Tito 3
3
Ko te Āmio Kelihiano
1Fakamanatu ki nā tino ke talia e ki lātou te pule a aliki ma nā taupulega, ke uhitaki ki ei ma ke nonofo hāuni ke fai ho he gāluega lelei. 2Lea ki ei ke nahe ki lātou tautatala i ni kupu kino ki ho he tino, kae ke nonofo fīlēmū ma fealofani, ma ke fakaaloalo ki tagata uma. 3Auā ko ki tātou foki nae vālelea, hē uhitaki ma nae hehē. Ko ki tātou nae fai ma pologa ki manakoga ma tuinanauga kehekehe. Ko ki tātou nae ola i he ōlaga tau fakakino ma te fuā; nae inohia ki tātou e tagata ma nae inoino foki ki tātou ki a te ki lātou. 4Kae kua fakaali mai e te Atua to tātou Fakaola tona agalelei ma tona alofa, 5ma kua fakaola ai ki tātou. E hē ona ni gāluega lelei na ki tātou faia, kae ona ko tona alofa fakahao mo ki tātou. E ala i te mana o tona Agaga na ia fakamamāgia ai ki tātou ma mafai ai ke toe fanaufougia ki tātou ma maua ai e ki tātou te ola fou. 6Kua fōki fua mai e te Atua te Agaga Paia ki a ki tātou e ala ia Iehu Keliho to tātou Fakaola, 7kae ke mafai ai ke fakalelei te va o ki tātou ma te Atua e ala i tona alofa tūnoa, ma maua ai e ki tātou te ola e fakavavau tēia e fakamoemoe ki tātou ki ei. 8Ko te fakakupuga tēnei e hako.
Ko au e fofou ko koe ke fakamākeke oi tautala i nā mea iēnei, kae ke mafai ai nā tino kua talitonu ki te Atua ke fano hako o lātou taimi ki te faiga o nā mea e lelei, ma fai ai e ki lātou ni gāluega e lelei ma aogā. 9Kae kalo kehe mai nā tauaiga kupu valea, nā talagā gafa, nā fefīnauakiga, ma nā tauaimihaga e uiga ki te Tūlāfono. Ko nā mea iēnei e hēai he uiga ma hēai he aogā. 10Lapataki fakafokotahi pe fakalua ki nā tino e fakatupua nā fekehekeheakiga, kā hēai lava oi tīaki vē loa nahe kē toe amanakiagia. 11E iloa e koe ko nā tino vēnei kua nunumi nā māfaufau, ma ko a lātou agahala e fakamāonia ai to lātou hehē i mua o te Atua.
Nā toe Fakahinoga
12 #
Gāl 20.4; Efe 6.21-22; Klh 4.7-8; 2 Tim 4.12 Kua tonu ia te au ke uga atu he tino o Atemani pe ko Tuhiko. Kāfai e pa atu, fakamolemole taumafai ke fetaui ki tāua i Nikapoli, auā kua fuafua e au ko au ka nofo i kinā i te taumālūlū. 13#Gāl 18.24; 1 Kol 16.12Kāfai ia Hena te loia ma Apolo e laga te faigāmalaga, fehoahoani ifo ko ki ei ke mautinoa e maua uma e ki lāua nā mea e fofou ki ei. 14E tatau o tātou tagata Kelihiano i Kelete ke ki lātou iloa oi fakaaogā o lātou taimi ke fai ai ni gāluega lelei, kae ke mafai ai ke fehoahoani ki nā tino e fofou vave ki he fehoahoani; e hē tatau ke ola ki lātou i he ōlaga e hē tupu mai ai ni fua lelei.
15E fakafeiloaki atu ki a te koe ki lātou uma e fakatahi ki mātou. E fakafeiloaki atu foki ki a mātou uō Kelihiano e alolofa mai ki a te ki mātou.
Ke ia te koutou uma te alofa tūnoa o te Atua.
Currently Selected:
Tito 3: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.
