Ioane 12

Kua Fakauku ia Iehu i Petania

(Mataio 26.6-13; Maleko 14.3-9)

1Kua toe ono ia aho oi pa ki te Pāheka, oi fano ai ia Iehu ki Petania, ki te fale o Lahalo, te tamāloa na fakatū e ia mai te oti. 2Na hāunia e ki lātou i kinā he kaiga mo Iehu, ma nae fehoahoani ia Mafa ki te laulauga o te meakai; ka ko Lahalo nae nonofo i te laulau ma Iehu, fakatahi ma iētahi tino. 3#Luk 7.37-38Oi kave ai e Malia ni lolo manogi taugatā pe ko te nato mamā, kua liligi ki nā vae o Iehu oi holo ai i tona laulu. Ko te manogi manaia o nā lolo kua fakatumulia ai te fale kātoa. 4Ko tētahi hoko o Iehu, ia Iuta te Ihikaliota — tēia ka fakalata e ia ia Iehu, kua lea vē atu, 5“He ā te hēki fakatau ai te lolo manogi tēnei mo he toluhelau tupe hiliva,#12.5 tupe hiliva: Kikila ki te 6.7. oi kave ai te tupe ma nā tino mātitiva?” 6Ko Iuta na lea vēnā, e hē ona ko hona alofa moni ki nā tino mātitiva, kae ona nae ia kikilagia te taga e teu ai a lātou tupe, ma nae māhani oi ia kaihohoa mai ai ni tupe.

7Kae kua vāgana atu ia Iehu, “Tuku vē te fafine ke tāofi e ia te mea kua ia te ia, mo te aho e tanu ai au. 8#Teu 15.11Ka i ei pea lava nā tino mātitiva ma koutou, kae ka hē i ei pea lava au ma koutou.”

Kua Taupulepule nā Ohitāulaga Hili ke Tāmate ia Lahalo

9I te lagonaga e te tokalahi o tagata Iutaia ko Iehu e i Petania oi olo ai ki ei, e hē ona ko Iehu oioti, kae na fia kikila foki ki a Lahalo, tēia na fakatū e Iehu mai te oti. 10Oi taupulepule ai nā ohitāulaga hili ke tāmate foki ia Lahalo, 11ona ko te mea na tupu ki a te ia, kua teteke ake ai te tokalahi o tagata Iutaia ki a te ki lātou, ka kua talitonu ki a Iehu.

Kua Tali Fiafia ia Iehu e Tagata i te Ulufale atuga ki loto o Ieluhalema

(Mataio 21.1-11; Maleko 11.1-11; Luka 19.28-40)

12I te aho alafaki, na lagona ai e te kaifenua tokalahi na ōmamai ki te Kaiga Fakamanatu o te Pāheka, ko Iehu e hau ki Ieluhalema. 13#Hal 118.25-26Oi kave ai e ki lātou nā launiu ma oatu kua fakafetaui ki a te ia, ma taufai kālalaga vē, “Ke vīkia te Atua! Ke fakamanuia e te Atua ki tē e hau i te igoa o te Aliki! Ke fakamanuia e te Atua te Tupu o Ihalaelu!”

14Kua maua e Iehu he tamā āhini, oi hopo ai ki luga e vē lava oi tūhia,

15 # Hkl 9.9 “Koutou nā tino o Hiona, koutou nahe mātataku!

Tēnei te koutou tupu kua hau

e tiketike i luga o he tamā āhini.”

16E hēki mālamalama nā hoko o ia i te mea tēnei i te taimi tēnā; kae i te fakatū akega o Iehu ki tona mamalu, na manatua ai e ki lātou ko te tuhituhiga paia na lea mai vēnei e uiga ki a te ia, ma ko nā mea iēnei na fai e ki lātou mo ia.

17Ko te kaifenua nae i ei fakatahi ma Iehu i te kalagaga ki a Lahalo ke hau ki fafo o te tugamau, ma ia fakatūa ai mai te oti, na ki lātou fakailoa ki tagata te mea tēnei na tupu. 18Ko te mea ia na olo ai ia tagata oi fakafetaui ia Iehu — ona kua ki lātou lagona na ia faia te fakailoga tēnei. 19Oi fakataufai ai te kau Falehaio ma lea vē tētahi ki tētahi, “E kē iloa, kua hē aogā lele a tātou taumafaiga! Kikila atu, ko te lalolagi kātoa e mulimuli ki a te ia!”

Kua Hakili ia Iehu e ni Tino Eleni

20E i ei ni tino Eleni nae i te vāega na olo ki Ieluhalema ke tāpuaki ai i te taimi o te Kaiga Fakamanatu o te Pāheka. 21Kua olo ki a Filipo (e hau mai Petehaita i Kalilaia) oi fehili vē ki ei, “Te aliki, ko ki mātou e fia feiloaki ma Iehu.”

22Kua fano ia Filipo oi lea ki a Anitelea, oi na olo uma ai ki lāua kua lea ki a Iehu. 23Kua tali mai ia Iehu ki a te ki lātou, “Kua pa mai te itūlā e fakatū ake ai te Ataliki o te Tagata ki tona mamalu. 24E takutino atu e au ki a te koutou te meamoni: ko te fuāhaito e fokotahi e tūmau lava ma fuāhaito e fokotahi, vaganā e pakū ki te kelekele ma mate. Kāfai e mate, oi ka lahi nā fua e maua mai ai. 25#Mat 10.39; 16.25; Mlk 8.35; Luk 9.24; 17.33Ko ai lava e fakapelepele ki tona ola, ka hē ia mauagia; ma ko ai lava e inoino ki tona ola i te lalolagi nei, ka ia te ia pea lava mo te ola e fakavavau. 26Ko ai lava he tino e fia kaukauna mai ki a te au, e tatau ke mulimuli mai ki a te au, ma ko te mea e i ei au, ka i ei ai foki taku kaukauna. Ko ai lava e kaukauna mai ki a te au, ka vīkia ia e toku Tamana.

Kua Tautala ia Iehu e uiga ki tona Oti

27“Te popole o toku loto i te taimi nei. Ka vēhea ake nei au? Ka lea nei au, ‘Te Tamana, fakahao ko au mai tēnei itūlā.’? Hēai, ko tēnei tonu lava te mea na hau ai au — ke maua au i nā puapuagā i te itūlā tēnei. 28Te Tamana, fakaali ko tō mamalu ke kitea e tagata!”

Oi tautala ifo ai he leo mai te lagi kua vē ifo, “Kua uma te kō fakaaliagia o toku mamalu, ma e toe kō fakaalia foki.”

29Na lagona e te kaifenua nae tutū i kinā te leo, ma na lea iētahi ko he faititili, ka ko iētahi na lea vē, “Ko he agelu na tautala ki a Iehu.”

30Kae kua vāgana atu ia Iehu ki a te ki lātou, “Ko te leo tēnei na tautala mai, e hē mo au kae mo koutou. 31Ko tēnei te taimi e fakamahino ai te lalolagi; ko tēnei te taimi e fakatōkilalo ai te pule o tēnei lalolagi. 32Kāfai au e hiki ake ki luga mai te kelekele, ka kavea tēnā ma mea e ōmamai ai ia tagata uma ki a te au.” 33(Na lea vēnei ia Iehu kae ke fakailoa ai te itūkāigā oti ka pa ia ki ei.)

34 # Hal 110.4; Iha 9.7; Ehk 37.25; Tan 7.14 Kua tali mai te kaifenua, “E lea mai te mātou Tūlāfono, ko te Mehia ka ola pea lava ke pa ki te fakavavau. E vēhea la ona lea mai koe, ko te Ataliki o te Tagata e tatau ke hiki ake ki luga? Ko ai te Ataliki o te Tagata?”

35Kua tali atu ia Iehu, “Ko te mālamalama ka i ei fakatahi ma koutou mo hina taimi. Havavali loa ka koi i ei fakatahi te mālamalama ma koutou, kae ke nahe maua koutou i te pōuli; auā ko te tino e havali i te pōuli, e hē ia iloa te mea e fano ia ki ei. 36Talitonu la ki te mālamalama ka koi ia te koutou, kae ke kavea ai koutou ma tagata o te mālamalama.”

Ko te Hē Talitonu o Tagata

Kua uma atu nā kupu iēnei a Iehu, oi fano kehe ai ma kinā, kua fano oi mumuni ke hē iloa ia e ki lātou. 37E ui na ia faia nā fakailoga uma iēnei i mua o tagata, e hēki talitonu ki lātou ki a te ia, 38#Iha 53.1kae ke taunuku ai te kupu a te pelofeta ko Ihaia:

“Te Aliki, ko ai nei te talitonu ki ta mātou fekau na folafola?

Ko ai te na fakaali ki ei e te Aliki, tona mālohi?”

39Ma e hēki mafai ke talitonu ki lātou, auā na lea vē foki ia Ihaia,

40 # Iha 6.10 “Kua fakatauahogia e te Atua o lātou mata

ma tapunia o lātou māfaufau,

kae ke hē mafai o lātou mata oi kikila,

ma hē mafai o lātou māfaufau oi mālamalama,

ma hē liliu mai ai ki lātou ki a te au, kua lea ai te Atua,

ke kō fakamālōlōa ki lātou.”

41Na lea vēnei ia Ihaia auā na kitea e ia te mamalu o Iehu, ma nae tautala ki tagata e uiga ki ei.#12.41 na kitea e ia te mamalu o Iehu, ma nae tautala ki tagata e uiga ki ei: pe na kitea e ia te mamalu o te Atua, ma nae tautala ki tagata e uiga ki Iehu.

42E ui i tēia, e tokalahi ia takitaki o Iutaia na talitonu ki a Iehu; kae ona ko to lātou mātataku i te kau Falehaio, na hēki fofou ai ke fakailoa ki tagata to lātou talitonuga, auā nā ki lātou e tutulia ki fafo o te hūnako. 43E hili atu to lātou fiafia ke maua ni o lātou vīkiga mai tagata i lo ni o lātou vīkiga mai te Atua.

Ko nā Kupu a Iehu ka Fakamahino ai ia Tagata

44Na leo lahi lele ia Iehu ma lea vē atu, “Ko ai lava e talitonu mai ki a te au, e hē talitonu mai oioti ki a te au, kae e talitonu foki ki tē na ia uga maia au. 45Ko ai lava e ia kitea au, e ia kitea foki tē na ia uga maia au. 46Ko au kua hau ki te lalolagi e vē he mālamalama, kae ke nahe tūmau ai i te pōuli, ki lātou uma e talitonu mai ki a te au. 47E hē fakamahinoa e au nā tino e ki lātou lagona aku kupu, kae hē uhitaki ki ei. Ko au e hēki hau ke fakamahino ia tagata o te lalolagi, kae ke fakaola. 48Ko nā tino e teteke mai ki a au ma hē ki lātou talia taku kupu, ka i ei te tino e ia fakamahinoa ki lātou. Ko nā kupu kua tautala ai au, ka kavea ma fakamahino mo ki lātou, i te aho mulimuli! 49Auā e hē āku nā kupu e tautala ai au, kae ko te Tamana na ia uga maia au, e ia fakatonu maia nā kupu e tatau ke tautala ai au. 50Ma e iloa e au ko tana fakatonuga e maua ai te ola e fakavavau. Ko nā mea e tautala ai au, ko nā mea ia e lea mai ai te Tamana ke tautala ai au.”

Currently Selected:

Ioane 12: TNT

Highlight

Copy