Kolohe 1

1Mai ia Paulo, he apohitolo e a Iehu Keliho e tuha ai ma te finagalo o te Atua, ma to mātou uho ki a Timoteo —

2Ki tagata o te Atua i Kolohe, o mātou uho fakamāoni i te māfutaga fakatahi ma Keliho:

Ke ia te koutou te alofa tūnoa ma te fīlēmū mai te Atua to tātou Tamana.

Tatalo o te Fakafetai

3E fakafetai pea lava ki mātou ki te Atua, te Tamana o to tātou Aliki ko Iehu Keliho, kāfai ki mātou e tatalo mo koutou. 4Auā kua fakalogo ki mātou ki te koutou fakatuatua ki a Keliho Iehu, ma te koutou alolofa ki tagata uma o te Atua. 5I te taimi muamua na pa atu ai te fekau moni ki a te koutou, ko te Tala Lelei tēnā, na fakalogo koutou ki te fakamoemoe e folafola mai ai. Ko te koutou fakatuatua la ma te koutou alofa, e fakavae i te mea kua fakamoemoe koutou ki ei, tēia e teu malu mo koutou i te lagi. 6E kaumai pea lava e te Tala Lelei nā fakamanuiaga, ma e halalau ki te lalolagi kātoa, e vē foki lava ko te mea na pa koutou ki ei, talu mai te aho muamua na koutou lagona ai e uiga ki te alofa tūnoa o te Atua, ma iloa lelei ai e koutou tona uiga moni. 7#Klh 4.12; Flm 1.23Kua iloa e koutou te alofa tūnoa o te Atua, mai ia Epafalahi to mātou uho a kaukauna fakapelepele, te kaukauna fakamāoni a Keliho kua fai ma o mātou#1.7 mātou, ko iētahi tuhituhiga e leamai outou. hui. 8Kua fakailoa mai e ia ki a te ki mātou e uiga ki te alofa kua maua e koutou mai te Agaga o te Atua.

9Mai te aho lava la na ki mātou iloa ai, e hēki uma lele to mātou tatalo mo koutou. Ko ki mātou e tatalo ki te Atua ke fakatumulia koutou i te mālamalama e uiga ki tona finagalo, vēnā ma te poto uma ma te iloa e maua mai i tona Agaga. 10Oi ka mafai ai loa e koutou oi ola e tuha ma te finagalo o te Aliki, ma koutou faia ai pea nā mea e fiafia ai ia. Ka fua mai autou gāluega lelei ma ka fakatupu ātili te koutou mālamalama e uiga ki te Atua. 11-12Koutou ke fakamākekeke i te mālohi kātoatoa mai tona mana, kae ke mafai ai e koutou oi talia nā mea uma ma te onohai. Ma i te agaga fiafia, hiki ake te fakafetai ki te#1.11-12 ma te onohai. Ma i te agaga fiafia, hiki ake te fakafetai ki te; pe ma te onohai ma te fiafia. Ma hiki ake te fakafetai ki te. Tamana, tē kua ia hāuniagia koutou ke maua he koutou vāega o te tofi kua uma te fakailoga e te Atua mo ona tagata, i te mālō o te mālamalama. 13Na ia laveakia ki tātou mai te mālohi o te pōuliuli, ma kaumai ki tātou ma te haogalēmū ki loto o te mālō o tona Ataliki pele, 14#Efe 1.7tē kua maua ai e ki tātou te haolotoga, ko tona uiga, ko a tātou agahala kua fakamāgalo.

Ko Keliho ma Tana Gāluega.

15Ko Keliho ko te ata fakatuha ia o te Atua, tē e hē mafai ke kitea e he tino. Ko ia ko te Ataliki ulumatua, ma e hilihili lele ia i lo hētahi o mea na gaohia e te Atua. 16Auā ko nā mea uma lele i te lagi ma te lalolagi, nā mea e kitea ma nā mea e hē kitea, fakatahi ai ma nā pule o agaga, aliki, tupu ma taupulega, na gaohia e te Atua e ala ia Keliho ma e mo ia. 17Na i ei ia Keliho ka ko hēki i ei he mea e fokotahi, ma i te māfutaga ma ia kua nofo tonu ai ia mea uma i te tūlaga e tatau ke i ei ai. 18#Efe 1.22-23Ko ia ko te ulu o tona tino, ko te Ekalehia tēnā; ko ia ko te puna o te ola mo te Ekalehia. Ko ia ko te Ataliki ulumatua, tē na toe fakatū mai i te oti, kae ke kavea ai ia ma muamua i nā mea uma lele. 19Auā e a te Atua lava te fuafuaga ke i te Ataliki lava ia te natula kātoatoa o ia. 20#Efe 2.16Ko te mea ia na fuafua ai e te Atua, ke fai te Ataliki ma auala ke toe fakafoki atu ai te lagi ma te lalolagi ki a te ia. Na fai te fakaleleiga e te Atua, e ala i te mate o tona Ataliki i luga o te hātaulo, ke toe fakafoki atu ai ki a te ia nā mea uma lele, i te lagi ma e lalolagi.

21E i ei te vāitaimi na mamao lele ai koutou ma te Atua ma na kavea ai koutou ma ona fili, ona ko nā āmioga kino a koutou nae fai vēnā ma outou māfaufauga kino. 22Kae nei, e ala i te mate o tona Ataliki, ko koutou kua fai e te Atua ma ana uō, kae ke ōmamai ai koutou ki a te ia, kua uma te fakapaiagia, mamā ma hēai ni hehē. 23Ko koutou la e tatau ke tūmau i te fakavae o te koutou fakatuatua, ma ke nahe māluelue lele mai te fakamoemoe na maua e koutou i te koutou lagonaga o te Tala Lelei. E mo te Tala Lelei tēnei kua kavea ai ia au tēnei ko Paulo, ma kaukauna — te Tala Lelei tēia kua folafola ki tagata uma o te lalolagi.

Ko Gāluega Kaukauna a Paulo ki te Ekalehia

24I te taimi nei, ko au e fiafia ke puapuagā au mo koutou, auā ko oku puapuagā i te tino e fehoahoani ai au ke fakakātoatoa nā puapuagā o Keliho koi totoe, mo tona tino, te Ekalehia. 25Ma ko au kua tōfia e te Atua ke fai ma kaukauna ki te Ekalehia, ma ia fōki maia te gāluega tēnei ke fai mo te koutou lelei. Ko te gāluega tēnei, ko te folafolaga kātoatoa o tana fekau, 26ko te mealilo tēnā nae ia mumunia mai augā tupulaga mai te kāloā, kae nei kua fakailoa mai e ia ki ona tagata. 27Ko te fuafuaga a te Atua, ke fakailoa atu tana mealilo ki ona tagata, te mealilo e vē he koloa tāua ma te gali, mo mālō uma. Ma ko te mealilo la, ko Keliho e i loto ia te koutou, ko tona uiga, ka i ei fakatahi koutou i te mamalu o te Atua. 28Oi e folafola la e ki mātou te fekau e uiga ki a Keliho, ki tagata uma. E lapataki ma akoako e ki mātou e ala i te poto kua ki mātou mauagia, kae ke mafai ai ke kaumai ki lātou tau tokatahi ki mua o te Atua, kua āmio fakatagata matua i te māfutaga ma Keliho. 29Ko tēia e galue mālohi ma tauivi ai nei au, ma fakaaogā e au te mālohi mai ia Keliho, tēia e galue i loto ia te au.

Currently Selected:

Kolohe 1: TNT

Highlight

Copy