Epelu Fakatomuaga
Fakatomuaga
Ko te Tuhi ki nā tino Epelu na tuhi ki he vāega o ni tino Kelihiano kua tau fakavāivai i to lātou talitonuga faka-Kelihiano, ona ko te teteke ki ei o tagata. Ko te tuhi e fakailoa ai ki te vāega tēnei ko Iehu Keliho ko te ata moni ia e fakaalia ai te Atua. I te faiga tēnei, e tolu ia meamoni e fakamamafa: (1) Ko Iehu ko te Ataliki ia e fakavavau o te Atua, na ia iloa te uhitaki fakamāoni ki te Tamana e ala i nā puapuagā na pa ki ei. Ona ko Iehu ko te Ataliki o te Atua, e hili atu la tona tāua i lo nā pelofeta i te Feagaiga Tuai, nā agelu ma vēnā foki ma Mohe. (2) Ko Iehu kua fakailoa e te Atua ko he ohitāulaga e fakavavau, e hili atu tona tāua i lo nā ohitāulaga i te Feagaiga Tuai. (3) E ala ia Iehu, ko te tino kua talitonu e laveaki mai te agahala, te mataku, ma te oti. I tona tūlaga ko he Ulu Ohitāulaga, e kaumai e Iehu te fakaolataga moni, tēia nae tau fakaataata i nā tāulaga manu nae ohi e tagata Epelu.
Na fakaaogā e te tuhitala te fakatuatua o iētahi tino takutakua i te tala fakaholopito o Ihalaelu (matākupu 11), ke fakamanatu ai ki nā tino na tuhi ki ei, ke tūmua to lātou fakatuatua. I te matākupu 12, e fakamālohi ki nā tino ke fakatuatua pea lava ke pa ki te ikuga, ma ke mata tahi pea lava ki a Iehu, ma fakamākeke i ho ni puapuagā ma ni fakahāuāga e ono pa ki lātou ki ei. E fakauma te tuhi i ni kupu apoapoaki ma faufautua.
Fakahologa o nā vāega o te Tuhi
Fakatomuaga: Ko Keliho ko te fakaaliga kātoatoa ia o te Atua 1.1-3
Ko Keliho e hili atu te tāua i lo nā agelu 1.4 — 2.18
Ko Keliho e hili atu te tāua i lo Mohe ma Iohua 3.1 — 4.13
Ko te ohitāulaga ko Keliho e hili atu te tāua 4.14 — 7.28
Ko te feagaiga a Keliho e hili atu te tāua 8.1 — 9.22
Ko te tāulaga a Keliho e hili atu te tāua 9.23 — 10.39
Fakamuamua te fakatuatua 11.1 — 12.29
Ko te mea e fiafia ki ei te Atua 13.1-19
Ko te tatalo fakaiku 13.20-21
Ko nā toe kupu 13.22-25
Currently Selected:
Epelu Fakatomuaga: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.