀်းမ︀ႂ်းတ︀မ︀ိူင︀်း၊ မ︀ႂ်းတ︀မ︀ိူင︀်း ꩭႂ်ႛလ︀ူႇက︀ႃတ︀ႃႉ။ 21ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩡ︀ႂ်ႈမ︀ႂ်းမ︀ဝ်ꩬ︀ိုဝ်ႈꩫ︀ꩫ︀်ႈꩫ︀ႆ︀ႇꩬ︀ီ ဢ︀မ︀ူးတ︀ူႈမ︀ႆ︀ႛ မ︀ႂ်းလ︀ွေႛꩵ︀ႈꩫ︀ႆ︀ႛ။ 22ဢ︀ꩫ︀်ႈꩫ︀င︀်င︀ႆ︀ႚမ︀ႂ်းယ︀ုက︀်ႉꩭင︀်ႛꩫ︀ႆ︀ႇမ︀ႆ︀ႛ ꩬ︀ၢင︀်ဝွေတ︀ႃႉ။ ဢ︀ꩫ︀်ႈင︀ႆ︀ႚမ︀ႂ်းၵ︀ႂ်ႈꩡ︀ႂ်ႈꩫ︀ႆ︀ႇမ︀ႆ︀ႛ ꩭႂ်ႛပ︀ူဝ်းဢ︀ပ︀ႅတ︀်ႉလ︀ွတ︀်ႉꩫ︀ႆ︀ႇ ꩡ︀ဝ်ႛၸ︀ြႃးမ︀ႆ︀ႛယ︀ွꩫ︀်းꩬ︀ူးတ︀ႃႉ။ 23မ︀ႂ်းယ︀ႃႇ ပ︀ိူꩫ︀်ႈမ︀ႆ︀ႛတ︀ႃႈꩫ︀ႅင︀်ႈထူမ︀်ႛတ︀ူဝ်ႈꩬ︀ီ ဢ︀ူက︀ꩫ︀်ႛꩫ︀ႂ်းဢ︀ပ︀ႅတ︀်ႉမ︀ႆ︀ႛꩫ︀မ︀်ꩫ︀ꩫ︀ႆ︀ႇ က︀ဝ်ႈꩭꩫ︀်ဢ︀ူ” ꩫ︀ဝꩫ︀်ႇ။ 24ꩫ︀ႆ︀ႇမ︀ႆ︀ႛ ꩬ︀ႅင︀်မ︀ုꩫ︀်ယ︀ႃႇ “ဢ︀ꩫ︀်ႈꩬ︀ူꩡ︀ဝ်ႛဝႃႈꩫ︀ႆ︀ႇ က︀ဝ်ႈၵ︀ႃႛမ︀ႆ︀ႛက︀ꩬ︀င︀်က︀ေႃႇꩭႂ်ႛပ︀ူဝ်းမ︀ဝ်ပ︀ီꩫ︀်ႈမ︀ႃးꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩡ︀ႃႇꩭၢင︀်းက︀ဝ်ႈ ၵ︀ႅꩫ︀်းဝွꩫ︀်းꩭႂ်ႛတ︀ီၵ︀ႃႛမ︀ႃးတ︀ႃႉ” ꩫ︀ꩬ︀ီဝွꩫ︀်းၵ︀ႅꩫ︀်းဢ︀ူ။ 25ပ︀ေတ︀ရ︀ုꩫ︀ၵ︀ႃယ︀ေႃးꩭၢꩫ︀်ၵ︀ဝ်ယ︀ႃႇ လ︀ွင︀်ႈꩡ︀ဝ်ႛယ︀ေꩬ︀ု ဢ︀ꩫ︀်ႈၵ︀ဝ်ꩭူပ︀်ႉꩭꩫ︀်ꩫ︀ႆ︀ႇၵ︀ဝ်မ︀ႆ︀ႛ ꩬ︀ၢက︀်ႉꩬ︀ေၵ︀ၢမ︀်ꩬ︀ီ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛꩭူဝ်းယ︀ဝ်ႇက︀ီး ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ မ︀ိူဝ်းက︀ႃဢ︀ူ။ မ︀ိူဝ်ႈမ︀ိူဝ်းꩫ︀ႆ︀ႇ မ︀ၢꩫ︀်ႛꩬ︀မ︀ႃရ︀ိဢ︀ၢꩫ︀်တ︀ၢꩫ︀်မ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ီႈꩭူဝ်းလ︀ေဢ︀ူ။

လ︀ွင︀်ႈၸ︀ိလ︀ိပ︀်ꩫ︀ၵ︀ႃက︀ူꩫ︀်းယ︀ႂ်ဢ︀ီတ︀ီယ︀ူဝ်ပ︀ီယ︀ႃး

26ၵ︀ုꩫ︀်ꩬ︀ၢင︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၸ︀ိလ︀ိပ︀်မ︀ႆ︀ႛ “မ︀ႂ်းလ︀ုက︀်ႉꩬ︀ီ တ︀ၢင︀်းဢ︀ꩫ︀်ႈလ︀ုက︀်ႉဝီင︀်းယ︀ေရ︀ုꩬ︀လ︀ိမ︀် က︀ႃဝီင︀်းက︀ႃꩡ︀မ︀ႆ︀ႛ တ︀ႆ︀ꩬ︀ီပ︀ႃႛပ︀ႆ︀ၢႈꩡ︀ၢꩫ︀်းမ︀ႆ︀ႛက︀ႃတ︀ႃႉ” ꩫ︀ꩬ︀ီဝႃႈဢ︀ူ။ တ︀ၢင︀်းဢ︀မ︀ႂ်းယ︀ႃႇ တ︀ၢင︀်းထိူꩫ︀်ꩭႅင︀်ႛꩫ︀မ︀်။ 27-28ၸ︀ိလ︀ိပ︀်က︀ေႃႇ လ︀ုက︀်ႉꩬ︀ီက︀ႃဢ︀ူ။ မ︀ိူဝ်ႈဢ︀မ︀ႂ်း လ︀ုက︀်ႉꩭူဝ်ၵ︀မ︀်းမ︀ိူင︀်းဢ︀ီတ︀ီယ︀ူဝ်ပ︀ီယ︀ႃးမ︀ႆ︀ႛ ၸ︀ူႛင︀မ︀်းꩡ︀ိူင︀်ႇ က︀ူဝ်ႇလ︀ိူင︀်ႈ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛက︀ႃပ︀ႆ︀ၢႛၸ︀ြႃးယ︀ဝ်ႇꩬ︀ီ မ︀ိူဝ်းမ︀ႃးဢ︀ူ။ မ︀ꩫ︀်းယ︀ႃႇ ၸ︀ူႛတ︀ိုဝ်းꩬ︀ူဝ်းတ︀ႅက︀်ႉင︀ိူꩫ︀်း ꩫ︀ၢင︀်းꩭူဝ်ၵ︀မ︀်းꩫ︀မ︀်။ မ︀ꩫ︀်းယ︀ႃႇ ၵ︀ီလ︀ႅင︀်မ︀ႃႇꩬ︀ီ ဢ︀ၢꩫ︀်က︀ျမ︀်းꩭေꩬ︀ႃယ︀ꩬ︀ီဢ︀ူဢ︀ူ။ 29ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၸ︀ိလ︀ိပ︀်မ︀ႆ︀ႛ “တ︀ႆ︀ၢႛၵ︀ၢင︀်ႛလ︀ႅင︀်မ︀ႃႇမ︀ႆ︀ႛက︀ႃတ︀ႃႉ” ꩫ︀ဝꩫ︀်ႇ။ 30ၸ︀ိလ︀ိပ︀်လ︀ႅꩫ︀်ႈက︀ႃက︀ီး က︀ူဝ်ႇဢ︀မ︀ႂ်းဢ︀ၢꩫ︀်က︀ျမ︀်းꩭေꩬ︀ႃယ︀ꩬ︀ီဢ︀ူꩫ︀ႆ︀ႇမ︀ႆ︀ႛ ꩫ︀ႆ︀ႛꩥ︀ိꩫ︀်းဢ︀ူ။ င︀ႆ︀းက︀ီးၸ︀ိလ︀ိပ︀်ယ︀ႃႇ “တ︀ွꩫ︀်ႈက︀ျမ︀်းလ︀ိက︀်ႉ ဢ︀ꩫ︀်ႈမ︀ႂ်းဢ︀ၢꩫ︀်ꩫ︀ႆ︀ႇမ︀ႂ်းပ︀ွင︀်ꩡ︀ႂ်ႈဢ︀ေႃး” ꩫ︀ꩬ︀ီမ︀ꩫ︀်းမ︀ႆ︀ႛထၢမ︀်ဢ︀ူ။ 31မ︀ꩫ︀်းယ︀ႃႇ “ဢ︀ꩫ︀်ႈၸ︀ူႛပ︀ုတ︀်ၵ︀ႆ︀ႈꩭႂ်ႛမ︀ဝ်ယ︀င︀်းက︀ီး တ︀ီꩭိုဝ်လ︀ိုဝ်ꩬ︀ီပ︀ွင︀်ꩡ︀ႂ်ႈꩫ︀ႆ︀” ꩫ︀ꩬ︀ီဝႃႈယ︀ဝ်ႇက︀ီး ၸ︀ိလ︀ိပ︀်မ︀ႆ︀ႛꩭွင︀်ႇꩬ︀ီတ︀င︀်းမ︀ꩫ︀်းꩭႂ်ႛꩭူမ︀်ႈꩫ︀င︀်းဢ︀ူ။ 32လ︀ွင︀်ႈဢ︀ꩫ︀်ႈမ︀ꩫ︀်းဢ︀ၢꩫ︀်ꩬ︀ီဢ︀ူꩫ︀ႆ︀ႇယ︀ႃႇ

“ꩫ︀င︀်ပ︀ူႇဢ︀ꩫ︀်ႈတ︀ီဢ︀ဝ်ႈက︀ႃပ︀ူဝ်ႇꩫ︀က︀ꩫ︀်ႈ မ︀ꩫ︀်းꩡ︀ဝ်ႛမ︀ႆ︀ႛပ︀ိူꩫ︀်ႈ ဢ︀ဝ်ႈက︀ႃယ︀ဝ်ႇ။

မ︀ိူဝ်ႈꩭိပ︀်ၵ︀ူꩫ︀်ꩫ︀ႆ︀ႇ ပ︀ူႇဢ︀ွꩫ︀်မ︀ဝ်ꩭွင︀်ႇတ︀ႆ︀ၢႈꩫ︀က︀ꩫ︀်ႈ

မ︀ꩫ︀်းꩡ︀ဝ်ႛက︀ေႃႇ တ︀ီတ︀်ꩡ︀ိပ︀်ႉꩰꩬ︀ီဢ︀ူဢ︀ူ။

33ပ︀ိူꩫ︀်ႈယ︀ႃႇ မ︀ꩫ︀်းမ︀ႆ︀ႛꩫ︀ိက︀်ႉꩬ︀ၢက︀်ႉꩬ︀ီ ဢ︀ဝ်ႈꩬ︀ူဝ်ႇလ︀ူင︀်ꩫ︀မ︀်။

ၸ︀ႂ်က︀ေႃႇပ︀ႃႛတ︀ြႃးမ︀ႆ︀ႛဢ︀ူꩬ︀ီ မ︀ꩫ︀်းမ︀ႆ︀ႛꩵ︀ႈꩡ︀ွႆ︀ႈꩭႂ်ႛ။

ဢ︀ꩬ︀ၢက︀်ႉမ︀ꩫ︀်းꩡ︀ဝ်ႛ လ︀ုက︀်ႉမ︀ိူင︀်းက︀ၢင︀်ႈမ︀ႆ︀ႛ ပ︀ိူꩫ︀်ႈယ︀ုတ︀်က︀ႃꩫ︀ႆ︀ႇꩬ︀ီ

လ︀ုက︀်ႉလ︀ၢꩫ︀်မ︀ꩫ︀်းꩫ︀ႆ︀ႇၵ︀ဝ်မ︀ႆ︀ႛ တ︀ီꩭိုဝ်လ︀ိုဝ်ꩡ︀ိုဝ်ႇပ︀ျႃးꩫ︀ႆ︀” ꩫ︀ဝꩫ︀်ႇ။

34က︀ူꩫ︀်းယ︀ႂ်ဢ︀မ︀ႂ်းယ︀ႃႇ ၸ︀ိလ︀ိပ︀်မ︀ႆ︀ႛ “ပ︀ရ︀ေႃၸ︀ႅတ︀်ႉꩫ︀ႆ︀ႇလ︀ွင︀်ႈၸ︀ႂ်ꩫ︀ႆ︀ဝႃႈꩫ︀ႆ︀ႇ။ လ︀ွင︀်ႈမ︀ꩫ︀်းၸ︀ူႛꩡ︀ဝ်ႛက︀ျႃး။ လ︀ွင︀်ႈပ︀ိူꩫ︀်ႈက︀ျႃး။ က︀ဝ်ႈမ︀ႆ︀ႛၵ︀ႆ︀ႈပ︀ျႃးꩭႂ်ႛမ︀လ︀ႃး” ꩫ︀က︀ီး 35ၸ︀ိလ︀ိပ︀်ယ︀ႃႇ လ︀ုက︀်ႉတ︀ွꩫ︀်ႈက︀ျမ︀်းလ︀ိက︀်ႉဢ︀မ︀ႂ်းမ︀ႆ︀ႛက︀ူဝ်ꩬ︀ီ ၵ︀ၢဝ်ႈၵ︀ၢမ︀်းꩫ︀ီႈလ︀ွင︀်ႈꩡ︀ဝ်ႛယ︀ေꩬ︀ု ꩭူဝ်းꩭႂ်ႛဢ︀ူ။ 36ꩬ︀ွင︀်ၵ︀ႃက︀ၢပ︀်က︀ႃဢ︀ိက︀်က︀ီး တ︀ီႈဢ︀ꩫ︀်ႈꩫ︀မ︀်ႇယ︀င︀်းမ︀ႆ︀ႛ ထိုင︀်က︀ႃဢ︀ူ။ ꩫ︀ႆ︀ႇမ︀ႆ︀ႛ က︀ူꩫ︀်းယ︀ႂ်ဢ︀မ︀ႂ်းယ︀ႃႇ “ပ︀လ︀ေႃး မ︀ႆ︀ႛꩫ︀မ︀်ႇယ︀င︀်းဢ︀ူ။ က︀ဝ်ႈꩭၢပ︀်ႉမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇက︀ီး မ︀ဝ်ꩫ︀ႆ︀ႛက︀ျႃး” ꩫ︀ဝꩫ︀်ႇ။ 37ၸ︀ိလ︀ိပ︀်ယ︀ႃႇ “မ︀ႂ်း ꩡ︀ဝ်ႛယ︀ေꩬ︀ုမ︀ႆ︀ႛတ︀င︀်းꩡ︀ႂ်ႈတ︀င︀်းၵ︀ူဝ်းယ︀ုမ︀်ယ︀မ︀်ႈက︀ီး မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭၢပ︀်ႉဢ︀ဝ်ႈꩫ︀ႆ︀ႛဢ︀ူ” ꩫ︀ꩬ︀ီဝႃႈဢ︀ူ။ က︀ူꩫ︀်းယ︀ႂ်ဢ︀မ︀ႂ်းက︀ေႃႇ ꩡ︀ဝ်ႛယ︀ေꩬ︀ုၵ︀ရ︀ီတ︀် ပ︀ီꩫ︀်ႈၸ︀ူႛလ︀ုက︀်ႉꩡ︀ႆ︀ၢးၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀် ꩫ︀ꩫ︀ႆ︀ႇက︀ဝ်ႈၵ︀ႃႛယ︀ုမ︀်ယ︀မ︀်ႈဢ︀ူ” ꩫ︀ဝꩫ︀်ႇ။ 38က︀ူꩫ︀်းယ︀ႂ်ꩫ︀ႆ︀ႇ လ︀ႅင︀်မ︀ႃႇꩭႂ်ႛဢ︀ဝ်ႈꩫ︀ႂ်ꩬ︀ီ ꩬ︀ွင︀်ၵ︀ႃလ︀ူင︀်းက︀ႃꩫ︀မ︀်ႇင︀ႆ︀း ၸ︀ိလ︀ိပ︀်ယ︀ႃႇ မ︀ꩫ︀်းမ︀ႆ︀ႛ မ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇꩭႂ်ႛဢ︀ူ။ 39ꩬ︀ွင︀်ၵ︀ႃလ︀ုက︀်ႉꩫ︀မ︀်ႇမ︀ႆ︀ႛ ၵ︀ိုꩫ︀်ႛမ︀ႃးက︀ီး ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၸ︀ိလ︀ိပ︀်မ︀ႆ︀ႛ ဢ︀ဝ်ႈက︀ႃတ︀ၢင︀်တ︀ီႈၵ︀ွတ︀်ꩬ︀ီ မ︀ꩫ︀်းမ︀ႆ︀ႛက︀ူꩫ︀်းယ︀ႂ်ꩫ︀ႆ︀ႇ ꩵ︀ႈꩭꩫ︀်ယ︀ဝ်ႇ။ က︀ူꩫ︀်းယ︀ႂ်ဢ︀မ︀ႂ်းက︀ေႃႇꩭုမ︀်ꩰꩡ︀ူမ︀်းꩰꩬ︀ီ က︀ၢပ︀်က︀ႃဢ︀ူ။ 40ၸ︀ိလ︀ိပ︀်ယ︀ႃႇ ဝီင︀်းဢ︀ႃꩡ︀ုက︀်မ︀ႆ︀ႛ ထိုင︀်က︀ႃက︀ꩫ︀ႆ︀ႇꩬ︀င︀် ဢ︀မ︀ႂ်းမ︀ႆ︀ႛထိုင︀်ယ︀ဝ်ႇꩫ︀ꩫ︀ႆ︀ႇတ︀ွင︀်းမ︀ႃးဢ︀ူ။ မ︀ꩫ︀်းက︀ၢပ︀်ꩬ︀ီ က︀ႃဝီင︀်းက︀ႄတ︀ရ︀ိဢ︀ူ။ က︀ꩡ︀ႃႉက︀ႃꩫ︀ႆ︀ႇ တ︀ၢင︀်းမ︀ႆ︀ႛ ဝီင︀်းလ︀ိူင︀်ႈယ︀ဝ်ႇဝီင︀်းလ︀ိူင︀်ႈၵ︀ဝ်ႛꩬ︀ီ ၵ︀ၢဝ်ႈၵ︀ၢမ︀်းꩫ︀ီႈꩭူဝ်းက︀ႃဢ︀ူ။

Currently Selected:

ထဝ်ꩡ︀တ︀်ႉၵ︀ဝ် 8: kht

Highlight

Copy