Epelu 3

E Tāua atu ia Iehu i lo Mohe

1Te kau uho Kelihiano, koutou iēnā kua kalagagia foki e te Atua! Māfaufau ki a Iehu, tēia na uga mai e te Atua ke kavea ma Ulu Ohitāulaga ke fehoahoani ki nā mea uma e tālaki e ki tātou, ma e talitonu ki tātou ki ei. 2#Nūm 12.7Nae uhitaki ki te Atua, tē na ia filifiliagia ia ke faia tana gāluega, e vē lava ko te uhitaki o Mohe i te faiga o tana gāluega i loto o te fale o te Atua.#3.2: fale o te Atua: ko te fakakupuga tēnei e fakaaogā i te Feagaiga Tuai fakatatau vē ki te kaukāiga pe ko tagata o te Atua. 3Ko te tino e ia fauagia he fale, e hili atu tona tāua i lo te fale. E vēnā foki lava oi hili atu te tāua o Iehu i lo Mohe. 4Ko nā fale takitahi uma lele, e i ei lava te tino na ia faua — ma ko te Atua lava te na fau e ia nā mea uma. 5Ko Mohe nae kaukauna ma te fakamāoni i loto o te fale o te Atua, ma na ia fakailoagia nā mea na tuku e folafola e te Atua i he taimi i mua. 6Ko Keliho te Ataliki o te Atua, e fakamāoni i tona tūlaga ko te takitaki o te fale o te Atua. Ko ki tātou ko te fale o te Atua kāfai e tūmau pea to tātou loto mākeke ma te talitonu, ki te mea e fakamoemoe ki tātou ki ei.

He Malōlōga mo nā Tino o te Atua

7 # Hal 95.7-11 Ko te mea ia, e vē oi lea ai te Agaga Paia:

“Kāfai e lagona e koutou te leo o te Atua i te aho nei,

8ia koutou nahe loto makaka, e vē ko nā tupuna o koutou i te fakatuikehega ki te Atua,

i te aho na ki lātou tofotofoa ai ia

i te vao.

9Na tofotofo au e ki lātou i kinā, kua vāgana ai te Atua,

e ui lava na ki lātou kitea nā mea na fai e au i nā tauhaga e fahefulu.

10Ma ko au na ita ki nā tino iēnā ma na lea vē ai au,

‘Ko nā loto o nā tino iēnei e fakahehēgia pea lava,

ko hēki ki lātou iloa nā mea e fofou au ke ki lātou faia.’

11Ko au na ita ma fai ai taku takutinoga e vēnei:

‘Ka hē pa lele ki lātou ki te nuku na mea e tuku atu ai e au ki a te ki lātou, he malōlōga.’ ”

12Koutou la ke mataala te kau uho, kae ke nahe i ei lele he tino o koutou e ia te ia he loto kino ma te hē talitonu, ma liliu kehe ai mai te Atua e ola. 13E tatau koutou ke fakamālohi tētahi ki tētahi i aho takitahi, kae ke nahe i ei ai he tino o koutou e fakahehēgia e te agahala ma maua ai i te loto makaka. Kāfai te kupu “Aho nei” e vē oi tākua i te tuhituhiga paia e fakaaga ki a te ki tātou, e tatau la ke fai pea lava tēnei mea e tētahi ki tētahi. 14Auā ko ki tātou uma e gālulue fakatahi ma Keliho, pe kāfai to tātou talitonu nae i ei i te kāmataga, e tūmau pea lava ke pa ki te ikuga.

15 # Hal 95.7-8 Ko tēnei te mea e tūhia i te tuhituhiga paia:

“Kāfai e fakalogo koutou ki te leo o te Atua i te aho nei,

koutou nahe loto makaka, e vē ko nā tupuna o koutou

i te fakatuikehega ki te Atua.”

16 # Nūm 14.1-35 Ko ai nā tino na ki lātou lagona te lea o te Atua ma fakatuikehe ki ei? Ko ki lātou uma lele na takitaki ki fafo mai Aikupito e Mohe. 17Ko ai te nae ita ki ei te Atua i nā tauhaga e fahefulu? Nae ita ki nā tino nae faia te agahala ma na mamate i te vao. 18I te faiga o te tautōga tēnei a te Atua, “Ka hē pa lele ki lātou ki te nuku na mea e tuku atu ai e au ki a te ki lātou he malōlōga” — ko ai te na fai agai ki ei? Na fai ki nā tino na fakatuikehe. 19Kua kitea la e ki tātou, e hēki mafai ki lātou ke pa ki te nuku, ona e hēki talitonu.

Currently Selected:

Epelu 3: TNT

Highlight

Copy