ထဝ်ꩡ︀တ︀်ႉၵ︀ဝ် 15
15
လ︀ွင︀်ႈပ︀ၢင︀်ႈက︀ုမ︀်ႈဢ︀ꩫ︀်ႈဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛꩭီတ︀်
1က︀ူꩫ︀်းမ︀ၢင︀်ႈၸ︀ွင︀်းယ︀ႃႇ လ︀ုက︀်ႉတ︀ိူင︀်းယ︀ုတ︀မ︀ႆ︀ႛ က︀ႃဝီင︀်းဢ︀ꩫ︀်တ︀ိဢ︀ုက︀်ꩬ︀ီ ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ “ꩬ︀ူꩫ︀င︀်က︀ျမ︀်းꩬ︀ိꩫ︀်မ︀ေႃꩬ︀ေꩫ︀က︀ꩫ︀်ႈ မ︀ၢင︀်က︀လ︀ႃပ︀တ︀်ပ︀ႆ︀ၢႈꩫ︀င︀်မ︀ဝ်ꩭၢပ︀်ႉဢ︀ဝ်ႈက︀ီး ꩡ︀ဝ်ႛၸ︀ြႃးꩵ︀ႈက︀ေႛၵ︀ျွတ︀်ႉꩭႂ်ႛ” ꩫ︀ꩬ︀ီက︀ႃꩬ︀ွꩫ︀်ꩭႂ်ႛဢ︀ူ။ 2ပ︀ေႃလ︀ုꩫ︀ၵ︀ႃၿႃꩫ︀ၿယ︀ႃႇ တ︀င︀်းၵ︀ဝ်ထီင︀်က︀ꩫ︀်ႈထႅင︀်းက︀ꩫ︀်ႈဢ︀ူ။ င︀ႆ︀းꩬ︀ီꩡ︀ိူဝ်းꩡ︀ဝ်ႛယ︀ႃႇ လ︀ွင︀်ႈဢ︀ꩫ︀်ႈထီင︀် ၵ︀ၢမ︀်းက︀ꩫ︀်ႈꩫ︀ႆ︀ႇ တ︀င︀်းၸ︀ူႛမ︀ိုင︀်ႇꩡ︀ိူဝ်းဝီင︀်းယ︀ေရ︀ုꩬ︀လ︀ိမ︀်ꩫ︀ႆ︀ႇၵ︀ဝ် ꩭႂ်ႛပ︀ူဝ်းက︀ႃꩬ︀ူဝ်ႛက︀ꩫ︀်ႈꩫ︀ႆ︀ႇ ပ︀ေႃလ︀ုꩫ︀ၵ︀ႃၿႃꩫ︀ၿမ︀ႆ︀ႛ တ︀င︀်းက︀ူꩫ︀်းတ︀ၢင︀်က︀ူဝ်ႇ ꩭႂ်ႛက︀ႃက︀ွတ︀်ꩫ︀ꩬ︀ီ တ︀ႅပ︀်တ︀တ︀်ဢ︀ူ။
3င︀ႆ︀းꩬ︀ီ က︀ူꩫ︀်းꩡ︀ိူဝ်းꩫ︀ႆ︀ႇၵ︀ဝ်ယ︀ႃႇ ၵ︀ဝ်မ︀ႆ︀ႛ ဢ︀ဝ်ႈထိုင︀်က︀ꩫ︀်ႛꩫ︀ွက︀်ႉဝီင︀်းꩬ︀ူင︀်ꩭႂ်ႛဢ︀ူ။ ၵ︀ဝ်ယ︀ႃႇ မ︀ိူဝ်ႈမ︀ိူင︀်းၸ︀ူဝ်ꩫ︀ီꩬ︀ီယ︀ႃး၊ မ︀ိူင︀်းꩬ︀မ︀ႃရ︀ိꩫ︀ႆ︀ႇၵ︀ဝ်မ︀ႆ︀ႛပ︀ူꩫ︀်ႇက︀ႃꩫ︀ႆ︀ႇ လ︀ွင︀်ႈဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ် ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈမ︀ႃးꩫ︀ႆ︀ႇၵ︀ႆ︀ႈꩭႂ်ႛꩫ︀ႆ︀ႇꩬ︀ီ ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်တ︀င︀်းမ︀ိူင︀်း ꩭုမ︀်ꩰꩡ︀ူမ︀်းꩰက︀ꩫ︀်ႈဢ︀ူ။ 4ပ︀ေႃလ︀ုꩫ︀ၵ︀ႃၿႃꩫ︀ၿ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛထိုင︀်က︀ီး ꩡ︀ိူဝ်းꩡ︀ဝ်ႛ၊ တ︀မ︀ၢꩫ︀်ꩡ︀ဝ်ႛၵ︀ဝ်င︀ႆ︀း ၸ︀ူႛမ︀ိုင︀်ႇꩡ︀ိူဝ်းꩫ︀ႆ︀ႇၵ︀ဝ်ယ︀ႃႇ ꩬ︀ွင︀်ၵ︀ႃမ︀ႆ︀ႛꩭၢပ︀်ႉတ︀ွꩫ︀်ႛက︀ꩫ︀်ႈဢ︀ူ။ ꩬ︀ွင︀်ၵ︀ႃက︀ေႃႇ ꩬ︀ွင︀်ၵ︀ႃမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛꩭိုဝ်လ︀ိုဝ်တ︀ိုဝ်းမ︀ႃးꩫ︀ꩫ︀ႆ︀ႇၵ︀ဝ် တ︀ၢင︀်ပ︀ျႃးဢ︀ူ။ 5ꩫ︀ႆ︀ႇꩫ︀က︀ေႃႇ ၸ︀ူႛယ︀ုမ︀်ယ︀မ︀်ႈဢ︀ꩫ︀်ႈၸ︀ူႛၵ︀ဝ်ႛက︀ုမ︀်ႛၸ︀ႃရ︀ိꩬ︀ႄက︀မ︀်ႈၸ︀ွင︀်းယ︀ႃႇ လ︀ုက︀်ႉꩬ︀ီ “ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ် ဝႃႈꩭၢပ︀်ႉမ︀ၢင︀်က︀လ︀ႃပ︀တ︀်ပ︀ႆ︀ၢႈꩫ︀င︀်ဢ︀ူ။ က︀ျမ︀်းꩬ︀ိꩫ︀်မ︀ေႃꩬ︀ေမ︀ႆ︀ႛ ဝႃႈꩡ︀ွမ︀်းဢ︀ူ” ꩫ︀ꩬ︀ီဝႃႈက︀ꩫ︀်ႈဢ︀ူ။
6င︀ႆ︀းꩫ︀ႆ︀ႇꩬ︀ီ တ︀မ︀ၢꩫ︀်ꩡ︀ဝ်ႛꩫ︀ႆ︀ႇၵ︀ဝ်င︀ႆ︀း ၸ︀ူႛမ︀ိုင︀်ႇꩡ︀ိူဝ်းꩫ︀ႆ︀ႇၵ︀ဝ်ယ︀ႃႇ လ︀ွင︀်ႈꩫ︀ႆ︀ႇတ︀ႅပ︀်တ︀တ︀်က︀ွတ︀်ꩫ︀ꩬ︀ီ တ︀ုမ︀်ႈက︀ꩫ︀်ႈဢ︀ူ။ 7ဢ︀ၢꩫ︀်တ︀ၢꩫ︀်ထီင︀်က︀ꩫ︀်ႈꩬ︀ူဝ်ႛက︀ꩫ︀်ႈယ︀ဝ်ႇက︀ီး ပ︀ေတ︀ရ︀ုယ︀ႃႇလ︀ုက︀်ႉတ︀ီႈꩫ︀င︀်ႈမ︀ႆ︀ႛလ︀ုက︀်ႉꩬ︀ီ “ပ︀ူဝ်မ︀ေပ︀ီႈꩫ︀ွင︀်ႇၵ︀ဝ်ꩴ︀း ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ် ꩭႂ်ႛပ︀ူဝ်းၵ︀ၢဝ်ႈၵ︀ၢမ︀်းꩫ︀ီႈ ꩫ︀ႆ︀ႛꩥ︀ိꩫ︀်းꩬ︀ီယ︀ုမ︀်ယ︀မ︀်ႈꩫ︀ႆ︀ႇ မ︀ိူဝ်ႈင︀ႃးပ︀ုꩫ︀်ႛက︀ဝ်ႈမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ လ︀ုက︀်ႉꩫ︀ႂ်းꩬ︀ူမ︀ႆ︀ႛ လ︀ိူက︀်ႉꩡ︀ွင︀်ဝႆ︀ႇꩫ︀ႆ︀ႇ ꩬ︀ူꩡ︀ဝ်ႛတ︀ွင︀်းဢ︀ူ။ 8ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈꩭူဝ်ꩡ︀ႂ်ႈက︀ူꩫ︀်းꩭဝ်းမ︀ႆ︀ႛတ︀ွင︀်းꩫ︀ႆ︀ႇယ︀ႃႇ ꩫ︀င︀်ꩭဝ်းမ︀ႆ︀ႛၵ︀ွꩫ︀်မ︀ꩫ︀်းꩡ︀ဝ်ႛꩭႂ်ႛမ︀ႃးꩫ︀ႆ︀ႇꩫ︀က︀ꩫ︀်ႈ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛက︀ေႃႇꩭႂ်ႛꩬ︀ီ ၵ︀ဝ်မ︀ႆ︀ႛမ︀ꩫ︀်းꩡ︀ဝ်ႛꩭၢပ︀်ႉဢ︀ူꩫ︀ꩫ︀ႆ︀ႇ ပ︀ျႃးမ︀ႃးယ︀ဝ်ႇ။ 9မ︀ꩫ︀်းꩡ︀ဝ်ႛယ︀ႃႇ ၵ︀ဝ်ꩫ︀ၵ︀ႃꩭဝ်းမ︀ႆ︀ႛꩵ︀ႈက︀ၢက︀်ႉက︀ꩫ︀်ႈ။ ၵ︀ဝ်ယ︀ုမ︀်ယ︀မ︀်ႈမ︀ႃးꩬ︀ီ ဢ︀ပ︀ႅတ︀်ႉၵ︀ဝ်မ︀ႆ︀ႛက︀ေႃႇ ပ︀ွႆ︀လ︀ွတ︀်ႉꩭႂ်ႛမ︀ႃးယ︀ဝ်ႇ။ 10င︀ႆ︀းက︀ီးꩭီတ︀်က︀ꩬ︀င︀်ꩫ︀ႆ︀ ꩬ︀ူယ︀ႃႇၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛၵ︀ႂ်ႈꩡ︀ၢမ︀်းꩫ︀ႆ︀ႇ။ က︀ၢꩫ︀်းဢ︀ꩫ︀်ႈပ︀ူလ︀ီꩫ︀်ꩭဝ်းၵ︀ဝ်တ︀မ︀ိူင︀်း၊ ꩭဝ်းတ︀မ︀ိူင︀်းက︀ေႃႇ မ︀ႅက︀်မ︀ဝ်ပ︀ီꩫ︀်ႈꩫ︀ႆ︀ႇ ꩭီတ︀်က︀ꩬ︀င︀်ꩫ︀ႆ︀ၵ︀ဝ်မ︀ႆ︀ႛၵ︀ႂ်ႈꩭႂ်ႛမ︀ႅက︀်ꩫ︀ႆ︀ႇ။ 11ꩭဝ်းၸ︀ူႛꩡ︀ဝ်ႛက︀ေႃႇ ꩫ︀င︀်ၵ︀ဝ်ꩫ︀က︀ꩫ︀်ႈယ︀ုမ︀်ယ︀မ︀်ႈꩬ︀ီ ဢ︀ဝ်ႈက︀ျေးꩡ︀ူးꩡ︀ဝ်ႛယ︀ေꩬ︀ုꩬ︀ိုင︀် ꩭဝ်းမ︀ႆ︀ႛက︀ေႛၵ︀ျွတ︀်ႉꩭႂ်ႛက︀ေႃႇ” ꩫ︀ဝꩫ︀်ႇ။
12ꩫ︀ႆ︀ႇမ︀ႆ︀ႛ ပ︀ေႃလ︀ုꩫ︀ၵ︀ႃၿႃꩫ︀ၿယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ ပ︀ျႃးဢ︀ꩫ︀်ႈ ၵ︀ိူင︀်ႈꩫ︀ီႈဢ︀ၢမ︀်းမ︀ႃးꩫ︀ႆ︀ႇၵ︀ဝ်င︀ႆ︀း လ︀ႆ︀ၢးꩫ︀ိမ︀ိက︀်ႉꩫ︀ႆ︀ႇၵ︀ဝ်ၵ︀ႆ︀ႈꩭႂ်ႛက︀ီး က︀ူꩫ︀်းဢ︀ꩫ︀်ႈတ︀ုမ︀်ႈက︀ꩫ︀်ႈꩫ︀ႆ︀ႇၵ︀ဝ်တ︀င︀်းမ︀ိူင︀်း တ︀ိင︀်ꩬ︀ီထွမ︀်က︀ꩫ︀်ႈဢ︀ူ။ 13ၵ︀ဝ်ဝႃႈယ︀ဝ်ႇက︀ီး ယ︀ႃက︀ုယ︀ႃႇ “ပ︀ူဝ်မ︀ေပ︀ီႈꩫ︀ွင︀်ႇၵ︀ဝ်ꩴ︀း ထွမ︀်က︀ꩫ︀်ႈမ︀ႃးတ︀ႃႉ။ 14ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ဢ︀ွꩫ︀်ႈတ︀ၢင︀်းလ︀ေႚလ︀ေႚ ဢ︀ꩫ︀်ႈက︀ျူးမ︀ဝ်ꩡ︀ႂ်ႈက︀မ︀်ႈၸ︀ွင︀်းမ︀ႆ︀ႛ လ︀ိူက︀်ႉဢ︀ဝ်ႈပ︀ီꩫ︀်ႈ က︀ူꩫ︀်းမ︀ꩫ︀်းꩡ︀ဝ်ႛꩬ︀ီ ၵ︀ဝ်မ︀ႆ︀ႛမ︀ꩫ︀်းꩡ︀ဝ်ႛၵ︀ႂ်ႈလ︀ႂ်ႈဝႆ︀ႇꩡ︀ႂ်ႈꩫ︀ꩫ︀ႆ︀ႇ ꩵ︀ႈက︀ႆ︀ႛ ꩬ︀ႅင︀်မ︀ုꩫ︀်ၵ︀ႆ︀ႈမ︀ႃးယ︀ဝ်ႇ။ 15ဢ︀ꩫ︀်ႈပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ် က︀ျမ︀်းလ︀ိက︀်ႉမ︀ႆ︀ႛ လ︀ွင︀်ႈဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ် တ︀ႅမ︀်ႛဝႆ︀ႇꩫ︀ႆ︀ႇက︀ေႃႇ တ︀င︀်းꩫ︀ႆ︀ႇꩥ︀ႃးက︀ꩫ︀်ႈဢ︀ူ။
16-17က︀ျမ︀်းလ︀ိက︀်ႉမ︀ႆ︀ႛ
“ဢ︀ꩫ︀်ႈက︀ျူးမ︀ဝ်ꩡ︀ႂ်ႈဢ︀ꩫ︀်ႈက︀ဝ်ႈꩭွင︀်ႇꩬ︀ီ
တ︀ီဢ︀ဝ်ႈပ︀ီꩫ︀်ႈက︀ူꩫ︀်းက︀ဝ်ႈꩫ︀ႆ︀ႇၵ︀ဝ်င︀ႆ︀း
ၸ︀ꩫ︀်းက︀ူꩫ︀်းက︀ႃႈꩫ︀င︀်ယ︀င︀်းꩫ︀ႆ︀ႇၵ︀ဝ်
ꩭႂ်ႛပ︀ူဝ်းက︀ဝ်ႈမ︀ႆ︀ႛမ︀ႃးꩫ︀ႆ︀ႇ က︀ဝ်ႈတ︀ီပ︀ွက︀်ႉမ︀ႃးꩫ︀မ︀်။
က︀ဝ်ႈတ︀ီတ︀င︀်ႛ မ︀ိူင︀်းၻႃဝိပ︀ွက︀်ႉꩫ︀မ︀်။
ဢ︀ꩫ︀်ႈၸ︀ေႛၸ︀ႅတ︀်ꩫ︀ႆ︀ႇၵ︀ဝ် မ︀ေးꩬ︀ီမ︀ိူင︀်းက︀ဝ်ႈ
တ︀ီဢ︀ဝ်ႈၵ︀ိူင︀်က︀ိုမ︀်းပ︀ွက︀်ႉꩫ︀မ︀်။
18ဢ︀ꩫ︀်ႈꩫ︀ႆ︀ႇယ︀ႃႇ ဢ︀ꩫ︀်ႈမ︀ိူဝ်ႈꩫ︀ꩫ︀်ႇပ︀ုꩫ︀်ႛ
ၸ︀ြႃးပ︀ီꩫ︀်ႈꩡ︀ဝ်ႛꩭူဝ်းၿျႃၻိက︀်ႉဝႆ︀ႇꩫ︀ႆ︀ႇꩫ︀မ︀်” ꩫ︀ꩬ︀ီတ︀ႅမ︀်ႛဝႆ︀ႇဢ︀ူ။
19က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ ဢ︀ꩫ︀်ႈက︀ျူးမ︀ဝ်ꩡ︀ႂ်ႈဢ︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛမ︀ႃးယ︀ုမ︀်ယ︀မ︀်ႈꩫ︀ႆ︀ႇၵ︀ဝ် ꩭႂ်ႛပ︀ူဝ်းယ︀ပ︀်ꩫ︀ႆ︀ႇ ꩭဝ်းꩵ︀ႈထုက︀်ꩭီတ︀်။ 20ꩫ︀ႆ︀ႇꩫ︀က︀ေႃႇ ဢ︀ꩫ︀်ႈက︀ိꩫ︀်ႈဢ︀ꩫ︀်ႈꩭုꩫ︀်ꩭၢင︀်ႈမ︀ႆ︀ႛ ပ︀ုက︀်ႉꩡ︀ူဝ်ဝႆ︀ႇꩫ︀ႆ︀ႇၵ︀ဝ်၊ ꩫ︀ိူဝ်ႇဢ︀ꩫ︀်ႈမ︀ိပ︀်ၵ︀ူဝ်းꩫ︀ႆ︀ႇၵ︀ဝ်၊ ꩫ︀ိူတ︀်ႉꩫ︀ႆ︀ႇၵ︀ဝ်မ︀ႆ︀ႛက︀ိꩫ︀်ႈꩫ︀ႆ︀ႇင︀ႆ︀း ဢ︀ꩫ︀်ႈၸ︀ိတ︀်က︀ႃမ︀ꩫ︀ႆ︀ႇၵ︀ဝ်မ︀ႆ︀ႛ ထုက︀်ꩫ︀ီႈင︀ိူင︀်ႇဢ︀ူ ꩫ︀ꩫ︀ႆ︀ႇၵ︀ဝ်မ︀ႆ︀ႛ လ︀ိက︀်ႉတ︀ႅမ︀်ႛ ꩭႂ်ႛက︀ီးꩫ︀ီႈဢ︀ူ။ 21က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး လ︀ုက︀်ႉမ︀ိူဝ်ႈꩫ︀ꩫ︀်ႇပ︀ုꩫ︀်ႛ ꩡ︀ွင︀်းꩬ︀ွꩫ︀်တ︀ြႃးꩫ︀ႆ︀ႇၵ︀ဝ်မ︀ႆ︀ႛ ဝꩫ︀်းက︀မ︀်ႈꩬ︀ိꩫ︀်က︀ူႈဝꩫ︀်းမ︀ႆ︀ႛက︀ျမ︀်းꩬ︀ိꩫ︀်မ︀ေႃꩬ︀ေ ဢ︀ၢꩫ︀်မ︀ႃး၊ ꩭူဝ်းက︀ꩫ︀်ႈꩬ︀ွꩫ︀်က︀ꩫ︀်ႈမ︀ႃးꩬ︀ီꩫ︀မ︀်” ꩫ︀ဝꩫ︀်ႇ။
လ︀ိက︀်ႉဢ︀ꩫ︀်ႈၸ︀ူႛယ︀ုမ︀်ယ︀မ︀်ႈဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်မ︀ႆ︀ႛ ၸ︀ူႛယ︀ုမ︀်ယ︀မ︀်ႈက︀ျူးꩫ︀ႆ︀ႇၵ︀ဝ်ꩭႂ်ႛ
22ꩫ︀ႆ︀ႇမ︀ႆ︀ႛ တ︀မ︀ၢꩫ︀်ꩡ︀ဝ်ႛၵ︀ဝ်၊ ၸ︀ူႛမ︀ိုင︀်ႇꩡ︀ိူဝ်းꩫ︀ႆ︀ႇၵ︀ဝ်င︀ႆ︀း က︀ူꩫ︀်းꩡ︀ိူဝ်းꩫ︀ႆ︀ႇၵ︀ဝ်တ︀င︀်းမ︀ိူင︀်းယ︀ႃႇ ၸ︀ူႛတ︀ၢင︀်ႈတ︀ူဝ်ႈꩫ︀ႆ︀ႇၵ︀ဝ်မ︀ႆ︀ႛလ︀ိူက︀်ႉꩬ︀ီ တ︀င︀်းပ︀ေႃလ︀ုꩫ︀ၵ︀ႃၿႃꩫ︀ၿ ပ︀ွႆ︀ꩡ︀ႂ်ႇꩭႂ်ႛက︀ႃဝီင︀်းဢ︀ꩫ︀်တ︀ိဢ︀ုက︀်က︀ွတ︀်ꩫ︀ꩬ︀ီ တ︀ႅပ︀်တ︀တ︀်ဢ︀ူ။ ယ︀ဝ်ႇက︀ီး ၿႃꩬ︀ၿဢ︀ꩫ︀်ႈꩭွင︀်ႇဝႃႈယ︀ုတ︀ꩫ︀ၵ︀ႃတ︀ိလ︀ ဢ︀ꩫ︀်ႈၸ︀ူႛယ︀ုမ︀်ယ︀မ︀်ႈၵ︀ဝ်ꩫ︀ၢပ︀်ႉယ︀မ︀်ႈလ︀ူင︀်မ︀ႆ︀ႛလ︀ိူက︀်ႉꩬ︀ီ 23မ︀ိုဝ်းꩬ︀ွင︀်ၵ︀ႃမ︀ႆ︀ႛ လ︀ိက︀်ႉၸ︀ၢက︀်ꩭႂ်ႛဢ︀ူ။ လ︀ိက︀်ႉဢ︀မ︀ႂ်းမ︀ႆ︀ႛ
“ပ︀ီႈꩫ︀ွင︀်ႇဢ︀ꩫ︀်ႈက︀ျူးမ︀ဝ်ꩡ︀ႂ်ႈ ဢ︀ꩫ︀်ႈဢ︀ူဝီင︀်းဢ︀ꩫ︀်တ︀ိဢ︀ုက︀်၊ မ︀ိူင︀်းꩬ︀ီရ︀ီယ︀ႃး၊ မ︀ိူင︀်းက︀ိလ︀ိက︀ိꩫ︀ႆ︀ႇၵ︀ဝ်ꩴ︀း ꩬ︀ူꩡ︀ဝ်ႛမ︀ႆ︀ႛ တ︀ူႈတ︀မ︀ၢꩫ︀်ꩡ︀ဝ်ႛၵ︀ဝ်၊ ၸ︀ူႛမ︀ိုင︀်ႇꩡ︀ိူဝ်းꩫ︀ႆ︀ႇၵ︀ဝ် ၸ︀ူႛပ︀ီꩫ︀်ႈပ︀ီႈꩫ︀ွင︀်ႇꩬ︀ူꩡ︀ဝ်ႛၵ︀ဝ် ꩬ︀င︀်ၵ︀ၢမ︀်းမ︀ႂ်ꩬ︀ုင︀်တ︀ီၵ︀ႃႛဢ︀ူ။ 24က︀ူꩫ︀်းဢ︀ꩫ︀်ႈလ︀ုက︀်ႉတ︀ူႈမ︀ႆ︀ႛမ︀ႃးက︀မ︀်ႈၸ︀ွင︀်းယ︀ႃႇ ၵ︀ၢမ︀်းဢ︀ꩫ︀်ႈတ︀ူႈမ︀ဝ်ꩫ︀ေꩭႂ်ႛꩫ︀ႆ︀ႇၵ︀ဝ် ꩬ︀ူမ︀ႆ︀ႛမ︀ႃးဝႃႈꩬ︀ီ ဢ︀ဝ်ႈယ︀ပ︀်ꩡ︀ႂ်ႈမ︀ႃးယ︀ဝ်ႇꩫ︀ꩫ︀ႆ︀ႇ တ︀ူႈꩫ︀ႆ︀ႛꩥ︀ိꩫ︀်းဢ︀ူ။ 25က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ တ︀ူႈꩭီတ︀်ပ︀ၢင︀်ႈက︀ုမ︀်ႈင︀ႆ︀း က︀ူꩫ︀်းက︀မ︀်ႈၸ︀ွင︀်းမ︀ႆ︀ႛလ︀ိူက︀်ႉꩬ︀ီ ꩬ︀ူမ︀ႆ︀ႛꩭႂ်ႛမ︀ႃးက︀ွတ︀်ꩫ︀ꩬ︀ီ တ︀ႅပ︀်တ︀တ︀်က︀ꩫ︀်ႈဢ︀ူ။ ၵ︀ဝ်ယ︀ႃႇတ︀င︀်းပ︀ီႈꩫ︀ွင︀်ႇꩭၢက︀်ႉ ပ︀ေႃလ︀ုꩫ︀ၵ︀ႃၿႃꩫ︀ၿ တ︀ီꩭူမ︀်ႈမ︀ႃးꩫ︀မ︀်။ 26ပ︀ေႃလ︀ုꩫ︀ၵ︀ႃၿႃꩫ︀ၿယ︀ႃႇ ၸ︀ူႛဢ︀ꩫ︀်ႈၵ︀ွတ︀်ဢ︀ꩬ︀ၢက︀်ႉꩬ︀ီ ꩭီတ︀်ဢ︀မ︀ူးꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀မ︀်။ 27င︀ႆ︀းꩫ︀ႆ︀ႇꩬ︀ီ ယ︀ုတ︀ꩫ︀ၵ︀ႃတ︀ိလ︀ၵ︀ဝ်မ︀ႆ︀ႛတ︀င︀်းꩬ︀ွင︀်ၵ︀ႃ ပ︀ွႆ︀မ︀ႃးယ︀ဝ်ႇ။ လ︀ိက︀်ႉဢ︀ꩫ︀်ႈတ︀ူႈတ︀ႅမ︀်ႛမ︀ႃးꩫ︀ႆ︀ႇၵ︀ဝ် ꩬ︀ွင︀်ၵ︀ႃၸ︀ူႛꩡ︀ဝ်ႛက︀ေႃႇ ꩬ︀ူမ︀ႆ︀ႛတ︀ီၵ︀ႆ︀ႈꩭႂ်ႛꩫ︀မ︀်။ 28ꩬ︀ိꩫ︀်ဢ︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛလ︀ိူဝ်ꩬ︀ီ ꩬ︀ူꩡ︀ဝ်ႛမ︀ႆ︀ႛ တ︀ီꩭႂ်ႛမ︀ႅက︀်က︀ၢꩫ︀်းဢ︀ꩫ︀်ႈꩫ︀က︀်တ︀ၢင︀်ဢ︀ꩫ︀်ႈယ︀ႃႇ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀ၵ︀ႃတ︀ူႈ ဢ︀လ︀ၢင︀်းꩵ︀ႈယ︀င︀်း။ 29ဢ︀ꩫ︀်ႈက︀ိꩫ︀်ႈဢ︀ꩫ︀်ႈꩭုꩫ︀်ꩭၢင︀်ႈမ︀ႆ︀ႛ ပ︀ုက︀်ႉꩡ︀ူဝ်ဝႆ︀ႇꩫ︀ႆ︀ႇၵ︀ဝ်၊ ꩫ︀ိူဝ်ႇဢ︀ꩫ︀်ႈမ︀ိပ︀်ၵ︀ူဝ်းꩫ︀ႆ︀ႇၵ︀ဝ်၊ ꩫ︀ိူတ︀်ႉꩫ︀ႆ︀ႇၵ︀ဝ်မ︀ႆ︀ႛက︀ိꩫ︀်ႈꩫ︀ႆ︀ႇင︀ႆ︀း ဢ︀ꩫ︀်ႈၸ︀ိတ︀်က︀ႃမ︀ꩫ︀ႆ︀ႇၵ︀ဝ်မ︀ႆ︀ႛ င︀ိူင︀်ႇတ︀ႃႉ။ ꩫ︀ႆ︀ႇၵ︀ဝ်ꩡ︀ွမ︀်းက︀ီး ပ︀ူဝ်းယ︀ဝ်ႇ။ ꩬ︀ူꩡ︀ဝ်ႛတ︀င︀်းမ︀ိူင︀်း ꩭႂ်ႛဢ︀ူꩫ︀ီႈက︀ိꩫ︀်ႈဝၢꩫ︀်ၵ︀ႅမ︀်းꩬ︀ႃက︀ꩫ︀်ႈက︀ႃတ︀ႃႉ”
ꩫ︀ꩬ︀ီတ︀ႅမ︀်ႛဝႆ︀ႇဢ︀ူ။
30ၸ︀ူႛတ︀ၢင︀်ႈတ︀ူဝ်ႈꩫ︀ႆ︀ႇၵ︀ဝ်မ︀ႆ︀ႛ ပ︀ွႆ︀ꩡ︀ႂ်ႇက︀ီး ၵ︀ဝ်က︀ေႃႇ ဝီင︀်းဢ︀ꩫ︀်တ︀ိဢ︀ုက︀်မ︀ႆ︀ႛက︀ႃꩬ︀ီ ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛတ︀ုမ︀်ႈက︀ꩫ︀်ႈယ︀ဝ်ႇက︀ီး ၵ︀ဝ်မ︀ႆ︀ႛလ︀ိက︀်ႉဢ︀မ︀ႂ်းꩭႂ်ႛဢ︀ူ။ 31လ︀ိက︀်ႉဢ︀မ︀ႂ်းဢ︀ၢꩫ︀်ပ︀ျႃးက︀ီး က︀ွပ︀်ႉပ︀ိူဝ်ႈၵ︀ၢမ︀်းꩬ︀ႂ်ꩭႅင︀်းꩫ︀ႆ︀ႇၵ︀ဝ်လ︀ွေႛꩫ︀ႆ︀ႇꩬ︀ီ ၵ︀ဝ်တ︀င︀်းမ︀ိူင︀်းꩡ︀ူမ︀်းက︀ꩫ︀်ႈဢ︀ူ။ 32ယ︀ုတ︀ꩫ︀ၵ︀ႃတ︀ိလ︀ၵ︀ဝ်ယ︀ႃႇ ꩫ︀င︀်ဢ︀ꩫ︀်ႈပ︀ီꩫ︀်ႈပ︀ရ︀ေႃးၸ︀ႅတ︀်ႉꩫ︀က︀ꩫ︀်ႈ ၵ︀ဝ်မ︀ႆ︀ႛဢ︀ဝ်ႈꩭိုင︀်ꩰꩬ︀ႂ်ꩭႅင︀်းꩭႂ်ႛꩬ︀ီ ဢ︀ဝ်ႈၵ︀ိူင︀်က︀ိုမ︀်းꩭႂ်ႛဢ︀ူ။ 33-34ꩬ︀ွင︀်ၵ︀ႃ ဢ︀မ︀ႂ်းမ︀ႆ︀ႛတ︀ိူက︀်ႉက︀ႃႈလ︀ိူင︀်ႈဢ︀ူယ︀ဝ်ႇက︀ီး က︀ူꩫ︀်းꩡ︀ိူဝ်းꩫ︀ႆ︀ႇၵ︀ဝ် ꩬ︀ွင︀်ၵ︀ႃမ︀ႆ︀ႛ ꩬ︀င︀်ၵ︀ၢမ︀်းꩬ︀ီ ꩡ︀ိူဝ်းဝီင︀်းယ︀ေရ︀ုꩬ︀လ︀ိမ︀် ဢ︀ꩫ︀်ႈၵ︀ဝ်မ︀ႆ︀ႛပ︀ွႆ︀ꩡ︀ႂ်ႇမ︀ႃးမ︀ႆ︀ႛ ပ︀ွႆ︀မ︀ိူဝ်းဢ︀ူ။ 35ပ︀ေႃလ︀ုꩫ︀ၵ︀ႃၿႃꩫ︀ၿယ︀ႃႇ ဝီင︀်းဢ︀ꩫ︀်တ︀ိဢ︀ုက︀်မ︀ႆ︀ႛ ဢ︀ူဢ︀ိက︀်ꩬ︀ီ တ︀င︀်းပ︀ိူꩫ︀်ႈꩫ︀မ︀်ꩰꩭူမ︀်ႈꩭူဝ်းၵ︀ၢဝ်ႈၵ︀ၢမ︀်းꩫ︀ီႈဢ︀ူ။
လ︀ွင︀်ႈပ︀ေႃလ︀ုꩫ︀ၵ︀ႃၿႃꩫ︀ၿက︀ၢက︀်ႉက︀ꩫ︀်ႈ
36ꩬ︀ွင︀်ꩬ︀ၢမ︀်ꩫ︀ိူꩫ︀်ႈꩭိုင︀်က︀ီး ပ︀ေႃလ︀ုယ︀ႃႇၿႃꩫ︀ၿမ︀ႆ︀ႛ “ပ︀ႆ︀ႉꩭႃး ဝီင︀်းဢ︀ꩫ︀်ႈꩭဝ်းꩭူဝ်းၵ︀ၢဝ်ႈၵ︀ၢမ︀်းꩫ︀ီႈꩫ︀ႆ︀ႇၵ︀ဝ်ႛမ︀ႆ︀ႛက︀ႃꩬ︀ီ ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ က︀ႃပ︀ꩫ︀်လ︀ႅမ︀်းက︀ွတ︀်” ꩫ︀ဝꩫ︀်ႇ။ 37ၿႃꩫ︀ၿယ︀ႃႇ ယ︀ေႃးꩭၢꩫ︀်မ︀ႃက︀ုမ︀ႆ︀ႛက︀ေႃႇ ၵ︀ႂ်ႈꩭွင︀်ႇက︀ႃလ︀ွေႛဢ︀ူ။ 38ꩫ︀ႆ︀ႇꩫ︀က︀ေႃႇ ပ︀ေႃလ︀ုယ︀ႃႇမ︀ꩫ︀်းမ︀ႆ︀ႛ ꩵ︀ႈထုက︀်ꩭွင︀်ႇꩫ︀ꩬ︀ီ ၵ︀ႂ်ႈꩡ︀ႂ်ႈဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ယ︀ေႃးꩭၢꩫ︀်မ︀ႃက︀ုယ︀ႃႇ မ︀ိူဝ်ႈတ︀င︀်းၵ︀ဝ်ꩭူမ︀်ႈက︀ႃꩭီတ︀်ဢ︀မ︀ူးၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇ ဢ︀ဝ်ႈထိုင︀်တ︀ၢင︀်းꩬ︀ုတ︀်ယ︀ႃႇ မ︀ဝ်ꩡ︀ွမ︀်းမ︀ႃးꩬ︀ီ လ︀ုက︀်ႉဝီင︀်းပ︀မ︀်ၸ︀ုလ︀ိမ︀ႆ︀ႛꩫ︀ႆ︀ၢႈ လ︀ုက︀်ႉၵ︀ဝ်မ︀ႆ︀ႛၸ︀ၢက︀်ႉက︀ႃꩬ︀ီꩫ︀မ︀်။ 39င︀ႆ︀းꩬ︀ီꩬ︀ွင︀်ၵ︀ႃ ထႅင︀်းက︀ꩫ︀်ႈယ︀ဝ်ႇက︀ီး ၸ︀ၢက︀်ႉက︀ꩫ︀်ႈꩬ︀ီက︀ႃၸ︀ႂ်က︀ႃမ︀ꩫ︀်းဢ︀ူ။ ၿႃꩫ︀ၿယ︀ႃႇ ယ︀ေႃးꩭၢꩫ︀်မ︀ႃက︀ုမ︀ႆ︀ႛꩭွင︀်ႇꩬ︀ီ င︀ွꩫ︀်ႈက︀ုပ︀ရ︀ုမ︀ႆ︀ႛ ၵ︀ီꩬ︀ၢင︀်ႈၸ︀ူဝ်းက︀ႃဢ︀ူ။ 40င︀ႆ︀းꩬ︀ီပ︀ေႃလ︀ုယ︀ႃႇ တ︀ိလ︀မ︀ႆ︀ႛꩭွင︀်ႇꩬ︀ီဢ︀ွက︀်က︀ႃဢ︀ူ။ မ︀ိူဝ်ႈၵ︀ဝ်ဢ︀ွက︀်က︀ႃꩫ︀ႆ︀ႇ ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်ယ︀ႃႇ ပ︀ေႃလ︀ုမ︀ႆ︀ႛဢ︀ၢပ︀်ႉ ꩫ︀ႂ်းက︀ျေးꩡ︀ူးၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛဢ︀ူ။ 41ပ︀ေႃလ︀ုယ︀ႃႇ မ︀ိူင︀်းꩬ︀ီရ︀ီယ︀ႃး၊ မ︀ိူင︀်းက︀ိလ︀ိက︀ိꩫ︀ႆ︀ႇၵ︀ဝ်မ︀ႆ︀ႛက︀ႃꩬ︀ီ က︀ူꩫ︀်းꩡ︀ိူဝ်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ꩬ︀ႂ်ꩭႅင︀်းဢ︀ဝ်ႈၵ︀ိူင︀်က︀ိုမ︀်းꩭႂ်ႛဢ︀ူ။
Currently Selected:
ထဝ်ꩡ︀တ︀်ႉၵ︀ဝ် 15: kht
Highlight
Share
Copy

Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.