Ioane 13

Kua Fulufulu e Iehu nā Vae o ona Hoko

1Kua pa ki te aho e hohoko ki te Kaiga Fakamanatu o te Pāheka, ma kua iloa e Iehu ko te itūlā kua pa mai, ke tukua ai e ia te lalolagi kae fano ki te Tamana. Nae alofa pea lava ia ki ona tagata i te lalolagi, ma nae alofa ki a te ki lātou ke pa lava ki te ikuga.

2I te taimi tēnā ko Iehu ma ona hoko nae fai te lātou katiga o te afiafi. Kua uma ai foki te galuegia e te Tiāpolo te loto o Iuta te ataliki o Himona Ihikaliota, ke fakalata e ia ia Iehu.#13.2 Kua uma ai foki te galuegia e te Tiāpolo…ke fakalata e ia ia Iehu; pe Kua uma te tonu i te Tiāpolo, ko Iuta te ataliki o Himona Ihikaliota, ka fakalata e ia ia Iehu. 3Kua uma ai te iloa e Iehu ko te pule kātoa kua tuku ake e te Tamana ki a te ia, ma ko ia na hau mai te Atua ma e toe fano foki lava ki te Atua, 4na tū ai ki luga mai te laulau kai, kua tatala kehe tona kofutatao, ma nonoa te holo ki tona taugātiti. 5Oi liligi ai e ia ni vai ki he pēhini ma kāmata oi fulufulu nā vae o ona hoko, ma holo i te holo i tona taugātiti. 6Kua fano ki a Himona Petelu, kae kua lea mai ki ei ia Himona Petelu, “Te Aliki, ko oku vae ka fulufulu e koe?”

7Kua tali atu ia Iehu, “Ko koe e hē mālamalama i te mea tēnei e kō faia i te taimi nei, kae ka mālamalama koe i he taimi mulimuli.”

8Ka kua lea vē mai ia Petelu ki ei, “E hē tatau lele ke fulufulu e koe oku vae!”

“Kāfai e hē kō fulufulua ō vae, ko koe la e hē āku,” kua tali atu ia Iehu.

9Kua tali mai ia Himona Petelu, “Te Aliki, nahe fulufulua la nā ko oku vae. Fulufulu foki ma oku lima ma toku ulu!”

10Kua lea atu ia Iehu, “Ko te tino kua uma te tākele e mamā kātoa, ma e hē tatau ke toe tākele, vaganā ai lava ona vae. Ko koutou e mamā, kae e hē ko koutou uma.” 11Kua uma te iloa e Iehu te tino ka ia fakalatagia ia; ko te mea ia na lea vē ai, “E hē ko koutou uma e mamā.”

12 # Luk 22.27 Kua uma te fulufulu e Iehu o nā vae o ki lātou, oi toe fai ai tona kofutatao ma toe fano ai ki te nofoaga nae nofo ai i te laulau. Oi fehili atu ai ia Iehu, “E mālamalama koutou i te mea na fātoā uma te kō faia ki a te koutou? 13Ko au e fakaigoa e koutou ko te Faiakoga ma ko te Aliki, ma e hako lava koutou, auā ko tēnā lava au. 14Kāfai la ia au, te Aliki ma te Faiakoga o koutou, na fulufulu e au outou vae, e tatau foki la koutou ke fulufulu e tētahi ia vae o tētahi. 15Kua kō faia he fakatakitakiga mo koutou, kae ke fai ai foki e koutou, e vē lava oi fai e au mo koutou. 16#Mat 10.24; Luk 6.40; Ioa 15.20E lea atu au ki a te koutou i te meamoni: e hē hili atu nā pologa i lo to lātou matai, ma e hē hili atu nā kavefekau i lo te tino na ia uga atua ki lātou. 17Nei la kua koutou iloa te moni o nā mea iēnei, amutia koutou kāfai e fakatakitaki koutou ki ei!

18 # Hal 41.9 “Ko au e hē tautala e uiga ki a te koutou uma; E iloa e au nā tino kua kō filifiliagia. Kae e tatau ke taunuku te tuhituhiga paia e lea mai, ‘Ko te tino na kakai fakatahi ki māua i aku meakai, kua fakahagatau mai ki a te au.’ 19Ko au kua lea atu i te mea tēnei i te taimi nei, ka ko hēki pa ki te taimi e tutupu ai. E pa atu la ki te taimi e tutupu ai, ka talitonu koutou ‘Ko Au Ko Au Lava Au.’#13.19 Kikila ki te fakamatalaga i te 8.24. 20#Mat 10.40; Mlk 9.37; Luk 9.48; 10.16E takutino atu e au ki a te koutou te meamoni: ko ai lava e talia e ia he tino e uga atu e au, kua ia talia foki au; ma ko ai lava e ia talia au, kua ia talia foki tē na ia uga maia au.”

Kua Vavalo e Iehu te mea ka Tupu ki a te Ia

(Mataio 26.20-25; Maleko 14.17-21; Luka 22.21-23)

21Kua uma te lea atu vēnei o Iehu, oi lagona ai e ia te loto fakanoanoa lahi, ma fai ai tana takutinoga e vēnei, “E takutino atu e au ki a te koutou te meamoni: e i ei te tino o koutou ka ia fakalatagia au.”

22Ko te kau hoko, kua taufai kikila tētahi ki tētahi, e hē ki lātou hāfia lele pe ko ai te tino e fakauiga ki ei tana kupu. 23Ko tētahi o te kau hoko, te tino nae alofa ki ei ia Iehu, nae nofo i tafa o Iehu. 24Kua geno atu ki ei ia Himona Petelu ma lea vē atu ki ei, “Fehili ki ei pe ko ai te fakauiga ki ei tana kupu!”

25Oi hōhō lele ai te hoko ki tafa o Iehu ma fehili vē atu, “Te Aliki, ko ai nei te lea ai koe?”

26Kua tali mai ia Iehu, “Ko te tino ka fōki e au ki ei te mea falaoa kāfai e uma te kō lolōa ki loto o te ipu, ko ia tēnā.” Oi tago ai ki te mea falaoa, kua lolō ma foki ki a Iuta, te ataliki o Himona Ihikaliota. 27Ko te taimi na tago ai ia Iuta ki te mea falaoa, ko te taimi foki tēnā na ulu ai ia Hātani ki a te ia. Kua lea atu ki ei ia Iehu, “Fai vave loa tau mea e tatau ke fai!” 28E hēai he tino o ki lātou nae i te laulau, na mālamalama i te uiga na lea vē ai ia Iehu ki a Iuta. 29Ona ko Iuta te nae kikilagia te taga tupe, na vēake ai iētahi o te kau hoko, ko Iehu na lea ki ei ke fano oi fakatau nā mea e manakomia e ki lātou mo te Kaiga Fakamanatu o te Pāheka, pe ke kave he mea ma nā tino mātitiva.

30Kua talia e Iuta te mea falaoa, oi fano vave ai loa ki fafo, ma ko te taimi tēnā kua pō.

Ko te Fakatonuga Fou

31Kua fano kehe ia Iuta, oi vāgana atu ai ia Iehu, “Ko te taimi nei e fakaalia ai te mamalu o te Ataliki o te Tagata; ko te taimi nei e fakaalia ai te mamalu o te Atua e ala i te Ataliki o te Tagata. 32Ma kāfai te mamalu o te Atua e fakaalia e ala i te Ataliki o te Tagata, ka fakaalia foki e te Atua te mamalu o te Ataliki o te Tagata e ala ia te ia, ma ka ia faia i te taimi nei lava. 33#Ioa 7.34Taku fānau, kua hē mataloa hoku taimi ma koutou. Ka koutou hakilia au; kae ko te mea na lea ai au ki nā takitaki o Iutaia, ka lea atu ai foki au ki a te koutou, ‘E hē koutou mafaia oi olo ki te mea e fano au ki ei.’ 34#Ioa 15.12, 17; 1 Ioa 3.23; 2 Ioa 1.5Ma i te taimi nei, e kō tuku atua ki a te koutou he fakatonuga fou: ke alofa tētahi ki tētahi. E vē ona alofa atu au ki a te koutou, ke vēnā foki ona alofa tētahi ki tētahi. 35Kāfai koutou e alofa tētahi ki tētahi, ka iloa ai e tagata uma, ko koutou ni hoko e ōku.”

Kua Vavalo e Iehu te Fakafiti a Petelu

(Mataio 26.31-35; Maleko 14.27-31; Luka 22.31-34)

36Kua fehili atu ia Himona Petelu. “Te Aliki, ko koe e fano ki fea?”

Kua tali mai ia Iehu, “E hē kē mafaia oi mulimuli mai ki te mea e fano au ki ei i te taimi nei, kae e hau te taimi oi mulimuli mai ai koe ki a te au.”

37Kua fehili atu ia Petelu, “Te Aliki, aiheā te hē mafai ai au ke mulimuli atu ki a te koe i te taimi nei? Ko au kua hāuni ke oti mo koe!”

38Kua tali mai ia Iehu, “Ko koe moni kua hāuni ke oti mo au? E takutino atu e au ki a te koe te meamoni: ka ko hēki vivini ia moa ka kua fakafiti fakatolu koe, e hē kē iloa au.”

Currently Selected:

Ioane 13: TNT

Highlight

Copy