Filemoni 1
1
1Mai ia Paulo, tē kua kavea ma pagotā ona ko Keliho Iehu, ma to tātou uho ko Timoteo —
Ki a Filemoni, te uō ma te hoa i luga o te gāluega, 2#Klh 4.17ma te Ekalehia e fai tāpuakiga i tō fale; ma te tuafafine ki a Afia, ma ki a Alihipo to mātou hoātau e vē he fitafita:
3Ke ia te koutou te alofa tūnoa ma te fīlēmū mai te Atua to tātou Tamana ma to tātou Aliki ko Iehu Keliho.
Ko te Alofa ma te Talitonu o Filemoni
4Ko nā taimi uma lava e tatalo ai au, e kō tākua pea lava tō igoa ma fakafetai au ki toku Atua. 5Auā kua fakalogo au ki tō alofa ki tagata o te Atua, ma tō talitonu ki te Aliki ko Iehu. 6Ko taku tatalo ko te fakatahiga a ki mātou ma koutou iēnā kua talitonu, ka maua ai he mālamalamaga lelei e uiga ki nā fakamanuiaga takitahi uma kua ki tātou mauagia, i te māfutaga ma Keliho. 7Auā ko tō alofa, te uho pele, kua maua ai e au te fiafia lahi ma kua toe fakamālohi ātili mai ki a te au! Kua kē fakafiafiagia ia loto o tagata uma o te Atua.
He Talohaga e uiga ki a Onehimahi
8Ona ko nā mea iēnei, e tatau ai ia te au, tō uho ia Keliho, ke fakatonu atu koe i nā mea e tatau ke fai e koe. 9Kae ona ko au e alofa ki a te koe, ka hē kō fakatonua atu ai koe kae ko au ka fakatālohaga atu. E fai e au te mea tēnei e ui lava ko au ko Paulo, te hui o Keliho Iehu, ma i te taimi nei ko he pagotā ona ko toku tautua ki a Keliho.#f.9 te hui o Keliho Iehu, ma i te taimi nei ko he pagotā ona ko toku tautua ki a Keliho pe he toeaina ma i te taimi nei ko he pagotā ona ko toku tautua ki a Keliho. 10#Klh 4.9Ko au la e talohaga atu ki a te koe e uiga ki a Onehimahi, ko he ataliki ki a te au e ala ia Keliho; auā na kavea au e vē ko he tamana ki a te ia, ka koi i loto au o te falepuipui. 11I he taimi kua teka atu, nae hēai hona aogā ki a te koe, kae i te taimi nei, kua aogā lele#f.11 Ko te uiga o te igoa Onehimahi i te gagana Eleni ko te “aogā.” ia mo koe ma au.
12Ka kō uga atua ki a te koe, ma ko he mea tēnei e fakanoanoa ai foki toku loto. 13Ko au nae fofou ke nonofo ki māua i kinei ka koi i te falepuipui ai au ona ko te Tala Lelei, kae ke kavea ai ma ō hui, ke fehoahoani mai ki a te au. 14Kae ko au e hē fofou ke fakamālohia koe ke fehoahoani mai ki a te au; kae e lelei lava te fai e koe i tō loto malie. Ko te mea ia ka hē kō faia lele ai he mea, vaganā e malie koe ki ei.
15Hōvē pe ko te mea ia na teka kehe ai ia Onehimahi ma koe mo hina taimi, kae ke toe kavatu ai ia ke fakatahi koulua i taimi uma. 16I te taimi nei la, ko Onehimahi e hē nā ko he pologa, kae e hili atu lele ia i lo he pologa: ko ia ko he uho pele ia Keliho. Kai au te alofa ko ki ei! Kae e vēhea ake nei la te lahi lele atu o tō alofa ki ei, e hē gata ona ko he pologa kae i tētahi itū, ko he uho foki e ala i te Aliki!
17Ko te mea ia, kāfai kua talia e koe ko au he hoā kaukauna ki a te koe, ke talia foki la e koe ma te fiafia ia Onehimahi, e vē lava ona kē talia au. 18Kāfai na fai e ia he mea kino ki a te koe, pe kaitālafu atu ki a te koe i ho he mea, tuhi ifo ki toku igoa nā mea iēnā. 19Tēnei ka tuhi e au ki lalo i toku lima:
Ko au ko Paulo, ka toe totogi atu e au taku kaitālafu ki a te koe. (E hē tau kō fakamanatu atua foki ko koe e nofo kaitālafu mai ki a te au e ala i tō ōlaga fou ia Keliho.) 20Io te uho, e fia kō mauagia he fehoahoani mai ia te koe mo te gāluega a te Aliki; toku uho ia Keliho, fakafiafia mai ko toku loto e koe.
21Ona ko au e talitonu ko nā mea e lea atu ai au e fai e koe, ko te mea kua tuhi atu ai au — ko te meamoni, e iloa e au ka lahi lele atu nā mea e fai e koe i lo nā mea e lea atu ai au. 22Ko tētahi mea la, hāuni ko he potu mo oku, auā ko au e fakamoemoe ka tali mai te Atua ki autou tatalo, ma ka mafai ai au ke toe fanatu ki a te koutou.
Nā toe Kupu
23 #
Klh 1.7; 4.12 E alofa atu ki a te koutou ia Epafalahi tēnei e i te falepuipui fakatahi ki māua e ala i te tautua ki a Keliho Iehu, 24#Gāl 12.12, 25; 13.13; 15.37-39; 19.29; 27.2; Klh 4.10, 14; 2 Tim 4.10, 11ma e vēnā foki oku hoa i luga o te gāluega, ia Maleko, Alihitako, Temahi, ma Luka.
25Ke ia te koutou uma te alofa tūnoa o te Aliki ko Iehu Keliho.
Currently Selected:
Filemoni 1: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.
