1 Timoteo 6
6
1Ko nā pologa e tatau ke ki lātou iloa ko he mea e tatau ke fakaaloalo ki lātou ki o lātou matai, kae ke nahe takukinoa ai te igoa o te Atua ma nā akoakoga a ki mātou. 2Ko nā pologa ni Kelihiano o lātou matai, e hē tatau ke feita ki o lātou matai ona ko ki lātou uma ni uho a Kelihiano. Kae e tatau ke hili atu ona lelei te lātou tautua, ona ko nā tino e manuia ia lātou gāluega, ko nā uho a Kelihiano foki lava e alolofa ki lātou ki ei.
Ko nā Akoakoga Pepelo ma nā Koloa Moni
E tatau ke akoako ma fakamālohia e koe nā tiute iēnei. 3Ko ai lava e ia akoakoa he talitonuga e kehe mai i nā kupu moni a to tātou Aliki ko Iehu Keliho ma nā akoakoga a te tātou talitonuga faka-Kelihiano, 4kua fefete i te fāfia kae e hē ia iloa he mea e fokotahi. E fiafia oi fakavevehi ma fai fīnauga ki te uiga o nā kupu, ma fakatupu ai te lotokino, te tauaimiha, te tau fakakino, te māhalohalo kino, 5ma te tauaikupu o nā tino kua hē lelei nā māfaufau, ma kua hē toe ia te ki lātou te meamoni. Ko nā tino iēnei e vēakē ko nā mea tau tāpuakiga e maua ai ni koloa e lahi.
6Io, ko nā mea tau tāpuakiga e maua ai e he tino nā koloa e lahi, pe kāfai e ia taliagia ma te fiafia nā mea a ia kua maua. 7Ni a te na ki tātou kaumaia ki te lalolagi? E hēai he mea! Ni a te ki tātou kave kehea mai te lalolagi? E hēai he mea! 8Ko te mea la ia, kāfai kua i ei ni a tātou meakai ma ni kofu, kua lava lele tēnā mo ki tātou. 9Kae ko nā tino e fofou ke lahi ni a lātou koloa, e maua ki lātou i nā fakaohoohoga ma lave i te māilei a nā tuinanauga valea e fakakino ai ki lātou, ma toho ai ki lalo ki te mea e fakatāugā ma fakaumatia ai ki lātou. 10Auā ko te mānumanu ki te tupe, ko te pogai ia o nā mea kino uma. Ko te mānumanu ki te tupe kua ala ai oi olo kehe iētahi tino mai to lātou talitonuga, ma kua tuia ai o lātou fatu i te lahi o mea tīgā.
Fakatonuga a Paulo mo Timoteo
11Kae e vē la ki a te ko koe, ko koe ko he hui e o te Atua. E tatau la koe ke kalo kehe ma nā mea uma iēnei, kae tauivi mo te āmiotonu, te fakatuatua, te fakamāoni, te alofa, te onohai, ma te agamalū. 12Vili mālohi i te tūkuga o te fakatuatua, ma ke maua e koe te fakailoga ko te ola e fakavavau; auā e mo te ōlaga tēnei na kalagagia ai koe e te Atua, i te faiga o te takutinoga o tō fakatuatua i mua o nā molimau e tokalahi. 13#Ioa 18.37I mua o te Atua, tē e ia fōkia te ola ki mea uma, ma i mua o Keliho Iehu, tē na takutino tona fakatuatua i mua o Ponitiō Pilato, ko au e lea vēnei atu 14ko koe ke uhitaki ki nā fakatonuga kua kavatu mo koe, ma tauhi ki ei ma te fakamāoni, ke pa ki te Aho e toe haele mai ai to tātou Aliki ko Iehu Keliho. 15Ko tona toe haele mai, ka fakatino lava i te taimi e tatau ai, e te Atua te Tupu e tokatahi e viviki ki ei ia tagata uma; ko ia ko te Tupu o tupu ma te Aliki o aliki. 16Nā ko ia lava te ola pea lava; e nofo ia i te mālamalama e pupula lahi e hē mafai ke kikila ki ei he tino, ma e hēai he tino na kua ia kitea, pe mafai foki ke ia kitea. Ke ia te ia te vīkiga ma te mana e fakavavau! Amene.
17Kae e vē la ki nā tino e mau koloa i nā mea o te ōlaga tēnei, fakatonu ki ei ke nahe ki lātou fia hihili, kae ke tuku to lātou fakamoemoe, e hē ki nā mea e hē mautinoa e vē ko nā koloa, kae ki te Atua tē e kaumaia nā mea e lahi ke fiafia ai ki tātou. 18Fakatonu ke fai e ki lātou nā mea e lelei, ke maukoloa ki lātou ia lātou gāluega lelei e fai, ma ke lima fōaki ma fehoahoani ki iētahi tino. 19I te faiga tēnei, ka fakaputu ai e ki lātou mo ki lātou ni koloa, e fai ma fakavae mautū mo te lumanaki. Ma ka maua ai e ki lātou te ola, ko te ola moni ia.
20Timoteo, tauhi lelei ki te mea kua fōki atu e te Atua ke kikila e koe. Ia koe nahe fakalogo ki nā tino e faia nā fakamatalaga valea ma hē mīgao, iē e lea iētahi tino ko te “poto.” 21Auā e i ei nā tino kua lea, ko ki lātou e popoto, ma kua fai tēnā ma mea e olo kehe ai mai to lātou talitonuga.
Ke ia te koutou uma te alofa tūnoa o te Atua.
Currently Selected:
1 Timoteo 6: TNT
Highlight
Share
Copy
Want to have your highlights saved across all your devices? Sign up or sign in
Tokelauan New Testament © Bible Society New Zealand, 2009.
