Gāluega 20

Kua toe Āhiāhi ia Paulo ki Maketonia ma Akaia

1Kua māona atu te vevehitū, oi fakapotopoto ai e Paulo te kau Kelihiano, ma ina kua uma te ia kavatua ki ei o ni kupu fakamākeke, oi fakamāvae atu ai ki a te ki lātou, ma malaga ai loa ki Maketonia. 2Na kui atu ia i nā kogāfenua iēnā ma fakamālohi ki te kau Kelihiano. Kua pa atu ia ki te atunuku ko Eleni, 3oi nofo ai i kinā i ni māhina e tolu. Kua hāuni ia Paulo e malaga i he vaka ki Hulia, kae ia maua te fakamatalaga ko ia e lama e ni tino Iutaia; oi fai ai tana tonu ke toe liliu oi kui atu i loto o Maketonia i tona auala ki Ieluhalema. 4Ko Hōpato te ataliki o Pulo, mai Peloia, na olo ma Paulo; na vēnā foki ia Alihitako ma Hekounato mai Tehalonika; ko Kaio mai Tepene; ko Tuhiko ma Tolofimo mai te itūmālō o Ahia; ma Timoteo. 5Na olo muamua oi fakatali mai ai ki a te ki mātou i Tolōata 6Na folau atu ki mātou mai Filipi i te umaga o te Fakamanatuga o te Falaoa Hē Fakafefetea, ma ina kua teka nā aho e lima, oi fetaui ai ki mātou i Tolōata, ma nonofo ai ki mātou i kinā i he vaiaho.

Ko te toe Malaga a Paulo ki Tolōata

7I te afiafipō o te Aho Tonai, na maopoopo ai ki mātou mo te kaiga fakatahi a te kau Kelihiano. Na tautala ia Paulo ki tagata ma na talatalanoa ai lava ki ei ke pa lava ki te tūlua o pō, ona ko te aho alafaki e tuku e fano kehe ai. 8E lahi nā lāmepa nae mumū i te falealuga i te mea nae fai ai te mātou fonotaga. 9Nae i ei he taumalo e igoa ki a Eutuko nae nofo i te famalama, ma e fai lava la te tautalaga a Paulo, ka kua kāmata oi tulemoe ma na iku lava na moe. Oi pakū ifo ai mai te fogāfale tolu ki te kelekele, ma e hiki ake e ki lātou kua oti. 10Kae kua fanaifo ia Paulo ki lalo, kua fakapakū ki luga o te taumalo ma ōpoipoi mai ma lea vē atu ai, “Koutou nahe popole, ko te taumalo koi ola!” 11Oi toe fano ai ki te falealuga, kua tavaevae e ia te falaoa ma kakai fakatahi ma te kau Kelihiano. Ina kua uma te tautala o Paulo ki a te ki lātou mo he taimi mataloa, ma na pa lava ki te hopo ake o te la, oi tuku ai e ia ki lātou kae fano kehe. 12Na kave ai loa e ki lātou te taumalo ki tona kāiga kua ola, ma na fai tēnei ma mea na matuā fakamāfanafanagia lele ai o lātou loto.

Kua Malaga atu ia Paulo mai Tolōata ki Mileto

13Na muamua ki mātou ki te mea e i ei te vaka ma tukuvaka loa lava ki Ahono, te mea e tuku e fakahopo ifo ai ia Paulo ki luga o te vaka. Na lea mai ki a te ki mātou ke fakahopo ifo ia i kinā, auā ko ia e kui gāuta atu. 14Ma i te fetauiga o ki mātou ma Paulo i Ahono, oi fakahopo ifo ai e ki mātou ki luga o te vaka, ma na fakaauau ai te mātou malaga ki Mitulene. 15Na malaga atu ki mātou mai kinā ma taunuku ki gātai o Hiou i te aho alafaki. I te aho na hohoko ai na pa ai ki mātou ki Hamona, ma i te aho alafaki oi taunuku ai ki mātou ki Mileto. 16Na fai ai te tonu e Paulo ke fakaauau pea te folauga ke teka ia Efeho, kae ke nahe fakafanoa ho mātou taimi i te itūmālō o Ahia. Nae ta fakavave lele ke pa ia ki Ieluhalema i te aho o te Penitekoho, pe kāfai e mafai.

Ko te Lāuga Fakamāvae a Paulo ki nā Toeaina o Efeho

17I to mātou taunuku atuga ki Mileto, oi uga ai e Paulo he tino ma he faifekau ki nā toeaina o te Ekalehia i Efeho, ko ia e fia feiloaki ma ki lātou kāfai ia e taunuku ake. 18Ma i to mātou taunuku atuga, oi lea atu ai ia Paulo ki a te ki lātou, “E iloa e koutou nā mea nae fakafano ki ei toku taimi i nā aho uma nae māfuta ai au ma koutou, mai te aho muamua lava na pa mai ai au ki te itūmālō o Ahia. 19Ko au he kaukauna e a te Aliki nae galue ma te lotomaulalo vēnā ma te lahi o te loimata maligi, i nā taimi faigatā na pa mai ki a te au, ona ko nā taupulepulega a ni tino Iutaia. 20E iloa e koutou e hēki kō tāofiagia lele he mea e fokotahi e aogā ki a te koutou, i aku akoakoga nae fai i mua tagata ma loto o outou kāiga. 21Na lapataki mālohi au ki nā tino Iutaia vēnā ma nā tino nukukehe, ke halamō ia lātou agahala ma liliu ki te Atua, ma ke talitonu ki to tātou Aliki ko Iehu. 22Ma i te taimi nei, ko au ka fano ki Ieluhalema e vē ona fakatonugia ai au e te Agaga Paia, e aunoa ma te kō iloa pe ko he ā te ka tupu ki a te au i kinā. 23Oioti lava te mea e kō iloa, kua uma te lapataki mai o te Agaga Paia ki a te au, ko te falepuipui ma puapuagā e fakatalitali mai ki a te au i nā kakai uma e pa au ki ei. 24#2 Tim 4.7Kae ko toku ola e hē tāua ia te au; oioti lava te mea e fofou au ki ei, ke fakataunuku te mea na tōfia ai au ma fakauma te gāluega na fōki mai e te Aliki ko Iehu ki a te au ke fai, ko te tālakiga tēnā o te Tala Lelei e uiga ki te alofa tūnoa o te Atua.

25“Kua uma toku pa atu ki a te koutou uma ma folafola atu e uiga ki te Mālō o te Atua, ma e iloa e au e hēai lele he tino o koutou ka toe kikila mai ki a te au. 26Ko te mea ia e takutino atu ai e au ki a te koutou i te aho tēnei: kāfai lava he tino o koutou e pakū ki te malaia, e hē ko au te na māfua ai. 27Auā e hēki fakanofonofo lele au i te fakailoa atuga ki a te koutou, nā mea uma kua fuafua e te Atua ke fakataunuku. 28Ko te mea ia, koutou ke mataala ma kikila lelei te lafu māmoe kua tuku atu e te Agaga Paia ke kikila e koutou. Ke kavea koutou ma leoleomāmoe o te Ekalehia a te Atua,#20.28 Atua; ko iētahi tuhituhiga e lea mai Aliki. tēia kua ia kavea ke fai mo ia, e ala i te toto o tona Ataliki.#20.28 e ala i te toto o tona Ataliki; pe e ala i te mate o tona Ataliki ke fai ma tāulaga; pe e ala i tona lava toto. 29Kua uma te kō iloa kāfai au e fano kehe, ka ōmamai nā luko fēkakai ki a te koutou, ma ka hē ki lātou fakahaoa te lafu māmoe. 30E hau te taimi e fai ai e ni tino o koutou ni fakamatalaga pepelo ke takitaki kehe ai nā tino Kelihiano ma mulimuli ake ai ki a te ki lātou. 31Koutou la ke mataala, ma ke manatua te lahi o nā loimata na maligi i te pō ma te ao, i te tolu tauhaga nae kō akoakoa ai koutou uma tau tokatahi.

32“Ma i te taimi nei, e kō tuku atua koutou ki lima o te Atua, ma ki te fekau e uiga ki tona alofa tūnoa, e mafai ai ke tuputupu pea te koutou ola fakateagaga ma maua ai e koutou nā fakamanuiaga a te Atua mo ona tagata uma. 33E hēki kō manakomiagia ni hiliva, pe ni aulo, pe ni kofu mai he tino. 34E iloa lelei lava e koutou, ko oku lima lava iēnei nae galue ke maua ai nā mea uma nae manakomia e au ma oku hoa a kaukauna, ke ola ai ki mātou. 35Kua fakahino atu e au ki a te koutou i aku mea uma e fai, ko te galue mālohi e vē ona galue ai au, e mafai ai e ki tātou ke fehoahoani ki te tino faitauale, ma manatua ai nā kupu na vāgana ai te Aliki ko Iehu e vē, ‘E lahi atu te manuia o te tino e ia fōkia, i lo te tino e ia taliagia’ ”

36Ina kua uma te tautala vēnei atu o Paulo, oi tōtuli ai ki lalo fakatahi ma ki lātou uma, ma tatalo. 37Ma na faitatagi uma lele ma ōpoipoi e ki lātou ia Paulo, ma hogi fakamāvae ki ei. 38Na fakaatili to lātou fakanoanoa, ona na lea ki ei ia Paulo, e hē toe kikila ki lātou ki a te ia. Oi olo fakatahi ai ki lātou ma Paulo ki te vaka.

Currently Selected:

Gāluega 20: TNT

Highlight

Copy