1 Timoteo 1

1Mai ia Paulo, he apohitolo a Keliho Iehu na fakatonugia e te Atua to tātou Fakaola ma Keliho Iehu to tātou fakamoemoe —

2 # Gāl 16.1 Ki a Timoteo, toku ataliki moni i te talitonuga faka-Kelihiano:

Ke ia te koe te alofa tūnoa, te agalelei ma te fīlēmū mai te Atua te Tamana ma Keliho Iehu to tātou Aliki.

Lapatakiga e uiga ki nā Akoakoga Pepelo

3Ko au e fofou ko koe ke nofo i Efeho, e vē lava oi lea atu ai au ki a te koe ka koi faimalaga atu au ki Maketonia. E i ei nā tino i Efeho e akoako e ki lātou ni matākupu hehē, ma e tatau ke fakatonu e koe nā tino iēnei ke tuku loa te lātou mea tēnei e fai. 4Fakatonu ki ei ke tīaki a lātou tala fāgogo mai te vavau, ma nā gafa loloa o nā tupuna o ki lātou. Ko nā mea iēnā e tutupu ai nā fīnauga, ma e hē fehoahoani ki te fakatinoga o fuafuaga a te Atua, iēia e fātoā iloa oi oti kāfai te tino e talitonu ki a Keliho. 5Ko te ala o te fakatonuga tēnei kae ke tupu ake ai te alofa e hau mai te loto mamā, te lotofuatia lelei ma te fakatuatua moni. 6Kua i ei nā tino kua liliu kehe mai nā mea iēnei, ma kua nunumi o lātou māfaufau i nā talatalanoaga ki nā mea e hēai he uiga. 7E fofou ke kavea ki lātou ma faiakoga o te tūlāfono a te Atua, kae e hē mālamalama ki lātou i nā kupu pe ko nā matākupu e tautatala agai ki ei ma to lātou mautinoa.

8E iloa e ki tātou ko te Tūlāfono e lelei lava pe kāfai e fakaaogā i te auala tatau. 9E tatau lava ke manatua, ko nā tūlāfono e hē faia mo nā tino e lelei, kae e fai mo nā tino holi tūlāfono ma hē uhitaki, nā tino agahala ma hē talitonu ki te Atua, nā tino e hē tāpuaki ki te Atua ma fakakinoa tona igoa, nā tino e ki lātou tāmatea o lātou tamana pe ko nā mātua, nā tino tāmate tino, 10nā tino fai āmio mātagā, nā tamāloa e nanau ki nā tino o iētahi tamāloa, nā tino e pukea fakamālohi iētahi tino, nā tino tala pepelo ma molimau pepelo, pe faia foki ho he mea e teteke ki ei nā akoakoga moni faka-Kelihiano, 11e tuha ai ma te tala lelei gali a te Atua tē e viviki ki ei ia tagata, kua tuku mai ke folafola e au.

Agaga Fakafetai ona ko te Agalelei o te Atua

12Ko au e fakafetai ki a Keliho Iehu to tātou Aliki, tē kua ia fōki maia te mālohi ke galue ai au. Ko au e fakafetai ona e ia kiteagia toku fakamāoni ma ia tōfia ai au ke galue mo ia, 13#Gāl 8.3; 9.4-5e ui lava e i ei he taimi kua teka atu nae fāifāi ai au ki tona igoa ma fakahāuā ma fakamātagā ki a te ia. Kae ko te Aliki na alofa fakahao mai ki a te au, ona nae hē kō iloa aku mea nae fai, auā ko hēki talitonu ai au ki a te ia i te taimi tēnā. 14Na fakatumulia au i te alofa tūnoa o to tātou Aliki ma ia fōki maia ki a te au te fakatuatua ma te alofa, e ala i te māfutaga ma Keliho Iehu. 15Ko he fakakupuga tēnei e hako, ma e tatau ke talia kātoatoa ma talitonu ki ei: Ko Keliho Iehu na haele mai ki te lalolagi ke fakaola nā tino agahala. Ma ko au te tino agahala e hili atu te kino, 16kae ko te Atua na alofa fakahao mai ki a te au, kae ke mafai ai ia Keliho Iehu ke fakaalia te kātoatoa o tona onohai ki a te au, te tino agahala e hili atu te kino, ke fai ma fakatakitakiga ki nā tino e talitonu ki a te ia i he taimi mulimuli, ma maua ai e ki lātou te ola e fakavavau. 17Ke i te Tupu o te fakavavau, tē e ola pea lava ma hē kitea e he tino, te Atua e tokatahi lava — te mamalu ma te vīkiga, ke pa ki te fakavavau lava! Amene.

18Timoteo, toku ataliki, e tuku atu e au te fakatonuga tēnei ki a te koe, e tuha ai ma nā kupu o te vāloaga i nā aho kua teka e uiga ki a te koe. Fakaaogā nā kupu iēnā ma meatau, ke tau ai te taua lelei, 19ma tāofi mau ki te fakatuatua ma te lotofuatia e mamā. Ko iētahi tino kua hē fakalogo ki o lātou lotofuatia, ma kua fakahēaogā ai e ki lātou to lātou fakatuatua. 20Ko iētahi o ki lātou iēnei e i ei ai ia Himenaio ma Alehana. Kua uma te kō tuku atua o te toka lua tēnei ke pule ai ia Hātani, kae ke fai ma akoakoga ki a te ki lāua ke nahe toe fāifāi ki te Atua.

Currently Selected:

1 Timoteo 1: TNT

Highlight

Copy