2 Timoteo 2

He Fitafita Fakamāoni e a Keliho Iehu

1Ko koe la toku ataliki, ke fakamākeke e ala i te alofa tūnoa kua maua e ki tātou i te māfutaga ma Keliho Iehu, 2ma ko nā mea kua fakalogo koe e akoako e au i mua o tagata e tokalahi, ke vēnā foki oi tuku atu e koe ki ni tino fakamoemoegia, ke ki lātou akoako atua ki iētahi tino.

3Ko koe he fitafita fakamāoni e a Keliho Iehu, ke talia la e koe tō vāega o nā puapuagā. 4E hēai he fitafita e galue i ona tiute fakafitafita e fofou ke ia faia ni iētahi gāluega kehe, auā ko te mea e fakamuamua i tona māfaufau, ke fakafiafia tona pule i ana gāluega. 5Ko he tino e vili i he tūkuga e hē mafai ke maua hona togi vaganā e uhitaki ki nā tūlāfono. 6Ko te faifatoaga na galue mālohi te tatau ke maua muamua tona vāega o te helehelega. 7Māfaufau ki nā mea e lea atu ai au, auā ka fehoahoani te Aliki ke fakamālamalama atu ki a te koe nā mea uma iēnei.

8Ke manatua ko Iehu Keliho, tē na toe fakatū mai i te oti, na tupuga mai ia Tavita e vē ona akoakogia e te Tala Lelei e kō tālakia. 9Ona e kō tālakia te Tala Lelei, kua maua ai au i nā puapuagā, ma noanoa i nā filifili ukamea e vē he tino holi tūlāfono. Kae ko te kupu a te Atua e hē noanoagia i ni filifili ukamea. 10Ma ko au e onohai i nā mea uma iēnei mo te lelei o nā tino kua filifilia e te Atua, kae ke mafai ai foki ke ki lātou maua te fakaolataga e ala ia Keliho Iehu ma maua ai nā vīkiga e fakavavau. 11Ko te fakakupuga tēnei e moni:

“Kāfai ki tātou kua oti fakatahi ma ia,

ko ki tātou foki ka ola fakatahi ma ia.

12 # Mat 10.33; Luk 12.9 Kāfai e tūmau pea to tātou onohai,

ka pule fakatahi foki ki tātou ma ia.

Kāfai e fakafiti ki tātou ia te ia,

ka fakafiti foki ia ia te ki tātou.

13Kāfai ki tātou e hē fakamāoni

e fakamāoni pea lava ia,

auā e hē mafai ia ke fakafiti e hē ia iloa ia ia lava.”

He Tino Faigāluega kua Taliagia Kātoatoa e te Atua

14Fakamanatu te mea tēnei ki a te ki lātou, ma lapataki mālohi ki ei i mua o te Atua, ke nahe ki lātou fai fīnauga ki te uiga o nā kupu. E hēai lele he mea lelei e maua ai, kae nā ko te āfāina lahi ai o nā tino e fakalogo ki ei. 15Taumafai ki mea e gata mai ai tō mafai ke talia kātoatoa koe i mua o te Atua, e vē he tino faigāluega e hē mā i tana gāluega, ma e akoako hako e ia te kupu moni a te Atua. 16Tau mamao ma nā talanoaga valea ma hēai he aogā, auā e nā ko te tuli kehe ai o tagata ke mamao ma te Atua. 17Ko nā akoakoga iēnā e vē ko he manuka kua papala kino. E toka lua ia tino kua ki lā akoakoa ni mea vēnei ko Humenaio ma Fileto. 18Kua olo kehe ki lāua ma te meamoni ma kua āfāina ai te talitonuga o iētahi, ona e lea vē ko te toetū ko he mea kua uma te fakatino. 19#Nūm 16.5Kae ko te fakavae mautū na fai e te Atua, e hē māluelue; ma e tuhi i luga nā kupu iēnei: “E iloa e te Aliki nā tino o ia” ma “Ko nā tino e lea ko ki lātou e a te Aliki, e tatau ke liliu kehe mai a lātou āmio hehē.”

20I he fale lahi, e i ei nā ipukai ma nā ipuloloto kehekehe: ko iētahi e gaohia i te hiliva ma te aulo, ko iētahi e gaohia i te lākau ma te ōmea; ko iētahi e fakaaogā mo nā mea fakapitoa, ko iētahi e mo nā mea māhani. 21Ko nā tino e ki lātou fakamamāgia ki lātou mai nā mea kino uma iēnā, ka fakaaogā ki lātou mo nā mea fakapitoa, auā kua uma te fakapaiagia o ki lātou ma e aogā mo to lātou Matai, ma kua hāuni ke fakaaogā ki ho he gāluega lelei. 22Tau mamao ma nā manatu fakataulealea, ma tauivi mo te āmiotonu, te fakamāoni, te alofa ma te fīlēmū, fakatahi ma ki lātou e tāpuaki atu ki te Atua ma te loto mamā. 23Tau mamao ma nā fīnauga valea ma hēai he uiga; e iloa e koe ko te ikuga o nā mea iēnei ko te tauaimiha. 24Ma ko te kaukauna a te Aliki e hē tatau ke fai fīnauga, kae e alofa ki ho he tino, ma ko he faiakoga lelei ma lava te onohai, 25e fakatonu mālie atu ki nā tino e fīnau mai. Ka ono tuku atu e te Atua ki a te ki lātou te avanoa ke halamō ai, ma ki lātou iloa ai te meamoni, 26ma ka mafai ki lātou ke hōhola kehe mai te māilei a te Tiāpolo, tē na ia pukea ki lātou ke mulimuli ake ki te mea e fofou ia ki ei.

Currently Selected:

2 Timoteo 2: TNT

Highlight

Copy