Epelu 2

Ko te Fakaolataga Tāua a te Atua

1Ko te mea ia e tatau ai ke tāofi mau ki tātou ki te meamoni kua fakalogo ki tātou ki ei, kae ke nahe tāfea kehe mai ai ki tātou. 2Ko te fekau na tuku mai e nā agelu ki o tātou tupuna, e hako, ma ko nā tino e hē mulimuli pe hē uhitaki ki ei, e maua e ki lātou te fakahalaga e tatau mo ki lātou. 3E vēhea nei la ona mafai ke fakahao ki tātou mai te fakahalaga, kāfai e hē ki tātou taliagia te fakaolataga tāua tēnei? Ko te Aliki lava ia te ia mua folafola maia te fakaolataga tēnei, ma ko ki lātou na fakalogo ki ei na ki lātou fakamāonia mai ki a te ki mātou, te hako o tēnei mea. 4I te taimi foki lava tēnā, na fakaopoopo e te Atua tana molimau ki nā molimau a nā tino iēnei, e ala i nā itūkāigā vāvega ma nā mea ofoofogia kehekehe na ia faia, ma te tufatufaga o nā meaalofa a te Agaga Paia, e tuha ai ma te mea kua finagalo ia ki ei.

Ko te Tino e ia Takitakia ki Tātou ki te Fakaolataga

5E hēki fakatonua e te Atua nā agelu ke ki lātou pūlea te lalolagi fou ko hēki pa ki ei — te lalolagi tēia e talanoa atu ai ki mātou. 6#Hal 8.4-6Kae e tūhia vēnei i he vāega o nā Tuhituhiga Paia:

“Ko ai nei te tagata, te Atua, kua manatu mai ai koe ki ei;

kua nā he tagata, kua popole mai ai koe ki ei?

7Na kē faia ki lātou mo he taimi pukupuku, ke i lalo ifo mālie te tāua o ki lātou i lo nā agelu;

kua fakapale e koe ki lātou i te mamalu ma te fakaaloalo lahi,#2.7 E lahi nā fakamaumauga e fakaopoopo ki ei te: Kua fai e ki lātou ma tupu ke pule i nā mea uma na fai e koe (kikila ki te Hal 8.6).

8ma tuku e koe ke pule i nā mea uma lele.”

E lea mai na fai ki lātou e te Atua ma “pule i nā mea uma lele”; e manino lele e aofia ai nā mea uma. I te taimi nei, e hē ki tātou kitea ko tagata ola e pule i nā mea uma. 9Kae kua ki tātou kitea ia Iehu, tē na fakamaulalogia i lo nā agelu mo hina taimi, kae ke oti ai ia e ala i te alofa tūnoa o te Atua, mo tagata uma lele. I te taimi nei la, kua kitea e ki tātou ko Iehu kua fakapalegia i te paia ma te mamalu, ona ko tona onohai i nā puapuagā na pa ia ki ei i tona mate. 10Ko he mea tatau i te Atua, tē na gaohia ma mafai ke tūmau ai ia mea uma, ke ia fakakātoatoagia te lelei o Iehu e ala i ona puapuagā, kae ke takitakia ai te tokalahi o fānau a te Atua, ke i ei fakatahi ma ia i tona mamalu. Auā ko Iehu te takitakia ki lātou ki te fakaolataga.

11E fakamamā e ia ia tagata mai a lātou agahala, ma ko ia fakatahi ma ki lātou uma e fakamamāgia, e fokotahi lava to lātou Tamana. Ko te mea ia e hē mā ai ia Iehu oi takua ki lātou ni tino e o tona kaukāiga. 12#Hal 22.22Kua lea vē atu ia ki te Atua:

“Ka fakailoa e au ki nā tino o toku kaukāiga nā mea na fai e koe;

Ka viviki ake au ki a te koe i nā mea e fai ai a lātou tāpuakiga.”

13 # Iha 8.17, 18 Kua lea foki vēia, “Ka talitonu kātoatoa au ki te Atua.” Ma lea vē foki, “Tēnei au fakatahi ma nā fānau kua fōki mai e te Atua ki a te au.”

14Ona la ko nā fānau, e vē oi fakaigoa ai ki lātou e ia, ni tino e o te kanofi ma te toto, na ia faia ai ia ia lava, ke vē ko ki lātou. Na fai e ia te mea tēnei, kae ke kavea ai tona mate ma auala e fakatōkilalo ai te Tiāpolo, tē e pule ki te oti, 15ma i te auala tēnei, kua ia fakahaolotoa ai nā tino nae pologa i o lātou ōlaga kātoa, ona ko te mātataku i te oti. 16#Iha 41.8-9Auā e manino lele e hē ko nā agelu te fehoahoani ia ki ei, kae e fehoahoani ki nā fānau a Apelaamo. 17Ko tona uiga, na kavea foki ia ke vē ko nā uho ma tuafafine o ia, kae ke fai ai ia ma o lātou Ulu Ohitāulaga fakamāoni ma alofa fakahao i ana gāluega e tautua ai ki te Atua, mo te fakamāgaloga o agahala a ona tagata. 18Ma e ona ko ia foki na fakaohoohogia ma maua i nā puapuagā, kua ia mafaia ai oi fehoahoani ki nā tino e fakaohoohogia.

Currently Selected:

Epelu 2: TNT

Highlight

Copy