Mărko 12

Bija Akhwèi Thobiscimu Agèlè

(Mattĕo 21.33-46; Lŭka 20.9-19)

1Jezŭ d́ò̆sagè bija dègèlè, “Bija dèbwè mè thobiscige, ze we hwă htòwe zu khulagè asci i thobiscihtĭ abò, prahtagè dèdôi ale. Mèhwă d́ō, za hna bija amèhlè̆ dèkhwèi thobiscige tòcò, kî zè hègè d́ŏ bija d́ŏ htĭge aòjî nu. 2D́ŏ akhîb́è tapla, zo thodŏlegè zô zô dèbwè gē le phî aphò̆athè d́ŏ bija akhwèi thobiscige tòcò ò nu. 3Barasă cè tòcò phògè lōwa, de bo hwă cè d́ō hnage thèd́è̆gè cè. 4Zo thodŏle d́ò̆ zô zôpho alewe dèbwè. Barasă ajo dèbwè ḿî ḿî, ze hwĕ lōwa akoakò̆ kî lo, zè mèjūlakăkègè lōwa. 5Zo thodŏle alewe dèbwè be, d́ō ajo dèbwè zè mèthĭgè lōwa dòkhò̆. Zo thodŏle we bija alewe pwĕdimi be. Tòcò b́èdeb́èbo, tòcò cò b́è mèthĭkè̆gè. 6Zo phokhŏ htè cè b́èlò̄ òdawe dèbwè be d́ō, agudulă zo thodŏlegè lōwa kî cò dò, ‘Cè tòcò ka j́ab́è bò̄d́ò̆ jo phokhŏ mò̄!’ 7Barasă akhwèi thobiscige tòcò d́òhlè lōwa, ‘Ajo ḿî agī nib́è dèilani dèbwè nu, lĕ, gè mèthĭ cè Hwă d́ō, dèilani tòcò kî ḿî lŏkò̆ kè è̆ be lò.’ 8Mègōnu d́ō, zò phò hwă lōwa, zè mèthĭgè lōwa kî htîphlòḿĭgè lōwa d́ŏ thobiscige akhlŏ nu.

9“Mègōnu d́ō, thobiscige ab́icè gè̄ mèbò̄ cadè̄? Ze gē le kî mèkè̆mèhlè̆mè̄kò̆ akhwèi thobiscige dalā nu, kî ci kī ikò̆ thobiscige d́ŏ bija lewe tòcò nu. 10Thĭ da phab́ègè d́ŏ Cè Tcahtĭ abu ńò ā?

‘Lo htè aprahi tòcò htî phlòḿĭkè̆ dèmè̆ nu,

phî̆htagè hi akăd́ò̆.

11Kib́ĭcè mègè dè gōjo,

amòama tèpwè d́ŏ wa gādŭbu nu tè b́è ńò ā?’”

12Bija tòcò thaè pôscja tèpwè Jezŭ, barasă zi scisăni bija aboahò ale. Manè̄, cè tòcò thîhè̆ htè dègèlè ajo ḿî cè tòcò awîakè̆ acè̆ nu, zè lè̄ladakè̆ hwă Jezŭ kî zè sè phrulaphrî̆hta lō tèpwè.

Dèi Caĕsarè Adèhmŭ

(Mattĕo 22.15-22; Lŭka 20.20-26)

13Alekă bija tòcò thodŏle Pharizè̆pho tòcò kî Saphra Èrŏdè abija tòcò cab́ô̆htè zè gè̄ sèni Jezŭ dēkha d́ŏ zè dèjî̄b́è tòcò aklè̆ nu. 14Cè tòcò le kî d́ògè Jezŭ, “Sara, wa thîhè̆ tèpwè Nî ḿî adî̄ahma, kî Ni di scisă bija dèbwè̆ ńò, Na da tca bija amūkă dèbwè̆ ńò ńò. Nî dî phîdophîmu bija dèbwè̆nòńò. Ḿî Nò thôithò̆i Kib́ĭcè aklèathòò̆ d́ŏ dèdî̄dèhma abu lò. Kî i Caĕsarè dèhmŭ ḿî wè b́èi tèpwè ā? Wè tè b́èi ńò dòkhò̆ ā?”

15Jezŭ thîhè̆ zè dèlîḿakakwè̆ d́ō, cò d́ò lōwa, “Thĭ b́o ma Ja tha nè? I Jè pĭsa te denărio, d́ō Ja gā tca caḿa.”

16Ze lei pĭsa d́ō, Jezŭ dè̆gè cè, “Bò̄bwè ajò kî alleaklè bwè?”

Cò d́òge lōwa, “Caĕsarè è̆.”

17Jezŭ d́òscĭge cè tòcò, “Ila Caĕsarè gajă ab́èkja Caĕsarè nu, kî ila Kib́ĭcè gajă ab́èkja Kib́ĭcè nu.”

Cè tòcò htèdômô̄dahmă nigè Jezŭ ale azî̄azô̄ d́o.

Saducè̆pho kî Dèhtaboge

(Mattĕo 22.23-33; Lŭka 20.27-40)

18Saducè̆pho htè atu b́u dèhtaboge ńò tòcò lehtî Jezŭ, htôtcad́è̆tca, cò d́ò, 19“Sara, Mŏzè hwelanigè wa, cò d́ò, ‘Bija dèbwè athè̆buwe gi thĭ sò̆dopho b́eḿĕ d́ō, cè thè̆buwe gî̄ phîgeb́è ahmugèmè dèbwè nu. Cò kò̄ òib́è zè mè̄ akhwĭthèlè̆ lò.’ 20Athè̆buwe ò thăthô dèbwè. Adobwe dèbwè phî ahmè̆, zi thĭ sò̆dopho. 21D́ō cî ṕîkò̆ phîge zè hmè̆ kî thĭ sò̆dophogè gè. D́ō thŏbwè̆dèbwè ḿî ḿî mègè gōnu lò lò. 22D́ō athè̆buwe thăthô dèbwè phî amihmu dèbwè nu d́ō thĭ sò̆dopho lōgè. Akŭdulă amihmu ḿî ḿî thĭgè gè. 23Mègōnu d́ō, d́ŏ dèhtaboge amuni nu, cè tòcò gā htaboge tapla, amihmu dèbwè gî̄ ḿîkò̆ b́èlè̄ dèbwèbwè ahmè̆ bwè? Manè̄, amikhŏ thăthô dèbwè phîgè cè acab́ô̆ lōwa ahmè̆ nu.”

24Jezŭ d́òscĭ cè tòcò kî d́ò, “Thĭ kèḿè ḿîthè̆ ajo dèdè̆ akhoacè̆ nu, ḿî thĭ dî thîhè̆ ńò ā? Manè̄ d́ŏ thĭ dî thîhè̆gè Dèhwela Tcahtĭ ḿî̆dîḿî ńò Kib́ĭcè acô̆thèlè̆ ńò acè̆ nu. 25D́ŏ cè tòcò htaboge dèthĭ aklè nu, zi dî phîcu mè ńò. Zi ḿî acab́ô̆ Mò̄khobwèzo aò d́ŏ Mò̄kho nu lò. 26Ab́èkja athĭ tòcò adèhtaboge nu, thĭ da phab́è Mŏzè acèbu, b́ĕ zòzwi dobro aklè̆ nu, B́ĭcè d́ò cè, ‘Jè ḿî Abraham Ab́ĭcè, Izăko Ab́ĭcè kî Jăkòb Ab́ĭcè nu,’ ńò ā? 27Zi di ḿî athĭ tòcò ab́icè ńò, ḿî Aò tòcò Ab́ĭcè dòkhò̆. Mègōnu d́ō, thĭ kèḿè lōklikligè hŏ!”

Dèhmèla Adogudŭ

(Mattĕo 22.34-40; Lŭka 10.25-28)

28Skrĭbāpho aklè̆ dèbwè le d́ō thîhè̆b́è za la d́ò la sa hlè lōwa kî Jezŭ adèd́òscĭ cè tòcò ḿî htĕ ab́èabò lò akhoacè̆, cè d́è̆gè lōwa, “Dèhmèla lŏlōcăcè aklè̆ akokhwi ḿî b́èlè̄ dôhmô̆hmô̆?”

29Jezŭ d́òscĭge cè, “Dèhmèla lŏlōcăcè aklè̆, akokhwi ḿî, ‘Sòkhĕńebò̄, Ŏ Israè̆l akhwĭ. Wa B́ĭcè, ḿî B́ĭcè dèbwè lò.’ 30B́èlò̄bò̄ nî B́ĭcè d́ŏ no tholōthacă, ńa tha thèd́è̆mè̆, nè dèthîdèza kî nè dèkhodèă lŏcăcè. Ajo ḿî dèhmèla akokhwi akhahtî dôhmô̆ lò. 31Dèhmèla akokhwi gīhmô̆dôhmô̆ ḿî cab́ô̆ gōnu lò lò. ‘B́èlò̄ bija no zokhozawa, cab́ô̆ nè b́èlò̄lage ne ne nu.’ Dèhmèla alewesòsŭ adolĭ ajo tò ò be ńò.”

32Skrĭbāpho dèbwè nu d́òscĭge cè, “Ab́èzî̄ tèpwè hŏ, Sara. Ńò d́ò dèdî̄dèhma lò. Manè̄, B́ĭcè ò dèbwè lò. D́ŏ Cè ahlò̆mò̄ nu, B́ĭcè alewe tò ò mè ńò. 33Bija htè ab́èlò̄ Kib́ĭcè d́ŏ adèthîdèza lŏcăcè, d́ŏ athathèd́è̆mè̆, kî adèkhodèă lŏcăcè, kî ab́èlò̄ bija azokhozawa tòcò cab́ô̆ ab́èlò̄lage ane nu, è dolĭ dèhlusôb́ô̆ kî dèhluhtai alewe lŏcăcè nu.”

34Jezŭ thîhè̆ d́ŏ cò d́òscĭ lōwa d́ŏ dèblî̄dèbla abu acè̆ d́ō, Cò d́ò lōwa, “Nè jo ńò tò òjîkî Mò̄kho Ahtĭage ńò.”

Anu hwă alekă, bija dèbwè̆ tè d́è̆tca b́u be Cè ńò.

Dèd́è̆ Ab́èkja Krĭstu

(Mattĕo 22.41-46; Lŭka 20.41-44)

35B́ĕ Jezŭ thôgethò̆gedè d́ŏ Zarādo abu nu, Cò d́ò, “Skrĭbāpho tòcò d́ò è̆ d́ŏ Krĭstu ḿî Dăvid Aphokhŏ cadè̄? 36Dăvid anebî̆cè thè̆ne, d́ò d́ŏ Spirito Tcahtĭ abu, Cò d́ò;

‘Kib́ĭcè d́ò Jî B́ĭcè,

“Sańăò b́ĕ Ju cudèhtwè,

Htô̆ Jè bè̄la ne d́ĕd́ò tòcò d́ŏ Na khajāla nu.”’

37Mègōnu d́ō, Dăvid thè̆ne jo Cè ‘Ji B́ĭcè,’ akhoacè̆ d́ō, Zî gî̄ ḿî d́ò̆ lōwa aphokhŏ cadè̄?”

Jezŭ Adèithidĭ Ab́èkja Skrĭbāpho tòcò

(Mattĕo 23.1-36; Lŭka 20.45-47)

D́ō bija aboahò sòkhĕńe Jezŭ alē d́ŏ dèthalōthalai abu nu. 38D́ŏ Zè dèthôlathò̆la abu, Jezŭ d́ò, “Hèkô̆bò̄ Skrĭbāpho tòcò nu. Cè b́èlò̄ hèkô̆ithòi scid́ŏdò̄dô, b́ĕ dèbwîisè̆i alle nu, za thaèni bija gū hnŭsè cè kî d́ŏb́èj́ab́è cè. 39D́ŏ Sinagŏgā abu ḿîwî, d́ŏ scilāpwèbu ḿîwî, za thaè sańăò dèlle aègudŭ. 40Zî phîadūkè̆ ahmugèmè ahiaphă, Hwă d́ō, cab́ô̆htè zè dèkèḿè di lî̄htabò̄ ńò anikhĭ, cè thèb́è̆hta htô̆zî̄htô̆zô̄ tèpwègè. Cè tòcò gā khab́è dècirra asôd́okhlŏ lò.”

Ahmugèmè Akrelî

(Lŭka 21.1-4)

41Jezŭ sańălăògè d́ŏ dèhlu akre ahlò̆mò̄, tcagè bija b́è̆nī hô̆ d́ŏ kre nu nu. Bija ajèdā tòcò b́è̆nī òè tèpwè. 42B́ĕnu bija ahmugèmè assègnè̆ dèbwè b́è̆nī krelî gīb́è, htè aò jŭ da kwadra lò nu. 43Jezŭ jo ladēplo hwă Zo bōhmubicè tòcò, Cò d́ŏsagè lōwa, Cò d́ò, “Jò d́ò̆sa thĭ adî̄ahma, ahmugèmè assègnè̆ ajo dèbwè b́è̆nī dèhlu akre bu jo aòè d́olĭgè bija alewe lŏcăcè tòcò aè̆. 44Manè̄, bija tòcò b́è̆lă dèhlu d́ŏ zô hô̆dohtè̆do abu nu. Ḿî cè nu, cè b́è̆nī lōklikli d́ŏ zè dèssègnè̆ kî zè dè a i ò̆ i anikhĭ aklè̆ nu.”

Currently Selected:

Mărko 12: GRNT21

Highlight

Copy