Gāluega 26

Kua Tali atu ia Paulo ki ona Mōliga i mua o Akalipa

1Kua lea atu ia Akalipa ki a Paulo, “Kua tuku atu te fakatagaga ke tautala ai koe.” Na fālō atu te lima o Paulo ma tali atu vēnei:

2“Te Tupu ko Akalipa! E manatu au ko au e aloā e laki auā i te aho nei, ko au ka tali atu i mua o koe, e tuha ai ma nā mea uma kua mōlia ai au e nā tino Iutaia iēnei, 3kae maihe lava, auā kua mālamalama lelei lava koe i nā tu a Iutaia ma nā fekehekeheakiga o ki lātou tau tokatahi. Ko au la e fakatagi atu ko koe ke onohai mai ma fakalogologo ki te mea ka lea atu ai au.

4“E iloa uma lele e nā tino Iutaia te ōlaga nae ola ai au talu mai toku tamaiti. E ki lātou iloa aku mea nae fai i toku ōlaga kātoa, kāmata mai i toku fenua ma vēnā foki i Ieluhalema. 5#Gāl 23.6; Fil 3.5Kua uma te ki lātou iloa, pe kāfai e loto ke molimau ki lātou ki nā mea iēnei. Mai te kāmataga maiga lava, ko au na ola ake ma kavea ma hētahi o te vāega e pito hili te tauhihi ki nā talitonuga o te tātou tāpuakiga, te kau Falehaio. 6Ma i te aho nei, ko au kua tū atu i kinei ona ko te fakamoemoe kua ia te au e tuha ai ma te folafolaga a te Atua na fai ki o tātou tupuna — 7ko tēnei tonu lava te mea e fakamoemoe ia tagata o nā puikāiga e hefululua o Ihalaelu ke ki lātou mauagia, ka koi tāpuaki pea lava ki lātou ki te Atua i te ao ma te pō. Ona ko te fakamoemoe tēnei, Tau Afioga te Tupu, kua mōlia ai au e nā tino Iutaia iēnei! 8He ā te faigatā ai ia te koutou iēnā i kinei ke talitonu ko nā tino kua feoti, e toe fakatutū e te Atua mai te oti?

9 # Gāl 8.3; 22.4-5 “Na pa foki lava au ki te lagona ko au ke teteke mālohi ki te igoa o Iehu te Nahaleta. 10Ko tēnā te mea na fai e au i Ieluhalema. Na tuku mai e te kau ohitāulaga hili te pule ki a te au, ma na kō tukua ai te tokalahi o tagata o te Atua ki te falepuipui; ma kāfai nā tino iēnei e fakahala oti, oi nae lagolago foki e au ke fakahala vēnā. 11E lahi nā taimi na kō fakahalagia ai ki lātou i loto o nā hūnako, ma taumafai i ni faiga ke fakafiti ai ki lātou i to lātou talitonuga. Ko toku ita lahi ki nā tino iēnei na fano ai lava au ki nā kakai nukukehe ke fai o lātou mōliga.

Kua Fakamatala e Paulo tona Liliuga ke kavea ma Kelihiano

(Gāluega 9.1-19; 22.6-16)

12“Ko te māfuaaga ia na fano ai au ki Tamaheko ma te pule ma te fakatonuga mai te kau ohitāulaga hili. 13Tau Afioga te Tupu, ko luga o te auala i te tūpou o te la, na kō kitea ai he mālamalama e hili atu tona pupula i lo te pupula o te lā, kua fanaifo mai te lagi ma huhulu fakatakamilo ia te au ma nā taulelea na malaga fakatahi ki mātou. 14Na pakukū uma ki mātou ki te kelekele, oi lagona ai e au he leo e lea vē mai ki a te au i te gagana Epelu, ‘Haulo, Haulo! He ā te fakahāuā mai ai koe ki a te au? E fakaogohia lava koe e koe ona ko tō teteke mai ki a te au, e vē ko he povi e ta aka e ia te mealākau e fakatonutonu ai e tona matai.’ 15Na fehili vē atu au, ‘Te Aliki, ko ai ko koe?’ Ma na tali mai te Aliki, ‘Ko au ko Iehu, tē kua fakahāuā koe ki ei. 16Kae tū loa ki luga. Kua fakakitea atu au ki a te koe ke tōfia ai koe ke kavea ma aku kaukauna. Ka fakailoa atu e koe ki iētahi tino nā mea kua kitea e koe i te aho nei, ma nā mea ka fakahino atu e au i te lumanaki. 17Ka kō laveakia koe mai tagata Ihalaelu vēnā foki mai tagata nukukehe iēia ka kō uga atua koe ki ei. 18Ka fakapupula e koe o lātou mata ma liliu kehe ki lātou mai te pōuliuli ki te mālamalama, mai te pule a Hātani ki te pule a te Atua, kae ke kavea ai to lātou fakatuatua mai ki a te au ma mea ka fakamāgalo ai a lātou agahala, ma kavea ai ki lātou ma vāega o tagata kua filifilia e te Atua.’

Kua Fakamatala e Paulo tana Gāluega

19“Ko te mea la ia te Tupu ko Akalipa, ko au na uhitaki ki te fakaaliga na kō maua mai te lagi. 20#Gāl 9.20, 28-29Muamua i Tamaheko ma Ieluhalema ma vēnā i te fenua kātoa ko Iutea, ma i nā mea e nonofo ai ia tagata nukukehe, na folafola e au ko ki lātou e tatau ke halamō ia lātou agahala ma liliu ki te Atua, ma ke fakatino e ki lātou nā mea e fakailoa ai to lātou halamō moni. 21Ko te pogai ia na puke ai au e nā tino Iutaia iēnei ka ko i loto au i te Mālumalu, ma na taumafai ki lātou ke tāmate au. 22Kae e pa mai lava ki te aho nei, e fehoahoani mai lava te Atua ki a te au, ma ko au la e tū atu i kinei ke kavatu taku molimau ki tagata uma, ki nā tino e he tāua ma nā tino e tāua. Ko te mea e lea ai au ko te mea foki lava tēnā e tahi na lea ia Mohe ma te kau pelofeta, e taunuku: 23#Iha 42.6; 49.6; 1 Kol 15.20ko te Mehia e tatau lava ke oti, ma ke kavea ia ko te tino muamua ia e toe tū mai te oti, ke fakailoa e ia te mālamalama o te fakaolataga ki tagata Iutaia ma tagata nukukehe.”

24Ka koi tali vēnei atu ia Paulo ki ona mōliga, kae kalaga mai ki ei ia Fehetone, “Paulo, ko tō māfaufau ko kua hē lelei! Ko te lahi o au hukehukega kua hē lelei ai tō māfaufau!”

25Kae kua tali atu ia Paulo, “Tau Afioga Fehetone, ko toku māfaufau e lelei lava! Ko au e tautala hako atu lava i te meamoni. 26Akalipa te Tupu! E mafai au ke tautala vēnei atu ki a te koe auā kua iloa e koe nā mea iēnei. E mautinoa e au kua mātau e koe nā mea takitahi uma iēnei, auā ko te mea tēnei e hēki tupu i he mea pōuli. 27Akalipa te Tupu, e talitonu koe ki te kau pelofeta? E iloa e au ko koe e talitonu!”

28Kua lea atu ia Akalipa ki a Paulo, “I te taimi pukupuku tēnei e manatu koe e kē mafaia oi liliu au ke kavea ma Kelihiano?”

29Kua tali atu ia Paulo, “Pe pukupuku te taimi pe loa, ko taku tatalo ki te Atua, ko koe ma koutou uma iēnā e fakalogologo mai ki a te au i te aho nei, ke kavea ke vē ko au — kae vāganā ai la, ko au e hē fofou ko koutou ke noanoa i ni filifili!”

30Oi tutū ai ki luga te tupu, te kōvana, ko Pelenike, ma iētahi tino uma lele, 31ma i te olo kehega na lea vē ai tētahi ki tētahi, “Ko te tino tēnei e hēai hana mea na fai e tatau ai ke tāmate, pe falepuipui.” 32Oi lea vē atu ai ia Akalipa ki a Fehetone, “Anei ake e hēki fakatagi te tagata tēnei ke fai tona fakamahinoga e Kaihala, moinei ake kua tatala fakahaoloto.”

Currently Selected:

Gāluega 26: TNT

Highlight

Copy