YouVersion Logo
Search Icon

ထဝ်ꩡ︀တ︀်ႉၵ︀ဝ် 16

16
လ︀ွင︀်ႈတ︀ိမ︀ေႃတ︀ေ ꩡ︀ွမ︀်းက︀ႃပ︀ေႃလ︀ု
1ပ︀ေႃလ︀ုယ︀ႃႇ ဝီင︀်းၻေရ︀ပ︀ေင︀ႆ︀း ဝီင︀်းလ︀ုတ︀်တ︀ရ︀မ︀ႆ︀ႛထိုင︀်က︀ႃဢ︀ူ။ ဝီင︀်းလ︀ုတ︀်တ︀ရ︀မ︀ႆ︀ႛ တ︀ိမ︀ေႃတ︀ေꩫ︀ꩫ︀ႆ︀ႇ ၸ︀ူႛယ︀ုမ︀်ယ︀မ︀်ႈက︀ူဝ်ႇလ︀ိူင︀်ႈယ︀င︀်းဢ︀ူ။ ၸ︀ူႛမ︀ေႈမ︀ꩫ︀်းယ︀ႃႇ ၸ︀ꩫ︀်းက︀ျူး ၸ︀ူႛယ︀ုမ︀်ယ︀မ︀်ႈꩫ︀မ︀်။ ၸ︀ူႛပ︀ူဝ်ႈယ︀ႃႇၸ︀ꩫ︀်းက︀ရ︀ိက︀်ꩫ︀မ︀်။ 2မ︀ꩫ︀်းယ︀ႃႇ က︀ꩫ︀်ႛꩫ︀ႃႛၸ︀ူႛယ︀ုမ︀်ယ︀မ︀်ႈဝီင︀်းလ︀ုတ︀်တ︀ရ︀ၵ︀ဝ်ꩫ︀ၵ︀ႃ ဝီင︀်းဢ︀ိက︀ေႃꩫ︀ိၵ︀ဝ်မ︀ႆ︀ႛ ꩫ︀ႆ︀ႛꩫ︀ႃႛဢ︀ူ။ 3ပ︀ေႃလ︀ုယ︀ႃႇတ︀ိမ︀ေႃတ︀ေမ︀ႆ︀ႛ ၵ︀ႂ်ႈꩭႂ်ႛꩡ︀ွမ︀်းမ︀ꩫ︀်းꩬ︀ီ မ︀ꩫ︀်းမ︀ႆ︀ႛမ︀ၢင︀်က︀လ︀ႃပ︀တ︀်ပ︀ႆ︀ၢႈꩫ︀င︀်ꩭႂ်ႛဢ︀ူ။ မ︀ꩫ︀်းꩭီတ︀်င︀ႆ︀းꩫ︀ႆ︀ႇ ၸ︀ူႛပ︀ူဝ်ႈတ︀ိမ︀ေႃတ︀ေယ︀ႃႇ ပ︀ီꩫ︀်ႈၸ︀ꩫ︀်းက︀ရ︀ိက︀်ꩫ︀မ︀်ꩫ︀ꩫ︀ႆ︀ႇ က︀ျူးဢ︀ꩫ︀်ႈဢ︀ူဝီင︀်းဢ︀မ︀ႂ်းၵ︀ဝ် တ︀ွင︀်းက︀ꩫ︀်ႈꩬ︀ီꩫ︀မ︀်။ 4ၵ︀ဝ်ယ︀ႃႇ မ︀ိူဝ်ႈဝီင︀်းꩫ︀ႆ︀ႇၵ︀ဝ်မ︀ႆ︀ႛၸ︀ႃပ︀ူꩫ︀်ႇက︀ႃꩫ︀ႆ︀ႇ ၸ︀ိင︀်ႛပ︀ိူင︀်ႈဢ︀ꩫ︀်ႈတ︀မ︀ၢꩫ︀်ꩡ︀ဝ်ႛၵ︀ဝ်င︀ႆ︀း ၸ︀ူႛမ︀ိုင︀်ႇꩡ︀ိူဝ်းဝီင︀်းယ︀ေရ︀ုꩬ︀လ︀ိမ︀်ꩫ︀ႆ︀ႇၵ︀ဝ်တ︀မ︀်းဝႆ︀ႇꩫ︀ႆ︀ႇ က︀ူꩫ︀်းꩡ︀ိူဝ်းꩫ︀ႆ︀ႇၵ︀ဝ်မ︀ႆ︀ႛ ၵ︀ႆ︀ႈပ︀ျႃးꩬ︀ီ ꩭႂ်ႛꩡ︀ွမ︀်းက︀ꩫ︀်ႈဢ︀ူ။ 5က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ က︀ူꩫ︀်းꩡ︀ိူဝ်းꩡ︀ဝ်ႛꩫ︀ႆ︀ႇၵ︀ဝ်ယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ေႈၵ︀ႅꩫ︀်းယ︀ုမ︀်ယ︀မ︀်ႈမ︀ႃးက︀ꩫ︀်ႈꩬ︀ီ ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်က︀ူႈမ︀ိုဝ်ႇက︀ူႈဝꩫ︀်းꩫ︀မ︀်ဢ︀ိက︀်မ︀ႃးက︀ꩫ︀်ႈဢ︀ူ။
ၿျႃၻိက︀်ႉဢ︀ꩫ︀်ႈဝီင︀်းတ︀ရ︀ေႃမ︀ႆ︀ႛ ပ︀ေႃလ︀ုꩭꩫ︀်
6ၵ︀ဝ်ယ︀ႃႇ တ︀ိူင︀်းၸ︀ျုက︀ိꩫ︀ၵ︀ႃ တ︀ိူင︀်းက︀လ︀ႃတ︀ိမ︀ႆ︀ႛ ၸ︀ႃက︀ႃဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၵ︀ဝ်မ︀ႆ︀ႛဢ︀ၵ︀ၢင︀်းဢ︀ꩫ︀်ႈ မ︀ိူင︀်းဢ︀ႃꩬ︀ျမ︀ႆ︀ႛ ꩭူဝ်းၵ︀ၢဝ်ႈၵ︀ၢမ︀်းꩫ︀ီႈမ︀ဝ်ꩭႂ်ႛꩬ︀ီꩫ︀မ︀်။ 7ၵ︀ဝ်ꩫ︀ႅꩫ︀်ႈတ︀ီႈမ︀ိူင︀်းမ︀ုတ︀ိမ︀ႆ︀ႛ ထိုင︀်က︀ႃက︀ီး ꩬ︀ၢင︀်က︀ႃမ︀ိူင︀်းပ︀ိတ︀ုꩫ︀ိဢ︀ူ။ ꩫ︀ႆ︀ႇꩫ︀က︀ေႃႇၵ︀ွꩫ︀်ꩡ︀ဝ်ႛယ︀ေꩬ︀ု ဢ︀ၵ︀ၢင︀်းမ︀ဝ်ꩭႂ်ႛꩫ︀ႆ︀ႇꩬ︀ီ 8မ︀ိူင︀်းမ︀ုတ︀ိမ︀ႆ︀ႛပ︀ူꩫ︀်ႇꩬ︀ီ ဝီင︀်းတ︀ရ︀ေႃမ︀ႆ︀ႛထိုင︀်က︀ႃဢ︀ူ။ 9ၵ︀မ︀်ႈဢ︀မ︀ႂ်းမ︀ႆ︀ႛ ပ︀ေႃလ︀ုၿျႃၻိက︀်ႉꩭꩫ︀်ꩫ︀ႆ︀ႇ က︀ူꩫ︀်းမ︀ိူင︀်းမ︀ႃက︀ေတ︀ေႃꩫ︀ိက︀ူဝ်ႇလ︀ိူင︀်ႈꩬ︀ဝ်းꩬ︀ီ “မ︀ိူင︀်းတ︀ူႈမ︀ႆ︀ႛမ︀ႃးꩬ︀ီ တ︀ူႈၵ︀ႃႛမ︀ႆ︀ႛꩡ︀ွႆ︀ႈတ︀ီၵ︀ႃႛမ︀ႃးတ︀ႃႉ” ꩫ︀ꩬ︀ီမ︀ꩫ︀်းမ︀ႆ︀ႛ ဝွꩫ︀်းၵ︀ႅꩫ︀်းဢ︀ူ။ 10မ︀ွင︀်းပ︀ေႃလ︀ုꩭꩫ︀်ၿျႃၻိက︀်ႉယ︀ႃႇ ဢ︀ꩫ︀်ႈတ︀ူႈမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ႂ်ႇꩭႂ်ႛက︀ႃမ︀ိူင︀်းမ︀ႃက︀ေတ︀ေႃꩫ︀ိ ꩭႂ်ႛꩭူဝ်းၵ︀ၢဝ်ႈၵ︀ၢမ︀်းꩫ︀ီႈꩫ︀မ︀်ꩫ︀ꩬ︀ီ တ︀ူႈတ︀ႅပ︀်တ︀တ︀်ꩬ︀ီ တ︀ူႈꩬ︀ၢင︀်က︀ႃမ︀ိူင︀်းမ︀ႃက︀ေတ︀ေႃꩫ︀ိဢ︀ူ။
လ︀ွင︀်ႈဝီင︀်းၸ︀ိလ︀ိပ︀်ပ︀ၢႆ︀မ︀ႆ︀ႛ လ︀ေတ︀ီယ︀ႃပ︀ီꩫ︀်ႈၸ︀ူႛယ︀ုမ︀်ယ︀မ︀်ႈမ︀ႃး
11တ︀ူႈလ︀ုက︀်ႉဝီင︀်းတ︀ရ︀ေႃမ︀ႆ︀ႛ ၵ︀ီꩬ︀ၢင︀်ႈၸ︀ူဝ်းက︀ႃꩬ︀ိုဝ်ႈꩰꩬ︀ီ က︀ႃင︀ွꩫ︀်ႈမ︀ေႃတ︀ရ︀ႅတ︀်က︀ီး ꩫ︀င︀်မ︀ိူဝ်ႈꩭုက︀်ႉ ဝီင︀်းꩫ︀ႃပ︀ေႃလ︀ိမ︀ႆ︀ႛထိုင︀်က︀ႃဢ︀ူ။ 12လ︀ုက︀်ႉဝီင︀်းဢ︀မ︀ႂ်းမ︀ႆ︀ႛ တ︀ူႈက︀ႃဝီင︀်းၸ︀ိလ︀ိပ︀်ပ︀ၢႆ︀ဢ︀ူ။ ဝီင︀်းဢ︀မ︀ႂ်းယ︀ႃႇ ဝီင︀်းဢ︀ꩫ︀်ႈမ︀ိူင︀်းမ︀ႃက︀ေတ︀ေႃꩫ︀ိ မ︀ႆ︀ႛၵ︀ဝ်ႛက︀ီး ဢ︀ꩫ︀်ႈထိုင︀်ဢ︀ွꩫ︀်ႈ၊ ဢ︀ꩫ︀်ႈက︀ူꩫ︀်းရ︀ေႃမ︀ၵ︀ဝ် ဢ︀ုပ︀်ႉက︀ိꩫ︀်ႈꩫ︀မ︀်။ ဝီင︀်းဢ︀မ︀ႂ်းမ︀ႆ︀ႛ တ︀ူႈဢ︀ူꩭိုင︀်မ︀ႃးဢ︀ူ။ 13ဝꩫ︀်းက︀မ︀်ႈꩬ︀ိꩫ︀်မ︀ႆ︀ႛ တ︀ူႈက︀ꩫ︀်ႛꩫ︀ွက︀်ႉဝီင︀်းမ︀ႆ︀ႛꩡ︀ွꩫ︀်လ︀ိူင︀်ႈ ဢ︀ွက︀်က︀ႃꩬ︀ီꩭိမ︀်းꩫ︀မ︀်ႇလ︀ူင︀် တ︀ီႈဢ︀ꩫ︀်ႈက︀ျူးꩫ︀ႆ︀ႇၵ︀ဝ်ယ︀ွꩫ︀်းꩬ︀ူးꩵ︀ထၢင︀်ႇꩫ︀ꩫ︀ႆ︀ႇမ︀ႆ︀ႛ က︀ႃꩫ︀င︀်ႈဢ︀ူ။ ယ︀ဝ်ႇက︀ီး တ︀င︀်းၸ︀ူႛယ︀ိင︀်းဢ︀ꩫ︀်ႈဢ︀မ︀ႂ်းမ︀ႆ︀ႛ ꩫ︀င︀်တ︀ုမ︀်ႈက︀ꩫ︀်ႈꩫ︀ႆ︀ႇၵ︀ဝ် တ︀ူႈမ︀ူꩫ︀်ႈၵ︀ၢဝ်ႈၵ︀ၢမ︀်းꩫ︀ီႈဢ︀ူ။ 14ၸ︀ုင︀်ဢ︀မ︀ႂ်းမ︀ႆ︀ႛ လ︀ေတ︀ီယ︀ႃꩫ︀ꩫ︀ႆ︀ႇၸ︀ူႛယ︀ိင︀်းက︀ူဝ်ႇလ︀ိူင︀်ႈ က︀ူꩫ︀်းဝီင︀်းတ︀ွႃတ︀ိရ︀ ဢ︀ꩫ︀်ႈၸ︀ူႛက︀ႃႇမ︀ꩫ︀်ႛꩫ︀ႅင︀်ႈꩫ︀ႆ︀ႇ လ︀ွေႛဢ︀ူ။ မ︀ꩫ︀်းယ︀ႃႇၸ︀ူႛပ︀ႆ︀ၢႛဝႆ︀ႈၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်။ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩭႂ်ႛပ︀ူဝ်းၸ︀ူႛယ︀ိင︀်းဢ︀မ︀ႂ်း ၵ︀ၢမ︀်းၸ︀ြႃးဢ︀ꩫ︀်ႈပ︀ေႃလ︀ုꩭူဝ်းမ︀ႆ︀ႛ ꩡ︀ႂ်ႈလ︀ွေႛꩬ︀ီထွမ︀်ꩫ︀ႆ︀ႇ ꩭူဝ်ꩡ︀ႂ်ႈမ︀ꩫ︀်းမ︀ႆ︀ႛမ︀ေးꩭႅမ︀်းꩭႂ်ႛဢ︀ူ။ 15င︀ႆ︀းꩬ︀ီ မ︀ꩫ︀်းင︀ႆ︀းက︀ူꩫ︀်းꩭိူꩫ︀်းမ︀ꩫ︀်းတ︀င︀်းꩭိူꩫ︀်း ꩭူမ︀်ႈꩭၢပ︀်ႉမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇဢ︀ူ။ ယ︀ဝ်ႇက︀ီးမ︀ꩫ︀်းယ︀ႃႇ “ꩬ︀င︀်ဝႃႈꩬ︀ူꩡ︀ဝ်ႛ က︀ဝ်ႈၵ︀ႃႛမ︀ႆ︀ႛ မ︀တ︀်ႉၸ︀ူႛယ︀ုမ︀်ယ︀မ︀်ႈတ︀ေႇတ︀ေႇꩫ︀မ︀်ꩫ︀က︀ီး ꩭိူꩫ︀်းတ︀ူႈၵ︀ႃႛမ︀ႆ︀ႛ မ︀ႃးꩬ︀ဝ်းတ︀ီၵ︀ႃႛမ︀ႃးတ︀ႃႉ” ꩫ︀ꩬ︀ီ တ︀ူႈမ︀ႆ︀ႛတ︀င︀်းꩡ︀ႂ်ႈတ︀င︀်းၵ︀ူဝ်းပ︀ၢင︀်းဢ︀ူ။
လ︀ွင︀်ႈပ︀ေႃလ︀ုꩫ︀ၵ︀ႃတ︀ိလ︀ ထွင︀်မ︀ႆ︀ႛယ︀ူဝ်းယ︀ွင︀်ႛၸ︀ြႃး
16ဝꩫ︀်းလ︀ိူင︀်ႈ တ︀ူႈတ︀ီႈဢ︀ꩫ︀်ႈယ︀ွꩫ︀်းꩬ︀ူးမ︀ႆ︀ႛက︀ႃက︀ီး ၸ︀ူႛယ︀ိင︀်းဢ︀ွꩫ︀်က︀ူဝ်ႇလ︀ိူင︀်ႈ ဢ︀ꩫ︀်ႈပ︀ိူꩫ︀်ႈꩬ︀ိုဝ်ႇꩭီတ︀်ၸ︀ူႛၵ︀ႃႛဝႆ︀ႇ ဢ︀ꩫ︀်ႈၸ︀ီၵ︀ဝ်ႛꩬ︀ီ ꩭူဝ်းပ︀ေတ︀ၢင︀်ꩫ︀ႆ︀ႛꩫ︀ႆ︀ႇမ︀ႆ︀ႛꩭꩫ︀်ဢ︀ူ။ မ︀ꩫ︀်းယ︀ႃႇ ꩭူဝ်းပ︀ေတ︀ၢင︀်င︀ႆ︀း ꩡ︀ဝ်ႛမ︀ꩫ︀်းၵ︀ဝ်မ︀ႆ︀ႛ င︀ိူꩫ︀်းဢ︀ၢꩫ︀်တ︀ၢꩫ︀်ဢ︀ဝ်ႈꩫ︀ႆ︀ႛꩭႂ်ႛဢ︀ူ။ 17ၸ︀ူႛယ︀ိင︀်းဢ︀ွꩫ︀်ဢ︀မ︀ႂ်းယ︀ႃႇ က︀ꩫ︀်ႛလ︀င︀်တ︀ူႈမ︀ႆ︀ႛꩡ︀ွမ︀်းꩬ︀ီ “က︀ူဝ်ႇꩫ︀ႆ︀ႇၵ︀ဝ်ယ︀ႃႇ ၸ︀ူႛၵ︀ႃႛၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈၵ︀ႅꩫ︀်းꩬ︀ုင︀်၊ ဢ︀ꩫ︀်ႈၵ︀ႅꩫ︀်းယ︀ႂ်မ︀ႅတ︀်ႉꩫ︀ႆ︀ႇꩫ︀မ︀်။ ၵ︀ဝ်ယ︀ႃႇ မ︀ႃးꩭူဝ်းတ︀ြႃးဢ︀ꩫ︀်ႈꩬ︀ူမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛꩭလ︀ိုဝ်ၵ︀ေꩬ︀ေꩭႂ်ႛꩫ︀ꩫ︀ႆ︀ႇꩫ︀မ︀်” ꩫ︀ꩬ︀ီဢ︀ိဝ်ဢ︀ူ။ 18င︀ႆ︀းꩬ︀ီ ၸ︀ူႛယ︀ိင︀်းဢ︀ွꩫ︀်ဢ︀မ︀ႂ်း လ︀ႆ︀ၢဝꩫ︀်းဢ︀ိဝ်ꩬ︀ီဢ︀ူꩫ︀ႆ︀ႇꩬ︀ီ ပ︀ေႃလ︀ု ꩡ︀ႂ်ႈꩬ︀ဝ်ႛမ︀ႃးင︀ႆ︀းꩬ︀ီ က︀ꩫ︀်ႛလ︀င︀်မ︀ႆ︀ႛဝိꩫ︀်င︀ႆ︀း “ꩭိူဝ်း ၸ︀ီမ︀ိက︀်ႉꩬ︀ႃ မ︀ႂ်းမ︀ႆ︀ႛဢ︀ဝ်ႈꩡ︀ိုဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀် ဢ︀မ︀ိင︀်းꩭႂ်ႛဢ︀ူ။ လ︀ုက︀်ႉမ︀ꩫ︀်းမ︀ႆ︀ႛ ဢ︀ွက︀်က︀ႃတ︀ႃႉ” ꩫ︀က︀ီး ၸ︀ီဢ︀မ︀ႂ်းက︀ꩡ︀ူးဢ︀ွက︀်က︀ႃဢ︀ူ။ 19ၸ︀ူႛပ︀ီꩫ︀်ႈꩡ︀ဝ်ႛ ၸ︀ူႛယ︀ိင︀်းဢ︀ွꩫ︀်ဢ︀မ︀ႂ်းၵ︀ဝ်ယ︀ႃႇ တ︀ၢင︀်းဢ︀ꩫ︀်ႈၵ︀ဝ်တ︀ီꩫ︀ႆ︀ႛင︀ိူꩫ︀်းꩫ︀ႆ︀ႇ ꩭၢပ︀်က︀ႃယ︀ဝ်ႇꩫ︀ꩫ︀ႆ︀ႇတ︀ွင︀်းက︀ႃက︀ီး ပ︀ေႃလ︀ုꩫ︀ၵ︀ႃတ︀ိလ︀မ︀ႆ︀ႛꩬ︀ႅဝ်ႛၵ︀ွတ︀်ဢ︀ူ။ ယ︀ဝ်ႇက︀ီးꩬ︀ွင︀်ၵ︀ႃမ︀ႆ︀ႛ ပ︀ၢင︀်ဢ︀ꩫ︀်ႈက︀ူꩫ︀်းမ︀ိူင︀်းတ︀ုမ︀်ႈမ︀ႆ︀ႛ က︀ꩫ︀်ႛꩫ︀ႃႛꩡ︀ဝ်ႛၵ︀ုꩫ︀်ရ︀ေႃမ︀ၵ︀ဝ်မ︀ႆ︀ႛ ꩡ︀ꩫ︀်ႈက︀ႃင︀ႆ︀း 20“က︀ူဝ်ႇꩫ︀ႆ︀ႇၵ︀ဝ်ယ︀ႃႇ က︀ျူးဢ︀ꩫ︀်ႈ ဝီင︀်းꩭဝ်းမ︀ႆ︀ႛဢ︀ဝ်ႈဢ︀ုက︀်ꩰဢ︀ဝ်ꩰက︀ꩫ︀်ႈꩫ︀ႆ︀ႇၵ︀ဝ်ꩫ︀မ︀်။
21ၵ︀ဝ်ယ︀ႃႇ ထုင︀်းၸ︀ိင︀်ႛဢ︀ꩫ︀်ႈတ︀င︀်း ပ︀ိူင︀်ႈတ︀ူႈမ︀ဝ်ꩥ︀ႃးက︀ꩫ︀်ႈꩫ︀ႆ︀ႇၵ︀ဝ် ꩬ︀ွꩫ︀်ꩬ︀ီဢ︀ူဢ︀ူ။ တ︀ူႈက︀ူꩫ︀်းမ︀ိူင︀်းရ︀ေႃမ︀ꩫ︀ႆ︀ႇၵ︀ဝ်ယ︀ႃႇ ထုင︀်းၸ︀ိင︀်ႛၸ︀ꩫ︀်းꩫ︀င︀်င︀ႆ︀းꩫ︀ႆ︀ႇၵ︀ဝ်ꩵ︀ႈၵ︀ႂ်ႈꩭၢပ︀်ႉ။ ꩡ︀ွမ︀်းက︀ေႃႇꩵ︀ႈပ︀ီꩫ︀်ႈ” ꩫ︀ꩬ︀ီ ꩡ︀ဝ်ႛၵ︀ုꩫ︀်ၵ︀ဝ်မ︀ႆ︀ႛꩬ︀ွက︀်ႉဢ︀ူ။ 22ၸ︀ုင︀်က︀ူꩫ︀်းꩫ︀ႆ︀ႇၵ︀ဝ်က︀ေႃႇ ပ︀ႃႛဢ︀ꩫ︀်ႈꩡ︀ွႆ︀းတ︀ြႃးꩫ︀ႆ︀ႇၵ︀ဝ်မ︀ႆ︀ႛ လ︀ွေႛꩬ︀ီ ပ︀ေႃလ︀ုꩫ︀ၵ︀ႃတ︀ိလ︀မ︀ႆ︀ႛ ပ︀ိꩫ︀်ႇဢ︀ပ︀ႅတ︀်ႉက︀ꩫ︀်ႈဢ︀ူ။ ꩫ︀ႆ︀ႇမ︀ႆ︀ႛ ꩡ︀ဝ်ႛၵ︀ုꩫ︀်ꩫ︀ႆ︀ႇၵ︀ဝ်ယ︀ႃႇ ၵ︀ိူင︀်ႈꩬ︀ွင︀်ၵ︀ႃမ︀ႆ︀ႛ ꩭႂ်ႛꩡ︀ႅက︀်ၵ︀ွတ︀်ꩬ︀ီ ဢ︀မ︀ိင︀်းတ︀ၢမ︀်ၵ︀ွꩫ︀်ႇၵ︀ျႃးꩭႂ်ႛဢ︀ူ။ 23လ︀ုက︀်ႉꩬ︀ိူက︀်ꩫ︀ႆ︀ႇၵ︀ဝ်က︀ေႃႇ ပ︀ေႃလ︀ုꩫ︀ၵ︀ႃတ︀ိလ︀မ︀ႆ︀ႛ ဢ︀ဝ်ႈၵ︀ွꩫ︀်ႇဝႆ︀ၢ တ︀ုက︀်ႉၸ︀ႃႇတ︀ုက︀်ႉမ︀ိူင︀်းယ︀ဝ်ႇက︀ီး ꩬ︀ႂ်ထွင︀်ဝႆ︀ႇဢ︀ူ။ ၸ︀ူႛင︀မ︀်းထွင︀်မ︀ႆ︀ႛက︀ေႃႇ ဢ︀မ︀ိင︀်းꩭႂ်ႛꩬ︀ီ ꩬ︀ွင︀်ၵ︀ႃမ︀ႆ︀ႛ ꩭႂ်ႛၵ︀င︀်ဝႆ︀ႇက︀တ︀်ႉꩰဢ︀ူ။ 24ꩫ︀င︀်ဢ︀ꩫ︀်ႈဢ︀မ︀ိင︀်းꩭႂ်ႛဝႆ︀ႇꩫ︀က︀ꩫ︀်ႈ ၸ︀ူႛင︀မ︀်းထွင︀်ꩫ︀ႆ︀ႇ ပ︀ေႃလ︀ုꩫ︀ၵ︀ႃတ︀ိလ︀မ︀ႆ︀ႛ ၵ︀ွက︀်ႉက︀ꩫ︀်ႛꩫ︀ႂ်းလ︀ေႚလ︀ေႚမ︀ႆ︀ႛ ၵ︀င︀်ဝႆ︀ႇꩬ︀ီတ︀ိꩫ︀်ႈꩬ︀ွင︀်ၵ︀ႃမ︀ႆ︀ႛ ꩬ︀ႂ်ၵ︀ိုဝ်ဝႆ︀ႇဢ︀ူ။
25ယ︀ၢꩫ︀်ႈက︀ၢင︀်ႈၵ︀ိုꩫ︀်းမ︀ႆ︀ႛ ပ︀ေႃလ︀ုꩫ︀ၵ︀ႃတ︀ိလ︀ယ︀ႃႇ ယ︀ွꩫ︀်းꩬ︀ူးင︀ႆ︀းယ︀ူဝ်းယ︀ွင︀်ႛက︀ျေးꩡ︀ူးၸ︀ြႃးပ︀ီꩫ︀်ႈꩡ︀ဝ်ႛꩬ︀ီဢ︀ူဢ︀ူ။ က︀ူꩫ︀်းထွင︀်တ︀ၢင︀်က︀ူဝ်ႇꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈꩬ︀ွင︀်ၵ︀ႃယ︀ူဝ်းယ︀ွင︀်ႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ထွမ︀်ꩬ︀ီဢ︀ူဢ︀ူ။ 26မ︀ိူဝ်ႈဢ︀မ︀ႂ်း က︀တ︀ိက︀်က︀ႃႈꩭႅင︀်းဢ︀ိင︀်ႈꩬ︀ꩫ︀်မ︀ႃးꩬ︀ီ ꩬ︀ူꩫ︀်ႛꩬ︀ဝ်ထွင︀်ꩫ︀ႆ︀ႇၵ︀ဝ်တ︀မ︀ိူင︀်း ၵ︀ွꩫ︀်းက︀ႃဢ︀ူ။ င︀ႆ︀းꩬ︀ီတ︀ၢင︀်းပ︀တ︀ူႈထွင︀်တ︀င︀်းမ︀ိူင︀်း ၵ︀တ︀်ႉၵ︀ႅင︀်းပ︀ုတ︀်က︀ႃမ︀ူတ︀်ဢ︀ူ။ ꩬ︀ၢႆ︀လ︀ီက︀်ဢ︀ꩫ︀်ႈက︀ူꩫ︀်းထွင︀်ꩫ︀ႆ︀ႇၵ︀ဝ်မ︀ႆ︀ႛ ၸ︀ုက︀်ဝႆ︀ႇၵ︀တ︀်ႉဝႆ︀ႇꩫ︀ႆ︀ႇၵ︀ဝ်တ︀င︀်းမ︀ိူင︀်းက︀ေႃႇ လ︀ူꩫ︀်တ︀ူက︀်က︀ႃမ︀ူတ︀်ဢ︀ူ။ 27ၸ︀ူႛင︀မ︀်းထွင︀်ꩫ︀ႆ︀ႇ ꩫ︀ွꩫ︀်းတ︀ိꩫ︀်မ︀ႃးက︀ီး တ︀ၢင︀်းပ︀တ︀ူႈထွင︀်ꩫ︀ႆ︀ႇၵ︀ဝ် ပ︀ုတ︀်က︀ꩫ︀်ႈꩫ︀ႆ︀ႇမ︀ႆ︀ႛꩭꩫ︀်ꩬ︀ီ ၵ︀ꩫ︀်တ︀ႂ်းက︀ူꩫ︀်းထွင︀်ꩫ︀ႆ︀ႇၵ︀ဝ် ပ︀ႆ︀ၢႈက︀ႃမ︀ူတ︀်ဢ︀ူ။ င︀ႆ︀းꩬ︀ီ ၸ︀ႃႇထွတ︀်ꩡ︀ၢတ︀်ꩫ︀ꩬ︀ီ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ တ︀ိူက︀်ႉꩬ︀ၢင︀်တ︀ႅင︀်းတ︀ႆ︀ၢႈꩫ︀ႆ︀ႇမ︀ႆ︀ႛ 28ပ︀ေႃလ︀ုယ︀ႃႇ “ꩭိူဝ်း ပ︀ီꩭီတ︀်၊ တ︀ူႈတ︀င︀်းမ︀ိူင︀်းမ︀ႆ︀ႛယ︀င︀်းဢ︀ူ” ꩫ︀ꩬ︀ီ က︀ႃႈꩭႅင︀်း ဢ︀ိဝ်ꩬ︀ီဝႃႈဢ︀ူ။ 29ꩫ︀ႆ︀ႇမ︀ႆ︀ႛ ၸ︀ူႛင︀မ︀်းထွင︀်ꩫ︀ႆ︀ႇ ၸ︀ႆ︀းဢ︀ဝ်ႈꩬ︀ီလ︀ႅꩫ︀်ႈၵ︀ဝ်ႛမ︀ႃးင︀ႆ︀း တ︀ႆ︀ၢႛတ︀ိꩫ︀်ႈပ︀ေႃလ︀ုꩫ︀ၵ︀ႃတ︀ိလ︀မ︀ႆ︀ႛ ꩬ︀ꩫ︀်ထႅပ︀်ႉꩰꩬ︀ီမ︀ႃးၵ︀ုပ︀်ႉၵ︀ဝ်ဢ︀ူ။ 30ယ︀ဝ်ႇက︀ီး ꩬ︀ွင︀်ၵ︀ႃမ︀ႆ︀ႛꩭွင︀်ႇဢ︀ွက︀်မ︀ႃးꩬ︀ီ “ꩡ︀ဝ်ႛၵ︀ဝ်ꩴ︀း ꩭႂ်ႛပ︀ူဝ်းက︀ဝ်ႈၵ︀ႃႛမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ၵ︀ေꩬ︀ေꩫ︀ႆ︀ႇဝႃႈꩭိုဝ်လ︀ိုဝ်တ︀ီၵ︀ႃꩫ︀ႆ︀” ꩫ︀ꩬ︀ီထၢမ︀်ဢ︀ူ။ 31ꩬ︀ွင︀်ၵ︀ႃက︀ေႃႇ “ꩡ︀ဝ်ႛယ︀ေꩬ︀ုမ︀ႆ︀ႛ ယ︀ုမ︀်ယ︀မ︀်ႈတ︀ႃႉ။ င︀ႆ︀းက︀ီး ꩬ︀ူတ︀င︀်းꩭိူꩫ︀်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ၵ︀ေꩬ︀ေꩭႂ်ႛဢ︀ူ” ꩫ︀ယ︀ဝ်ႇက︀ီး 32ၵ︀ဝ်တ︀င︀်းꩭိူꩫ︀်းမ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ီႈꩭူဝ်းꩭႂ်ႛဢ︀ူ။ 33ၵ︀မ︀်ႈဢ︀မ︀ႂ်းမ︀ႆ︀ႛက︀ꩡ︀ူး ၸ︀ူႛင︀မ︀်းထွင︀်ꩫ︀ႆ︀ႇ ပ︀ေႃလ︀ုꩫ︀ၵ︀ႃတ︀ိလ︀မ︀ႆ︀ႛꩭွင︀်ႇꩬ︀ီ တ︀ီႈꩡ︀ီပ︀်ၵ︀ဝ်မ︀ႆ︀ႛꩬ︀ုက︀်ႉꩭႂ်ႛယ︀ဝ်ႇက︀ီး ၵ︀ဝ်တ︀င︀်းꩭိူꩫ︀်း ၵ︀တ︀်ႉၵ︀ႅင︀်းꩭူမ︀်ႈꩭၢပ︀်ႉမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇဢ︀ူ။ 34ယ︀ဝ်ႇက︀ီးၸ︀ူႛင︀မ︀်းထွင︀်ꩫ︀ႆ︀ႇ ပ︀ေႃလ︀ုꩫ︀ၵ︀ႃတ︀ိလ︀မ︀ႆ︀ႛ ပ︀ၢင︀်းက︀ႃꩭိူꩫ︀်းၵ︀ဝ်ꩬ︀ီ ဢ︀ꩫ︀်ႈက︀ိꩫ︀်ႈꩫ︀ႆ︀ႇၵ︀ဝ်လ︀ီင︀်ႇဢ︀ူ။ က︀ူꩫ︀်းꩭိူꩫ︀်းမ︀ꩫ︀်းၵ︀ဝ်ယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛယ︀ုမ︀်ယ︀မ︀်ႈမ︀ႃးꩫ︀ႆ︀ႇꩬ︀ီ ꩭုမ︀်ꩰꩡ︀ူမ︀်းꩰက︀ꩫ︀်ႈဢ︀ူ။
35ꩫ︀င︀်မ︀ိူဝ်ႈꩭုက︀်ႉ ၸ︀ႃႇလ︀ႅင︀်းက︀ီး က︀ူꩫ︀်းယ︀ႂ်ရ︀ေႃမ︀ꩫ︀ႆ︀ႇၵ︀ဝ်ယ︀ႃႇ ꩭူဝ်ꩭၢꩫ︀်ꩫ︀ႆ︀ႇၵ︀ဝ်မ︀ႆ︀ႛ ဢ︀မ︀ိင︀်းꩭႂ်ႛꩬ︀ီ ပ︀ေႃလ︀ုꩫ︀ၵ︀ႃတ︀ိလ︀မ︀ႆ︀ႛꩭႂ်ႛပ︀ွႆ︀ဢ︀ူ။ 36ꩫ︀ႆ︀ႇမ︀ႆ︀ႛ ၸ︀ူႛင︀မ︀်းထွင︀်ꩫ︀ႆ︀ႇပ︀ေႃလ︀ုမ︀ႆ︀ႛ “က︀ူꩫ︀်းယ︀ႂ်ꩫ︀ႆ︀ႇၵ︀ဝ်ဢ︀မ︀ိင︀်းꩭႂ်ႛꩬ︀ီ ꩬ︀ူꩡ︀ဝ်ႛမ︀ႆ︀ႛꩭႂ်ႛပ︀ွႆ︀ဢ︀ူ။ င︀ႆ︀းꩫ︀ႆ︀ႇꩬ︀ီ ꩡ︀ႂ်ႈယ︀ီꩫ︀်ႈꩰꩬ︀ီက︀ႃတ︀ီၵ︀ႃႛတ︀ႃႉ” ꩫ︀ဝꩫ︀်ႇ။ 37ꩫ︀ႆ︀ႇꩫ︀က︀ေႃႇ ပ︀ေႃလ︀ုယ︀ႃႇ “ꩭၢင︀်းၵ︀ိူဝ်ဢ︀ꩫ︀်ႈၸ︀ူႛပ︀ီꩫ︀်ႈက︀ူꩫ︀်းမ︀ိူင︀်းရ︀ေႃမ︀ꩫ︀ႆ︀ႇၵ︀ဝ်မ︀ႆ︀ႛ မ︀ဝ်ꩡ︀ႅပ︀်ႉမ︀ဝ်ထၢမ︀်ꩬ︀ီ က︀ꩫ︀်ႛꩫ︀ႃႛက︀ူꩫ︀်းမ︀ႆ︀ႛတ︀ုက︀်ႉင︀ႆ︀း ꩬ︀ႂ်ထွင︀်ဝႆ︀ႇယ︀ဝ်ႇက︀ီး င︀ႆ︀ႚတ︀ီတ︀်ꩡ︀ိပ︀်ႉꩰꩬ︀ီ ၵ︀ႂ်ႈပ︀ွႆ︀ဝၢင︀်က︀ေႃႇꩫ︀ႆ︀ႛꩫ︀ႃႊ။ င︀ႆ︀းꩭီတ︀်ꩵ︀ႈꩫ︀ႆ︀ႛ။ က︀ူꩫ︀်းယ︀ႂ်ၵ︀ဝ်ၸ︀ူႛꩡ︀ဝ်ႛ ꩭႂ်ႛမ︀ႃးꩬ︀ီꩭၢင︀်းၵ︀ိူဝ်မ︀ႆ︀ႛ ꩭႂ်ႛမ︀ႃးပ︀ွႆ︀တ︀ႃႉ” ꩫ︀ꩬ︀ီ ꩭူဝ်ꩭၢꩫ︀်ꩫ︀ႆ︀ႇၵ︀ဝ်မ︀ႆ︀ႛဝႃႈဢ︀ူ။ 38ꩭူဝ်ꩭၢꩫ︀်ꩫ︀ႆ︀ႇၵ︀ဝ်က︀ေႃႇက︀ႃꩬ︀ီ ၵ︀ၢမ︀်းꩫ︀ႆ︀ႇက︀ူꩫ︀်းယ︀ႂ်ꩫ︀ႆ︀ႇၵ︀ဝ်မ︀ႆ︀ႛ က︀ႃၵ︀ႆ︀ႈꩭႂ်ႛဢ︀ူ။ က︀ူꩫ︀်းယ︀ႂ်ꩫ︀ႆ︀ႇၵ︀ဝ်က︀ေႃႇ ပ︀ေႃလ︀ုꩫ︀ၵ︀ႃတ︀ိလ︀ ပ︀ီꩫ︀်ႈက︀ူꩫ︀်းမ︀ိူင︀်းရ︀ေႃမ︀ꩫ︀မ︀်ꩫ︀ꩫ︀ႆ︀ႇ ꩫ︀ႆ︀ႛꩥ︀ိꩫ︀်းက︀ီး က︀ူဝ်ႈက︀ꩫ︀်ႈဢ︀ူ။ 39င︀ႆ︀းꩬ︀ီ ၵ︀ဝ်ယ︀ႃႇပ︀ေႃလ︀ုꩫ︀ၵ︀ႃတ︀ိလ︀မ︀ႆ︀ႛ မ︀ႃးၵ︀ႅꩫ︀်းဝꩫ︀်းဢ︀ူ။ ယ︀ဝ်ႇက︀ီးꩬ︀ွင︀်ၵ︀ႃမ︀ႆ︀ႛ လ︀ုက︀်ႉထွင︀်မ︀ႆ︀ႛဢ︀ဝ်ႈဢ︀ွက︀်ꩬ︀ီ လ︀ုက︀်ႉဝီင︀်းဢ︀မ︀ႂ်းမ︀ႆ︀ႛꩭႂ်ႛဢ︀ွက︀်က︀ႃဢ︀ူ။ 40ꩬ︀ွင︀်ၵ︀ႃက︀ေႃႇ လ︀ုက︀်ႉထွင︀်မ︀ႆ︀ႛဢ︀ွက︀်ꩬ︀ီ က︀ႃꩭိူꩫ︀်းလ︀ေတ︀ီယ︀ႃဢ︀ူ။ ဢ︀မ︀ႂ်းမ︀ႆ︀ႛ တ︀င︀်းၸ︀ူႛယ︀ုမ︀်ယ︀မ︀်ႈ ꩫ︀ႆ︀ႇၵ︀ဝ် ꩭꩫ︀်က︀ꩫ︀်ႈင︀ႆ︀း ၵ︀ဝ်မ︀ႆ︀ႛꩬ︀ႂ်ꩭႅင︀်းꩭႂ်ႛယ︀ဝ်ႇက︀ီး လ︀ုက︀်ႉဝီင︀်းဢ︀မ︀ႂ်းမ︀ႆ︀ႛဢ︀ွက︀်က︀ႃဢ︀ူ။

Highlight

Share

Copy

None

Want to have your highlights saved across all your devices? Sign up or sign in