1 Timoteo 4

Nā Faiakoga Pepelo

1E manino lele te lea mai a te Agaga, e i ei nā tino ka olo kehe mai to lātou talitonuga faka-Kelihiano, i ni taimi mulimuli; ka uhitaki ki lātou ki nā agaga talapepelo, ma mulimuli ki akoakoga a nā tēmoni. 2Ko nā akoakoga vēnā e fakahalalau e nā tino talapepelo fakahehē, kua mamate o lātou lotofuatia, e vē na huhunu i he ukamea kakaha. 3E akoako e ki lātou ko te fakaipoipo ma te kakai ki ni itūkāigā meakai, e hē ni mea e tatau ke fai. Oi ka ko nā meakai uma iēnei na gaohia e te Atua ke kakai ki ei, kāfai kua uma he tatalo fakafetai, nā tino kua talitonu ma iloagia te meamoni. 4Ko nā mea uma lele na gaohia e te Atua e lelei; e hēai he mea e tiakia, kae ko nā mea uma lele e tatau ke talia ma he tatalo o te fakafetai, 5auā ko te kupu a te Atua ma te tatalo, e talia ai nā mea iēnei e te Atua.

He Kaukauna Lelei e a Keliho Iehu

6Kāfai e tuku atu e koe nā fakatonuga iēnei ki nā tino kua talitonu, ka kavea koe ma kaukauna lelei a Keliho Iehu. Ka fakaalia e koe ko koe kua matua i nā akoakoga e uiga ki to tātou talitonuga ma nā takitakiga kua mulimuli koe ki ei. 7Kae tau mamao ma nā tala fāgogo mai anamua, auā e hē paia ma hēai he aogā. Tokaga oi koleni ke maua e koe he ōlaga e fiafia ki ei te Atua. 8Ko te koleni fakamālohi tino e moni e aogā, kae ko te koleni fakateagaga e tāua atu ia i nā itū uma lele, auā e mautinoa ai te maua o te ola nei, ma i te lumanaki. 9Ko he fakakupuga tēnei e hako lelei lava, ma e tatau ke talia kātoatoa. 10Ko ki tātou e fītatā#4.10 fītatā; ko iētahi tuhituhiga e lea mai inohia. auā ko ki tātou kua fakamoemoe tahi ki te Atua e ola pea, te Fakaola o tagata uma, kae maihe ki lātou kua talitonu.

11Fakatonu ma akoako ki ei nā mea iēnei. 12Nahe i ei he tino e fakatauemu atu ona ko koe e tamaiti, kae ke kavea koe ma fakatakitakiga ki nā tino kua talitonu, e ala i tau tautala, tau āmio, tō alofa, tō fakatuatua, ma tō mamā kātoatoa. 13Ka ko hēki fanatu au, ke mautinoa e faitau e koe nā Tuhituhiga Paia ki tagata, ma lāuga ma akoako atu ki a te ki lātou. 14Fakaaogā te meaalofa fakateagaga kua ia te koe, na tuku atu e ala i nā kupu a te kau pelofeta, ma i te fakaeke atuga o nā lima o te kau toeaina ki ō luga. 15Fai nā tiute iēnei o koe ma te fakamāoni, kae ke kitea e tagata uma te tuputupu o koe, i te ōlaga faka-Kelihiano. 16Kikila lelei tau āmio ma te faiga o au akoakoga. Fakamālohi oi fai nā mea kua fakatonu atu ai koe e au. Kāfai e fai e koe nā mea iēnei, ka fakaolagia koe e te Atua vēnā ma nā tino e fakalogo atu ki a te koe, e ala i au gāluega.

Currently Selected:

1 Timoteo 4: TNT

Highlight

Copy