ထဝ်ꩡ︀တ︀်ႉၵ︀ဝ် 7
7
လ︀ွင︀်ႈꩬ︀တ︀ေၸ︀ꩫ︀်ꩭူဝ်းတ︀ြႃး
1ꩫ︀ႆ︀ႇမ︀ႆ︀ႛ ၵ︀ုꩫ︀်ယ︀ီတ︀်ႉပ︀ရ︀ေႃးꩭိက︀်ႉယ︀ႃႇ “ၵ︀ၢမ︀်းဢ︀ꩫ︀်ႈၵ︀ဝ်ဝႃႈꩫ︀ႆ︀ႇ ꩡ︀ႂ်ႈဢ︀ေႃး” ꩫ︀ꩬ︀ီမ︀ꩫ︀်းမ︀ႆ︀ႛထၢမ︀်ဢ︀ူ။ 2ꩬ︀တ︀ေၸ︀ၢꩫ︀်ယ︀ႃႇ “ပ︀ူဝ်မ︀ေပ︀ီႈꩫ︀ွင︀်ႇၵ︀ဝ်ꩴ︀း ထွမ︀်က︀ꩫ︀်ႈတ︀ီၵ︀ႃႛမ︀ႃးတ︀ႃႉ။ မ︀ိူဝ်ႈပ︀ူဝ်ꩭဝ်းဢ︀ႃပ︀ြႃꩭၢမ︀် ဝီင︀်းꩭႃရ︀ꩫ︀်မ︀ႆ︀ႛꩵ︀ႈပ︀ႆ︀က︀ႃဢ︀ူꩬ︀ီ ဢ︀ူတ︀ိူင︀်းမ︀ေꩬ︀ူဝ်ပ︀ူဝ်တ︀ေမ︀ိယ︀ꩫ︀ႆ︀ႇ မ︀ꩫ︀်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈမ︀ူꩫ︀်ႈၸ︀ုင︀်းတ︀ီမ︀်ႈက︀ုမ︀်ꩫ︀ႆ︀ႇ ပ︀ျႃးတ︀ူဝ်ႈမ︀ႃးဢ︀ူ။ 3မ︀ိူဝ်ႈဢ︀မ︀ႂ်း ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ပ︀ူဝ်ꩭဝ်းမ︀ႆ︀ႛ “လ︀ုက︀်ႉမ︀ိူင︀်းမ︀ႂ်း၊ လ︀ုက︀်ႉပ︀ီႈꩫ︀ွင︀်ႇမ︀ႂ်းၵ︀ဝ်မ︀ႆ︀ႛဢ︀ွက︀်ꩬ︀ီ မ︀ိူင︀်းဢ︀ꩫ︀်ႈက︀ဝ်ႈ တ︀ီပ︀ျႃးမ︀ႆ︀ႛက︀ႃတ︀ႃႉ” ꩫ︀ဝꩫ︀်ႇ။ 4င︀ႆ︀းက︀ီး ဢ︀ႃပ︀ြႃꩭၢမ︀်ယ︀ႃႇ လ︀ုက︀်ႉမ︀ိူင︀်းမ︀ꩫ︀်းမ︀ႆ︀ႛဢ︀ွက︀်ꩬ︀ီ ဝီင︀်းꩭႃရ︀ꩫ︀်မ︀ႆ︀ႛက︀ႃဢ︀ူဢ︀ူ။ က︀ꩫ︀်ႛလ︀င︀်ၸ︀ူႛပ︀ူဝ်ႈမ︀ꩫ︀်းတ︀ႆ︀ၢႈက︀ႃꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ꩫ︀်းမ︀ႆ︀ႛ မ︀ိူင︀်းဢ︀ꩫ︀်ႈင︀ႆ︀ႚꩬ︀ူဢ︀ူမ︀ႆ︀ႛꩭႂ်ႛၵ︀ႆ︀ၢႇမ︀ႃးဢ︀ူ။ 5မ︀ိူဝ်ႈဢ︀ႃပ︀ြႃꩭၢမ︀် ဢ︀ူမ︀ိူင︀်းဢ︀မ︀ႂ်းꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ꩫ︀်းမ︀ႆ︀ႛၵ︀ူဝ်လ︀ိင︀်းက︀ꩬ︀င︀်က︀ေႃႇ ꩵ︀ႈꩭႂ်ႛမ︀ႃး။ ꩡ︀ိူမ︀်ႈက︀ႃႈꩫ︀ိꩫ︀်ႈ တ︀ိူက︀်ႉၵ︀ူင︀်ႇမ︀ႃတ︀ႆ︀ၢႈꩫ︀ႆ︀ၢႈက︀ေႃႇ ꩵ︀ႈꩭႂ်ႛမ︀ႃး။ ꩫ︀ႆ︀ႇꩫ︀က︀ေႃႇ မ︀ꩫ︀်းမ︀ႆ︀ႛတ︀မ︀ိူင︀်း၊ လ︀ုက︀်ႉလ︀ၢꩫ︀်မ︀ꩫ︀်းၵ︀ဝ်မ︀ႆ︀ႛတ︀မ︀ိူင︀်း မ︀ိူင︀်းဢ︀မ︀ႂ်းꩭႂ်ႛလ︀ေႚလ︀ေႚ က︀ွတ︀်ꩫ︀ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛက︀တ︀ိꩭႂ်ႛမ︀ႃးဢ︀ူ။ မ︀ိူဝ်ႈဢ︀မ︀ႂ်း ဢ︀ႃပ︀ြႃꩭၢမ︀်မ︀ႆ︀ႛ လ︀ုက︀်ႉလ︀ၢင︀်းꩵ︀ႈပ︀ႆ︀ယ︀င︀်း။ 6ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ꩫ︀်းမ︀ႆ︀ႛ “လ︀ုက︀်ႉလ︀ၢꩫ︀်မ︀ႂ်းၵ︀ဝ်ယ︀ႃႇ မ︀ိူင︀်းပ︀ိူꩫ︀်ႈမ︀ႆ︀ႛ ပ︀ီꩫ︀်ႈၸ︀ူႛၵ︀ႃႛꩬ︀ီ ꩬ︀ီပ︀ၢက︀်ပ︀ီႈတ︀ၢင︀်ႈꩰ ၵ︀ဝ်မ︀ႆ︀ႛပ︀ိူꩫ︀်ႈတ︀ီꩫ︀ိက︀်ႉꩬ︀ၢက︀်ႉꩫ︀မ︀်။ 7ꩫ︀ႆ︀ႇꩫ︀က︀ေႃႇ က︀ူꩫ︀်းဢ︀ꩫ︀်ႈၵ︀ဝ်မ︀ႆ︀ႛꩫ︀ိက︀်ႉꩬ︀ၢက︀်ႉꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈတ︀ီꩭႂ်ႛတ︀ၢမ︀်ꩫ︀မ︀်။ ယ︀ဝ်ႇက︀ီး လ︀ုက︀်ႉလ︀ၢꩫ︀်မ︀ႂ်းၵ︀ဝ်ယ︀ႃႇ လ︀ုက︀်ႉမ︀ိူင︀်းဢ︀မ︀ႂ်းမ︀ႆ︀ႛလ︀ွတ︀်ႉမ︀ႃးꩬ︀ီ တ︀ီႈꩫ︀ႆ︀ႇမ︀ႆ︀ႛက︀ဝ်ႈမ︀ႆ︀ႛတ︀ီပ︀ႆ︀ၢႛဝႆ︀ႈꩫ︀မ︀်” ꩫ︀ဝꩫ︀်ႇ။ 8ယ︀ဝ်ႇက︀ီး ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇꩭီတ︀်ၵ︀ၢမ︀်းၵ︀တ︀်ႉꩬ︀ီ ဢ︀ႃပ︀ြႃꩭၢမ︀်မ︀ႆ︀ႛ မ︀ၢင︀်က︀လ︀ႃ ပ︀တ︀်ပ︀ႆ︀ၢႈꩫ︀င︀်ꩭႂ်ႛဢ︀ူ။ င︀ႆ︀းꩬ︀ီ မ︀ꩫ︀်းမ︀ိူဝ်ႈလ︀ုက︀်ႉꩡ︀ႆ︀ၢးဢ︀ေꩬ︀က︀်ꩫ︀ႆ︀ႛꩬ︀ီ ပ︀ႅတ︀်ဝꩫ︀်းထူꩫ︀်ႛꩫ︀ႆ︀ႇ လ︀ုက︀်ႉꩡ︀ႆ︀ၢးမ︀ꩫ︀်း မ︀ႆ︀ႛ မ︀ၢင︀်က︀လ︀ႃပ︀တ︀်ပ︀ႆ︀ၢႈꩫ︀င︀်ꩭီတ︀်ꩭႂ်ႛဢ︀ူ။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ဢ︀ေꩬ︀က︀်က︀ေႃႇ လ︀ုက︀်ႉꩡ︀ႆ︀ၢးမ︀ꩫ︀်း ယ︀ႃက︀ုမ︀ႆ︀ႛ၊ ယ︀ႃက︀ုက︀ေႃႇ ၸ︀ူႛလ︀ုက︀်ႉꩡ︀ႆ︀ၢးꩬ︀ိပ︀်ꩬ︀ွင︀်က︀ူဝ်ႇမ︀ႆ︀ႛ မ︀ၢင︀်က︀လ︀ႃပ︀တ︀်ပ︀ႆ︀ၢႈꩫ︀င︀်ꩫ︀ႆ︀ႇ ꩭႂ်ႛမ︀ႃးဢ︀ူ။ ၸ︀ူႛလ︀ုက︀်ႉယ︀ႃက︀ုၵ︀ဝ်ယ︀ႃႇ ၸ︀ူႛပ︀ူဝ်ႈꩡ︀ိူဝ်ႇၵ︀ိူဝ်းꩭဝ်း ꩬ︀ိပ︀်ꩬ︀ွင︀်က︀ူဝ်ႇꩫ︀မ︀်။ 9ပ︀ူဝ်ꩡ︀ိူဝ်ႇၵ︀ိူဝ်းꩭဝ်းꩫ︀ႆ︀ႇၵ︀ဝ်ယ︀ႃႇ ၸ︀ူႛꩫ︀ွင︀်ႇꩡ︀ႆ︀ၢးၵ︀ဝ် ယ︀ေႃတ︀ၢတ︀်မ︀ႆ︀ႛ တ︀ႃႈꩫ︀ႅင︀်ႈꩬ︀ီ မ︀ိူင︀်းဢ︀ီက︀ျီပ︀်မ︀ႆ︀ႛၵ︀ႆ︀ၢꩭႂ်ႛꩭီတ︀်ၵ︀ႃႛဢ︀ူ။ ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ တ︀င︀်းမ︀ꩫ︀်းၵ︀ိင︀်းလ︀ွေႛꩫ︀ႆ︀ႇꩬ︀ီ 10မ︀ꩫ︀်းမ︀ႆ︀ႛ လ︀ုက︀်ႉဢ︀ꩫ︀်ႈယ︀ပ︀်တ︀င︀်းမ︀ိူင︀်းမ︀ႆ︀ႛ ၵ︀ေꩬ︀ေꩭႂ်ႛမ︀ႃးဢ︀ူ။ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ယ︀ေႃတ︀ၢတ︀်မ︀ႆ︀ႛ ပ︀ၢင︀်ႈꩫ︀ႃႛꩡ︀ဝ်ႛꩭူဝ်ၵ︀မ︀်းၸ︀ႃရ︀ေႃမ︀ိူင︀်းဢ︀ီက︀ျီပ︀်မ︀ႆ︀ႛ ဢ︀ဝ်ႈꩫ︀ႆ︀ႛꩫ︀ႃႛꩭႂ်ႛဢ︀ူ။ မ︀ꩫ︀်းမ︀ႆ︀ႛ ꩥ︀ၢꩫ︀်ပ︀ိင︀်ꩥ︀ႃက︀ေႃႇꩭႂ်ႛဢ︀ူ။ ꩡ︀ဝ်ႛꩭူဝ်ၵ︀မ︀်းၸ︀ႃရ︀ေႃယ︀ႃႇမ︀ꩫ︀်းမ︀ႆ︀ႛ ဢ︀ယ︀ႃၵ︀ုꩫ︀်ဢ︀ꩫ︀်ႈဢ︀ုပ︀်ႉမ︀ိူင︀်းတ︀မ︀ိူင︀်း၊ ဢ︀ယ︀ႃဢ︀ꩫ︀်ႈဢ︀ုပ︀်ႉꩫ︀ႂ်းꩭူဝ်ၵ︀မ︀်းတ︀မ︀ိူင︀်း ဢ︀ၢပ︀်ႉꩭႂ်ႛဢ︀ူ။ 11မ︀ိူဝ်ႈဢ︀မ︀ႂ်း မ︀ိူင︀်းဢ︀ီက︀ျီပ︀်ꩫ︀ၵ︀ႃမ︀ိူင︀်းၵ︀ႃꩫ︀ၢꩫ︀်မ︀ႆ︀ႛ ၸ︀ေးဢ︀ိုပ︀်က︀ိꩫ︀်ႈထိုင︀်မ︀ႃးꩬ︀ီ က︀ူꩫ︀်းꩫ︀ႆ︀ႇၵ︀ဝ်ဢ︀ိုပ︀်က︀ိꩫ︀်ႈက︀ꩫ︀်ႈဢ︀ူ။ ပ︀ူလ︀ီꩫ︀်ꩭဝ်းꩫ︀ႆ︀ႇၵ︀ဝ်မ︀ႆ︀ႛက︀ေႃႇ ဢ︀ꩫ︀်ႈက︀ိꩫ︀်ႈꩵ︀ႈယ︀င︀်းယ︀ဝ်ႇ။ 12ꩫ︀ႆ︀ႇꩫ︀က︀ေႃႇမ︀ိူင︀်းဢ︀ီက︀ျီပ︀်မ︀ႆ︀ႛ ၵ︀ဝ်ႛယ︀င︀်းဢ︀ူꩫ︀ꩫ︀ႆ︀ႇ ယ︀ႃက︀ုꩫ︀ႆ︀ႛꩥ︀ိꩫ︀်းက︀ီး ၸ︀ူႛလ︀ုက︀်ႉꩡ︀ႆ︀ၢးမ︀ꩫ︀်းၵ︀ဝ်ၸ︀ူႛပ︀ီꩫ︀်ႈပ︀ူလ︀ီꩫ︀်ꩭဝ်းꩫ︀ႆ︀ႇၵ︀ဝ်မ︀ႆ︀ႛ ꩭႃပ︀ထမ︀ꩡ︀ႂ်ႇꩭႂ်ႛက︀ႃဢ︀ူ။ 13ꩭႃတ︀ုတ︀ိယ︀ၵ︀ဝ်ထိုင︀်မ︀ႃးက︀ီး ယ︀ေႃတ︀ၢတ︀်ယ︀ႃႇ မ︀ꩫ︀်းပ︀ီꩫ︀်ႈၸ︀ႂ်ꩫ︀ꩫ︀ႆ︀ႇ ၸ︀ူႛက︀ေꩡ︀ဝ်ႛမ︀ꩫ︀်းၵ︀ဝ် မ︀ႆ︀ႛၵ︀ႆ︀ႈꩭႂ်ႛဢ︀ူ။ င︀ႆ︀းꩬ︀ီ ꩡ︀ဝ်ႛꩭူဝ်ၵ︀မ︀်းၸ︀ႃရ︀ေႃꩫ︀ႆ︀ႇ လ︀ွင︀်ႈꩡ︀ုမ︀်ႛꩭိူꩫ︀်းယ︀ေႃတ︀ၢတ︀်တ︀ွင︀်းက︀ႃဢ︀ူ။ 14ယ︀ေႃတ︀ၢတ︀်ယ︀ႃႇ ၸ︀ူႛပ︀ူဝ်ႈမ︀ꩫ︀်း ယ︀ႃက︀ုင︀ႆ︀း ပ︀ီႈꩫ︀ွင︀်ႇꩡ︀ိူဝ်ႇၵ︀ိူဝ်းၵ︀ဝ်ꩡ︀ီတ︀်ꩬ︀ိပ︀်ꩭႃႛက︀ူဝ်ႇမ︀ႆ︀ႛ ꩭွင︀်ႇꩭႂ်ႛမ︀ႃးမ︀ိူင︀်းဢ︀ီက︀ျီပ︀်ဢ︀ူ။ 15င︀ႆ︀းꩬ︀ီ ယ︀ႃက︀ုက︀ေႃႇ မ︀ိူင︀်းဢ︀ီက︀ျီပ︀်မ︀ႆ︀ႛ ꩡ︀ွမ︀်းမ︀ႃးဢ︀ူ။ မ︀ိူင︀်းဢ︀မ︀ႂ်းမ︀ႆ︀ႛ မ︀ꩫ︀်းင︀ႆ︀းၸ︀ူႛလ︀ုက︀်ႉꩡ︀ႆ︀ၢး မ︀ꩫ︀်းၵ︀ဝ်တ︀င︀်းမ︀ိူင︀်း တ︀ႆ︀ၢႈက︀ႃမ︀ူတ︀်ဢ︀ူ။ 16ꩭၢင︀်ႈတ︀ႆ︀ၢႈၵ︀ဝ် ဝီင︀်းꩬ︀ေၵ︀ီꩫ︀်မ︀ႆ︀ႛဢ︀ဝ်ႈက︀ႃꩬ︀ီ ပ︀ႃꩡ︀ႃႇဢ︀ꩫ︀်ႈဢ︀ႃပ︀ြႃꩭၢမ︀်ꩬ︀ိုဝ်ႇဝႆ︀ႇမ︀ႆ︀ႛ ꩬ︀ၢင︀်းၵ︀ိဝ်ဝႆ︀ႇဢ︀ူ။ ပ︀ႃꩡ︀ႃႇဢ︀မ︀ႂ်းယ︀ႃႇ ဢ︀ꩫ︀်ႈလ︀ုက︀်ႉၸ︀ူႛလ︀ုက︀်ႉꩭႃမ︀ေႃၵ︀ဝ်မ︀ႆ︀ႛ ꩬ︀ိုဝ်ႇဝႆ︀ႇꩫ︀ႆ︀ႇꩫ︀မ︀်။ 17ယ︀ၢမ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ဢ︀ႃပ︀ြႃꩭၢမ︀်မ︀ႆ︀ႛ က︀တ︀ိꩭႂ်ႛဝႆ︀ႇꩫ︀ႆ︀ႇ က︀ႂ်ႛမ︀ႃးက︀ီး မ︀ိူင︀်းဢ︀ီက︀ျီပ︀်မ︀ႆ︀ႛ ဢ︀ီတ︀်ꩬ︀ြေးၵ︀ဝ် ဢ︀ၢꩫ︀်တ︀ၢꩫ︀်ꩫ︀မ︀်မ︀ႃးဢ︀ူ။ 18မ︀ိူဝ်ႈဢ︀မ︀ႂ်း မ︀ိူင︀်းဢ︀ီက︀ျီပ︀်မ︀ႆ︀ႛ ꩡ︀ဝ်ႛꩭူဝ်ၵ︀မ︀်းဢ︀ꩫ︀်ႈယ︀ေႃတ︀ၢတ︀်မ︀ႆ︀ႛ မ︀ဝ်တ︀ွင︀်းꩫ︀ႆ︀ႇက︀ူဝ်ႇလ︀ိူင︀်ႈ ပ︀ူဝ်မ︀ႃးဢ︀ူ။ 19ꩡ︀ဝ်ႛꩭူဝ်ၵ︀မ︀်းဢ︀မ︀ႂ်းယ︀ႃႇ ပ︀ူလ︀ီꩫ︀်ꩭဝ်းꩫ︀ႆ︀ႇၵ︀ဝ်မ︀ႆ︀ႛꩭူမ︀်းက︀ိꩫ︀်ႈꩬ︀ီ ꩫ︀ိက︀်ႉꩬ︀ၢက︀်ႉဢ︀ူ။ ၸ︀ူႛလ︀ုက︀်ႉၵ︀ဝ်ꩫ︀ႆ︀ႇၵ︀ဝ်ꩭႂ်ႛပ︀ူဝ်းတ︀ႆ︀ၢႈꩫ︀ႆ︀ႇ က︀ꩫ︀်ႛꩫ︀ွက︀်ႉꩭိူꩫ︀်းꩫ︀ႆ︀ႇၵ︀ဝ်မ︀ႆ︀ႛꩭႂ်ႛၵ︀ွတ︀်ဝႆ︀ႇဢ︀ူ။ 20ꩡ︀ူဝ်ႈဢ︀မ︀ႂ်းယ︀ႃႇ ꩡ︀ူဝ်ႈမ︀ိူဝ်ႈမ︀ေႃꩬ︀ေယ︀င︀်းမ︀ႃးꩫ︀ႆ︀ႇꩫ︀မ︀်။ မ︀ေႃꩬ︀ေယ︀ႃႇ ဢ︀ေႚဢ︀ꩫ︀်ႈꩭၢင︀်ႈꩫ︀ီႈလ︀ူင︀်ꩫ︀မ︀်။ မ︀ꩫ︀်းမ︀ႆ︀ႛꩬ︀ၢမ︀်ꩫ︀ိူꩫ︀်ႈတ︀ၢင︀်ႈꩰ ꩭိူꩫ︀်းၸ︀ူႛပ︀ူဝ်ႈမ︀ႆ︀ႛ ဢ︀ူဝ်ဝႆ︀ႇဢ︀ူ။ 21မ︀ꩫ︀်းမ︀ႆ︀ႛ က︀ꩫ︀်ႛꩫ︀ွက︀်ႉမ︀ႆ︀ႛၵ︀ွတ︀်ဝႆ︀ႇက︀ီး ၸ︀ူႛလ︀ုက︀်ႉꩬ︀ၢဝ်ꩡ︀ဝ်ႛꩭူဝ်ၵ︀မ︀်းၸ︀ႃရ︀ေႃယ︀ႃႇ မ︀ꩫ︀်းမ︀ႆ︀ႛက︀ီပ︀်ꩬ︀ီလ︀ီင︀်ႇဝႆ︀ႇဢ︀ူ။ 22မ︀ေႃꩬ︀ေယ︀ႃႇ တ︀ၢင︀်းꩡ︀ၢင︀်ႈက︀ူꩫ︀်းဢ︀ီက︀ျီပ︀်ၵ︀ဝ် တ︀င︀်းမ︀ိူင︀်းꩬ︀ွꩫ︀်ဢ︀ဝ်ႈဝႆ︀ႇꩫ︀ႆ︀ႇꩬ︀ီ ဢ︀ꩫ︀်ႈတ︀ၢꩫ︀်ႛဢ︀ꩫ︀်ႈꩭီတ︀်ꩫ︀ႆ︀ႇၵ︀ဝ်မ︀ႆ︀ႛ ꩫ︀မ︀်ႇꩡ︀ႂ်ႈ၊ ꩫ︀မ︀်ႇက︀ူꩫ︀်းတ︀ီမ︀်ႈတ︀ုပ︀်ꩰꩫ︀မ︀်။ 23မ︀ꩫ︀်းဢ︀ꩬ︀ၢက︀်ႉꩬ︀ီꩬ︀ိပ︀်ထူꩫ︀်ႛက︀ီး ဢ︀ီတ︀်ꩬ︀ြေး ဢ︀ꩫ︀်ႈၸ︀ူႛပ︀ီꩫ︀်ႈပ︀ီႈꩫ︀ွင︀်ႇမ︀ꩫ︀်းၵ︀ဝ်မ︀ႆ︀ႛ ပ︀ိူꩫ︀်ႈꩭိုဝ်လ︀ိုဝ်ꩫ︀ိက︀်ႉꩬ︀ၢက︀်ႉꩫ︀ꩫ︀ႆ︀ႇ ၵ︀ႂ်ႈတ︀ွင︀်းꩬ︀ီ က︀ႃလ︀ႅမ︀်းဢ︀ူ။ 24မ︀ိူဝ်ႈမ︀ꩫ︀်းက︀ႃလ︀ႅမ︀်းလ︀ေꩫ︀ႆ︀ႇ ဢ︀ီတ︀်ꩬ︀ြေးက︀ူဝ်ႇလ︀ိူင︀်ႈမ︀ႆ︀ႛ က︀ူꩫ︀်းဢ︀ီက︀ျီပ︀်က︀ူဝ်ႇလ︀ိူင︀်ႈ တ︀ုက︀်ႉꩬ︀ီဢ︀ူမ︀ႆ︀ႛꩭꩫ︀်ဢ︀ူ။ ꩫ︀ႆ︀ႇမ︀ႆ︀ႛမ︀ꩫ︀်း ပ︀ႃႛဢ︀ီတ︀်ꩬ︀ြေးမ︀ႆ︀ႛꩡ︀ွႆ︀ႈပ︀ွင︀်ႇꩬ︀ီ က︀ူꩫ︀်းဢ︀ီက︀ျီပ︀်မ︀ႆ︀ႛတ︀ွပ︀်ꩬ︀ူꩫ︀်ႇ ဢ︀ဝ်ႈတ︀ႆ︀ၢႈဢ︀ူ။ 25မ︀ေႃꩬ︀ေယ︀ႃႇ ꩭႂ်ႛပ︀ူဝ်းဢ︀ီတ︀်ꩬ︀ြေးၵ︀ဝ် လ︀ွတ︀်ႉလ︀ႅဝ်းꩫ︀ႆ︀ႇ မ︀ꩫ︀်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛပ︀ွႆ︀ꩡ︀ႂ်ႇမ︀ႃးꩫ︀မ︀်ꩫ︀ꩫ︀ႆ︀ႇ ၵ︀ဝ်ပ︀ွင︀်ꩡ︀ႂ်ႈꩵ︀ထၢင︀်ႇꩫ︀ꩬ︀ီၵ︀ႂ်ႈꩡ︀ႂ်ႈꩫ︀က︀ေႃႇ ၵ︀ဝ်ယ︀ႃႇꩵ︀ႈပ︀ွင︀်ꩡ︀ႂ်ႈ။ 26ꩫ︀င︀်ဝꩫ︀်းလ︀ိူင︀်ႈ ဢ︀ီတ︀်ꩬ︀ြေးꩬ︀ွင︀်က︀ူဝ်ႇ ꩫ︀ꩫ︀်းက︀ꩫ︀်ႈꩫ︀ႆ︀ႇမ︀ႆ︀ႛꩭꩫ︀်က︀ီး မ︀ꩫ︀်းယ︀ႃႇ ꩭႂ်ႛꩬ︀ွင︀်ၵ︀ႃꩫ︀ီႈက︀ꩫ︀်ႈပ︀ွက︀်ႉက︀ွတ︀်ꩫ︀ꩬ︀ီ “ꩭီတ︀်က︀ꩬ︀င︀်ꩫ︀ႆ︀ ပ︀ီႈꩫ︀ွင︀်ႇၸ︀ူႛꩡ︀ဝ်ႛꩫ︀ႆ︀ၢႈꩫ︀ꩫ︀်းက︀ꩫ︀်ႈꩫ︀ႆ︀ႇ” ꩫ︀ꩬ︀ီ က︀ႃၵ︀ေꩭႂ်ႛဢ︀ူ။ 27ꩫ︀ႆ︀ႇꩫ︀က︀ေႃႇ က︀ူဝ်ႇဢ︀ꩫ︀်ႈပ︀ေႇက︀ိꩫ︀်ႈꩫ︀ႆ︀ႇယ︀ႃႇ မ︀ေႃꩬ︀ေမ︀ႆ︀ႛꩬ︀ႆ︀ၵ︀ွတ︀်ꩬ︀ီ “ၸ︀ႂ်ꩫ︀ႆ︀မ︀ႂ်းမ︀ႆ︀ႛꩭႂ်ႛမ︀ႃးပ︀ႅတ︀်ႉတ︀ြႃးꩫ︀ႆ︀ႇ။ 28ꩫ︀င︀်မ︀ိူဝ်ႈင︀ႃး က︀ူꩫ︀်းဢ︀ီက︀ျီပ︀်က︀ူဝ်ႇလ︀ိူင︀်ႈမ︀ႆ︀ႛဢ︀ဝ်ႈတ︀ႆ︀ၢႈꩫ︀က︀ꩫ︀်ႈ က︀ဝ်ႈမ︀ႆ︀ႛက︀ေႃႇ ၵ︀ႂ်ႈမ︀ႃးဢ︀ဝ်ႈတ︀ႆ︀ၢႈက︀ျႃး” ꩫ︀ဝꩫ︀်ႇ။ 29မ︀ေႃꩬ︀ေယ︀ႃႇ ၵ︀ၢမ︀်းဢ︀မ︀ႂ်းꩫ︀ႆ︀ႛꩥ︀ိꩫ︀်းက︀ီး လ︀ုက︀်ႉမ︀ိူင︀်းဢ︀ီက︀ျီပ︀်မ︀ႆ︀ႛ ပ︀ႆ︀ၢႈဢ︀ွက︀်ꩬ︀ီ မ︀ိူင︀်းမ︀ီတ︀ႅꩫ︀်မ︀ႆ︀ႛ က︀ႃꩬ︀ွꩫ︀်ႈဢ︀ူဢ︀ူ။ မ︀ိူင︀်းဢ︀မ︀ႂ်းမ︀ႆ︀ႛ မ︀ꩫ︀်းၸ︀ူႛလ︀ုက︀်ႉꩬ︀ွင︀်က︀ူဝ်ႇꩫ︀ႆ︀ႛမ︀ႃးဢ︀ူ။ 30ꩬ︀ီꩬ︀ိပ︀်ပ︀ီႈꩭိုင︀်က︀ီး ပ︀ႃထိူꩫ︀်ꩭႅင︀်ႛဢ︀ꩫ︀်ႈတ︀ႆ︀ၢႛꩫ︀ွႆ︀ႈတ︀ိꩫ︀ႃမ︀ႆ︀ႛ လ︀ုက︀်ႉယ︀ုမ︀်းဢ︀ꩫ︀်ႈ မ︀ုက︀်ႉၸ︀ႆ︀းꩭိုင︀်းဢ︀ꩫ︀်ႈလ︀ိူင︀်ႈမ︀ႆ︀ႛ ၵ︀ုꩫ︀်ꩬ︀ၢင︀်ပ︀ႃးလ︀ိူင︀်ႈ မ︀ေႃꩬ︀ေမ︀ႆ︀ႛပ︀ျႃးတ︀ူဝ်ႈဢ︀ူ။ 31ꩫ︀ႆ︀ႇမ︀ႆ︀ႛ မ︀ေႃꩬ︀ေꩭꩫ︀်က︀ီး ဢ︀ၢမ︀်းလ︀ူင︀်ဢ︀ၢမ︀်းလ︀ၢင︀်ꩬ︀ီ လ︀ႅမ︀်းက︀ွတ︀်ꩫ︀ꩬ︀ီက︀ႂ်ႛက︀ႃက︀ီး 32“က︀ဝ်ႈယ︀ႃႇ ၸ︀ြႃးပ︀ူလ︀ီꩫ︀်မ︀ႂ်းၵ︀ဝ်ꩫ︀မ︀်။ ၸ︀ြႃးဢ︀ႃပ︀ြႃꩭၢမ︀်၊ ဢ︀ေꩬ︀က︀်၊ ယ︀ႃက︀ုၵ︀ဝ်ꩫ︀မ︀်” ꩫ︀ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛတ︀ၢꩫ︀်ႛမ︀ႃးꩫ︀ႆ︀ႇမ︀ႆ︀ႛ မ︀ꩫ︀်းꩫ︀ႆ︀ႛꩥ︀ိꩫ︀်းဢ︀ူ။ င︀ႆ︀းꩬ︀ီမ︀ꩫ︀်းယ︀ႃႇ က︀ူဝ်ႈꩰꩬ︀ွင︀်ꩰꩬ︀ီ ꩫ︀ူႈꩫ︀ႆ︀ၢႈက︀ေႃႇꩵ︀ႈပ︀ီꩫ︀်ႈ။ 33ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ “ꩫ︀ိꩫ︀်ႈဢ︀ꩫ︀်ႈမ︀ႂ်းယ︀ီပ︀်ꩫ︀ႆ︀ႇ ꩫ︀ိꩫ︀်ႈဢ︀ꩫ︀်ႈမ︀ႅတ︀်ႉꩫ︀မ︀်။ ၵ︀ႅပ︀်တ︀ိꩫ︀်ႈမ︀ႂ်းလ︀ွꩫ︀်ႛတ︀ႃႉ၊ 34ၸ︀ုင︀်က︀ူꩫ︀်းက︀ဝ်ႈဢ︀ꩫ︀်ႈဢ︀ူမ︀ိူင︀်းဢ︀ီက︀ျီပ︀်ꩫ︀ႆ︀ႇၵ︀ဝ်မ︀ႆ︀ႛ ပ︀ိူꩫ︀်ႈꩫ︀ိက︀်ႉꩬ︀ၢက︀်ႉꩫ︀ႆ︀ႇ က︀ဝ်ႈꩭꩫ︀်ယ︀ဝ်ႇ။ ꩬ︀ီင︀်ဢ︀ꩫ︀်ႈၵ︀ဝ်ꩭႆ︀ႛက︀ꩫ︀်ႈၵ︀င︀်းက︀ꩫ︀်ႈမ︀ႆ︀ႛ က︀ဝ်ႈꩫ︀ႆ︀ႛꩥ︀ိꩫ︀်းယ︀ဝ်ႇ။ င︀ႆ︀းꩫ︀ႆ︀ႇꩬ︀ီ ၵ︀ဝ်မ︀ႆ︀ႛၵ︀ေꩬ︀ေက︀ွတ︀်ꩫ︀ꩬ︀ီ က︀ဝ်ႈလ︀ူင︀်းမ︀ႃးꩫ︀မ︀်။ င︀ႆ︀းꩫ︀ႆ︀ႇ မ︀ႂ်းင︀ႆ︀ႚက︀ႃတ︀ႃႉ။ မ︀ႂ်းမ︀ႆ︀ႛက︀ဝ်ႈ မ︀ိူင︀်းဢ︀ီက︀ျီပ︀်မ︀ႆ︀ႛ ပ︀ွႆ︀ꩡ︀ႂ်ႇက︀ွတ︀်” ꩫ︀ꩬ︀ီ မ︀ေႃꩬ︀ေမ︀ႆ︀ႛဝႃႈဢ︀ူ။ 35မ︀ေႃꩬ︀ေယ︀ႃႇ က︀ူဝ်ႇဢ︀ꩫ︀်ႈဢ︀ီတ︀်ꩬ︀ြေးၵ︀ဝ် ၵ︀ွတ︀်ဝႆ︀ႇꩫ︀မ︀်။ ဢ︀ီတ︀်ꩬ︀ြေးၵ︀ဝ်ယ︀ႃႇ “ၸ︀ႂ်ꩫ︀ႆ︀မ︀ႂ်းမ︀ႆ︀ႛꩭႂ်ႛမ︀ႃးပ︀ႅတ︀်ႉတ︀ြႃးတ︀ူႈ၊ ꩭႂ်ႛမ︀ႃးင︀မ︀်းတ︀ူႈꩫ︀ႆ︀ႇ” ꩫ︀ꩬ︀ီတ︀မ︀ိူင︀်းက︀ေႃႇ ဝႃႈꩬ︀ီ မ︀ꩫ︀်းမ︀ႆ︀ႛပ︀ႆ︀ဝႆ︀ႇမ︀ႃးဢ︀ူ။ မ︀ꩫ︀်းယ︀ႃႇ က︀ူဝ်ႇဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛပ︀ွႆ︀ꩡ︀ႂ်ႇ ဢ︀ꩫ︀်ႈꩭႂ်ႛꩭီတ︀်ꩭူဝ်က︀ေဢ︀ီတ︀်ꩬ︀ြေးၵ︀ဝ်ꩬ︀ီ ၵ︀ဝ်မ︀ႆ︀ႛ ꩭႂ်ႛၵ︀ေꩬ︀ေဢ︀ဝ်ႈလ︀ွတ︀်ႉဢ︀ွက︀်မ︀ႃးꩫ︀မ︀်။ ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇ ၵ︀ုꩫ︀်ꩬ︀ၢင︀် ဢ︀ꩫ︀်ႈလ︀ုက︀်ႉက︀ꩫ︀်ႛꩫ︀ႂ်းယ︀ုမ︀်းဢ︀ꩫ︀်ႈမ︀ႆ︀ႛၸ︀ႆ︀းမ︀ႆ︀ႛ ပ︀ျႃးတ︀ူဝ်ႈꩫ︀ႆ︀ႇမ︀ႆ︀ႛꩡ︀ႂ်ႇꩬ︀ီ မ︀ေႃꩬ︀ေမ︀ႆ︀ႛ ꩭႂ်ႛꩡ︀ွႆ︀ႈမ︀ႃးဢ︀ူ။ 36မ︀ꩫ︀်းယ︀ႃႇ မ︀ိူင︀်းဢ︀ီက︀ျီပ︀်မ︀ႆ︀ႛ၊ ပ︀ၢင︀်လ︀ႆ︀ၢꩫ︀ႅင︀်ႈမ︀ႆ︀ႛင︀ႆ︀း ပ︀ႃထိူꩫ︀်ꩭႅင︀်ႛမ︀ႆ︀ႛꩬ︀ီꩬ︀ိပ︀်ပ︀ီႈတ︀ၢင︀်ႈꩰ ဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်းꩫ︀ႆ︀ႇၵ︀ဝ်ပ︀ျႃးꩬ︀ီ ဢ︀ီတ︀်ꩬ︀ြေးꩫ︀ႆ︀ႇၵ︀ဝ်မ︀ႆ︀ႛ လ︀ုက︀်ႉမ︀ိူင︀်းဢ︀ီက︀ျီပ︀်မ︀ႆ︀ႛ ၵ︀ေဢ︀ွက︀်မ︀ႃးဢ︀ူ။ 37ꩡ︀ႃႇလ︀ိူင︀်ႈ “လ︀ုက︀်ႉက︀ꩫ︀်ႛꩫ︀ႂ်းပ︀ီႈꩫ︀ွင︀်ႇꩬ︀ူမ︀ႆ︀ႛ ꩫ︀င︀်က︀ဝ်ႈꩫ︀က︀ꩫ︀်ႈ ပ︀ရ︀ေႃးၸ︀ႅတ︀်ႉပ︀ႃးလ︀ိူင︀်ႈ ၸ︀ြႃးပ︀ီꩫ︀်ႈꩡ︀ဝ်ႛ တ︀ီဢ︀ဝ်ႈပ︀ူဝ်မ︀ႃးꩭႂ်ႛꩫ︀မ︀်” ꩫ︀ꩬ︀ီ ဢ︀ီတ︀်ꩬ︀ြေးၵ︀ဝ်မ︀ႆ︀ႛဝႃႈဝႆ︀ႇꩫ︀ႆ︀ႇက︀ေႃႇ မ︀ေႃꩬ︀ေꩫ︀မ︀်။ 38တ︀င︀်းဢ︀ီတ︀်ꩬ︀ြေးၵ︀ဝ်၊ တ︀င︀်းပ︀ူလ︀ီꩫ︀်ꩭဝ်းꩫ︀ႆ︀ႇၵ︀ဝ် ထိူꩫ︀်ꩭႅင︀်ႛမ︀ႆ︀ႛꩭူမ︀်ႈဢ︀ူမ︀ႃးꩫ︀ႆ︀ႇက︀ေႃႇမ︀ꩫ︀်းꩫ︀မ︀်။ က︀ꩫ︀်ႛꩫ︀ိူဝ်ꩫ︀ွႆ︀ႈတ︀ိꩫ︀ႃမ︀ႆ︀ႛတ︀င︀်းၵ︀ုꩫ︀်ꩬ︀ၢင︀် ဢ︀ꩫ︀်ႈမ︀ꩫ︀်းမ︀ႆ︀ႛ ꩭႂ်ႛၿျႃၻိက︀်ႉမ︀ႃးဢ︀မ︀ႂ်း ꩭူမ︀်ႈဢ︀ူမ︀ႃးꩫ︀ႆ︀ႇက︀ေႃႇမ︀ꩫ︀်းꩫ︀မ︀်။ ၵ︀ၢဝ်ႈၵ︀ၢမ︀်းဢ︀ꩬ︀ၢက︀်ႉ ꩡ︀ႃႇꩭဝ်းတ︀မ︀ိူင︀်းက︀ေႃႇ မ︀ꩫ︀်းမ︀ႆ︀ႛꩫ︀မ︀်ၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛမ︀ႃးꩫ︀ႆ︀ႇ။ 39ꩫ︀ႆ︀ႇꩫ︀က︀ေႃႇ ပ︀ူလ︀ီꩫ︀်ꩭဝ်းꩫ︀ႆ︀ႇၵ︀ဝ်ယ︀ႃႇ ၵ︀ၢမ︀်းမ︀ꩫ︀်းꩵ︀ႈထွမ︀်မ︀ႃး။ မ︀ꩫ︀်းမ︀ႆ︀ႛပ︀ႆ︀ၵ︀ွတ︀်ꩬ︀ီ ၵ︀ႂ်ႈမ︀ိူဝ်းမ︀ိူင︀်းဢ︀ီက︀ျီပ︀်ပ︀ွက︀်ႉက︀ꩫ︀်ႈဢ︀ူ။ 40င︀ႆ︀းꩬ︀ီၵ︀ဝ်ယ︀ႃႇ “ၸ︀ြႃးꩡ︀ႃႇꩭဝ်းမ︀ႆ︀ႛ ဢ︀ွꩫ︀်ႈတ︀ၢင︀်းꩫ︀ႆ︀ႇၵ︀ဝ် ꩭီတ︀်ꩭႂ်ႛမ︀ႃးတ︀ႃႉ။ မ︀ေႃꩬ︀ေဢ︀ꩫ︀်ႈꩭဝ်းမ︀ႆ︀ႛ လ︀ုက︀်ႉမ︀ိူင︀်းဢ︀ီက︀ျီပ︀်မ︀ႆ︀ႛ ꩭွင︀်ႇဢ︀ွက︀်မ︀ႃးꩫ︀ႆ︀ႇယ︀ႃႇ ပ︀ီꩫ︀်ႈꩭိုဝ်က︀ႃက︀ေႃႇꩵ︀ႈတ︀ွင︀်းယ︀ဝ်ႇ” ꩫ︀ꩬ︀ီ ဢ︀ႃရ︀ုꩫ︀်မ︀ႆ︀ႛဝႃႈမ︀ႃးဢ︀ူ။ 41ယ︀ဝ်ႇက︀ီးၵ︀ဝ်ယ︀ႃႇ ꩭုꩫ︀်ꩭၢင︀်ႈင︀ူဝ်းဢ︀ွꩫ︀်တ︀ူဝ်ႈလ︀ိူင︀်ႈꩭီတ︀်ꩬ︀ီ ꩭၢင︀်ႈဢ︀ꩫ︀်ႈဢ︀ဝ်ႈမ︀ိုဝ်းၵ︀ဝ်ၸ︀ူႛꩡ︀ဝ်ႛ ꩭီတ︀်ꩫ︀ႆ︀ႇမ︀ႆ︀ႛ ၵ︀ႅက︀်ꩡ︀ဝ်ႛꩬ︀ီ ꩭီတ︀်ပ︀ွႆ︀းပ︀ိဝ်က︀ꩫ︀်ႈဢ︀ူ။ 42-43င︀ႆ︀းꩬ︀ီ
“ဢ︀ီတ︀်ꩬ︀ြေးၵ︀ဝ်ꩴ︀း ꩬ︀ူပ︀ႃထိူꩫ︀်ꩭႅင︀်ႛမ︀ႆ︀ႛ ꩬ︀ီꩬ︀ိပ︀်ပ︀ီႈတ︀ၢင︀်ႈꩰ
ဢ︀ဝ်ႈတ︀ူဝ်ႈꩫ︀ိူဝ်ႇမ︀ိူဝ်ႛꩫ︀ႆ︀ႇၵ︀ဝ်ၵ︀ႅက︀်ꩡ︀ဝ်ႛꩫ︀ႆ︀ႇ ဢ︀ꩫ︀်ႈက︀ဝ်ႈမ︀ႆ︀ႛ ၵ︀ႅက︀်ꩵ︀ႈꩡ︀ႂ်ႈ။
ၵ︀ီင︀်ၸ︀ြႃးမ︀ေႃလ︀ုက︀်ꩫ︀ၵ︀ႃ ꩭုꩫ︀်ꩭၢင︀်ႈၸ︀ြႃးရ︀ိမ︀်ၸ︀ၢꩫ︀်
ဢ︀ꩫ︀်ႈꩬ︀ူဢ︀ဝ်ႈမ︀ႃးꩫ︀ႆ︀ႇၵ︀ဝ်မ︀ႆ︀ႛꩫ︀မ︀် ꩬ︀ူၵ︀ႅက︀်ꩫ︀ႆ︀ႇ။
ဢ︀မ︀ႂ်းၵ︀ဝ်ယ︀ႃႇ ၸ︀ြႃးꩫ︀ၢဝ်ႈဢ︀ꩫ︀်ႈꩬ︀ူꩭီတ︀်ꩬ︀ီပ︀ႆ︀ၢႛဝႆ︀ႈꩫ︀ႆ︀ႇၵ︀ဝ်ꩫ︀မ︀်။
က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ ꩬ︀ူမ︀ႆ︀ႛက︀ဝ်ႈတ︀ီꩭူဝ်ႛဢ︀ွက︀် ဢ︀ဝ်ႈပ︀ူꩫ︀်ႇမ︀ိူင︀်းၿေၿီလ︀ုင︀်ၵ︀ွတ︀်ꩫ︀မ︀်”
ꩫ︀ꩬ︀ီꩫ︀င︀်က︀ျမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်မ︀ႆ︀ႛတ︀ႅမ︀်ႛဝႆ︀ႇꩫ︀ႆ︀ႇꩫ︀က︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩭႂ်ႛၵ︀ဝ်ပ︀ႆ︀ၢႛꩫ︀ၢဝ်ႈꩫ︀ႆ︀ႇၵ︀ဝ်က︀ွတ︀်ꩫ︀ꩬ︀ီ လ︀ုက︀်ႉၵ︀ဝ်မ︀ႆ︀ႛꩫ︀ႃႛမ︀ꩫ︀်းꩡ︀ဝ်ႛ ပ︀ႆ︀ၵ︀ွတ︀်မ︀ႃးဢ︀ူ။ 44မ︀ိူဝ်ႈပ︀ူလ︀ီꩫ︀်ꩭဝ်းꩫ︀ႆ︀ႇၵ︀ဝ် ဢ︀ူပ︀ႃထိူင︀်ꩭႅင︀်ႛꩫ︀ႆ︀ႇ ၵ︀ဝ်မ︀ႆ︀ႛꩬ︀ုမ︀်ႇꩭၢင︀်းၸ︀ြႃးပ︀ီꩫ︀်ႈꩡ︀ဝ်ႛၵ︀ိင︀်းယ︀င︀်းမ︀ႃးဢ︀ူ။ ꩬ︀ုမ︀်ႇဢ︀မ︀ႂ်းယ︀ႃႇ ꩫ︀င︀်ဢ︀ꩫ︀်ႈမ︀ေႃꩬ︀ေမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛပ︀ျႃးဝႆ︀ႇꩫ︀ႆ︀ႇꩫ︀က︀ꩫ︀်ႈ ꩭီတ︀်ဝႆ︀ႇမ︀ႃးꩫ︀မ︀်။ 45ပ︀ူဝ်ꩭဝ်းꩫ︀ႆ︀ႇၵ︀ဝ်ယ︀ႃႇ လ︀ုက︀်ႉပ︀ူဝ်ၵ︀ဝ်ꩫ︀ႆ︀ႇၵ︀ဝ်မ︀ႆ︀ႛ ꩬ︀ုမ︀်ႇဢ︀မ︀ႂ်းꩬ︀ုပ︀်ႉဢ︀ဝ်ႈꩬ︀ီ မ︀ိူဝ်ႈတ︀င︀်းယ︀ေႃꩬ︀ု မ︀ိူင︀်းက︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭူဝ်ႛဢ︀ွက︀်ꩫ︀ႆ︀ႇၵ︀ဝ်မ︀ႆ︀ႛက︀ႃတ︀ိက︀်ꩫ︀ႆ︀ႇ ꩬ︀ုမ︀်ႇဢ︀မ︀ႂ်းတ︀ူဝ်ႇက︀ႃဢ︀ူ။ ꩬ︀ုမ︀်ႇဢ︀မ︀ႂ်းယ︀ႃႇ ဢ︀ဝ်ႈထိုင︀်ꩡ︀ူဝ်ႈပ︀ၢꩫ︀်ႈꩡ︀ဝ်ႛꩭူဝ်ၵ︀မ︀်းၻႃဝိ ယ︀င︀်းမ︀ႃးဢ︀ူ။ 46ꩡ︀ဝ်ႛꩭူဝ်ၵ︀မ︀်းၻႃဝိယ︀ႃႇ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩫ︀ႆ︀ႛꩫ︀ႃႛမ︀ႃးဢ︀ူ။ င︀ႆ︀းꩫ︀ႆ︀ႇꩬ︀ီမ︀ꩫ︀်းယ︀ႃႇ ꩡ︀ွင︀်းၿိက︀်ႉမ︀ၢꩫ︀်ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈယ︀ႃက︀ုပ︀ႆ︀ၢႛꩫ︀ႆ︀ႇ ꩭႂ်ႛပ︀ူဝ်းꩫ︀ႆ︀ႛပ︀ူက︀်ꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ွꩫ︀်းဢ︀ၵ︀ၢင︀်းမ︀ႃးဢ︀ူ။ 47ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ဢ︀ၵ︀ၢင︀်းꩡ︀ႃႇပ︀ူက︀်ꩡ︀ွင︀်းၿိက︀်ႉမ︀ၢꩫ︀်ꩫ︀ႆ︀ႇ ꩡ︀ဝ်ႛꩭူဝ်ၵ︀မ︀်းꩬ︀ေႃလ︀မ︀ုꩫ︀်မ︀ႆ︀ႛꩬ︀ိုင︀် ꩭႂ်ႛမ︀ႃးꩫ︀မ︀်။ 48-50င︀ႆ︀းꩬ︀ီဢ︀ၵ︀ၢင︀်းꩭႂ်ႛမ︀ႃးꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈၵ︀ႅꩫ︀်းꩬ︀ုင︀်မ︀ႅတ︀်ႉယ︀ႃႇ
“က︀ၢင︀်ႈၸ︀ႃႇယ︀ႃႇ ပ︀လ︀ၢင︀်က︀ဝ်ႈꩫ︀မ︀်။
လ︀င︀်ꩫ︀ိꩫ︀်ႈယ︀ႃႇတ︀ီႈဢ︀ꩫ︀်ႈက︀ဝ်ႈတ︀မ︀်းတ︀ိꩫ︀်ႈꩫ︀မ︀်။
ꩡ︀ွင︀်းꩫ︀င︀်ꩭိုဝ်ꩫ︀ႆ︀ ꩬ︀ူꩭၢင︀်းက︀ဝ်ႈ တ︀ီပ︀ူက︀်ꩫ︀ႆ︀ႇ။
တ︀ီႈဢ︀ꩫ︀်ႈက︀ဝ်ႈၵ︀ိင︀်းယ︀ႃႇဢ︀မ︀ႆ︀ႚꩫ︀ႆ︀။
က︀ဝ်ႈၸ︀ူႛꩡ︀ဝ်ႛꩬ︀ိုင︀်တ︀င︀်းမ︀ိူင︀်းမ︀ႆ︀ႛ ၸ︀ၢꩫ︀်ꩬ︀ၢင︀်းဝႆ︀ႇမ︀ဝ်ꩡ︀ႂ်ႈက︀ျႃး”
ꩫ︀ꩬ︀ီ က︀ျမ︀်းပ︀ရ︀ေႃးၸ︀ႅတ︀်ႉမ︀ႆ︀ႛဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈ ꩡ︀ွင︀်းဢ︀ꩫ︀်ႈက︀ူꩫ︀်းပ︀ူက︀်ꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛꩵ︀ႈၵ︀ိင︀်း။ 51ꩬ︀ူယ︀ႃႇ ꩡ︀ႃႉလ︀ူင︀်ꩫ︀မ︀်။ ပ︀ႃႛဢ︀ꩫ︀်ႈတ︀ီꩫ︀ႆ︀ႛꩥ︀ိꩫ︀်း ၿျႃၻိက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ႃႇ ꩡ︀ႂ်ႈꩬ︀ူꩫ︀ႆ︀ႇတ︀ꩫ︀်ႈလ︀ူင︀်ꩫ︀မ︀်။ ꩬ︀ူယ︀ႃႇ ꩫ︀င︀်ပ︀ူလ︀ီꩫ︀်ꩬ︀ူꩫ︀ႆ︀ႇၵ︀ဝ်ꩫ︀က︀ꩫ︀်ႈ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ꩬ︀ၢꩫ︀်တ︀ၢꩫ︀်းလ︀ူင︀်ꩫ︀မ︀်။ 52ပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်ယ︀ႃႇ လ︀ွင︀်ႈၸ︀ူႛꩡ︀ႂ်ႇၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈမ︀ူတ︀်ꩡ︀ၢင︀် ဢ︀ꩫ︀်ႈတ︀ီက︀ျွႃးမ︀ႃးꩫ︀ႆ︀ႇ ꩭူဝ်းꩬ︀ီ ၵ︀ဝ်မ︀ႆ︀ႛꩬ︀ူဢ︀ဝ်ႈတ︀ၢႆ︀ႈမ︀ူတ︀်မ︀ႃးယ︀ဝ်ႇ။ မ︀ဝ်ꩡ︀ႂ်ႈက︀ျႃး။ ပ︀လ︀ေႃး င︀ႆ︀ႚꩡ︀ဝ်ႛဢ︀ꩫ︀်ႈမ︀ူတ︀်ꩡ︀ၢင︀်ဢ︀မ︀ႂ်းမ︀ႆ︀ႛက︀ေႃႇ ꩬ︀ူၸ︀ုꩫ︀်ႇꩬ︀ႅတ︀်ႉꩡ︀ႃꩬ︀ီ ဢ︀ဝ်ႈတ︀ႆ︀ၢႈၵ︀ွတ︀်ယ︀ဝ်ႇ။ 53ꩬ︀ူယ︀ႃႇ တ︀ြႃးဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛꩫ︀ႆ︀ႇ လ︀ုက︀်ႉၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ်မ︀ႆ︀ႛ ꩫ︀ႆ︀ႛꩭၢပ︀်ႉမ︀ႃးꩫ︀ႆ︀ႇꩫ︀က︀ေႃႇ တ︀ြႃးဢ︀မ︀ႂ်းမ︀ႆ︀ႛꩬ︀ူꩵ︀ႈꩡ︀ွမ︀်း” ꩫ︀ဝꩫ︀်ႇ။
လ︀ွင︀်ႈꩬ︀တ︀ေၸ︀ꩫ︀်မ︀ႆ︀ႛ ဢ︀ဝ်ႈꩭိꩫ︀်ꩬ︀ိုင︀်းတ︀ႆ︀ၢႈ
54ꩡ︀ဝ်ႛတ︀ြႃးယ︀ုတ︀ꩫ︀ႆ︀ႇၵ︀ဝ်ယ︀ႃႇ ၵ︀ၢမ︀်းဢ︀မ︀ႂ်းꩫ︀ႆ︀ႛꩥ︀ိꩫ︀်းက︀ီး ၵ︀ႂ်ႈꩡ︀ႃႇꩭႅင︀်းꩬ︀ီ က︀တ︀်ၵ︀ိဝ်ႛက︀တ︀်က︀ၢင︀်းက︀ꩫ︀်ႈဢ︀ူ။ 55ꩬ︀တ︀ေၸ︀ꩫ︀်ယ︀ႃႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛတ︀ီမ︀်ႈင︀ႆ︀း က︀ၢင︀်ႈꩭၢဝ်မ︀ႆ︀ႛလ︀ႅမ︀်းၵ︀ွတ︀်က︀ီး မ︀ူꩫ︀်ႈၸ︀ုင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛတ︀မ︀ိူင︀်း၊ ပ︀ႃႛၵ︀ႃၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩡ︀ဝ်ႛယ︀ေꩬ︀ုꩬ︀ဝ်းꩬ︀ီဢ︀ူꩫ︀ႆ︀ႇမ︀ႆ︀ႛတ︀မ︀ိူင︀်း ꩭꩫ︀်ဢ︀ူ။ 56င︀ႆ︀းꩬ︀ီ မ︀ꩫ︀်းယ︀ႃႇ “က︀ၢင︀်ႈၸ︀ႃႇပ︀ုတ︀်ꩬ︀ီ မ︀ူꩫ︀်ႈၸ︀ုင︀်းတ︀ꩫ︀်းၵ︀ူဝ်းꩡ︀ဝ်ႛယ︀ေꩬ︀ုၸ︀ူႛလ︀ုက︀်ႉက︀ူꩫ︀်း ꩭိူဝ်ႈꩭိုင︀်းꩬ︀ီဢ︀ူꩫ︀ႆ︀ႇမ︀ႆ︀ႛ က︀ဝ်ႈꩭꩫ︀်ဢ︀ူ” ꩫ︀ဝꩫ︀်ႇ။ 57ꩫ︀ႆ︀ႇမ︀ႆ︀ႛၵ︀ဝ်ယ︀ႃႇ ဢ︀ိဝ်ꩰꩬ︀ႅꩫ︀်ꩰင︀ႆ︀း ꩭူၵ︀ဝ်မ︀ႆ︀ႛဢ︀ဝ်ႈမ︀ိုဝ်းတ︀ွပ︀်ႉꩬ︀ီ က︀ႃꩭႅင︀်းလ︀ႅꩫ︀်ႈမ︀ႃးယ︀ဝ်ႇက︀ီး 58ꩬ︀တ︀ေၸ︀ꩫ︀်မ︀ႆ︀ႛ ꩡ︀ꩫ︀်ႈဢ︀ွက︀်က︀ꩫ︀်ႛꩫ︀ွက︀်ႉဝီင︀်းင︀ႆ︀း ဢ︀ဝ်ႈꩭိꩫ︀်ꩬ︀ိုင︀်းက︀ꩫ︀်ႈꩬ︀ီဢ︀ဝ်ႈတ︀ႆ︀ၢႈဢ︀ူ။ ꩬ︀ၢက︀်ႉꩬ︀ေꩫ︀ႆ︀ႇၵ︀ဝ်ယ︀ႃႇ ꩬ︀ေႃလ︀ုꩫ︀ꩫ︀ႆ︀ႇၸ︀ူႛမ︀ၢဝ်က︀ူဝ်ႇလ︀ိူင︀်ႈမ︀ႆ︀ႛ ꩬ︀ိူဝ်ႛထမ︀ူင︀်ႇၵ︀ဝ် ဢ︀ၢပ︀်ႉဝႆ︀ႇဢ︀ူ။ 59င︀ႆ︀းꩬ︀ီ မ︀ိူဝ်ႈမ︀ꩫ︀်းမ︀ႆ︀ႛ ပ︀ိူꩫ︀်ႈဢ︀ဝ်ႈꩭိꩫ︀်ꩬ︀ိုင︀်းက︀ꩫ︀်ႈꩫ︀ႆ︀ႇ ꩬ︀တ︀ေၸ︀ꩫ︀်ယ︀ႃႇ “ꩡ︀ဝ်ႛယ︀ေꩬ︀ုတ︀ီၵ︀ႃႛ ၵ︀ွꩫ︀်က︀ဝ်ႈၵ︀ႃႛမ︀ႆ︀ႛ ꩭၢပ︀်ႉဢ︀ဝ်ႈတ︀ီၵ︀ႃႛမ︀ႃးတ︀ႃႉ” ꩫ︀ꩬ︀ီ ယ︀ွꩫ︀်းꩬ︀ူးဢ︀ူ။ 60ယ︀ဝ်ႇက︀ီး ၵ︀ုပ︀်ႉၵ︀ဝ်ꩬ︀ီ “ၵ︀ိင︀်းတ︀ူဝ်ꩡ︀ဝ်ႛꩴ︀း ဢ︀ပ︀ႅတ︀်ႉၵ︀ဝ်မ︀ႆ︀ႛ ပ︀ွႆ︀လ︀ွတ︀်ႉꩭႂ်ႛတ︀ီၵ︀ႃႛမ︀ႃးတ︀ႃႉ” ꩫ︀ꩬ︀ီ ဢ︀ိဝ်ꩬ︀ႅꩫ︀်င︀ႆ︀း ꩡ︀ႂ်ႈၵ︀တ︀်က︀ႃယ︀ဝ်ႇ။
Currently Selected:
ထဝ်ꩡ︀တ︀်ႉၵ︀ဝ် 7: kht
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
