Mărko 13

Munilēdū Ahô̆gèlè

(Mattĕo 24.1,2; Lŭka 21.5,6)

1B́ĕ Jezŭ hèhta Zarādo akhlŏ akhî, Zo bōhmubicè aklè̆ dèbwè d́ò Cè, “Sara, tcabò̄ lo tòcò nu, adozî̄, hidophădo tòcò nu amòkò̆ pwedè̄ lò.”

2Jezŭ d́òge cè, “Na tcahtî tèpwè hidophădo tòcò nu ā? Lo htè bija d́ò̆lă akho gŏ amè̆ nu, kè̄ b́è htîladē lŏkò̆. Atò òb́èbe allele to d́ŏ ńò.”

Dèbadèsè̆ kî Dèlômèssègnè̆

(Mattĕo 24.3-14; Lŭka 21.7-19)

3Kîd́ò̆ b́ĕ Za sańălăò Òlĭvo khòlò̆kho aganawè̄ Zarādo akhî nu, Petru, Zăkomo, Zowănnī kî Andrĕa ńò̆ńò d́è̆huzògè Cè, 4“D́ò̆sabò̄ wa dè ajo tòcò gî̄ phî̆hta htôdè̄? Kî agî̄ phî̆hta b́ôhtîgè nu, ahô̆agèlè gî̄ ḿîgè danè̄ nu.”

5Jezŭ d́ò̆sagè cè tòcò gōjo, “Sòiwāibò̄ thĭ ne cab́ô̆htè bija dò hlòniplèni thĭ dèbwè̆ ńò nu. 6D́ŏ ji mi abu, bija dèbwè kò d́òkò̆, ‘Jî ḿî Mèssĭah,’ kî zò hlòniplèni thĭ. 7Barasă b́ĕ thĭ thîhè̆b́è dèd́odèphja dalā kî dalā awîakè̆ nu, thaphuthaganābò̄ ḿè. Manè̄, dè tòcò jo gî̄ phî̆htab́è barasă adu kŭdu mè hnî̆ńò. 8Manè̄, bija dikhwĭ kî dikhwĭ, htĭge dege kî dege gā htad́ĕd́òhlèkò̆ lōwa, ko d́o gā phja hlè lōwa, lākho gi jijā, dè gō bokò̆ dalā hwă dalā. Ge gi wīthô̆, dèthaẃilad́ò, dèmègomègè̄ kò̄ òhtakò̆. Dè tòcò jo ḿî dèothootha akăhtî kòlò̆.”

9“Kasèwāsèbò̄ thĭ ne. Bija tòcò gi cwilekò̆ thĭ d́ŏ dèladēplo abu. Thĭ kè̄ b́è de b́è bokò̆ d́ŏ Sinagŏgā bu, thĭ gò̄ sò̆htoòb́èkò̆ d́ŏ htĭge akhoane tòcò kî Sophrŏsaphra tòcò ahlò̆mò̄ agā kha Ji nikhĭ thè̆thî nu. 10Barasă dukhlŭkî Munilēdū hnî̆ńò nu, kè̄ b́è d́ò̆sai ŭsukò̆ Vanzĕlō awîakè̆ d́ŏ bijakhwĭpho lŏcăcè nu. 11B́ĕ bija hè cwihmòi thĭ d́ŏ akè b́è dècirra akhî nu, thĭ kò d́òb́è danè̄ nu, b́èhjŏbò̄ ḿè. Manè̄, agī jî̄b́è nu, tè b́è thĭ ńò. Ḿî Spirito Tcahtĭ dòkhò̆. 12Thè̆buthè̆we dèzè̄ lò gā lahô̆lăhlèkò̆ lōwa. Aphoali gā htad́ĕd́ò hwă amo apa, zè gè̄ mèthĭmèhlè̆mè̄ hlèkò̆ lōwa. 13Jo kho Jè cè̆ lò, Bija gè̄ dèwè̄dèsè̆kò̆ thĭ ńò. Barasă bija akŏikhòi htô̆ agudugîdî̄ nu, gī nib́è dèhlô̆htage lò.

Jerŭsalèm Adèlamulapha

(Mattĕo 24.15-28; Lŭka 21.20-24)

14“Kîd́ò̆ b́ĕ thî gā tcahtî ‘Dèmèscisăthabo htè amòcîpôcîthŏ’ sò̆htoògè d́ŏ adò mò sò̆hto ò ale ńò nu, (bija apha cè dèbwè kî thîhè̆ d́ò̆è) bija aò d́ŏ Judĕage tòcò gè̄ cwèhlô̆hta d́ò̆è d́ŏ khò̆mukhòlò̆kho. 15Bija aò d́ŏ hikho tòcò gē de genī phî d́ò̆è dè dimĭ ńò. 16Bija aò d́ŏ khlòbu lèbu tòcò ge dègeb́a phîge d́ò̆è ascid́ŏkhlŏ ńò. 17Amihmu amuthèd́ŏ kî aphoòlathè̆ tòcò anikhĭ dèba d́ŏ dèba nu! 18Thèb́è̆htabò̄ cab́ô̆htè ajo tòcò gī dî phî̆htanibò̄ d́ŏ dèhòkhè̆ ńò nu. 19D́ŏ muni tòcò abu ḿî dèbadèsè̆ azî̄azô̄, htè hlĕ Kib́ĭcè b́òladè akăhtî kî htô̆ khŏnujo nu atò ògè taplă ńò, kî alekă tò òbegè ńò ńò. 20Kib́ĭcè dè mèpô̆phola muni tòcò nu ńò athŭtherĕ, bija agī nib́è dèhlô̆htage tò òb́è dèbwè̆ ńò. Barasă d́ō, d́ŏ zè bwè ab́èrôhta amūkă acè̆, ze mèpô̆pho htŏ munimuthè̆ tòcò nu.

21“B́eḿĕ bija dèbwèbwè kò̄ d́ò thĭ, ‘Tcabò̄, Krĭstu ò jo!’ ‘Krĭstu ò d́ŏnu!’ d́ō b́ubò̄ ḿè cè ḿè. 22Manè̄, Krĭstu athô̆blô kî Prò̆fèt aplè gò̄ pòhta kî gè̄ mèkò̆ dècòklîcòhjè̆ cab́ô̆htè zè gè̄ hèphròihŭbò̄ bija aklè nu, pwĕ acab́ô̆ ab́èrôhta tòcò hnò̆nu, sèphròb́è ale kò̄ ò nu. 23Mègōnu d́ō, kasèwāsèbò̄ thĭ ne; Jò d́ò̆sadòlò htŏ tèpwè thĭ.

Bija Apho Adèdole

(Mattĕo 24.29-31; Lŭka 21.25-28)

24“D́ŏ muni anu tòcò abu nu, dèothootha ahmŭara gā hwă nu,

Lumu gī khikò̆,

hlè̆ gî̄ dî hlî̆ be ńò;

25Sè tòcò gā ladē d́ŏ Mò̄kholè̄ kî Mò̄kho acô̆thèlè̆ gē gleglākò̆.

26“B́ĕnu bija Lākhopho tòcò gā tcahtîkò̆ Bija Apho dèbwè la d́ŏ dè̄tob́o aklè, dèphlŭdèthere kî dèdòdèthe abu. 27Ca gā b́ăhlôlekò̆ Mò̄khobwèzo tòcò kî zō jo ladēplokò̆ bija ab́èrôhta tòcò aò d́ò̆ Gīlli lwīkhòb́è, d́ŏ Mò̄kholè̄ lākho amòhtîkă òjîòzo nu.

Dèmèhlô̆ d́ŏ Thod́ohtĭmu Aò

(Mattĕo 24.32-35; Lŭka 21.29-33)

28“Dòniphînibò̄ thod́ohtĭmu ahô̆agèlè. B́ĕ amēaphă zewe d́ō ahlè htuhtad́è̆hta kî dòzehtagè nu, thĭ thîhè̆ tèpwè thathîkhè̆ b́ôhtî htŏ. 29Gōnu akhò̆pha b́ĕ thĭ tcahtîb́è dèmè ane gōjo tòcò nu, ab́ôhtîhtŏ pwĕ adowè̄htŏ khaglè̄htî nu. 30Jò d́ò̆sa thĭ adî̄ahma, Bija ajo dôzô dò phlòtôlô hnî̆ńò, dè ajo tòcò gē pĕhtazòhta ŭsu tèpwè. 31Mò̄kho kî lākho gè̄ hètôĺô nòthò̆ hnò̆nu, Je lē Jè hwè dè hèkè̆b́è ńò.

Muni Kî Akhî Bija Dî thîhè̆ ńò

(Mattĕo 24.36-44)

32“Barasă dè anu tòcò gî̄ phî̆hta amunimuthè̆ kî akhînare nu, bija dî thîhè̆ mè dèbwè ńò. Mò̄khobwèzo aò d́ŏ Mò̄kho ḿîwî, Phokhŏ ḿîwî di thîhè̆ ńò. Athîhè̆ ḿî htĕ Pa dèbwè lò. 33Kasèwāsèbò̄ thĭ ne. Dôi kî thèb́è̆htabò̄. Manè̄, amuahlè̆ kè̄ b́è htôdè̄ htôdè̄ nu thĭ di thîhè̆ ńò. 34Dè mè ane acab́ô̆ bija dèbwè bāladē ahi kî le d́ŏ htĭjîgejî nu, ila azôabwè tòcò dècô̆dèthèlè̆, dèbwè kî adèmè, dèbwè kî adèmè, d́ō hmèla bija adôi khaglè̄do dèbwè cab́ô̆htè zô gô̄ dôi lò. 35Mègōnu d́ō, dôibò̄. Manè̄, hib́icè gē ge htôdè̄ htôdè̄, lumula ā? Klăḿè̆lumu ā? B́ĕ scî̆ ôhta ā? B́ĕ lumusehta ā? Thĭ di thîhè̆ ńò. 36Tè b́è ńò d́ō, ze gedo thè̆lèthòlò̆, d́ō za gā tcahtîkò̆ thĭ sòmĭthebĕ. 37Dè d́ŏ Jò d́ò thĭ jo, Jò d́òkô bija lŏcăcè lò. Kasèwāsè dôibò̄!”

Currently Selected:

Mărko 13: GRNT21

Highlight

Copy