Ioane 16

1“Kua uma toku lea atu ki a te koutou i te mea tēnei, kae ke nahe āfāina ai te koutou fakatuatua. 2Ka tuli kehe koutou mai loto o nā hūnako, e hē gata i tēnā, e pa mai te taimi ka manatu ai nā tino e ki lātou fahiotia koutou, ko he tiute tēnā e o ki lātou e tautua ai ki te Atua. 3Ka fai e nā tino nā mea iēnei ki a te koutou, auā ko hēki ki lātou iloa te Tamana pe ko au. 4Kae kua uma toku lea atu ki a te koutou i te mea tēnei. Kāfai la e pa ki te taimi e fai ai e ki lātou nā mea iēnei, ka manatua e koutou nā mea na lea atu ai au.

Ko te Gāluega a te Agaga Paia

“E hēki kō taku atua ki a te koutou nā mea iēnei i te kāmataga, auā nae fakatahi lava au ma koutou. 5Kae nei ko au ka fano ki tē na ia uga maia au, kae e hēai lele houtou tino e fehili mai, pe ko au e fano ki fea. 6Nei la kua kō taku atua, ko outou loto kua tūtumu i te fakanoanoa. 7Kae ko au e lea moni atu ki a te koutou; e hili atu mo koutou kāfai au e fano kehe, auā kāfai au e hē fano, ka hē hau foki te koutou Fehoahoani. Kae kāfai au e fano kehe, oi ka kō uga maia ai ia, ki a te koutou. 8Ma kāfai te koutou Fehoahoani e hau, ka ia fakamāonia ki tagata o te lalolagi, te hehē o to lātou tāofi e uiga ki te agahala, ma e uiga ki te mea e hako, ma e uiga ki te fakamahinoga a te Atua. 9E hehē to lātou tāofi e uiga ki te agahala, auā e hē talitonu mai ki a te au; 10e hehē to lātou tāofi e uiga ki te mea e hako, auā ko au e fano ki te Tamana, ma ka hē toe koutou kitea au; 11ma e hehē to lātou tāofi e uiga ki te fakamahinoga, auā ko te pule o te lalolagi kua uma te fakamahinogia e te Atua.

12“E lahi lele nā mea e tatau ke lea atu ai au ki a te koutou, kae e hē nafatia e koutou i te taimi nei. 13Kae kāfai e hau te Agaga, tē e ia fakailoa te meamoni, ka ia takitakia koutou ki te meamoni. Ka hē tautala ia i hana lava pule, kae ka tautala i nā mea e ia lagona, ma ka ia fakailoa atua ki a te koutou nā mea ka tutupu. 14Ka ia fakailoa toku mamalu, auā ka talia e ia nā mea e lea ai au, ma folafola atu e ia ki a te koutou. 15Ko nā mea uma lele a toku Tamana e āku; ko te mea ia na lea atu ai au, ka talia e te Agaga nā mea e lea ai au, ma e folafola atu e ia ki a te koutou.”

Ko te Fakanoanoa ka Līua ki te Fiafia

16Kua lea atu ia Iehu, “Kua hē mataloa oi hē toe koutou kitea au, kae ka hē mataloa foki, oi toe koutou kitea au.”

17Ko iētahi hoko, kua taufai fehili tētahi ki tētahi, “He ā te uiga o tana fakakupuga? E lea mai kua hē mataloa oi hē toe ki tātou kitea ia, kae ka hē mataloa foki, oi toe ki tātou kitea ia; ma e lea foki vē, ‘ona ko au e fano ki te Tamana.’ 18He ā te uiga o te, ‘kua hē mataloa’? E hē ki tātou iloa te uiga o tana fakakupuga!”

19Kua iloa e Iehu ko ona hoko e fia fehili ake ki a te ia, oi vāgana atu ai ki ei, “Ko au na lea atu, ‘Kua hē mataloa oi hē toe koutou kitea au, kae ka hē mataloa foki, oi toe koutou kitea au.’ Ko tēnei te mea e fakataufai ai koutou? 20E takutino atu e au ki a te koutou te meamoni; ka faitatagi ma lauē koutou, kae ka fiafia te lalolagi; ka fakanoanoa koutou, kae ko te koutou fakanoanoa ka līua ki te fiafia. 21Kāfai he fafine e faitama kua tāli fānau, e lagona e ia te fakanoanoa auā ko tona itūlā o puapuagā kua pa mai; kae kāfai kua fānau mai te pepe, kua puli lele i ona puapuagā, auā kua fiafia kua i ei he pepe e fānau mai ki te lalolagi. 22E vēnā foki la koutou; i te taimi nei ko koutou e fakanoanoa, kae ka toe kitea au e koutou, ma ka fakatumulia ai outou loto i te fiafia, te itūkāigā fiafia e hē mafai e he tino oi kave kehe mai ia te koutou.

23“Kāfai e pa mai te aho tēnā, ka hē toe gogō mai koutou ki a te au ki he mea. E takutino atu e au ki a te koutou te meamoni: kāfai koutou e gogō atu ki toku Tamana i ho he mea i toku igoa, ka fōki atu e ia ki a te koutou. 24Ke pa mai ki te taimi nei, ko hēki gogō lele atu koutou ki he mea i toku igoa; gogō atu oi maua ai e koutou, kae ke kātoatoa ai te koutou fiafia.

Kua Fakatōkilalo e Iehu te Lalolagi

25“Nae fakaaogā e au nā talafakatuha ke fakailoa atu ai ki a te koutou nā mea iēnei. Kae e hau te taimi ka hē toe kō fakaaogā ai nā talafakatuha, kae ka fakaaogā te gagana faigōfie ke tautala atu ai au ki a te koutou, e uiga ki te Tamana. 26Kāfai e pa mai te aho tēnā, ka gogō atu koutou ki a te ia i toku igoa; ko au e hē lea atu ko au ka gogō ki te Tamana, mo koutou, 27auā ko te Tamana lava ia e alofa atu ki a te koutou. E alofa atu ki a te koutou, auā ko koutou e alolofa mai ki a te au ma talitonu ko au na hau mai te Atua. 28Ko au na hau mai te Tamana ki te lalolagi; ma i te taimi nei, ka kō tukua te lalolagi kae fano ki te Tamana.”

29Oi lea atu ai ki ei ona hoko, “E hako, ko koe kua tautala mai nei i te gagana faigōfie, kae kua hē fakaaogā e koe nā talafakatuha. 30Kua ki mātou iloa nei, e kē iloa ia mea uma lele; e hē tau i ei ni fehili e fai atu, auā kua uma te kē iloa o te mea i te māfaufau o te tino ka ko hēki fai atua hana fehili. Ko te mea ia kua talitonu ai ki mātou ko koe na hau mai te Atua.”

31Kua tali atu ia Iehu ki a te ki lātou, “Kua talitonu la koutou i te taimi nei? 32E hau te taimi, ma kua pa mai, ka takape ai koutou ma fano lava te tino ki tona kāiga, kae tīaki au tautahi. Kae ko au e hē tautahi, auā ko te Tamana e fakatahi ma au. 33Ko au kua lea atu ki a te koutou i te mea tēnei, kae ke maua ai e koutou te fīlēmū, ona ko koutou e tahi ma au. Ka hāuāgia koutou e te lalolagi. Kae loto tetele! Kua fakatōkilalo e au te lalolagi!”

Currently Selected:

Ioane 16: TNT

Highlight

Copy